བོད་པར་གྲ་སྒྲིག་མེད་ཚེ་རྒྱ་ནག་འཐོར་ཞིག་གམ་ཡང་ན་དམངས་གཙོའི་ལམ་ལུགས་སུ་བསྐྱོད་པ་ཡིན་ནའང་རག་རྒྱུ་ཅི་གང་མེད་པས་ད་ལྟ་ནས་གྲ་སྒྲིག་དགོས་ཀྱི་ཡོད།
ཟླ་འདིའི་ཕྱི་ཚེས་ ༡༥ ཉིན་ས་རཱ་མཐོ་རིམ་སློབ་གཉེར་ཁང་གི་ཚོགས་ཁང་དུ། བོད་ཀྱི་སྲིད་བྱུས་ཉམས་ཞིབ་ཁང་དང་ས་རཱ་མཐོ་སློབ་གཉིས་ཀྱི་གོ་སྒྲིག་འོག སྤྱི་ཚོགས་རིག་པའི་འབུམ་རམས་པ་ལྡོང་ཕྱུར་གོང་བ་རྒྱལ་ལགས་ནས། རྒྱ་ནག་གི་གནས་སྟངས་དབྱེ་ཞིབ་ལས་མཐོང་བའི་བོད་ཀྱི་གོ་སྐབས་ཞེས་པའི་བརྗོད་གཞིའི་ཐོག་གསུང་བཤད་ཀྱི་ལས་རིམ་ཞིག་འཚོགས་སོང་བ་དང་། ལས་རིམ་དེའི་སྟེང་དུ་ས་རཱ་མཐོ་སློབ་ཀྱི་སློབ་སྤྱི་གཙོ་གཞོན་གཉིས་ཀྱི་དབུས་པའི་མཐོ་སློབ་ཀྱི་སློབ་གཉེར་བ་དང་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་རྣམས། དེ་བཞིན། བོད་དོན་ལས་འགུལ་བསྟི་གནས་ཁང་གི་བཞུགས་སྒར་ལས་ཁུངས་ཀྱི་ལས་བྱེད་རྣམ་པ་དང་བཞུགས་སྒར་ཁུལ་དུ་གནས་པའི་ཉམས་ཞིབ་པ་སོགས་འཛོམས་འདུག
སྐབས་དེར་འབུམ་རམས་པ་ལྡོང་རྒྱལ་ལོ་ལགས་ཀྱིས་རྒྱ་ནག་གི་གནས་སྟངས་དབྱེ་ཞིབ་ལས་མཐོང་བའི་བོད་ཀྱི་གོ་སྐབས་ཞེས་པའི་བརྗོད་གཞིའི་སྐོར་ལ། ངས་འདས་པའི་ལོ་ངོ་ལྔ་ཙམ་གྱི་རིང་ལ་ང་ཚོའི་བཙན་བྱོལ་སྤྱི་ཚོགས་ཀྱི་གཞུང་མང་གཉིས་ལ་རྒྱུས་ལོན་བྱས་པ་ལྟར་ན། ང་ཚོས་བོད་ནང་གི་གནས་སྟངས་ཐོག་རྒྱ་ནག་གི་གནས་སྟངས་མགོ་ཡག་པོ་འཚོས་པ་ཡིན་ན། མ་འོངས་པའི་བོད་དོན་འཐབ་རྩོད་ཀྱི་ཁ་ཕྱོགས་ཇེ་གསལ་དུ་འགྲོ་བར་ཕན་ཐོགས་པའི་ཀུན་སློང་བཅིངས་ཏེ་བརྗོད་གཞི་འདི་འདེམས་པ་ཡིན། དེའི་ནང་ནས་ཀྱང་ང་ཚོའི་འཐབ་རྩོད་བྱེད་ས་རྒྱ་ནག