༸གོང་ས་རྒྱལ་བ་རིན་པོ་ཆེ་མཆོག་གསེར་ཁྲིར་མངའ་གསོལ་ཞུས་ཏེ་ལོ་ངོ་ ༨༦ འཁོར་བའི་མཛད་སྒོ་འཚོགས།

བཀའ་བློན་ཁྲི་ཟུར་༸སྐྱབས་རྗེ་ཟམ་གདོང་རིན་པོ་ཆེ་མཆོག་གིས་དེ་རིང་བཀྲ་ཤིས་པའི་དུས་སྐབས་འདིར་ངས་༸གོང་ས་མཆོག་ལ་སྙིང་ཐག་པ་ནས་བཀའ་དྲིན་རྗེས་དྲན་ཞུ་བ་དང་ཁོང་གི་མཛད་རྗེས་དཔག་ཏུ་མེད་པ་ལ་གུས་བཀུར་ཞུ་རྒྱུ་ཡིན་ཞེས་གསུངས་སོང་།

དེ་རིང་༸གོང་ས་རྒྱལ་བ་རིན་པོ་ཆེ་མཆོག་ཕོ་བྲང་པོ་ཏཱ་ལར་གསེར་ཁྲིར་མངའ་གསོལ་ཞུས་ཏེ་ལོ་ངོ་ ༨༦ འཁོར་བའི་མཛད་སྒོ་འཚོགས་སོང་། མཛད་སྒོའི་ཐོག་སྐུ་མགྲོན་གཙོ་བོ་བཀའ་བློན་ཁྲི་ཟུར་༸སྐྱབས་རྗེ་ཟམ་གདོང་རིན་པོ་ཆེ་མཆོག་དང་། ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ཀེ་ལ་ཤི་ (Kailash Satyarthi) ལགས། ཆེ་བསྟོད་སྐུ་མགྲོན་ཧྥི་ལི་པིན་སིའི་གྲོས་ཚོགས་འོག་མའི་འཐུས་མི་མའེ་ཁལ་ (Adrian Michael A. Amatong) ལགས། ཧྥི་ལི་པིན་སིའི་གྲོས་ཚོགས་འོག་མའི་འཐུས་མི་རུ་ཧྥ་སི་ (Rufus B. Rodriguez) ལགས། ཧིན་རྡུའི་ཆོས་དཔོན་ཨ་རྗེ་ཀུ་མར་ (Ajay Kumar Sharma) ལགས། ཁ་ཆེའི་ཆོས་དཔོན་མོ་ཧ་མ་དྷི་ (Muhamad Kamil Jamie) ལགས། ཡེ་ཤུའི་ཆོས་དཔོན་ཝིག་ཊོར་ (Rev. Victor Khojee) ལགས། ་སིག་གི་ཆོས་དཔོན་སར་བྷི་ཇི་ཏི་སིངྒ་ (Sarbjeet Singh) ལགས། བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་པ་ཆེ་བ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག ཚོགས་གཞོན་སྒྲོལ་མ་ཚེ་རིང་མཆག ཁྲིམས་ཞིབ་པ་གཞན་གཉིས། བཀའ་བློན་རྣམ་པ། མི་མང་སོགས་ལྷན་འཛོམས་གནང་ཡོད་འདུག

ཐོག་མར་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་གཏམ་བཤད་སྒྲོགས་སྦྱངས་གནང་བའི་ནང་། དེ་རིང་ང་ཚོ་གངས་ལྗོངས་ལྷ་མི་ཡོངས་ནས་ཁམས་གསུམ་ཆོས་ཀྱི་རྒྱལ་པོ་སྤྱི་ནོར་༸གོང་ས་༸སྐྱབས་མགོན་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ཕོ་བྲང་པོ་ཏ་ལའི་གསེར་ཁྲིར་མངའ་གསོལ་ཞུས་ནས་ལོ་ངོ་ ༨༦ འཁོར་བའི་དུས་ཚེས་ཁྱད་པར་ཅན་འདིར་དགའ་སྤྲོའི་ངང་དྲན་གསོ་ཞུ་བའི་མཛད་སྒོ་འདིའི་ཐོག བཀའ་ཤག་ནས་གཞིས་བྱེས་སྤུན་ཟླ་རྣམ་པ་དང་། བོད་ཀྱི་གྲོགས་པོ་རྣམ་པར་འཚམས་འདྲི་བཀྲ་ཤིས་བདེ་ལེགས་ཞུ་ཡི་ཡོད། ཅེས་དང་། ལོ་ངོ་ ༨༦ གོང་གི་གསེར་ཁྲི་མངའ་གསོལ་གྱི་མཛད་སྒོ་དེ་ནི་བོད་ལ་མཚོན་ན་སྲོལ་རྒྱུན་ལམ་ལུགས་ཀྱི་ཁྱད་འཕགས་སྒྲིག་འཛུགས་གནམ་བསྐོས་དགའ་བ་བརྒྱ་ལྡན་པའི་གངས་ལྗོངས་ཆབ་སྲིད་ཀྱི་དབང་ལུང་རྒྱུན་བསྲིངས་དང་། འཕགས་པ་སྤྱན་རས་གཟིགས་དབང་གི་ཐུགས་བསྐྱེད་སྨོན་ལམ་གྱི་ལྕགས་ཀྱུ་དང་གངས་ལྗོངས་ལྷ་མི་ཀུན་གྱི་དད་པའི་ཨ་ལོང་མཐུད་སྦྲེལ་གྱི་ཆོ་ག་གཟབ་གཟེངས་ལྡན་པ་ཞིག་ཡིན་པས། གཞུང་ངོས་ནས་རྒྱ་ནག་གོ་མིང་སྲིད་གཞུང་དང་། དབྱིན་གཞུང་གི་སྐུ་ཚབ་དང་། འབྲས་ལྗོངས། བལ་ཡུལ་དང་འབྲུག་སོགས་ཁྱིམ་མཚེས་རྒྱལ་ཁབ་ཀྱི་སྐུ་ཚབ་ལའང་མཇལ་ཕྱག་དང་ཁྲི་སྐྱེས་དངོས་འབུལ་གྱི་གོ་སྐབས་གནང་སྟེ་སྣེ་ལེན་ཞུས་ཡོད་ལ། སྐབས་དེའི་རྒྱ་ནག་གོ་མིན་ཏང་སྲིད་གཞུང་གི་སྐུ་ཚབ་ནས་གསེར་ཁྲི་མངའ་གསོལ་གྱི་མཛད་སྒོ་གཙོ་སྐྱོང་བྱས་ལུགས་དང་། རྒྱལ་ཚབ་རྭ་སྒྲེང་རིན་པོ་ཆེས་གསེར་བུམ་དཀྲུག་འདོན་མ་དགོས་པའི་སྙན་ཞུ་ཕུལ་ལུགས་སོགས་རྒྱ་ནག་གུང་ཁྲན་གཞུང་གིས་ད་དུང་ཨུ་ཚུགས་ཀྱིས་རྫུན་སྒྲོགས་བྱས་དང་བྱེད་བཞིན་པ་དེ་རིགས་ཡིག་ཚགས་དང་། དཔྱད་རྩོམ་རིམ་ཐོན་ལ་བརྟེན་ནས་དངོས་དོན་གསལ་ལྷང་བྱུང་ཡོད།

ལོ་ངོ་ ༨༦ ནི་ལོ་རྒྱུས་ཀྱི་གྲངས་ཀ་ཙམ་ཞིག་མ་ཡིན་པར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་བ་མིའི་བཟང་སྤྱོད་དར་སྤེལ་དང་། ཆོས་ལུགས་མཐུན་སྒྲིལ། བོད་ཀྱི་ཆོས་རིག་སྲུང་སྐྱོབ། རྒྱ་གར་གྱི་གནའ་བོའི་ཤེས་རིག་བསྐྱར་གསོ་བཅས་མཛད་ཁུར་དམ་བཅའ་བཞི་ཉམས་ལེན་དང་སྐུལ་སྤེལ་གྱི་བྱུང་རབས་ཚར་དུ་དངར་བ་ཞིག་ཡིན་ལ། ༸གོང་ས་༸སྐྱབས་མགོན་མཆོག་གི་བྱམས་བརྩེའི་བསྟན་བཅོས་ཀྱིས། བྱམས་བརྩེ་དང་བཟོད་བསྲན་ནི་སྟོབས་མེད་ཀྱི་མངོན་རྟགས་མིན་པར། ནུས་སྟོབས་ཀྱི་མཚོན་རྟགས་ཡིན་པ་དུས་རབས་ ༢༡ པའི་འཇིག་རྟེན་འདིར་ར་སྤྲོད་གནང་བས། གླུ་གཞས་ཀྱི་གཟེངས་རྟགས་གྲགས་ཆེན་ (68th Annual Grammy Awards) ནས་ཀྱང་འདི་ཟླའི་ཚེས་ ༡ ཉིན་གཟེངས་བསྟོད་ཕུལ་ཡོད་ལ། ༸མགོན་པོ་གང་ཉིད་ཀྱི་སྐུ་ཚེ་ཧྲིལ་པོའི་བྱམས་བརྩེ་དང་ཤེས་རབ་ཀྱི་ཉམས་ལེན་དང་གདམ་ངག་ལ་བརྟེན་ནས། འགྲོ་བ་མིའི་དཔལ་ཡོན་ལ་འཛད་མཐའ་མེད་པའི་འོད་སྣང་སྦྱིན་ཡོད་པ་དང་། བོད་ཀྱི་གནད་དོན་འདི་ཆབ་སྲིད་ཀྱི་མངོན་འདོད་རྐྱང་པ་ཞིག་ནས། འཛམ་གླིང་ཞི་བདེ་དང་། ཆོས་ལུགས་འཆམ་མཐུན། ཁོར་ཡུག་སྲུང་སྐྱོབ་སོགས་འགྲོ་བ་མི་ཐུན་མོང་གི་རེ་སྙེགས་ཀྱི་མཐོ་ཚད་བར་སྤར་གནང་ཡོད།

ལོ་ངོ་འདི་དག་ནི་ང་ཚོ་བཙན་བྱོལ་བོད་མི་ཚོར་མཚོན་ན། ༸མགོན་པོ་མཆོག་གིས་ང་ཚོའི་ཆེད་དུ་དུས་ཚོད་དང་འགྲན་རྒྱུགས་ཀྱི་བྱུང་རབས་ཤིག་ཀྱང་ཡིན་ཞིང་། ངོ་ཤེས་པ་གནམ་དང་ས་ལས་མེད་པའི་བཙན་བྱོལ་གྱི་ལོ་ཟླའི་ནང་། ང་ཚོའི་སྐད་ཡིག་དང་། ཆོས་ལུགས། རིག་གཞུང་། མི་རིགས་ཀྱི་ཆེ་མཐོང་ད་ལྟའི་བར་དུ་སྲུང་ཉར་ཐུབ་སྟེ། འཛམ་གླིང་ཤར་ནུབ་ཀྱི་གྲོང་དང་གྲོང་ཁྱེར་འདྲ་མིན་དུ་གནས་འཁོད་ངེད་ཅག་ཚང་མས་དེང་སང་སྤོབས་པའི་ཐོག་ནས་ང་བོད་པ་ཡིན་ཞེས་གསུང་ཕོད་ཀྱི་ཡོད་པ་འདི་དང་། བོད་ནང་བོད་མི་རིགས་རྩ་མེད་གཏོང་རྒྱུའི་རྒྱ་གཞུང་གི་དྲག་ཆར་རླུང་འཚུབ་ལྟ་བུའི་ཆབ་སྲིད་ལས་འགུལ་དང་། སྲིད་ཇུས་གང་གིས་ཀྱང་བོད་མི་རིགས་ཀྱི་ཐུན་མོང་མ་ཡིན་པའི་ངོ་བོ་གཅེས་ཉར་གྱི་སེམས་ཤུགས་གཅོག་ཐུབ་ཀྱི་མེད་པ་འདིའང་༸མགོན་པོ་མཆོག་གི་ཐབས་མཁས་ཐུགས་རྗེའི་བྱིན་རླབས་ལ་བརྟེན་ནས་བྱུང་བ་ཞིག་ཡིན་པ་ང་ཚོ་ཚང་མས་དུས་དང་རྣམ་པ་ཀུན་ཏུ་བཀའ་དྲིན་རྗེས་དྲན་ཞུ་དགོས། ཞེས་འཁོད་འདུག

