ཨ་རིའི་ནང་ཡོད་པའི་ཝེ་ཐི་ནམ་གྱི་ཧོང་དྷའོ་ནང་པའི་དགོན་པའི་གོ་སྒྲིག་འོག་དགེ་འདུན་པ་ ༡༩ ཡིས་ཨ་ལོ་ཀ་ཞེས་པའི་རྒྱ་གར་གྱི་ཁྱི་ལྡོམ་ཞིག་འཁྲིད་དེ་ཨ་རིའི་ཊེག་སེ་སི་ནས་མངའ་སྡེ་བཅུ་ལྷག་བརྒྱུད་དེ་ཝ་ཤིང་ཊོན་བར་འཛམ་གླིང་ཞི་བདེའི་ཆེད་དུ་གོམ་བགྲོད་གནང་བཞིན་ཡོད་འདུག
ཨ་རིའི་མངའ་སྡེ་ཊེག་སེ་སི་ (Texas) ནང་རྟེན་གཞི་བྱས་པའི་ཝེ་ཐི་ནམ་གྱི་ཧོང་དྷའོ་ནང་པའི་དགོན་པ་ (Huong Dao Buddhist Temple) ཡི་གོ་སྒྲིག་འོག འཛམ་གླིང་ཞི་བདེའི་ཆེད་གོམ་བགྲོད་(Walk for Peace)ཞེས་པའི་ལས་འནང་པའི་དགེ་འདུན་པ་ ༡༩ ཡིས་ཨ་ལོ་ཀ་ (Aloka) ཟེར་བའི་ཁྱི་ཞིག་འཁྲིད་དེ་ཨ་རིའི་རྒྱལ་ས་ཝ་ཤིང་ཊོན་ཌི་སི་སོགས་སུ་ཐོན་ཡོད་པ་དང་། ད་ལྟའི་ཆར་ཨ་རིའི་ལྷོ་ཁེ་རོ་ལི་ན་ (South Carolina) མངའ་སྡེ་རུ་ཡོད་པའི་ལེ་སིང་ཊོན་ (Lexington) རྫོང་དང་། གྷིལ་བྷར་ཌི་ (Gilbert) གྲོང་སྡེ་རུ་འབྱོར་ཡོད་འདུག
འཛམ་གླིང་ཡུལ་ལུང་མང་པོའི་ནང་དམག་འཁྲུག་འབྱུང་བཞིན་ཡོད་པའི་སྐབས་འདིར། བྱམས་སྙིང་རྗེ་དང་། ཞི་བདེ་བཅས་གོང་འཕེལ་དུ་གཏོང་བར་དམིགས་པ་ཞིག་ཡིན་འདུག་ལ། ཐེངས་འདིའི་གོམ་བགྲོད་དང་འབྲེལ་བའི་ཞི་བདེའི་ཆེད་དུ་གོམ་བགྲོད་ཅེས་པའི་ངོ་དེབ་ནང་དུ། ང་ཚོ་གཅིག་པོ་གོམ་བགྲོད་བྱེད་ཀྱི་མེད། སེམས་ལ་ཞི་བདེ་དང་བྱམས་བརྩེ། ཉིན་རེའི་འཚོ་བའི་ཁྲོད་ཞི་བདེ་གོང་འཕེལ་གཏོང་མཁན་དང་མཉམ་དུ་གོམ་བགྲོད་བྱེད་ཀྱི་ཡོད། ཅེས་བརྗོད་འདུག་ལ། ཁོང་རྣམས་ལ་ཨ་རིའི་མི་མང་སྟོང་ཕྲག་མང་པོས་ལམ་བར་ནས་དགའ་བསུ་ཞུ་ཡི་ཡོད་འདུག་ལ། ལྷག་པར་དུ་ཨ་ལོ་ཀ་ཟེར་བའི་ཁྱིའི་བརྩེ་སེམས་སོགས་མཐོང་སྐབས་མི་རྣམས་ཀྱིས་དགའ་སྐྱོ་འདྲིས་མའི་མིག་ཆུ་ཤོར་བ་དང་། ཨ་ལོ་ཀ་ནི་འཛམ་གླིང་ཞི་བདེའི་གོམ་བགྲོད་ཀྱི་མཚོན་རྟགས་སམ་གླེང་གཞི་ཆེན་པོ་ཞིག་ཏུ་གྱུར་ཡོད་འདུག