་གི་གནས་སྟངས་སྐོར་ལ་གོ་རྟོགས་ཞན་པོ་བྱས་ནས་བསྡད་པ་ཡིན་ན། ང་ཚོའི་འཐབ་རྩོད་ཀྱི་དམིགས་ཡུལ་འགྲུབ་ཀྱི་མེད། རྒྱ་ནག་གི་སྐོར་ལ་རྒྱུས་ལོན་ཡག་པོ་ཡོད་ཚེ། ང་ཚོ་འགྲོ་སའི་ཁ་ཕྱོགས་གསལ་བ་དང་ཐབས་ཇུས་འཐེན་ཐུབ་པའི་གནས་སྟངས་ཤིག་ཡོང་གི་རེད་བསམས་ནས་བརྗོད་གཞི་འདི་འདེམས་པ་ཡིན། ཞེས་གསུངས་སོང་།
ཡང་ད་ལྟའི་རྒྱ་ནག་གི་གནས་སྟངས་ནི་འདས་པའི་ལོ་ངོ་དྲུག་ཅུ་རེ་གྲངས་ནང་བྱུང་མ་མྱོང་བའི་གོ་སྐབས་ཤིག་ཡིན་སྐོར་ལ་ཁོང་གིས། ད་ལྟ་རྒྱལ་སྤྱིའི་ཁོར་ཡུག་ལ་འགྱུར་ལྡོག་ཆེན་པོ་བྱུང་བ་དང་རྒྱ་ནག་ཡང་འཇིག་རྟེན་གྱི་ཁོར་ཡུག་གཞན་ནང་ལྟར་མི་རྟག་པ་ཡིན་དུས་འགྱུར་བ་འགྲོ་ཡི་ཡོད། རྒྱ་ནག་ལ་འགྱུར་བ་འགྲོ་བཞིན་པའི་ཁྲོད་ད་ལྟའི་གནས་སྟངས་ནི་ང་ཚོ་བོད་པར་མཚོན་ན་འདས་པའི་ལོ་ངོ་དྲུག་ཅུ་རེ་གྲངས་ནང་བྱུང་མ་མྱོང་བ་དང་མ་འོངས་པར་འབྱུང་ཁག་པོ་ཡིན་པའི་གནས་སྐབས་ཤིག་ལ་ཐུག་བསྡད་ཡོད། རྒྱ་ནག་ལ་འགྱུར་བ་རིགས་མང་པོ་ཡོང་གི་ཡོད་པ་དང་འགྱུར་བ་རེ་རེའི་འོག་ནས་བོད་ལ་གོ་སྐབས་ག་རེ་ཡོད་མེད་དང་ང་ཚོས་གྲ་སྒྲིག་ག་འདྲ་བྱེད་དགོས་མིན་སོགས་ནི་ཧ་ཅང་གནད་འགག་ཆགས་ཡོད། ད་ལྟ་རྒྱ་ནག་དང་དམར་ཤོག་ཚོགས་པ། རྒྱ་ནག་མི་མང་ལ་འགྱུར་ལྡོག་ཆེ་བའི་ལོ་རྒྱུས་ཀྱི་ཀྱོག་མཚམས་ཤིག་ཏུ་བསླེབས་ཡོད། རྒྱ་ནག་ལ་འགྱུར་བ་ཇི་ཙམ་ཕྱིན་ན་དེའི་ཚོད་ཀྱིས་བོད་ལ་གོ་སྐབས་ག་རེ་ཤར་གྱི་ཡོད་པར་ངོས་འཛིན་བྱེད་ཐུབ་དགོས། རྒྱ་ནག་གི་གནས་སྟངས་མགོ་མ་འཚོས་པ་ཡིན་ན་ང་ཚོར་ཡོད་པའི་གོ་སྐབས་ངོས་འཛིན་བྱེད་མི་ཐུབ་ལ། ང་ཚོ་གོམ་པ་མདུན་སྤོ་བྱེད་པའི་རྨང་གཞི་མེད་པར་མདུན་སྤོ་ཡང་བྱེད་ཐུབ་ཀྱི་མེད།
