གནས་མཆོག་རྡོ་རྗེ་གདན་གྱི་ཞེ་ཆེན་དགོན་དུ་ནང་པའི་གསར་གཏོད་ཀྱི་ཚོགས་ཆེན་ཐེངས་དང་པོ་འཚོགས་མགོ་བཙུགས་ཡོད་ཅིང་ཚོགས་ཆེན་ཐོག་འདི་ལོའི་སྤྱི་ཚོགས་དྲ་ལམ་དུ་ནང་ཆོས་དར་ཁྱབ་དང་རྒྱུད་སྤེལ་བྱེད་མཁན་ཁག་ཅིག་ལ་ཆེ་བསྟོད་གཟེངས་རྟགས་ཤིག་ཀྱང་དབུལ་འཆར་ཡོད་འདུག
གནས་མཆོག་རྡོ་རྗེ་གདན་དུ་ཡོད་པའི་ཞེ་ཆེན་དགོན་དུ་ནང་པའི་གསར་གཏོད་ཀྱི་ཚོགས་ཆེན་ཐེངས་དང་པོ་འཚོག་བཞིན་པ། ༢༠༢༥།༡།༢༩ དུས་བབ་གསར་ཁང་གིས་པར་སྒྲིག་སྦྱོར་བྱས།
དེ་རིང་ཕྱི་ཚེས་ ༢༩ ནས་ཕྱི་ཟླ་ ༢ ཚེས་ ༦ བར་ཉིན་གྲངས་དགུའི་རིང་གནས་མཆོག་རྡོ་རྗེ་གདན་དུ་ཡོད་པའི་ཞེ་ཆེན་དགོན་དུ། དྷར་མ་དྷུ་ཏའི་ཞབས་ཞུ་ཁང་ (Dharmaduta Services) གི་གོ་སྒྲིག་འོག ཕྱི་ལོ་ ༢༠༢༦ ལོའི་ནང་པའི་གསར་གཏོད་ཀྱི་ཚོགས་ཆེན་ (Buddhist Creators Convention 2026) ཞེས་པ་ཞིག་འཚོགས་མགོ་བཙུགས་ཏེ། ཚོགས་ཆེན་དེའི་ཐོག་ཚོང་རྟགས་འཐབ་ཇུས་མཁས་པ་སྐུ་ཞབས་མི་ལན་ཨ་མིན་ (Mr. Milan Amin) ལགས་དང་། རྒྱལ་སྤྱིའི་ཚོང་དོན་གྱི་འགན་འཛིན་འབུམ་རམས་པ་རྗེ་མིན་ཤུ་ཀ་ལ་ (Dr. Jaimin Shukla) ལགས་རྣམ་གཉིས་གཙོས། བཙན་བྱོལ་བོད་མིའི་སྤྱི་ཚོགས་དང་། རྒྱ་གར། སེངྒེ་ལ། འབྲུག ལྷོ་ཨ་མི་རི་ཁ་ནས་སོགས་རྒྱལ་ཁབ་བཅུ་ལྷག་ནས་ཚོགས་ཞུགས་བ་མི་གྲངས་བརྒྱ་དང་ཉི་ཤུ་ལྷག་གིས་མཉམ་ཞུགས་གནང་གི་ཡོད་ཅིང་། དེང་གི་འཕྲུལ་རིག་ལག་རྩལ་ལ་བརྟེན་ནས་ནང་ཆོས་དར་སྤེལ་གཏོང་ཐབས་ཀྱི་སྐོར་ལ་གོ་བསྡུར་དང་བགྲོ་གླེང་གནང་གི་ཡོད་འདུག་ལ། ད་ལན་ཚོགས་ཆེན་དེ་ནི་བཙན་བྱོལ་སྤྱི་ཚོགས་ཁྲོད་ནང་པའི་གསར་གཏོད་ཀྱི་ཚོགས་ཆེན་དང་པོ་དེ་ཡིན་སྐོར་རྗོད་ཀྱི་འདུག