སྟབས་མ་ལེགས་པ་ཞིག་ལ་འདས་ལོའི་ཕྱི་ཟླ་ ༡༡ ཚེས་ ༡༩ ཉིན་དགེ་འདུན་པ་རྣམས་ཊེག་སེ་སིའི་གྲོང་ཁྱེར་ཧའོ་སི་ཊོན་ (Houston) ནང་གོམ་བགྲོད་གནང་བཞིན་པའི་སྐབས་སུ། རླངས་འཁོར་གཉིས་གདོང་ཐུག་བྱུང་སྟེ་དགེ་འདུན་པ་གཉིས་ལ་རྨས་སྐྱོན་ཕོག་ཡོད་པ་མ་ཟད། དགེ་འདུན་པ་གཅིག་གི་རྐང་པ་གཏུབ་དགོས་བྱུང་སྟེ་ཟླ་གཅིག་རིང་སྨན་བཅོས་བྱས་ཏེ་ཕྱིར་དགོན་པར་ཕེབས་དགོས་བྱུང་། དོན་རྐྱེན་དེ་བྱུང་རྗེས་འཛམ་གླིང་ཞི་བདེའི་ཆེད་དུ་གོམ་བགྲོད་བྱེད་བཞིན་པའི་གནས་ཚུལ་རྒྱ་ཁྱབ་ཆེན་པོ་ཕྱིན་ཡོད་འདུག
ཞི་བདེའི་གོམ་བགྲོད་དེ་འདས་ལོའི་ཕྱི་ཟླ་ ༡༠ ཚེས་ ༢༦ ཉིན་ཊེག་སེ་སིའི་གྲོང་ཁྱེར་ཧྥོར་ཌི་ཝོར་ཐི་ (Fort Worth) ནས་མགོ་བརྩམས་ཡོད་པ་དང་། ཨ་རིའི་མངའ་སྡེ་བཅུ་བརྒྱུད་དེ་ཨ་རིའི་རྒྱལ་ས་ཝ་ཤིང་ཊོན་ཌི་སི་ (Washington DC) རུ་ཕེབས་ཀྱི་ཡོད་འདུག་ལ། འདི་ལོའི་ཕྱི་ཟླ་ ༢ པའི་ནང་ཝ་ཤིང་ཊོན་དུ་འབྱོར་རྩིས་ཡོད་འདུག
ཞི་བདེའི་ཆེད་དུ་གོམ་བགྲོད་ཅེས་པའི་ངོ་དེབ་དེར་རྗེས་འཇུག་པ་ ༨༠༠,༠༠༠ ལྷག་དང་། ཨ་ལོ་ཀ་ཟེར་བའི་ཁྱི་དེའི་ངོ་དེབ་ཁ་བྱང་ལ་རྗེས་འཇུག་པ་ ༤༥༠,༠༠༠ ལྷག་བྱུང་ཡོད་འདུག ཨ་ལོ་ཀ་ནི་རྒྱ་གར་ནས་འཁྲིད་ཡོང་བའི་ཁྱི་ལྡོམ་ཞིག་ཡིན་པ་དང་། འདས་པའི་ལོ་ངོ་བཞིའི་གོང་དུ་དགེ་འདུན་པ་ཁག་ཅིག་གིས་ཉིན་གྲངས་ ༡༠༠ ལྷག་རིང་རྒྱ་གར་ནང་འཛམ་གླིང་ཞི་བདེའི་ཆེད་དུ་གོམ་བགྲོད་གནང་སྐབས། ཨ་ལོ་ཀའང་གོམ་བགྲོད་དེའི་ནང་མཉམ་ཞུགས་བྱས་ཡོད་འདུག་ལ། ལམ་བར་དུ་ན་བ་དང་རླངས་འཁོར་གྱིས་བརྡུངས་བ་སོགས་དཀའ་ངལ་མང་པོ་འཕྲད་ཡོད་ཀྱང་། ཉེན་ཁ་ལས་ཐར་ཡོད་འདུག ཕྱིས་སུ་དགེ་འདུན་པ་དེ་དག་གིས་ཨ་ལོ་ཀ་ཨ་རིར་འཁྲིད་དེ་བདག་སྐྱོང་གནང་བཞིན་ཡོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
