ཉི་ཧོང་བོད་དོན་རྒྱབ་སྐྱོར་ཚོགས་པའི་ལོ་འཁོར་ཚོགས་ཆེན་སྟེང་རྒྱ་ནག་གིས་༸གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ཐད་ཐེ་ཇུས་བྱེད་མི་ཆོག་པ་སོགས་ཀྱི་གྲོས་ཆོད་གཏན་འབེབས་གནང་།
ཕྱི་ཟླ་ ༢ ཚེས་ ༢༨ ཉིན་དྲ་ཐོག་ནས་ཉི་ཧོང་་བོད་དོན་རྒྱབ་སྐྱོར་ཚོགས་པའི་ལོ་འཁོར་ཚོགས་ཆེན་འཚོགས་ཡོད་ཅིང་། སྐབས་དེར་ཉི་ཧོང་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཟུར་པ་མཱ་ཀི་ནོ་ (Makino Seishu) མཆོག་དང་། དྲུང་ཆེ་ཡཱ་མཱ་ཌ་ཧི་རོ་ཤི་ (Yamada Hiroshi) ལགས། དྲུང་ཆེ་ཟུར་པ་ན་གྷའོ་ (Nagao Takshi) ལགས། ཕྱི་དྲིལ་ལས་ཁུངས་ཀྱི་དྲུང་ཆེ་ཀརྨ་ཆོས་དབྱིངས་ལགས། ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས། ཉི་ཧོང་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་ཅིག་བཅས་མཉམ་ཞུགས་གནང་ཡོད་འདུག
ཐེངས་འདིའི་ཚོགས་ཆེན་ཐོག་གྲོས་ཆོད་དོན་ཚདན་གསུམ་གཏན་འབེབས་བྱུང་ཡོད་པ་ནི། ༡། རྒྱ་ནག་གིས་བོད་ནང་གི་བོད་ཕྲུག་རྣམས་བཙན་གྱིས་གཏན་འཇགས་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་བཞིན་པ་དེ་མཚམས་འཇོག་དགོས་པ། ༢། རྒྱ་ནག་གིས་བོད་ནང་གི་བོད་མི་རྣམས་ཀྱི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པ་དེ་དག་མཚམས་འཇོག་བྱས་ཏེ་བོད་མི་རྣམས་ལ་ཐོབ་ཐང་ཆ་ཚང་སྤྲོད་དགོས་པ། ༣། རྒྱ་ནག་གིས་༸གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་གནད་དོན་ཐད་ཐེ་ཇུས་བྱེད་མི་ཆོག་པ་བཅས་དང་། དེ་བཞིན་ཉི་ཧོང་གཞུང་དང་གྲོས་ཚོགས་ལ་རེ་སྐུལ་ཞུ་རྒྱུའི་དོན་ཚན་གསུམ་ནི། དེ་སྔ་ཉི་ཧོང་གི་གྲོས་ཚོགས་ནང་བོད་པ་དང་ཡུ་གུར་བ་རྣམས་ཀྱི་ཆེད་དུ་བསྒྲགས་གཏམ་སྤེལ་ཡོད་པ་རེད། ད་ལན་དེ་ལས་ལྷག་པ་གནད་དོན་གསལ་སྟོན་བྱས་ཏེ་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་དེ་དག་འགྲིག་གི་མེད་པ་སོགས་ཐེར་འདོན་དང་། ཉི་ཧོང་གཞུང་གིས་ཉི་ཧོང་ནང་བོད་དོན་དམིགས་བསལ་འབྲེལ་མཐུད་པ་བསྐོ་གཞག་དགོས་པ། རྒྱ་ནག་གིས་༸གོང་ས་མཆོག་གི་ཡང་སྲིད་གནད་དོན་ཐད་ཐེ་ཇུས་བྱ་རྒྱུ་མཚམས་འཇོག་དགོས་པ་སོགས་བཀོད་ཡོད་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་སུ་འདས་ལོར་ཉི་ཧོང་ནང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་ ༩ བསྡུས་ཡོད་པ་དེས་སྔར་ལས་ནུས་པ་ཅི་ཙམ་ཐོན་ཡོད་མེད་སྐོར་དྲིས་པར་ཁོང་གིས། འཛམ་གླིང་ནང་གྲོས་ཚོགས་འཐུས་མི་བོད་དོན་སྐོར་ལ་རྒྱབ་སྐྱོར་གནང་མཁན་མང་ཤོས་ཉི་ཧོང་ཆགས་ཀྱི་ཡོད་པ་རེད། ད་ལན་ཕྱི་ཟླ་ ༢ ཚེས་ ༢༨ ཉིན་ཉི་ཧོང་ནང་བོད་དོན་རྒྱབ་སྐྱོར་ཚོགས་པ་ ༡༦ ཙམ་ཡོད་པ་རྣམས་ལོ་འཁོར་ཚོགས་ཆེན་འཚོགས་ཡོད་པ་དང་། འདས་ལོའི་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དགུ་པའི་སྐབས་གྲོས་ཆོད་བཞག་པ་དེ་དག་ཚགས་ཚུད་པ་ཡོང་བའི་རྒྱུ་རྐྱེན་གཙོ་བོ་ནི་ཉི་ཧོང་ནང་ཡོད་པའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཀྱིས་རྒྱབ་སྐྱོར་ཤུགས་ཆེན་གནང་བ་རེད། ད་ལྟའི་ཚོགས་ཆེན་ནང་མཉམ་ཞུགས་གནང་མཁན་མང་ཆེ་བ་བོད་དོན་རྒྱབ་སྐྱོར་ཚོགས་པའི་ཚོགས་མི་ཡིན་པ་དང་། ཚོགས་མི་དྲུག་གིས་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུའི་ནང་མཉམ་ཞུགས་གནང་རྒྱུའི་ཐུགས་ཐག་བཅད་སོང་། ད་ལན་སྔར་དང་མི་འདྲ་བའི་ཀོ་རི་ཡ་ནས་ཚོགས་མི་གཉིས་མཉམ་ཞུགས་བྱ་རྒྱུ་རེད། ཅེས་འགྲེལ་བརྗོད་གནང་བྱུང་།
ཉི་ཧོང་ནང་བོད་དོན་རྒྱབ་སྐྱོར་ཚོགས་པའི་གནས་སྟངས་དང་འབྲེལ་ནས་ཨརྱ་ཚེ་དབང་རྒྱལ་པོ་ལགས་ཀྱིས། ད་ལྟའི་ཆར་ཉི་ཧོང་ནང་བོད་དོན་རྒྱབ་སྐྱོར་ཚོགས་པའི་གནས་སྟངས་ཡག་པོ་ཆགས་ཡོད་པ་རེད། ཉེ་སྔོན་ཕྱི་ཟླ་ ༢ པའི་ནང་ཉི་ཧོང་གི་རྒྱལ་ཡོངས་ཀྱི་འོས་བསྡུའི་ནང་བོད་དོན་རྒྱབ་སྐྱོར་བྱེད་མཁན་མང་པོ་ཞིག་ལ་རྒྱལ་ཁ་ཐོབ་ཡོད་པར་བརྟེན། ང་རང་གྲོས་ཚོགས་སུ་བཅར་སྐབས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་དེ་ལས་མང་དུ་འགྲོ་རྒྱུའི་གཞི་ཞིག་ཆགས་ཀྱི་ཡོད་སྐོར་འགྲེལ་བརྗོད་གནང་བྱུང་། དེ་སྔ་ཉི་ཧོང་ནང་བོད་དོན་རྒྱབ་སྐྱོར་ཚོགས་པ་ ༦ ཙམ་ལས་མེད་ཀྱང་། རིམ་པས་མང་དུ་ཕྱིན་ཏེ་ད་ལྟའི་ཆར་བོད་དོན་རྒྱབ་སྐྱོར་ཚོགས་པ་ ༡༦ ཡོད་པ་རེད། རྒྱུ་མཚན་ནི་གྲོས་ཚོགས་ཀྱི་ཐོག་ནས་བོད་དོན་ལ་རྒྱབ་སྐྱོར་ཤུགས་ཆེན་གནང་བ་དང་། ༸གོང་ས་རྒྱལ་བ་རིན་པོ་ཆེ་མཆོག་ནས་གསུང་འཕྲིན་བསྩལ་བ་ལྟར། བོད་དོན་དང་འཛམ་གླིང་གི་དཀའ་རྙོག་གང་འདྲ་ཞིག་ཡིན་རུང་མཚོན་ཆ་བེད་སྤྱོད་བྱེད་མི་དགོས་པར་འཚེ་མེད་ཞི་བའི་ཐོག་ནས་སེལ་ཐབས་དགོས་སྐོར་གསུངས་པ་དེ་རླབས་ཆེན་པོ་འདུག་བསམས་ནས་བོད་དོན་ལ་རྒྱབ་སྐྱོར་བྱེད་མཁན་ཇེ་མང་དུ་ཕྱིན་སོང་། ཞེས་བརྗོད་བྱུང་།
ཕྱི་ལོ་ ༡༩༩༠ ནས་ཉི་ཧོང་ནང་བོད་དོན་རྒྱབ་སྐྱོར་ཚོགས་པ་གསར་འཛུགས་ཀྱི་མགོ་བརྩམས་ཡོད་ཅིང་། བོད་དང་ཉི་ཧོང་བར་གི་འབྲེལ་བ་དེ་༸གོང་ས་སྐུ་ཕྲེང་བཅུ་གསུམ་པའི་སྐབས་ནས་བྱུང་ཡོད་པ་རེད། ཕྱི་ལོ་ ༡༩༦༧ ནས་ད་ལྟ་བར་དུ་༧གོང་ས་རྒྱལ་བ་རིན་པོ་ཆེ་མཆོག་ཐེངས་ ༢༥ ལྷག་ཉི་ཧོང་ནང་ཆིབས་བསྒྱུར་བཀའ་དྲིན་བསྐྱངས་ཡོད་ལ། རྒྱལ་སྤྱིའི་ཐོག་བོད་དོན་རྒྱབ་སྐྱོར་ཚོགས་པ་མང་ཤོས་ཀྱི་རྒྱལ་ཁབ་ཅིག་ཆགས་བསྡད་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
