༸གོང་ས་མཆོག་ལ་ཆེ་བསྟོད་ཀྱི་གྲོས་ཆོད་སྤྱི་མོས་གཏན་འབེབས་གནང་།

ཨ་རིའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གིས་༸གོང་ས་མཆོག་གི་སྐུའི་འཁྲུངས་སྐར་ཉིན་བྱམས་བརྩེའི་ཉིན་མོར་སྲུང་གཙི་ཞུ་རྒྱུའི་གྲོས་ཆོད་དེ་སྤྱི་མོས་གཏན་འབེབས་གནང་འདུག

ཉེ་ལམ་ཨ་རིའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གིས། ༸གོང་ས་རྒྱལ་བ་རིན་པོ་མཆོག་གི་རླབས་ཆེན་གྱི་མཛད་འཕྲིན་ཁག་ལ་ཆེ་བསྟོད་མཚོན་སླད། ༸གོང་ས་མཆོག་གི་འཁྲུངས་སྐར་གྱི་ཉིན་མོ་དེ་བྱམས་བརྩེའི་ཉིན་མོར་སྲུང་གཙི་ཞུ་རྒྱུ་དང་། བོད་མི་མང་གི་གཞི་རྩའི་རང་དབང་དང་འགྲོ་བ་མིའི་ཐོབ་ཐང་སོགས་ལ་རྒྱབ་སྐྱོར་བྱེད་པའི་གྲོས་ཆོད་ཨང་ ༥༡༥ བ་སྤྱི་མོས་གཏན་འབེབས་གནང་འདུག

ཨ་རིའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་བྷི་རེན་ (Brian Mast) མཆོག་གིས། རྒྱ་ནག་གཞུང་གིས་བོད་མི་རིགས་ཀྱི་སྐད་ཡིག་དང་རིག་གཞུང་། ཆོས་ལུགས། ངོ་བོ་དང་བཅས་པ་རྩ་མེད་གཏོང་ཐབས་བྱེད་བཞིན་ཡོད་ཀྱང་། ༸གོང་ས་མཆོག་གིས་འདས་པའི་ལོ་ངོ་  ༦༠ ལྷག་གི་རིང་ལ་འཚེ་མེད་ཞི་བའི་ལམ་ནས་བོད་དོན་འཐབ་རྩོད་གནང་སྟེ། ད་ཆ་བོད་ཀྱི་ཆོས་དང་རིག་གཞུང་འཛམ་གླིང་ཡོངས་ལ་ཁྱབ་ཐུབ་པ་ནི་སེམས་ཤུགས་སྤར་བྱེད་ཅིག་ཡིན་པས། ངས་གྲོད་ཆོད་འདི་ལ་རྒྱབ་སྐྱོར་བྱ་རྒྱུ་ཡིན། ཞེས་གསུངས་འདུག་

ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་མཱ་ཡེ་ཀལ་མེ་ཁོལ་ (Michael McCaul) ལགས་ཀྱིས། དེ་རིང་ང་ཚོས་དུས་རབས་འདིར་འབྱུང་བཞིན་པའི་བཟོད་དཀའ་བའི་སྐྱོ་གར་ཞིག་གསལ་བོ་བཟོ་དགོས། དེ་ནི་ད་ལྟ་རྒྱ་ནག་གཞུང་གིས་བོད་མི་རྣམས་ལ་གདུག་རྩུབ་ཆེ་བའི་དྲག་གནོན་བྱེད་བཞིན་ཡོད། ལྷག་པར་དུ་རྒྱ་ནག་གིས་༸གོང་ས་ཏ་ལའི་བླ་མའི་ཡང་སྲིད་ངོས་འཛིན་བྱེད་རྩིས་ཡོད་པ་དེ་རེད།  འོན་ཀྱང་། ངས་འདི་ནས་གསལ་བོ་ཞུ་རྒྱུ་ཡིན། དེ་ནི་ནོར་འཁྲུལ་ཙམ་དང་ཡང་ན་བཟང་སྤྱོད་ཀྱི་ཐོག་ནས་ནོར་བ་ཁོ་ན་ཙམ་མིན་པར། རྒྱ་ནག་གིས་འཛམ་གླིང་མི་མང་གི་ཆོས་དད་རང་དབང་ལ་རྡོག་རོལ་གཏོང་གི་ཡོད་པ་ཞིག་རེད། ༸གོང་ས་མཆོག་གིས་སྤྱི་ཚོགས་ནང་བྱམས་བརྩེ་དང་འཚེ་མེད་ཞི་བ། ཆོས་ལུགས་མཐུན་སྒྲིལ་སོགས་ཀྱི་མཛད་རྗེས་རླབས་ཆེན་བསྐྱངས་ཡོད། ལོ་གཉིས་ཀྱི་གོང་དུ་ང་དྷ་རམ་ས་ལར་ཕྱིན་ཏེ་༸གོང་ས་ཏ་ལའི་བླ་མར་མཇལ་བ་ཡིན། སྐབས་དེ་དུས་ཁོང་གིས་ང་ལ། ཁོང་གི་ཡང་སྲིད་རྒྱ་ནག་ནས་འཁྲུང་གི་མིན། རང་དབང་ལུང་པ་ཞིག་ནས་འཁྲུང་གི་ཡིན་གསུངས་བྱུང་བས། ཨ་རིས་དེ་ལ་རྒྱབ་སྐྱོར་གྱིས་བོད་དོན་ལ་རྒྱབ་སྐྱོར་བྱེད་དགོས་ཞེས་གསུངས་འདུག

