༸སྐྱབས་རྗེ་སྨན་རིའི་ཡོངས་འཛིན་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག་སྐུ་གཞན་དོན་དུ་བདེ་བར་གཤེགས་པར་བརྟེན། འདི་ལོར་སྨན་རི་གླིང་གྲྭ་ཚང་ནས་བོད་ཀྱི་ལོ་གསར་གཏོང་རྒྱུ་མིན་པའི་གསལ་བསྒྲགས་སྤེལ།
ཟླ་འདིའི་ཕྱི་ཚེས་ ༡༡ ཉིན་དཔལ་གཤེན་བསྟན་སྨན་རིའི་གྲྭ་ཚང་གིས་དད་ལྡན་བོན་འབངས་ཡོངས་ལ་གསལ་བསྒྲགས་ཤིག་སྤེལ་ནས། འདས་ལོའི་ཕྱི་ཟླ་ ༦ ནང་༸སྐྱབས་རྗེ་སྨན་རིའི་ཡོངས་འཛིན་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག་དགུང་ ༡༠༡ སྟེང་དུ་བལ་ཡུལ་དུ་རྟེན་གཞི་བྱས་པའི་དབེན་གནས་བྱེ་མ་རི་ཁྲོད་དུ་སྐུ་མྱ་ངན་ལས་འདས་ཚུལ་བསྟན་པར་བརྟེན། འཆར་ལ་ཉེ་བའི་བོད་ཀྱི་ལོ་གསར་སྐབས་སྨན་རིའི་གྲྭ་ཚང་གི་བོན་ཕྱོགས་ཀྱི་བྱེད་སྒོ་ཁག་ཙམ་མ་གཏོགས། ལོ་གསར་རྒྱས་སྤྲོས་སོགས་བྱ་རྒྱུ་མིན་པའི་གསལ་བསྒྲགས་སྤེལ་འདུག
དེ་འབྲེལ་གསལ་བསྒྲགས་ནང་། ཀུན་གྱིས་མཁྱེན་གསལ་ལྟར་ཕྱི་ལོ་༢༠༢༥ལོར་རང་ཅག་རྣམས་ཀྱི་རྩ་བའི་བླ་མ་གསང་གསུམ་བོན་གྱི་མཛོད་འཛིན་༸སྐྱབས་རྗེ་༸སྨན་རིའི་ཡོངས་འཛིན་སྨྲ་བའི་དབང་པོ་མཆོག་གདུལ་བྱ་གཞན་དོན་དུ་སྐུ་བདེ་བར་གཤེགས་པར་བརྟེན། འཆར་ལ་ཉེ་བའི་བོད་མེ་རྟ་ལོའི་ལོ་གསར་སྐབས་འདི་ག་གདན་ས་སྨན་རིའི་ལོ་སར་ཚེས་གཅིག་ཞོགས་པར་བླ་བྲང་གི་མང་ཇ་དང་ཚིག་བཀྲ་གསུང་རྒྱུ། ཚེས་ ༣ ཉིན་བསང་གསོལ། ཚེས་ ༥ ཉིན་རྗེ་རིན་པོ་ཆེའི་དུས་ཆེན་སྐབས་སྐུ་བརྙན་རིན་པོ་ཆེ་ལ་མཇལ་ཞུ། ཚེས་ ༡༠ ནས་དགེ་བཤེས་ཀྱི་མཛད་སྒོ ཚེས་ ༡༣ ཉིན་གཤེན་གྱི་གར་འཆམ་ཉིན་རྩེད་འཆམ་མིན་པའི་འཆམ་སྣ་གཞན་རྣམས་འཆམ་རྒྱུས་མཚོན་བོན་ཕྱོགས་ཀྱི་མཛད་རིམ་ཁག་ལས། དེ་མིན་འཆར་ཅན་ལྟ་བུའི་ལོ་གསར་སྐབས་རྒྱས་སྤྲོས་མི་བྱེད་རྒྱུ་མ་ཟད། ཚེས་གཅིག་གི་ཞོགས་པར་དགོན་འདིར་བླ་མ་ཁག་མཇལ་ཞུ་སོགས་ཀྱང་གནང་འཆར་མེད་པ་བཅས། ཞེས་གསལ་འདུག