ད་ལྟ་རྒྱ་ནག་ལ་མཚོན་ན་རྒྱལ་སྤྱིའི་སྟེང་ཁེར་རྐྱང་དུ་ལུས་པ་དང་ནང་ཁུལ་རྩོད་རྙོག་ཆེ་བ་སོགས་ཕྱི་ནང་གི་རྒྱུ་རྐྱེན་སྣ་ཚོགས་ཀྱི་དབང་གིས་རྒྱ་ནག་ལ་འགྱུར་བ་ཆེན་པོ་འགྲོ་བཞིན་ཡོད་པ་དང་འགྲོ་སྲིད་པའི་ཟུར་མང་པོ་ཞིག་མངོན་ཡོང་གི་ཡོད། ད་ལྟ་ང་ཚོ་བཙན་བྱོལ་སྤྱི་ཚོགས་ནང་རྒྱ་ནག་ལབ་དུས་དབྱེ་བ་འབྱེད་ཀྱི་མི་འདུག རྒྱ་ནག་ལ་ངོས་འཛིན་བྱེད་སྟངས་གཙོ་བོ་གཉིས་ཡོད་པ་ལས། གཅིག་རྒྱ་མི་རིགས་ཀྱི་རྒྱལ་ཁབ་ངོས་ནས་རྒྱ་ནག་ལ་བརྟག་དཔྱད་གཏོང་དགོས་པ་དང་གཅིག་དམར་ཤོག་ཚོགས་པའི་ངོས་ནས་བརྟག་དགོས། ད་ལྟ་རྒྱ་ནག་རྒྱལ་ཁབ་དང་དམར་ཤོག་ཚོགས་པ་གཉིས་ཀར་དཀའ་ངལ་འཕྲད་ཀྱི་ཡོད། སྔོན་མ་རྒྱ་ནག་ལ་དམངས་གཙོའི་འོས་འདེམས་བྱེད་སྲོལ་ཞིག་ཡོད་ཀྱང་། ད་ལྟ་ལྐོག་ཟ་རུལ་སུངས་ཀྱི་གནས་སྟངས་འོག་སུ་ལ་དངུལ་མང་བ་ཡོད་ན་དེར་གོང་ས་ཐོབ་ཀྱི་ཡོད་ལ། དམར་ཤོག་པའི་དམངས་གཙོའི་འགྲོ་ལུགས་དེ་གཏོར་ཚར་བ་རེད། གནད་དོན་འདི་ནི་རྒྱ་ནག་གནས་ཐུབ་དང་མི་ཐུབ་ཀྱི་གནད་འགག་ཅིག་རེད། རྒྱ་ནག་རྒྱལ་ཁབ་ཅིག་དང་ཡང་ན་དམར་ཤོག་ཚོགས་པའི་རྒྱལ་ཁབ་ཅིག་གི་ངོ་བོར་གནས་མིན་ཐད་དཀའ་ངལ་འཕྲད་ཀྱི་ཡོད།
རྒྱ་ནག་གི་དཔལ་འབྱོར་མ་ལག་ལ་ཕྱོགས་གཅིག་ཙམ་མིན་པར་ཕྱོགས་ཡོངས་ནས་ཉེན་ཁ་ཆེན་པོ་འཕྲད་ཀྱི་ཡོད། ལོ་རབས་བརྒྱད་ཅུ་བའི་ནང་ཕྱི་ཕྱོགས་སྒོ་འབྱེད་བྱས་ཏེ་རྒྱ་ནག་དཔལ་འབྱོར་ཐོག་བསྐྱོད་པའི་མགོ་བཙུགས་པ་ལས་རྒྱ་ནག་ལམ་ཁ་ཡག་པོ་ཞིག་གི་སྟེང་དུ་འགྲོ་ཐུབ་མེད། རྒྱ་ནག་བོད་དུ་བསླེབས་རྗེས་ལོ་རབས་བརྒྱད་ཅུ་བ་ནས་ ༢༠༠༠ བར་ལོ་ཉི་ཤུའི་རིང་སྲིད་ཇུས་གུ་ཡངས་བཏང་བར་བརྟེན། ང་ཚོས་ལས་ཀ་ཅུང་ཙམ་ཞིག་བྱེད་ཐུབ་ཡོད། དེའི་རྗེས་ནས་རྒྱ་ནག་ལ་དཔལ་འབྱོར་གྱི་ལམ་ལུགས་མེད་པར་མུན་ནག་ནང་ལག་སྙོབ་བྱས་ནས་དཔལ་འབྱོར་ལམ་ལུགས་ཐོག་ལོ་བཅུ་ཕྱིན་པ་དང་། ཕྱི་ཕྱོགས་སྒོ་འབྱེད་བྱས་ནས་དཔལ་འབྱོར་གྱི་གནས་བབ་གང་འཚམ་ལམ་འགྲོ་བྱུང་ཡང་། ཕྱི་ལོ་ ༡༩༨༩ གནམ་སྡེ་སྒོ་མོ་ཆེའི་སློབ་ཕྲུག་ཡར་ལང་གི་དོན་རྐྱེན་བྱུང་བ་དང་རྒྱ་ནག་གཡོན་ཕྱོགས་ཐོག་ཤར་བསྐྱོད་བྱས་པ་རེད། ཕྱི་ལོ་ ༡༩༩༠ ནང་རྒྱ་ནག་མུན་ནག་ནང་ལག་སྙོབ་བྱས་ནས་དཔལ་འབྱོར་ལམ་ལུགས་ཐོག་བསྐྱོད་ན་འགྲིག་གི་མེད་པའི་གནས་བབ་མཐོང་ནས། རྒྱ་ནག་རྒྱལ་ཁབ་མ་རྩ་རིང་ལུགས་ཐོག་བསྐྱོད་པ་རེད། དེ་ནས་ཞི་ཅིན་ཕིན་གྱིས་སྲིད་དབང་མ་བཟུང་གི་བར་དུ་གཡས་སྐྱོར་གཡོན་སྐྱོར་བྱས་ནས་བསླེབས་པ་རེད་དེ། དེ་དུས་རྒྱ་ནག་གི་མ་རྩ་རིང་ལུགས་རྨང་གཞི་ནས་སྦོ་ལུག་སྟེ་དཔལ་འབྱོར་ཐོག་དཀའ་ངལ་ཆེན་པོ་འཕྲད་བསྡད་ཡོད། ཅེས་གསུངས་སོང་།
རྒྱ་ནག་གི་དམག་མིའི་དབང་ཆ་འཐབ་རྩོད་ཐོག་དཀའ་ངལ་ཤུགས་ཆེན་འཕྲད་ཡོད་སྐོར་ལ་ཁོང་གིས། ད་ལྟ་རྒྱ་ནག་གི་དམག་གི་དབང་ཆ་དང་དམག་མིའི་གནས་སྟངས་ཐོག་དཀའ་ངལ་ཆེན་པོ་འཕྲད་བཞིན་ཡོད། རྒྱ་ནག་དམར་ཤོག་ཚོགས་པའི་སྲིད་དབང་གི་ཆ་རྐྱེན་གལ་ཆེ་ཤོས་ནི་དམག་གི་དབང་ཤུགས་བཟུང་བསྡད་ཡོད་པས་ཡིན། དམག་གིས་དམར་ཤོག་ཚོགས་པར་ཁ་ལེན་ཚིག་བརྩི་བྱེད་དགོས་ཀྱི་ཡོད། འོན་ཀྱང་། ད་ལྟ་རྒྱ་ནག་གི་དམག་མིའི་སྡེ་ཁག་གཉིད་ལས་སད་དེ། དམག་མིའི་མགོ་ཁྲིད་ནང་ཁུལ་དུའང་། དམག་ནི་རྒྱ་ནག་རྒྱལ་ཁབ་ཀྱི་དམག་མི་ཡིན་པ་ལས་དམར་ཤོག་ཚོགས་པའི་དམག་མི་མིན་ཟེར་ནས་དབྱེ་བ་ཕྱེ་ཡི་ཡོད་ལ། གནད་དོན་འདི་ནི་ང་ཚོས་ཤེས་དགོས་པའི་དམར་ཤོག་ཚོགས་པའི་ལོ་རྒྱུས་ཀྱི་གནད་དོན་ཞིག་རེད།