འདི་གའི་གསར་འགོད་པས་ཁ་པར་བརྒྱུད་དྷར་མ་དྷུ་ཏའི་ཞབས་ཞུ་ཁང་གི་སྤྱི་ཁྱབ་འགན་འཛིན་བསྟན་འཛིན་ནོར་དབྱངས་ལགས་སུ་ཚོགས་ཆེན་འདི་ཚོགས་པའི་དགོས་དམིགས་གཙོ་བོ་ག་རེ་ཡིན་སྐོར་དྲིས་པར། ཁོང་མོས། འདས་ལོའི་ཕྱི་ཟླ་ ༥ པའི་ཟླ་མཇུག་ཏུ་དྷ་རམ་ས་ལ་རུ་དྷ་མ་དྷུ་ཏའི་ཞབས་ཞུ་ཁང་ཞེས་པའི་ཚོགས་པ་གསར་འཛུགས་བྱས་ཡོད་པ་དང་། ཉེ་ལམ་འཕྲུལ་རིག་དར་ཁྱབ་ཆེན་པོ་འགྲོ་ཡི་ཡོད་པར་བརྟེན། འཕྲུལ་རིག་གི་བརྒྱུད་ནས་ནང་ཆོས་དར་ཁྱབ་གཏང་རྒྱུར་དམིགས་ཡོད། ཅེས་བརྗོད་བྱུང་།
ཡང་ཚོགས་ཆེན་དང་འབྲེལ་ནས་བསྟན་འཛིན་ནོར་དབྱངས་ལགས་ཀྱིས། ད་ལན་གྱི་ཚོགས་ཆེན་ཐོག་རྒྱ་གར་དང་། སིངྒ་ལ། འབྲུག ལྷོ་ཨ་མི་རེ་ཁ་སོགས་རྒྱལ་ཁབ་འདྲ་མིན་བཅུ་ནས་མི་གྲངས་ ༡༢༠ ཙམ་མཉམ་ཞུགས་གནང་ཡོད་པ་དང་། ཚོགས་ཆེན་བརྒྱུད་ཚོགས་མི་རྣམས་ཕན་ཚུན་འབྲེལ་ལམ་ཡར་རྒྱས་གཏང་རྒྱུ་དང་། ཉིན་གྲངས་གཉིས་རིང་ནང་པའི་གསར་གཏོད་དང་འབྲེལ་ནས་ཚོགས་འདུ་འཚོགས་པ་དང་། ཉིན་གྲངས་དྲུག་གི་རིང་དྲ་རྒྱའི་ཐོག་ཚོང་དོན་གྱི་སློབ་ཁྲིད་བྱ་རྒྱུ་ཡིན་པ་མ་ཟད། མཇུག་སྡོམ་གྱི་མཛད་སྒོའི་སྟེང་སྤྱི་ཚོགས་དྲ་ལམ་དུ་ནང་ཆོས་དར་ཁྱབ་དང་རྒྱུད་སྤེལ་བྱེད་མཁན་ཁག་ཅིག་ལ་ཆེ་བསྟོད་གཟེངས་རྟགས་ཐོག་མ་སྤྲད་འཆར་ཡོད་སྐོར་བརྗོད་དང་། བོད་པའི་སྤྱི་ཚོགས་ཁྲོད་ནང་པའི་གསར་གཏོད་ཀྱི་ཚོགས་ཆེན་འདི་ཐེངས་དང་པོ་ཆགས་ཀྱི་ཡོད་པ་དང་། ཚོགས་ཆེན་འདིའི་ཐོག་བོད་བརྒྱུད་ནང་བསྟན་གཅིག་པུ་མིན་པར་རྒྱལ་ཡོངས་ཀྱི་ནང་པ་རྣམས་མཉམ་ཞུགས་གནང་རྒྱུའི་གོ་སྐབས་བསྐྲུན་གྱི་ཡོད་པ་མ་ཟད། འཕྲུལ་རིག་བརྒྱུད་ནང་ཆོས་དར་ཁྱབ་གཏོང་བར་ཆ་རྐྱེན་བསྐྲུན་ཐབས་བྱས་ཡོད་སྐོར་བརྗོད་བྱུང་།
དྷར་མ་དྷུ་ཏའི་ཞབས་ཞུ་ཁང་ནི་ཕྱི་ལོ་ ༢༠༢༥ ཟླ་ ༥ ནང་གསར་འཛུགས་གནང་ཡོད་འདུག་ལ། ཚོགས་པ་དེའི་དམིགས་ཡུལ་གཙོ་བོ་ནི་འཛམ་གླིང་ཡོངས་ཀྱི་ནང་པའི་སྤྱི་ཚོགས་ལ་ཞབས་ཞུའི་ཆེད་དུ་ཆ་རྐྱེན་བསྐྲུན་རྒྱུ་དང་། རྒྱལ་ཁབ་འདྲ་མིན་ནང་ཡོད་པའི་ནང་པ་རྣམས་ཀྱི་ཤེས་ཡོན་བརྗེ་ལེན་དང་། འཕྲུལ་རིག་བརྒྱུད་ནང་ཆོས་དར་ཁྱབ་གཏོང་བར་མཐུན་རྐྱེན་སྐྲུན་གྱི་ཡོད་འདུག
གསར་འགོད་པ། བསྟན་འཛིན་ཕུར་བུ།
