༧གོང་ས་མཆོག་ནས་བསྒྲུབ་བྱ་ཕོ་མོ་གྲངས་དྲུག་ཅུ་རེ་གསུམ་ལ་བར་མ་རབ་བྱུང་དང་དགེ་ཚུལ་གྱི་བསླབ་སྡོམ་སྩལ། 

༧གོང་ས་མཆོག་ནས་བསྒྲུབ་བྱ་ཕོ་མོ་གྲངས་དྲུག་ཅུ་རེ་གསུམ་ལ་བར་མ་རབ་བྱུང་དང་དགེ་ཚུལ་གྱི་བསླབ་སྡོམ་སྩལ་གནང་མཛད་དེ་བདག་ཅག་གི་སྟོན་པ་བཅོམ་ལྡན་འདས་ཀྱི་རྗེས་འབྲངས་རྣལ་མ་ཞིག་གནང་དགོས་སྐོར་སོགས་གསུངས་འདུག

དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་བཞུགས་སྒར་རྒྱལ་བའི་ཕོ་བྲང་དུ་བསྒྲུབ་བྱ་ཕོ་མོ་གྲངས་དྲུག་ཅུ་རེ་གསུམ་ལ་བར་མ་རབ་བྱུང་དང་དགེ་ཚུལ་གྱི་བསླབ་སྡོམ་སྩལ་ཡོད་ཅིང་། སྐབས་དེར་༧མགོན་པོ་གང་ཉིད་ཀྱིས་བཅོམ་ལྡན་འདས་ཀྱི་རྗེས་འབྲངས་རྣལ་མ་ཞིག་ཡིན་བསམ་པའི་སེམས་ཤུགས་དང་འདུ་ཤེས་སྐྱེད་དགོས་སྐོར་སོགས་གསུངས་འདུག 

༧གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་སངས་རྒྱས་པའི་ཆོས་ལ་ཞུགས་ནས་དགེ་ཚུལ་སློང་བསྒྲུབས་ནས། བཅོམ་ལྡན་འདས་ཀྱི་རྗེས་འབྲངས་རྣལ་མ་ཞིག་བྱེད་ཀྱི་ཡིན་བསམ་པ་ཞིག་གི་སེམས་ཤུགས་ཡག་པོ་ཞིག་སྐྱེད། དཔེར་ན། ངོས་རང་ལ་ཆ་བཞག་ནའང་བཅོམ་ལྡན་འདས་ཀྱི་རྗེས་འབྲངས་དགེ་སློང་ཡིན་བསམ་པ་དེས། ཞོགས་པ་གཉིད་སད་པ་དང་ང་བཅོམ་ལྡན་འདས་ཀྱི་རྗེས་འབྲངས་དགེ་སློང་ཞིག་ཡིན་བསམ་པའི་བསམ་བློ་དེ་རྟག་པར་འཁོར་གྱི་ཡོད། བྱས་ཙང་ང་རང་ཚོ་བཅོམ་ལྡན་འདས་ཀྱི་རྗེས་འབྲངས་དགེ་སློང་ཞིག་ཡིན་བསམ་པའི་འདུ་ཤེས་གསལ་པོ་ཞིག་སེམས་ནང་དུས་བརྟན་དུ་བཅངས་ནས་བསྡད་པ་ཡིན་ན། དེའི་ཚོད་ཀྱིས་ཕན་ཡོན་ཆེན་པོ་ཞེ་དྲགས་རེད། ད་ལྟ་སྐབས་སུ་བབ་པ་ཚེ་དང་ལྡན་པའི་དགེ་འདུན་ལ་རབ་བྱུང་ཞུ་བའི་གྲོགས་བསྟེན་མཛོད། ཅེས་གསུངས།

ཡང་༧མགོན་པོ་གང་ཉིད་ཀྱིས། ད་ཁྱེད་རང་ཚོས་ཁྱིམ་པའི་གོས་དཀར་པོ་ཞིག་གྱོན་ནས། བསམ་བློ་ཐར་པ་དང་ཐམས་ཅད་མཁྱེན་པའི་གོ་འཕང་དེ། ཚེ་འདི་ལ་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་སྒོ་ནས་ཐར་པའི་གོ་འཕང་སྒྲུབས་བསམ་པའི་སེམས་ཤུགས་སྐྱེད་པའི་དོན་དུ། སྔོན་ལ་ཁྱིམ་པའི་གོས་དཀར་པོ་ཞིག་དཔྱངས་དགོས་པ་རེད། མདོ་སྔགས་ཟུང་འབྲེལ་གྱི་ཐོག་ནས་ཚེ་གཅིག་ལུས་གཅིག་ལ་སངས་རྒྱས་ཐུབ་པའི་ཆོས་ཚུལ་བཟང་པོ་ཞིག་ང་ཚོ་བོད་ལ་ཡོད་པ་རེད། ཅེས་གསུངས།

ཡང་༧གོང་ས་རྒྱལ་བ་རིན་པོ་ཆེ་མཆོག་ནས། རང་བྱུང་བསྒྲུབ་མཁན་གྱི་མཁན་པོས་གང་བྱུང་བྱུང་གིས་རྟགས་དང་ཆ་ལུགས་བརྗེས་པ་ཙམ་གྱིས་ཡོང་གི་ཡོད་མ་རེད། གང་ལྟར་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་སྟོན་པའི་བཀའ་ཚུལ་བཞིན་སྒྲུབ་མཁན་ཞིག དཔེར་ན། ངོས་རང་ལ་ཆ་བཞག་ན་ཞོགས་པ་གཉིད་སད་པ་དང་སྟོན་པ་བཅོམ་ལྡན་འདས་དྲན་པའི་ཐོག་ནས། བཅོམ་ལྡན་འདས་ཀྱི་རྗེས་འབྲངས་རྣལ་མ་ཞིག་བྱ་བསམ་པ་ཞིག་གི་སེམས་ཤུགས་ཉིན་ལྟར་སྐྱེད་བསྡད་ཀྱི་ཡོད། བཙན་བྱོལ་བྱས་ནས་རང་དབང་ལུང་པའི་ནང་ལ་ང་ཚོ་སངས་རྒྱས་པའི་ཆོས་དངོས་གནས་དྲང་གནས་ཉམས་ལེན་ཡག་པོ་ཞིག་བྱ་རྒྱུའི་གོ་སྐབས་ཡོད་བསྡད་པ་ཞིག་ཆགས་ཀྱི་ཡོད་རེད། བྱས་ཙང་། ཁྱེད་རང་ཚོར་གཞན་གྱིས་ཁྲིམས་བཀལ་ནས་གྲྭ་བ་བྱ་དགོས་རེད་ཟེར་གྱི་ཡོད་མ་རེད། སོ་སོའི་འདོད་པས་དང་དུ་བླངས་ནས་དངོས་གནས་དྲང་གནས་བཅོམ་ལྡན་འདས་ཀྱི་རྗེས་འབྲངས་དང་། དགེ་ཚུལ་སློང་གི་སྡོམ་པ་བླངས་ནས་སྔོན་ལ་རབ་བྱུང་ཡག་པོ་ཞིག་བྱེད་ཀྱི་ཡིན་བསམ་པའི་སེམས་ཤུགས་སྐྱེད་རྒྱུ་གལ་ཆེན་པོ་རེད། ཅེས་གསུངས་སོང་། 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།