རྒྱ་ནག་དམར་ཤོག་ཚོགས་པའི་མ་རྩ་སྦོ་ལུག་པའི་སྐད་ཆ་དེ་ཕྱི་ལོ་ ༢༠༠༠ ཙམ་ནས་མང་ཚོགས་ཁྲོད་གླེང་སློང་ཡོང་ཡོད། རྒྱ་ནག་ནང་ལྐོག་ཟ་རུལ་སུངས་ཤུགས་ཆེ་དྲགས་པའི་རྐྱེན་གྱིས་མང་ཚོགས་ཁྲོད་གསལ་བོ་ཆགས་པ་དང་། ལྐོག་ཟ་རུལ་སུངས་ཐེར་འདོན་མ་བྱས་ན་རྒྱ་ནག་རྒྱལ་ཁབ་འཐོར་རྒྱུ་ཡིན་པ་དང་ལྐོག་ཟ་རུལ་སུངས་ཐེར་འདོན་བྱས་པ་ཡིན་ན་རྒྱ་ནག་དམར་ཤོག་ཚོགས་པ་འཐོར་རྒྱུ་ཡིན་པ། མདོར་ན་རྒྱལ་ཁབ་དགོས་སམ་དམར་ཤོག་ཚོགས་པ་དགོས་མིན་གྱི་བསམ་ཚུལ་བྱུང་ཡོད་ལ། རྒྱ་ནག་གི་མཁས་པ་དག་གི་ཁྲོད་དུ་དམར་ཤོག་ཚོགས་པ་དགོས་དོན་མེད་པ་དང་རྒྱ་ནག་རྒྱལ་ཁབ་བྱས་ནས་མདུན་སྐྱོད་བྱེད་དགོས་པའི་བསམ་ཚུལ་ཤུགས་ཆེན་བྱུང་ཡོད།
འོན་ཀྱང་། དམར་ཤོག་ཚོགས་པའི་ལག་ཏུ་དམག་དང་དཔལ་འབྱོར་གྱི་དབང་ཆ་ཆ་ཚང་ཡོད་སྟབས་སྒུལ་སྐྱོད་རྒྱག་ཐུབ་མེད། དམར་ཤོག་ཚོགས་པར་སྒུལ་སྐྱོད་ཐུབ་པའི་གནས་སྟངས་དེ་ཞི་ཅིན་ཕིན་གྱིས་སྲིད་དབང་བཟུང་ནས་ལོ་གསུམ་གྱི་རྗེས་ཏེ། ལྐོག་ཟ་རུལ་སུངས་ཐེར་འདོན་བྱས་ཏེ་མང་ཚོགས་ཁྲོད་ཁོ་ལ་མཐོང་ཡོད་པ་ལྟ་བུ་ཆགས་པ་དང་། དེ་ནས་ཁོས་དམག་མིའི་ཁྲོད་ལྐོག་ཟ་རུལ་སུངས་ཐེར་འདོན་དྲག་པོ་བྱས་སྟབས། དམག་མིའི་ཁྲོད་དུ་ཁོ་ལ་ངོ་རྒོལ་བྱེད་མཁན་མང་པོ་བྱུང་ཡོད་ལ། ད་ལྟ་དམག་གི་ཁྲོད་དུ་མཐའ་གཅིག་ཏུ་ཞི་ཅིན་ཕིན་མགོ་ཁྲིད་ལ་འདུག་མི་ཆོག་པའི་བསམ་ཚུལ་འབྱུང་གི་ཡོད། དམར་ཤོག་ཚོགས་པས་ཁོ་ཚོའི་དབུ་འཁྲིད་འོག་དཔལ་འབྱོར་ཡར་རྒྱས་དང་རྒྱལ་ཁབ་འཕེལ་རྒྱས་ཕྱིན་ཡོད་ཟེར་བཞིན་ཡོད་མོད། ད་ལྟ་རྒྱ་ནག་གི་དཔལ་འབྱོར་ཉམས་རྒུད་དང་དམག་མིའི་ཁྲོད་དུ་ངོ་རྒོལ་འབྱུང་གི་ཡོད་པ་འདིས། དམར་ཤོག་ཚོགས་པར་དམག་མི་དང་དཔལ་འབྱོར་གཉིས་ཀྱི་ཐོག་ནས་དཀའ་ངལ་འཕྲད་ཀྱི་ཡོད་ལ། འདིས་ཞི་ཅིན་ཕིན་ཙམ་མ་ཡིན་པར་དམར་ཤོག་ཚོགས་པ་གནས་ཐུབ་མིན་དང་རྒྱ་ནག་རྒྱལ་ཁབ་ཅིག་གི་ངོ་བོའི་ཐོག་ནས་གནས་ཐུབ་མིན་གྱི་རྙོག་གྲ་ཆེན་པོ་གཉིས་བཟོས་ཡོད། ཅེས་གསུངས་སོང་།
ཞི་ཅིན་ཕིན་ལ་ཡིད་ཆེས་ལ་བརླག་པ་དང་ནང་ཁུལ་དཔོན་རིགས་ཕྱོགས་སྒྲིག་གི་རྩོད་རྙོག་འབྱུང་གི་ཡོད་སྐོར་ལ་ཁོང་གིས། ཞི་ཅིན་ཕིན་གྱི་དབང་ཐང་ལ་ཉེན་ཁ་འཕྲད་པའི་གནས་སྟངས་དེ་འཕྲོད་བསྟེན་གྱི་ཐོག་ནས་བྱུང་བ་དང་། དེ་ལ་བརྟེན་ནས་ཚོགས་ཁག་གཞན་གྱིས་ཞི་ཅིན་ཕིན་གྱི་དབང་ཆ་འཕྲོག་རྩིས་བྱེད་བཞིན་ཡོད། ཞི་ཅིན་ཕིན་གྱིས་ཐབས་བཀོད་འཐེན་ནས་སྲིད་བློན་ལི་ཁུ་ཆང་བསད་ཡོད་པའི་དོགས་གཞི་བྱུང་བ་ལ་བརྟེ་ནས་ཞི་ཅིན་ཕིན་ལ་རྒྱ་ནག་གི་མཐོ་རིམ་མི་སྣའི་ཁྲོད་མི་དགའ་བའི་གནས་སྟངས་བྱུང་ཡོད་ལ། ད་ལྟ་རྒྱ་ནག་ནང་དམག་གི་ཕྱོགས་ཁག་གཅིག་དང་རྒས་ཡོལ་དུ་ཕྱིན་པའི་དཔོན་རིགས་ཀྱི་ཕྱོགས་ཁག་གཅིག ད་ལྟ་ཡོད་བསྡད་པའི་དཔོན་རིགས་ཀྱི་ཕྱོགས་ཁག་བཅས་དཔོན་རིགས་ཀྱི་ཕྱོགས་ཁག་རིམ་པ་གསུམ་ཆགས་ཡོད། ཕྱོགས་ཁག་གསུམ་ལ་རྒྱ་ནག་ལ་ལམ་ཕྱོགས་མི་འདྲ་བ་གསུམ་ཡོང་གི་ཡོད། ཕྱོགས་ཁག་གཅིག་གིས་ལོ་རབས་བརྒྱད་ཅུའི་ནང་གི་ཏིན་ཞོ་ཕིན་གྱི་གུ་ཡངས་སྲིད་ཇུས་བཅོས་བསྒྱུར་སྒོ་འབྱེད་ཀྱི་ཐོག་བསྐྱོད་རྒྱུ་ཡིན་པ་དང་། ཕྱོགས་ཁག་ཅིག་གིས་དམར་ཤོག་ཚོགས་པ་མི་དགོས་པར་དམངས་གཙོའི་ལམ་ལུགས་ཐོག་ནས་རྒྱ་ནག་རྒྱལ་ཁབ་བྱས་ནས་མུ་མཐུད་སྐྱོང་དགོས་པ། དེ་བཞིན་ཕྱོགས་གཅིག་གིས་དབང་ཆ་འདྲ་མཉམ་དགོས་པའི་ལངས་ཕྱོགས་འཛིན་གྱི་ཡོད།