༸སྐྱབས་རྗེ་ཟམ་གདོང་རིན་པོ་ཆེ་མཆོག་གིས། ༸གོང་ས་རྒྱལ་བ་རིན་པོ་ཆེ་མཆོག་གི་གསེར་ཁྲི་མངའ་གསོལ་ནི་ལོ་རྒྱུས་ཐོག་བོད་མི་ཙམ་མ་ཡིན་པར་འཛམ་གླིང་ཡོངས་ཀྱི་ཆེད་དུ་དུས་ཚིགས་ཁྱད་པར་ཅན་ཞིག་ཡིན། འཛམ་གླིང་གི་འགྱུར་འགྲོས་དང་ལྷན་དུ་བོད་མི་རྣམས་ཀྱིས་དཀའ་ངལ་མང་དག་ཅིག་གདོང་ལེན་བྱས་དགོས་བྱུང་ཡོད་ཀྱང་། སྐབས་དེ་དུས་༸གོང་ས་མཆོག་གི་བཀའ་སློབ་ལམ་སྟོན་ལ་བརྟེན་ནས་བོད་མི་རྣམས་ལ་སོ་སོའི་ངོ་བོ་དང་། ཆོས། རིག་གཞུང་ཉར་ཚགས་བྱས་ཐུབ་པ་མ་ཟད། འཛམ་གླིང་ཡོངས་སུ་ཁྱབ་སྤེལ་ཐུབ་པ་བྱུང་ཡོད། དེ་རིང་བཀྲ་ཤིས་པའི་དུས་སྐབས་འདིར་ངས་༸གོང་ས་མཆོག་ལ་སྙིང་ཐག་པ་ནས་བཀའ་དྲིན་རྗེས་དྲན་ཞུ་བ་དང་། ཁོང་གི་མཛད་རྗེས་དཔག་ཏུ་མེད་པ་ལ་གུས་བཀུར་ཞུ་རྒྱུ་ཡིན། ང་ཚོས་ཆོས་ལུགས་མཐུན་སྒྲིལ་དང་ཁོར་ཡུག་སྲུང་སྐྱོབ་སྐོར་གླེང་སློང་བྱ་དགོས་ཀྱི་ཡོད་པ་རེད། ཆོས་ལུགས་དང་གནའ་བོའི་རྒྱ་གར་གྱི་རིག་གཞུང་གཉིས་ཁ་བྲལ་ཐབས་མེད་པའི་ཆ་ཤས་ཤིག་རེད། འོན་ཀྱང་འདས་པའི་དུས་རབས་བཞི་དང་ལྔའི་རིང་ཚན་རིག་དང་འཕྲུལ་རིག་ཡར་རྒྱས་ཤུགས་ཆེན་ཕྱིན་པ་ལ་བརྟེན་ནས་ཆོས་ལུགས་ཉམས་རྒུད་དུ་ཕྱིན་ཡོད་ལ། ཆོས་ལུགས་ཕན་ཚུན་མཐུན་སྒྲིལ་བྱུང་མེད་པའི་རྐྱེན་གྱིས་རྩོད་རྙོག་སོགས་བྱུང་གི་ཡོད་པ་རེད། ང་ཚོས་རྒྱ་གར་གྱི་གནའ་བོའི་རིག་གཞུང་དང་ཆོས་ལུགས་སྐོར་སློབ་སྦྱོང་ངེས་པར་དུ་བྱ་དགོས་པ་མ་ཟད། ཆོས་ལུགས་མཐུན་སྒྲིལ་དང་། ཆོས་ལུགས་ཡོངས་ལ་བརྩི་བཀུར་གཅིག་མཚུངས་ཞུ་དགོས། ཞེས་གསུངས་སོང་།

ཡང་སློབ་དཔོན་ཟམ་གདོང་རིན་པོ་ཆེ་མཆོག་གིས། འགྲོ་བ་མིའི་རིགས་ཀྱིས་འཚོ་གནས་ཀྱི་ཐབས་ལམ་ཡང་དག་ཅིག་མ་བླངས་ན་ཁོར་ཡུག་སྲུང་སྐྱོབ་བྱེད་ཐུབ་ཀྱི་མ་རེད་བསམ་གྱི་འདུག འཚོ་ཐབས་ཡང་དག་ཟེར་ན་དགོས་ངེས་ཀྱི་ཆ་རྐྱེན་ཁོ་ན་ཐོན་སྐྱེད་བྱེད་པ་དང་། དགོས་ངེས་ཡོད་པ་ཁོ་ན་བེད་སྤྱོད་གཏོང་བ་དེ་རེད། ༸གོང་ས་རྒྱལ་བ་རིན་པོ་ཆེ་མཆོག་གིས་དུས་རྟག་ཏུ་རེ་བ་ནམ་ཡང་མ་ཆད། ང་ཚོས་མུ་མཐུད་དུ་ལྷག་བསམ་རྣམ་དག་གིས་འབད་བརྩོན་བྱེད་དགོས། ཞེས་གསུངས་ཀྱི་ཡོད་པར་བརྟེན། ང་ཚོས་ཁོར་ཡུག་སྲུང་སྐྱོབ་དང་། ཁོར་ཡུག་ལ་གནོད་པའི་འཚོ་བའི་གོམས་གཤིས་བཟོ་མི་དགོས་པའི་འབོད་སྐུལ་ཞུ་རྒྱུ་ཡིན་ལ། མི་སྒེར་སོ་སོས་ཁོར་ཡུག་སྲུང་སྐྱོབ་ལ་ཕན་ཐོགས་གང་བྱེད་ཐུབ་མིན་ཐད་བསམ་གཞིག་ངེས་པར་དུ་གཏོང་དགོས། བོད་ཀྱི་ལོ་གསར་དང་༸གོང་ས་མཆོག་གསེར་ཁྲི་མངལ་གསོལ་ཞུས་ཏེ་ལོ་ངོ་ ༨༦ འཁོར་བའི་དུས་དྲན་གྱི་ཉིན་མོར་བཀྲ་ཤིས་བདེ་ལེགས་ཞུ་རྒྱུ་ཡིན། ཞེས་གསུངས་སོང་།

ཧྥི་ལི་པིན་སིའི་གྲོས་ཚོགས་འོག་མའི་འཐུས་མི་མའེ་ཁལ་ (Adrian Michael A. Amatong) ལགས་ཀྱིས། ༸གོང་ས་རྒྱལ་བ་རིན་པོ་ཆེ་མཆོག་གིས་འཚེ་མེད་ཞི་བ་དང་། འགྲོ་བ་མི་རྣམས་གཅིག་མཚུངས་ཡིན་པ་སོགས་ཐུགས་བསྐྱེད་དམ་བཅའ་བཞི་ཉམས་ལེན་གནང་མུས་ཡིན་པ་རེད། ཧྥི་ལི་པིན་སི་ནང་བཟང་སྤྱོད་ལྡན་པའི་མགོ་ཁྲིད་ཚོར་བརྩི་བཀུར་ཆེན་པོ་ཞུ་ཡི་ཡོད། ང་ཚོའི་ལོ་རྒྱུས་ཀྱིས་ང་ཚོར་རང་དབང་དང་། ངོ་བོ། རང་དབང་གཙང་མའི་བདག་དབང་བཅས་སྲུང་སྐྱོབ་དང་ཉར་ཚགས་བྱེད་དགོས་པའི་ལམ་སྟོན་བྱས་ཡོད་པ་རེད། ང་ཚོས་མི་རིགས་ཤིག་གི་སྟོབས་ཤུགས་དེ་མངའ་ཁོངས་གཅིག་པུའི་ཐོག་ནས་ཚད་འཇལ་མི་ཐུབ་པར་ཁོང་ཚོའི་སེམས་ཁམས་དང་། རིག་གཞུང་། མ་འོངས་པར་གྲུབ་འབྲས་ལེགས་པོ་ཡོང་རྒྱུའི་ཡིད་ཆེས་བྱེད་པའི་རྒྱུ་ལ་བརྟེན་ནས་ཚད་འཇལ་དགོས་པ་ཤེས་ཀྱི་ཡོད། ༸གོང་ས་མཆོག་གིས་བྱམས་སྙིང་རྗེ་ནི་སྒེར་གྱི་དགེ་མཚན་ཁོ་ན་མིན་པར་སྤྱི་ཚོགས་ལ་འགྱུར་བ་གཏོང་ཐུབ་པའི་ཤུགས་རྐྱེན་ཞིག་ཡོད་པ་དྲན་སྐུལ་གནང་ཡོད། མགོ་ཁྲིད་ཀྱི་གོ་གནས་དེ་དབང་ཆའི་ཐོག་ནས་མིན་པར་ཞབས་ཞུའི་ཐོག་ནས་ཤེས་རྟོགས་ཐུབ་ཀྱི་རེད། ཧྥི་ལི་པིན་སིའི་མི་རིགས་ཤིག་ཡིན་པའི་ཆ་ནས། རང་མི་རིགས་ཀྱི་ངོ་བོ་དང་། རིག་གཞུང་། ཞི་བདེའི་ཐོག་ནས་འཚོ་གནས་བྱ་རྒྱུའི་མི་མང་དང་མཉམ་དུ་ཡོད། ང་ཚོས་བོད་མི་རིགས་ཀྱི་བརྟན་ལྷིང་ལ་གུས་བཀུར་བྱེད་པ་དང་། ༸གོང་ས་མཆོག་གི་ཁྱད་དུ་འཕགས་པའི་མི་ཚེ་དང་མཛད་རྗེས་ལ་གུས་བཀུར་བྱེད་ཀྱི་ཡོད། ཅེས་གསུངས་སོང་།

ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ཀེ་ལ་ཤི་ (Kailash Satyarthi) ལགས་ཀྱིས། ང་རང་བཞུགས་སྒར་དང་ལྷག་པར་དུ་ཐེག་ཆེན་ཆོས་གླིང་གཙུག་ལག་ཁང་དུ་སླེབས་སྐབས་གནས་སྐོར་ལ་སླེབས་པའི་ཚོར་བ་ཡོང་གི་འདུག དེ་རིང་ལོ་ངོ་ ༨༦ འཁོར་བའི་དུས་སྟོན་སྲུང་གཙི་ཞུ་བཞིན་པ་ནི་དུས་སྟོན་ཙམ་དུ་མ་ཡིན་པར་༸གོང་ས་རྒྱལ་བ་རིན་པོ་ཆེ་མཆོག་གསེར་ཁྲིར་མངའ་གསོལ་ཞུས་པ་ནས་བཟུང་ད་བར་ལོ་ངོ་ ༨༦ རིང་འཛམ་གླིང་སྟེང་བྱམས་བརྩེ་དང་། འཚེ་བ་མེད་པའི་སྐོར་བཀའ་སློབ་ལམ་སྟོན་གནང་བཞིན་ཡོད་པ་རེད། བོད་མི་རྣམས་ཀྱི་རྒྱུད་ལ་ཡོད་པའི་སེམས་ཤུགས་དང་། ལྷག་བསམ། བྱམས་སྙིང་རྗེ་དེ་དག་གིས་འཛམ་གླིང་ཁྱོན་ཡོངས་ལ་མིག་དཔེ་དང་སེམས་སྐུལ་སྤྲོད་ཀྱི་ཡོད། ༸མགོན་པོ་གང་ཉིད་མཆོག་གི་དམིགས་ཡུལ་གཅིག་ནི་བོད་ནང་དུ་ཡོད་པའི་གནས་ཆེན་ཁག་ཏུ་གནས་སྐོར་ཕེབས་རྒྱུ་དེ་ཡིན་པ་དེ་ལྟར་བྱུང་བའི་རེ་བ་ཡོད། རྒྱུ་མཚན་ནི་དྲང་བདེན་དང་། སྙིང་རྗེའི་རྒྱལ་ཁ་ཐོབ་ངེས་རེད། ༸གོང་ས་མཆོག་གི་བྱམས་སྙིང་རྗེའི་དགོངས་པ་དེར་བོད་མི་ཁོ་ན་ཙམ་མིན་པར་འཛམ་གླིང་གི་ཆོས་ལུགས་མི་འདྲ་བའི་སྤྱི་ཚོགས་ཡོངས་ཀྱིས་རྒྱབ་སྐྱོར་བྱེད་ཀྱི་ཡོད། དེ་བཞིན་གཞུང་དང་སྲིད་དབང་སྟོབས་ཤུགས་ཅན་དང་། དཔལ་འབྱོར་དབང་ཐང་ཆེན་པོ་གང་འདྲ་ཞིག་ཡིན་རུང་། ༸གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ངོས་འཛིན་བྱེད་ཕྱོགས་ཀྱི་ཁྲིམས་མཐུན་དབང་ཆ་མེད་པ་དང་། ཡང་སྲིད་ངོས་འཛིན་གྱི་བདག་དབང་ཆ་ཚང་ཆོས་ཕྱོགས་ཀྱི་ལམ་སྲོལ་ལྟར་འགྲོ་དགོས་པའི་ནན་བརྗོད་གནང་སོང་།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱངས་གནང་བའི་ནང་། བོད་ཀྱི་ལྷ་སྐལ་སྤྱན་རས་གཟིགས་དབང་མིའི་གཟུགས་སུ་བྱོན་པའི་ཁམས་གསུམ་ཆོས་ཀྱི་རྒྱལ་པོ། འཇིག་རྟེན་ཞི་བདེའི་དེད་དཔོན། ས་སྟེང་༸རྒྱལ་བསྟན་ཡོངས་རྫོགས་ཀྱི་མངའ་བདག