འབྲས་སྤུངས་བླ་སྤྱི་ནས་ཟླ་འདིའི་ཕྱི་ཚེས་ ༢༠ ཉིན་ལས་ཐོག་དགེ་ལུགས་སྤྱི་འཐུས་གཉིས་ནས་འབྲས་སྤུངས་ཚོགས་ཆེན་དུ་༸རྒྱལ་བའི་བཞུགས་ཁྲི་རིན་པོ་ཆེའི་སྤྱན་སྔར་མཇལ་དར་སྒྲོན་འབུལ་དང༌། ལྷ་མོ་ཁང་དུ་སྔར་བྱས་ལ་འགྱོད་བཤགས་དང༌། ཕྱིན་ཆད་མི་བྱེད་པའི་ཁས་ལེན་དམ་བཅའ་གཙང་མ་འཇོག་དགོས་པའི་སྐུལ་མ་ཞུས་འདུག
ཟླ་འདིའི་ཕྱི་ཚེས་ ༩ ཉིན་དཔལ་ལྡན་འབྲས་དཀར་སྤུངས་པའི་བླ་སྤྱི་ནས་ལས་ཐོག་དགེ་ལུགས་སྤྱི་འཐུས་གཉིས་ལ་རེ་སྐུལ་ཞུ་ཡིག་ཅིག་ཕུལ་ཡོད་པ་ལྟར་ན། ཉེ་ལམ་དཔལ་ལྡན་འབྲས་སྤུངས་ཀྱི་ལྷ་མི་ཟུང་གིས་གནས་ཆུང་ཆོས་རྒྱལ་ཆེན་པོར་ཇི་ལྟར་གསོལ་འདེབས་ཞུས་པར་བཀའ་ལུང་ཕེབས་དོན་བཞིན། དགེ་ལུགས་སྤྱི་འཐུས་ཨ་ཀྲུག་ཚེ་བརྟན་ལགས་དང་གོ་བོ་ཕན་བདེ་ལགས་གཉིས་ཟླ་འདིའི་ཕྱི་ཚེས་ ༡༩ ཉིན་གདན་སར་འབྱོར་བ་བྱས་ཏེ། བོད་ཚེས་གཉིས་ཏེ་གནས་ཆུང་ཆོས་ རྒྱལ་ཆེན་པོའི་ལྷ་ཚེས་དགེ་བའི་ཉིན་ཞོགས་པའི་ལྷ་ཚེས་ཀྱི་སྐབས་དང་བསྟུན་ནས། ༸རྒྱལ་བའི་བཞུགས་ཁྲིར་མཇལ་དར་སྒྲོན་འབུལ་དང་འབྲས་སྤུངས་ལྷ་མོ་ཁང་དུ་གནས་ཆུང་ཆོས་རྒྱལ་ཆེན་པོས་བཀའ་ལུང་སྩལ་བའི་དགོངས་དོན་ལྟར་ཉེས་པ་ལ་ཉེས་བར་མཐོང་སྟེ། སྔར་བྱས་ལ་འགྱོད་བཤགས་དང་ཕྱིན་ཆད་མི་བྱེད་པའི་ཁས་ལེན་དམ་བཅའ་གཙང་མ་འཇོག་དགོས་པའི་འབོད་སྐུལ་ཞུས་འདུག་ལ། གལ་སྲིད་དེ་ལྟར་མ་བྱུང་ཚེ་དཔལ་ལྡན་འབྲས་སྤུངས་ངོས་ནས་སྤྱི་འཐུས་རྣམ་གཉིས་རི་བོ་དགེ་ལུགས་པའི་མགྲིན་ཚབ་ཏུ་ངོས་ལེན་ཞུ་ཐབས་མེད་པའི་ཞུ་ཡིག་བཏང་འདུག
དེ་འབྲེལ་འབྲས་སྤུངས་བླ་སྤྱིའི་ཐག་གཅོད་ཞུ་ཡིག་ནང་། དཔལ་ལྡན་འབྲས་དཀར་སྤུངས་པའི་ལྷ་མི་ཟུང་གིས་རིང་ནས་ཇི་ལྟར་གསོལ་འདེབས་ཞུས་དོན་ལྟར། ཕྱི་ལོ་ ༢༠༢༥ ལོའི་ཟླ་ ༡༢ ཚེས་ ༢༤ ཉིན་སྤྱི་ནོར་ྋགོང་ས་ྋསྐྱབས་མགོན་རྒྱལ་བའི་དབང་པོ་མཆོག་དཔལ་ལྡན་འབྲས་དཀར་སྤུངས་པར་༧རྗེ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་ཆེན་པོའི་གསེར་ཁྲིར་མངའ་གསོལ་མཛད་དེ་རྟེན་འབྲེལ་ལེགས་ཚོགས་ཀྱི་སྒོ་བརྒྱ་ཡངས་པོར་ཕྱེས། ཕྱི་ཚེས་ ༢༧ ཉིན་དཔལ་ལྡན་འབྲས་དཀར་སྤུངས་པ་དང་༸རྒྱལ་དབང་སྐུ་ཕྲེང་རིམ་བྱོན་བར་ཐུན་མིན་དམ་ཟབ་ཀྱི་འབྲེལ་བར་བརྟེན། དུས་ཚིགས་ཁྱད་པར་ཅན་འདིར་གདན་ས་འདིའི་ངོས་ནས་བསྒྲུབ་དགོས་ཀྱི་བཀའ་ལུང་ཅི་ཡོད་ཐད། སྤྱིར་གཞུང་རྟེན་དགྲ་ལྷའི་གཙོ་བོ། སྒོས་རྗེ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་ཆེན་པོས་བཀའ་ བསྒོས་གཉེར་གཏད་མཛད་པའི་ངེད་འབྲས་སྤུངས་པའི་ཐུན་མོང་མ་ཡིན་པའི་བཀའ་སྲུང་གནས་ཆུང་ཆོས་ རྒྱལ་ཆེན་པོ་སྤྱན་འདྲེན་ཞུས་པར།
རྡོ་རྗེའི་བཀའ་ལུང་དུ་དཔལ་ལྡན་འབྲས་དཀར་སྤུངས་པའི་མཁན་བླ་འདུས་སྡེ་སྤྱི་ནས་ངོས་ཀྱི་སློབ་དཔོན་མཐོང་བ་དོན་ལྡན་མཆོག་ལ་སྐུ་ཚེ་ཞབས་པད་བརྟན་ཕྱིར་བརྟན་བཞུགས་ཟབ་མོ་ལེགས་པར་བགྱིས་པ་འདི་ནི་ཤིན་ཏུ་ལེགས་ལ། འོན་ཀྱང་ཕྱི་ཡི་རིམ་གྲོ་བསྒྲུབས་དང་སྒྲུབ་བཞིན་ནའང་ནང་དུ་དམ་ཚིག་མི་གཙང་བའི་འགལ་རྐྱེན་ཡོད་ཙ་ན། རང་ཅག་རི་བོ་དགེ་ལུགས་པའི་མགྲིན་ཚབ་མིང་ཅན་རེ་པ་གཉིས་ནས་འབྱུང་པོས་རྒྱུད་བསྐུལ་ཏེ་ངག་བློ་ཐལ་ཏེ་གང་བྱུང་བྱ་ངན་དང༌། ངོས་ཀྱི་སློབ་དཔོན་མཐོང་བ་དོན་ལྡན་མཆོག་ལ་མཚན་སྨད་ཞུ་བ་དང༌། ཁ་བའི་ལྗོངས་ཀྱི་སྤྱི་དོན་བོར་ཏེ་ཆོལ་ཁ་ཆོས་ལུགས་འཐེན་འཁྱེར་བགྱིད་པ་འདི་ནི་སྐྱེ་བོ་ཀུན་གྱི་མིག་གིས་མཐོང་བ་དེ་ཡིན་ལ། དེས་མཚོན་པས་དགྲ་བཅོམ་འཕགས་པའི་དགེ་འདུན་རྣམས་ལ་ཡང་མཚན་སྨད་ཞུ་བའི་དུས་ལ་བབས་པས་ན་འགན་འཁུར་བ་རྣམ་པས་མཚམས་འཇོག་ལེགས་པར་བགྱིད་ན་ལེགས་སོ། ཞེས་གསལ་རྗེན་དུ་སྩལ་འདུག་པའི་དགོངས་དོན་གྲོས་བསྡུར་གྱིས་ཐག་གཅོད་བྱུང་དོན་ནི། སྤྱི་འཐུས་ཨ་ཀྲུག་ཚེ་བརྟན་དང་སྤྱི་འཐུས་གོ་བོ་བློ་བཟང་ཕན་བདེ་ཁྱེད་གཉིས། ཕྱི་ ལོ་ ༢༠༢༦ ལོའི་ཟླ་ ༡ ཚེས་ ༡༩ དང༌། བོད་ ཟླ་ ༡༢ ཚེས་ ༡ ནང་ཚུན་ལ་ངེས་པར་གྲྭ་སར་འབྱོར་བ་བྱས་ཏེ། བོད་ཚེས་གཉིས་ཏེ་གནས་ཆུང་ཆོས་རྒྱལ་ཆེན་པོའི་ལྷ་ཚེས་དགེ་བའི་ཉིན་ཞོགས་པའི་ལྷ་ཚེས་ཀྱི་སྐབས་དང་བསྟུན་ནས། འབྲས་སྤུངས་ཚོགས་ཆེན་དུ་༸རྒྱལ་བའི་བཞུགས་ཁྲི་རིན་པོ་ཆེའི་སྤྱན་སྔར་མཇལ་དར་སྒྲོན་འབུལ་དང༌། འབྲས་སྤུངས་ལྷ་མོ་ཁང་དུ་གནས་ཆུང་ཆོས་རྒྱལ་ཆེན་པོས་བཀའ་ལུང་སྩལ་བའི་དགོངས་དོན་ལྟར་ཉེས་པ་ལ་ཉེས་བར་མཐོང་སྟེ། སྔར་བྱས་ལ་འགྱོད་བཤགས་དང༌། ཕྱིན་ཆད་མི་བྱེད་པའི་ཁས་ལེན་དམ་བཅའ་གཙང་མ་འཇོག་དགོས་པའི་སྐུལ་མ་བྱེད་བཞིན་ཡོད། གལ་ཏེ་དེ་ལྟར་མ་བྱུང་ཚེ་དཔལ་ལྡན་འབྲས་དཀར་སྤུངས་པའི་ངོས་ནས་རི་བོ་དགེ་ལུགས་པའི་མགྲིན་ཚབ་ཏུ་ངོས་ལེན་ཞུ་ཐབས་མེད། གྲྭ་ཚང་གཉིས་ནས་ཀྱང་ཐག་གཅོད་ནན་པོ་གནང་རྒྱུའི་ཐག་གཅོད་བྱུང་ཡོད། ལར་ནས་དམ་ཚིག་མི་གཙང་བའི་འགལ་རྐྱེན་འདི་སེལ་དགོས་དོན་ཡང་། གནས་ཆུང་ཆོས་རྒྱལ་ཆེན་པོའི་བཀའ་ལུང་དགོངས་དོན་དང་ཡོངས་སུ་མཐུན་པར། ཆོལ་གསུམ་ཆིག་སྒྲིལ་གྱི་སྤྱི་དོན་ནུས་པ་ཉམས་དམས་དང༌། དཔལ་ལྡན་འབྲས་དཀར་སྤུངས་བས་མཚོན་ཕྱོགས་བཅུའི་དགེ་འདུན་གྱི་སྡེར་ངན་སྨྲས་ཀྱི་ལས་ངན་གསོག་པ་དང་། ཁྱད་པར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ལའང་གཅིག་ཏུ་གནོད་པའི་ལས་སུ་འགྱུར་བར་ངེས་པས་ན། གནད་དོན་འདི་རང་དགར་འཇོག་ག་ལ་བཟོད། དེར་བརྟེན་གོང་སྨོས་ཀྱི་ཐབས་ལམ་འདི་བཙལ་བ་ལགས་ན། ལས་དོན་འདིའི་ཐད་གྲྭ་ཚང་ཤར་ནུབ་གཉིས་ནས་ཀྱང་འགན་འཁུར་གནང་དགོས་པ་མ་ཟད། དགའ་ལྡན་ཁྲི་ཐོག་ཁང་དང་རྒྱལ་སྤྱིའི་དགེ་ལྡན་ལྷན་ཚོགས་ནས་ཀྱང་ལས་དོན་འདིའི་ཐད་ཐུགས་ཁུར་དང་། རམ་འདེགས་གནང་སྐྱོང་ཡོང་བ་ཞེས་ཁོངས་སོ་སོར་ཞུས་ཟིན་པ་ལྟར་ཁྱེད་གཉིས་ནས་དེ་དོན་བཞིན་ཉམས་ལེན་ཚུལ་བཞིན་ཡོང་བའི་རེ་སྐུལ་བཅས། ཞེས་གསལ་འདུག
