ཨ་རིས་བོད་མིའི་སྒྲིག་འཛུགས་ཀྱི་གཙོས་གཞུང་འབྲེལ་མིན་པའི་ཚོགས་སྡེ་ཁག་སོགས་བོད་ཕྱི་ནང་གཉིས་ཀྱི་ལས་དོན་ཐོག་ཨ་སྒོར་ས་ཡ་ ༢༣ གྱི་རོགས་དངུལ་སྤྲད་རྒྱུ་གཏན་འབེབས་བྱས་འདུག
ཟླ་འདིའི་ཕྱི་ཚེས་ ༣ ཉིན་ཨ་རིའི་སྲིད་འཛིན་ཊོམ་ཕུ་མཆོག་གིས། ཨ་རིའི་གྲོས་ཚོགས་ཀྱི་ཕྱི་ལོ་ ༢༠༢༦ ལོའི་སྔོན་རྩིས་ལ་མཚན་རྟགས་བསྐྱོན་ཏེ། བོད་ནང་གི་རིག་གཞུང་དང་ཤེས་ཡོན་སྲུང་སྐྱོབ་དང་རྒྱུན་གནས་འཕེལ་རྒྱས། བོད་ཀྱི་ཁོར་ཡུག་སྲུང་སྐྱོབ་སོགས་ཀྱི་ཐོག་ཕྱག་ལས་གནང་མཁན་གྱི་བོད་མིའི་ཚོགས་སྡེ་ཁག་ལ་ཨ་སྒོར་ས་ཡ་ ༡༠ དང་། བོད་མིའི་སྒྲིག་འཛུགས་ནས་བཙན་བྱོལ་བོད་མིའི་སྤྱི་ཚོགས་ནང་བོད་ཀྱི་རིག་གཞུང་དང་སྐད་ཡིག་སྲུང་སྐྱོབ་དང་གོང་སྤེལ། ཤེས་ཡོན་གོང་འཕེལ། སྤྱི་ཚོགས་བརྟན་འཇགས་དང་མི་རབས་གསར་པ་སྐྱེད་བསྲིང་སོགས་ཀྱི་ཆེད་དུ་ཨ་སྒོར་ས་ཡ་ ༨ ། བོད་མིའི་སྒྲིག་འཛུགས་ཀྱི་ནུས་པ་གོང་འཕེལ་གཏོང་བའི་ལས་གཞིའི་ཆེད་ཨ་སྒོར་ས་ཡ་ ༥ དང་། དེའི་ནང་ནས་ཨ་སྒོར་ས་ཡ་གཅིག་ནས་ཕྱེད་ཀའི་བར་རྒྱ་གར་དང་བལ་ཡུལ་ནང་གི་བོད་མི་སྐྱབས་བཅོལ་བ་རྣམས་ཀྱི་གཞི་རྩའི་དགོས་མཁོ་གཙོ་བྱས་པའི་དཔལ་འབྱོར་འཕེལ་རྒྱས་དང་སྤྱི་ཚོགས་ཀྱི་ནུས་པ་གོང་འཕེལ་གཏོང་སླད་བཅས་ཁྱོན་ཨ་སྒོར་ས་ཡ་ ༢༣ བཀའ་འཁྲོལ་གཏན་འབེབས་གནང་འདུག
དེ་འབྲེལ་རྒྱལ་སྤྱིའི་བོད་དོན་ལས་འགུལ་ཁང་གིས། ཨ་རིའི་གཞུང་གིས་བཙན་བྱོལ་བོད་མི་རྣམས་ལ་རོགས་དངུལ་གཏན་འབེབས་བྱས་པར་སྔོན་རྩིས་ཚོགས་ཆུང་གི་མགོ་ལས་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། ཨ་རིའི་གྲོས་ཚོགས་ཀྱི་ལངས་ཕྱོགས་བརྟན་པོ་བཟུང་ནས་རོགས་དངུལ་གནང་བར་དགའ་པོ་བྱུང་ཞེས་བརྗོད་འདུག་ལ། བསྟན་ཆོས་རྒྱ་མཚོ་ལགས་ཀྱིས། ང་ཚོས་ཨ་རིའི་རླུང་འཕྲིན་ཁང་དང་ཨེ་ཤ་ཡ་རང་དབང་རླུང་འཕྲིན་ཁང་གཉིས་ཀྱི་བོད་སྐད་སྡེ་ཚན་གྱི་ལས་དོན་ཁག་སླར་གསོ་ཡོང་བའི་རེ་བ་བྱེད་ཀྱི་ཡོད། རླུང་འཕྲིན་ཁང་གཉིས་དེ་སྒོ་བརྒྱབ་པ་དེས་བོད་ནང་གི་བོད་མི་རྣམས་དང་འཛམ་གླིང་ཡུལ་གྲུ་གང་སར་གནས་པའི་བོད་མིའི་སྤྱི་ཚོགས་ཁག་ལ་ཡིད་ཆེས་བྱེད་རུང་བའི་རང་དབང་ཅན་གྱི་གནས་ཚུལ་གྱི་འབྱུང་ཁུངས་གལ་ཆེན་མེད་པར་བཟོས། ང་ཚོས་ཨ་རིའི་གྲོས་ཚོགས་ལ་རྩིས་ལོ་ ༢༠༢༧ ལོའི་སྔོན་རྩིས་ནང་བོད་དང་འབྲེལ་བའི་རོགས་དངུལ་གཏན་འབེབས་རྒྱུན་འཁྱོངས་ཡོང་བའི་འབོད་སྐུལ་ཞུ་རྒྱུ་ཡིན་ཞེས་བརྗོད་འདུག
ད་ལྟའི་ཆར་སྤྱི་ཚོགས་ཁྲོད་ཐེངས་འདིའི་རོགས་དངུལ་དེ་ནི་ཕྱི་ལོ་ ༢༠༢༤ ལོའི་རོགས་དངུལ་ལས་བརྒལ་ཡོད་མེད་ཐད་དོགས་འདྲི་དང་བསམ་ཚུལ་མང་དག་ཅིག་འབྱུང་གི་འདུག་སྟབས། འདི་གའི་གསར་འགོད་པས་རྒྱུས་ལོན་བྱས་པ་ལྟར་ན། ཐེངས་འདིའི་རོགས་དངུལ་བཀའ་འཁྲོལ་གཏན་འབེབས་དེ་ནི་ཕྱི་ལོ་ ༢༠༢༤ ལོའི་ཨ་རིའི་བོད་དང་འབྲེལ་བའི་རོགས་དངུལ་གྱི་གྲངས་འབོར་ལས་འཕར་ཆག་གང་ཡང་བྱུང་མི་འདུག་ལ། འདས་ལོའི་ཕྱི་ཟླ་ ༣ ནང་ཨ་རིའི་སྲིད་འཛིན་ཊོམ་ཕུས་བོད་མིའི་སྒྲིག་འཛུགས་ཀྱི་རོགས་དངུལ་ཡོངས་བཀག་བསྐྱིལ་བྱས་ཀྱང་། ལོ་དེའི་ཕྱི་ཟླ་ ༧ ནང་ཨ་སྒོར་ས་ཡ་ ༧ ལ་བཀའ་འཁྲོལ་བསྐྱར་དུ་ཐོབ་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