ལོ་རབས་བརྒྱད་ཅུ་བའི་གུ་ཡངས་སྲིད་ཇུས་འཛིན་མཁན་ཚོའི་ལག་ཏུ་དབང་ཆ་ཤོར་བ་ཡིན་ན་ང་ཚོ་བོད་ལ་གོ་སྐབས་ག་རེ་ཡོད་པ་དང་། དམར་ཤོག་ཚོགས་པ་མེད་པའི་ཐོག་ནས་རྒྱ་ནག་རྒྱལ་ཁབ་མུ་མཐུད་གནས་དགོས་མཁན་ཚོའི་ལག་ཏུ་དབང་ཆ་ཤོར་བ་ཡིན་ན་ང་ཚོར་གོ་སྐབས་ག་རེ་ཡོད་པ། དེ་བཞིན་ཕྱོགས་གཅིག་གིས་དབང་ཆ་འདྲ་མཉམ་དགོས་ཟེར་ནས་མངའ་སྡེ་རིམ་པའམ་ཡང་ན་རྒྱ་ནག་འཐོར་ཞིག་ཏུ་འགྲོ་དགོས་ཀྱི་ཡོད་ལ། རྒྱ་ནག་འཐོར་ཞིག་ཏུ་ཕྱིན་པ་ཡིན་ན། རྒྱ་ནག་དེ་རྒྱལ་ཁབ་གསུམ་ལ་འགྱུར་འགྲོ་ཡི་ཡོད་པ་དང་ཁག་ཅིག་གིས་རྒྱལ་ཁབ་བདུན་བརྒྱད་ལ་འགྱུར་འགྲོ་ཡི་རེད་ཟེར་གྱི་ཡོད། གནས་སྟངས་དེ་འདྲའི་འོག་ཏུ་ཕྱིན་པ་ཡིན་ན་ང་ཚོ་བོད་པར་གོ་སྐབས་ག་རེ་ཡོད་དམ། ང་ཚོས་གནས་སྟངས་འོག་ནས་གོ་སྐབས་ཇི་ལྟར་འཛིན་པ་དང་གྲ་སྒྲིག་ག་རེ་བྱ་རྒྱུ་ཡིན་མིན་གལ་ཆེན་རེད་ལ། གོ་སྐབས་འདི་གསུམ་འཛིན་ཐུབ་དང་མི་ཐུབ་ནི་ང་ཚོས་གྲ་སྒྲིག་བྱས་ཡོད་མེད་ལ་རག་ལས་ཡོད། ང་ཚོར་གྲ་སྒྲིག་གཅིག་ཀྱང་མེད་པར་རྒྱ་ནག་གི་གནས་སྟངས་གསུམ་གང་གི་ཐད་ནས་ང་ཚོར་གོ་སྐབས་རག་གི་རེད་བསམས་ནས་བསྡད་པ་ཡིན་ན་ང་ཚོར་གོ་སྐབས་རག་གི་མ་རེད། ང་ཚོར་གྲ་སྒྲིག་མེད་ཚེ། རྒྱ་ནག་འཐོར་ཞིག་ཏུ་སོང་བའམ་ཡང་ན་དམངས་གཙོའི་ལམ་ལུགས་སུ་བསྐྱོད་པ་ཡིན་ན་ཅི་གང་རག་གི་མ་རེད། དེར་བརྟེན་ང་ཚོར་ད་ལྟ་ནས་གྲ་སྒྲིག་དགོས་ཀྱི་ཡོད། ཅེས་གསུངས་སོང་།
གསར་འགོད་པ། སྐལ་བཟང་སྦྱིན་པ།