གྲོས་ཆོད་དེས། ཕྱི་ལོ་ ༢༠༢༥ ཟླ་ ༧ ཚེས་ ༦ ནི་༧གོང་ས་རྒྱལ་བ་རིན་པོ་ཆེ་མཆོག་ལ་ཆེ་བསྟོད་སླད་བྱམས་བརྩེའི་ཉིན་མོར་སྲུང་གཙི་ཞུ་རྒྱུ་དང་། རྒྱ་ནག་གཞུང་གིས་༧གོང་ས་སྐུ་ཕྲེང་བཅོ་ལྔ་པ་ངོས་འཛིན་བྱེད་པའི་གནད་དོན་ལ་ཐེ་གཏོགས་བྱེད་པ་ནི་བོད་བརྒྱུད་ནང་བསྟན་གྱི་ཆོས་དད་རང་དབང་ལ་རྡོག་རོལ་གཏོང་གི་ཡོད་པར་ངོས་འཛིན་ཞུ་རྒྱུ། དེ་བཞིན། བོད་མི་མང་གི་གཞི་རྩའི་རང་དབང་དང་འགྲོ་བ་མིའི་ཐོབ་ཐང་སོགས་ལ་རྒྱབ་སྐྱོར་བྱ་རྒྱུ་བཅས་ཡིན་འདུག

ད་ལན་སྤྱི་མོས་གཏན་འབེབས་བྱུང་བའི་གྲོས་ཆོད་དེ་ནི་ཐོག་མར་ཨ་རིའི་སྤྱི་མཐུན་ཚོགས་པའི་གྲོས་ཚོགས་འཐུས་མི་སྐུ་ཞབས་མཱ་ཡེ་ཀལ་མེ་ཁོལ་ (Michael McCaul) ལགས་དང་། དམངས་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་ཇེམ་མེག་གྷ་ཝིན་( (Jim McGovern) ལགས་རྣམ་གཉིས་ཀྱིས། འདས་ལོའི་ཕྱི་ཟླ་ ༧ ཚེས་ ༡༤ ཉིན་གྲོས་ཚོགས་འོག་མའི་ནང་ངོ་སྤྲོད་གནང་ཞིང་། གྲོས་ཚོགས་གོང་མའི་འཐུས་མི་ (Jeff Merkley) ལགས་དང་ (Todd Young) ལགས་གཉིས་ཀྱི་སྣེ་འཁྲིད་འོག་གྲོས་ཆོད་དེར་རྒྱབ་སྐྱོར་གནང་མཁན་གྲོས་ཚོགས་གོང་འོག་གཉིས་ཀྱི་འཐུས་མི་ ༡༠ བྱུང་བའི་ཐོག་ནས་གྲོས་ཚོགས་གོང་མའི་ནང་ངོ་སྤྲོད་དང་མཐར་སྤྱི་མོས་གཏན་འབེབས་གནང་ཡོད།

འདས་ལོར་རྒྱལ་སྤྱིའི་བོད་དོན་ལས་འགུལ་ཁང་གིས་སྤེལ་བའི་དེ་འབྲེལ་གྱི་གནས་ཚུལ་ལྟར་ན། གྲོས་ཆོད་དེའི་བརྒྱུད་རིམ་ཁྲོད། ཨ་རིའི་རྒྱལ་ཡོངས་ཀྱི་བོད་རིགས་ཚོགས་པ་དང་བོད་དོན་རྒྱབ་སྐྱོར་བ་སོགས་མི་གྲངས་ཉིས་བརྒྱ་ལྷག་རྒྱལ་ས་ཝང་ཤིན་ཊོན་དུ་འཛོམས་ཏེ་གྲོས་ཆོད་དེར་རྒྱབ་སྐྱོར་ཡོང་བའི་ཞུ་གཏུག་བསྟུད་མར་བྱས་པའི་གྲུབ་འབྲས་ཤིག་ཡིན་པ་དང་། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས་ཀྱིས། གྲོས་ཆོད་འདི་ནི་ཨ་རིས་༧གོང་ས་རྒྱལ་བ་རིན་པོ་ཆེ་མཆོག་གི་བྱམས་བརྩེ་དང་འཚེ་མེད་ཞི་བའི་བཀའ་སློབ། དེ་བཞིན། བོད་མིའི་མང་གཙོའི་རང་དབང་དང་འགྲོ་བ་མིའི་ཐོབ་ཐང་སོགས་ལ་རྒྱབ་སྐྱོར་བརྟན་པོ་ཡོད་པ་མཚོན་ཐུབ་ཅེས་དང་། ངས་བོད་ཀྱི་གྲོགས་པོ་གྲོས་ཚོགས་འཐུས་མི་རྣམ་པ་དང་བོད་དོན་ཞུ་གཏུག་གི་ལས་འགུལ་ནང་མཉམ་ཞུགས་གནང་མཁན་ཡོངས་ནས་གྲོས་ཆོད་མདུན་སྐྱོད་ཡོང་ཐབས་སུ་རོགས་འདེགས་བྱས་པར་བཀའ་དྲིན་ཆེ་ཞུ་རྒྱུ་ཡིན། ཞེས་བརྗོད་འདུག