བོད་མི་ཡོངས་ཀྱི་མགོན་སྐྱབས། བླ་ན་མེད་པའི་དབུ་འཁྲིད། བླང་དོར་ལམ་སྟོན་པ། བོད་མིའི་ངོ་བོ་དང་། དེའི་ཆིག་སྒྲིལ་གྱི་མཚོན་རྟགས། བོད་མི་ཡོངས་ཀྱི་རང་དབང་ལྡན་པའི་མགྲིན་ཚབ་པ། སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་ལྔའི་ཐོག་བོད་ཀྱི་རྒྱལ་སར་ཕོ་བྲང་པོ་ཏ་ལར་གསེར་ཁྲིར་མངའ་གསོལ་ཞུས་ཏེ་མི་ལོ་ཧྲིལ་པོ་ ༨༦ འཁོར་བའི་སྐལ་བཟང་ཉིན་མོར་བོད་མི་རྩམ་ཟན་པ་ཡོངས་དང་། དད་ལྡན་བོད་བརྒྱུད་ནང་བསྟན་རྗེས་འཇུག་པ་རྣམས་ཀྱི་ཚབ་ཞུས་ཏེ་གུས་ཕྱག་དང་བཅས་དགའ་དད་སྤྲོ་གསུམ་གྱི་སྒོ་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ཞེས་དང་།

༸གོང་ས་མཆོག་གིས་བོད་མི་ཙམ་མ་ཟད་འགྲོ་བ་མི་སྤྱི་ལ་བདེ་སྐྱིད་དང་ཞི་བདེ་ཡོང་ཐབས་ཀྱི་ལམ་སྟོན་མཛད་ཅིང་། དེ་ཡང་རིགས་རུས་དང་། མཆོག་དམན། ཤ་མདོག་སོགས་ཀྱི་ཁྱད་མེད་ཀྱིས་འགྲོ་བ་མི་གཅིག་གྱུར་གྱི་འདུ་ཤེས་དགོས་པ་དང་། འཛམ་གླིང་ཞི་བདེ་ཡོང་ཐབས་སུ་དང་པོ་རང་ཉིད་ནས་ནང་སེམས་ཀྱི་ཞི་བདེ་ཡོང་ཐབས་བྱ་དགོས་པ་ལས་ཕྱིའི་དངོས་པོའི་མཐུན་རྐྱེན་ཙམ་གྱིས་ཞི་བདེ་ཡོང་མི་ཐུབ་པ་དང་། སྤྱི་ཚོགས་ནང་དཀའ་རྙོག་ཆེ་ཆུང་གང་ཞིག་ཡིན་ཡང་སྟོབས་ཆེ་ཆུང་དང་གོ་མཚོན་བེད་སྤྱོད་ཀྱིས་དམག་འཐབ་དང་འཁྲུག་འཛིང་མེད་པར་ཕན་ཚུན་གྲོས་མོལ་གྱི་ལམ་ནས་དཀའ་ངལ་ཐག་གཅོད་ཡོང་ཐབས་བྱ་དགོས་པའི་ལམ་སྟོན་གནང་ཞིང་བོད་དོན་འཐབ་རྩོད་ཀྱང་འཚེ་མེད་ཞི་བའི་ལམ་ནས་རྒྱ་ནག་གཞུང་མཉམ་འབྲེལ་ལམ་གྱིས་དཀའ་རྙོག་སེལ་ཐབས་ལ་འབད་བརྩོན་གནང་ཡོད།

དེང་གི་ཚན་རིག་དང་ནང་ཆོས་དབར་ལོ་ངོ་སུམ་ཅུ་ལྷག་བགྲོ་གླེང་དང་གོ་བསྡུར་གནང་ཞིང་སྙན་གྲགས་ཅན་གྱི་ཚན་རིག་པ་མང་པོ་ཞིག་གིས་ནང་ཆོས་ནས་བཤད་པའི་སེམས་སེམས་བྱུང་དང་། དྲན་པ་ཉེར་བཞག་བཞི་སོགས་ནས་དམིགས་བསལ་སེམས་ཀྱི་བདེ་སྐྱིད་ལ་ཕན་ཐོགས་ཡོང་བའི་ར་སྤྲོད་བྱས་ཤིང་། ༸གོང་ས་མཆོག་གི་མཁྱེན་བརྩེའི་ཡོན་ཏན་དང་། རླབས་ཆེན་གྱི་དགོངས་གཞི་ལ་བསྔགས་བརྗོད་ཡི་རང་ཞུ་བཞིན་པ་དང་། འཛམ་གླིང་ནང་ཆོས་ལུགས་དང་བཟང་སྤྱོད་ཀྱི་ནང་དོན་ལ་ཤུགས་རྐྱེན་ཆེ་ཤོས་ཐེབས་མཁན་དང་། ཚན་རིག་དང་ཆོས་ལུགས་ཟུང་འབྲེལ་གྱིས་མིའི་རིགས་ཀྱི་བདེ་སྐྱིད་དང་ཤེས་རབ་གོང་འཕེལ་གཏོང་མཁན་གྱི་རླབས་ཆེན་མི་སྣ་ཞིག་ལ་ངོས་འཛིན་གྱིས་ཕྱི་ལོ་ ༢༠༡༢ ལོར་ཆོས་ལུགས་དང་འབྲེལ་བའི་གཟེངས་རྟགས་སྙན་གྲགས་ཆེ་ཤོས་ཊེམ་པལ་ཊོན་གཟེངས་རྟགས་ (The Templeton Prize) སོགས་གཟེངས་རྟགས་བརྒྱ་ཕྲག་མང་པོ་འབུལ་བཞེས་བྱུང་ཡོད། ཉེ་ཆར་ཕྱི་ཟླ་ ༢ ཚེས་ ༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གྷ་རམ་མི་ (Grammy Award) གཟེངས་རྟགས་འབུལ་བཞེས་གནང་བ་གོ་སྐབས་འདི་བརྒྱུད་ནས་འཚམས་འདྲི་ཞུ་རྒྱུ་དང་། གཟེངས་རྟགས་འབུལ་བཞེས་གནང་བ་འདི་ནི་༸གོང་ས་མཆོག་སྐུ་སྒེར་གྱི་མཛད་རྗེས་ཙམ་ལ་མ་ཡིན་པར། འདིས་བོད་མི་རིགས་ཀྱི་ཆོས་དང་། རིག་གཞུང་། སྐད་ཡིག་བཅས་ནི་འཛམ་གླིང་ནང་རིན་ཐང་ཆེ་བའི་གཅེས་ནོར་ཞིག་ཡིན་པ་སླར་ཡང་ར་སྤྲོད་བྱས་ཤིང་། ༸གོང་ས་མཆོག་གི་བྱམས་བརྩེའི་བཀའ་སློབ་དང་། འགྲོ་བ་མི་གཅིག་གྱུར་གྱི་འདུ་ཤེས། ཆོས་ལུགས། ཁོར་ཡུག འགྲོ་བ་མིའི་བཟང་སྤྱོད་བཅས་ཀྱི་ལམ་སྟོན་དེས་འཛམ་གླིང་སྤྱི་དང་། རང་ཅག་བོད་མི་རྣམས་ལ་དགོས་མཁོ་གལ་ཆེ་ཞིག་ཆགས་ཡོད་པས་རང་ཅག་རྣམས་ཀྱིས་ཉམས་ལེན་ལག་བསྟར་ཞུ་དགོས་པ་གལ་ཆེ་ཆགས་ཡོད།

༸གོང་ས་མཆོག་གི་ཐུགས་བསྐྱེད་དམ་བཅའ་བཞིའི་ནང་ནས་ཆོས་ལུགས་མཐུན་འབྲེལ་གལ་ཆེར་བརྩི་བཞིན་པ་དང་། གང་ཉིད་སྟོན་པ་བཅོམ་ལྡན་འདས་ཀྱི་རྗེས་འབྲངས་ནང་པའི་དགེ་སློང་ཞིག་ཡིན་པའི་ཆ་ནས་འཛམ་གླིང་ནང་ཆོས་ལུགས་མི་འདྲ་བ་མང་ཡང་དེ་དག་གིས་ཆོག་ཤེས་དང་། བྱམས་བརྩེ། བཟོད་སྒོམ་སོགས་གཅིག་གྱུར་ཉམས་ལེན་ལག་བསྟར་གྱིས་འགྲོ་བའི་ཁམས་དང་མོས་པར་འཚམ་པའི་ཕན་ཐོགས་ཡོང་བཞིན་ཡོད་པས་ཕན་ཚུན་གུས་བཀུར་དགོས་པ་ལས་སྤྱི་ཚོགས་ནང་ཆོས་ལུགས་ཀྱི་དབང་གིས་འཁྲུག་རྩོད་བྱེད་པ་ནི་ཐབས་སྡུག་གི་བྱ་བ་ཞིག་ཡིན་པ་གསུང་བཤད་ནན་ཏན་མང་པོ་གནང་ཡོད། ཅེས་སོགས་འཁོད་འདུག

གསར་འགོད་པ། བསྟན་འཛིན་ཕུར་བུ།