ཐའེ་ཝན་དུ་གསུམ་བཅུའི་དུས་དྲན་དང་འབྲེལ་ནས་གསར་འགོད་གསལ་བསྒྲགས་ཤིག་སྤེལ།

ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ཁྲིན་ཁྲོ་ཙུའུ་ལགས་ཀྱིས་ཉིན་གཅིག་ཐའེ་ཝན་ནང་བོད་ནང་བཞིན་དཀའ་ངལ་འཕྲད་སྲིད་པ་དེ་ཤེས་ཀྱི་མེད་མདོག་བྱས་ན་འགྲིག་གི་མེད་སྐོར་གསུངས་འདུག

བོད་ཀྱི་གསུམ་བཅུའི་དུས་དྲན་བསླེབ་ལ་ཉེ་བ་དང་བསྟུན། དེ་རིང་ཕྱི་ཚེས་ ༤ ཉིན་གྱི་སྔ་དྲོ་ཆུ་ཚོད་ ༡༠ པའི་ཐོག་ཐའེ་ཝན་གྱི་རྒྱལ་ས་ཐའེ་པེའི་གྲོས་ཚོགས་ཁང་གི་མདུན་དུ། བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་གོ་སྒྲིག་འོག ཡང་སྲིད་ངོས་འཛིན་བདག་དབང་བརྟན་སྲུང་དང་རྒྱལ་མཚམས་ལས་བརྒལ་བའི་དྲག་གནོན་ལ་ངོ་རྒོལ་ཞེས་པའི་གསར་འགོད་གསར་བསྒྲགས་ཤིག་སྤེལ་ཡོད་ཅིང་། ཚོགས་ཐོག་ཏུ་ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ཁྲིན་ཁྲོ་ཙུའུ་ (Chen chao tzu) ལགས་དང་། ས་གནས་གྲོས་ཚོགས་འཐུས་མི་ལིན་ལིང་ཁྲོན་ (lin liang chun) ལགས། ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས། བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་དྲུང་ཆེ་བཀྲ་ཤིས་ཚེ་རིང་ལགས། ཐའེ་ཝན་བོད་རིགས་ཚོགས་པའི་ཚོགས་གཙོ་དཀོན་མཆོག་ལྷག་པ་ལགས། དེ་བཞིན་ཐའེ་ཝན་གྱི་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་བཅས་མཉམ་ཞུགས་གནང་ཡོད་འདུག

དེའི་སྐོར་ལ་བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་དྲུང་ཆེ་བཀྲ་ཤིས་ཚེ་རིང་ལགས་ཀྱིས་འདི་གའི་གསར་འགོད་པར། གསར་འགོད་གསལ་བསྒྲགས་དེ་ནི་འདི་ལོའི་ཐའེ་པེའི་གསུམ་བཅུ་དུས་དྲན་གྱི་གོམ་བགྲོད་ཆེད་དུ་དམིགས་པ་ཞིག་ཡིན། ཟླ་འདིའི་ཕྱི་ཚེས་ ༧ ཉིན་ཐའེ་ཝན་གྱི་རྒྱལ་ས་ཐའེ་པེ་མི་མང་འཛོམས་ས་ནས་མགོ་བཙུགས་ཏེ་ཐའེ་ཝན་གྱི་ཁང་རྩེག་མཐོ་ཤོས་མདུན་བར་དུ་གོམ་བགྲོད་བྱ་རྒྱུ་ཡིན། རྒྱལ་ཁབ་གཞན་དུ་རྒྱ་ནག་གཞུང་ཚབ་ཁང་གི་མདུན་དུ་སྐད་འབོད་ཞུ་སྲོལ་ཡོད་ཀྱང་། ཐའེ་ཝན་དུ་རྒྱ་ནག་གཞུང་གི་ལས་ཁུངས་མེད་པས།ཐའེ་ཝན་ཡོད་པའི་རྒྱ་ནག་གི་དངུལ་ཁང་གི་མདུན་དུ་སྐད་འབོད་ཞུ་ཡི་ཡོད། ཁང་རྩེག་མཐོ་ཤོས་འདིའི་མདུན་དུ་རྒྱ་ནག་གི་ཡུལ་སྤྲོ་འཆམ་པ་མང་པོ་འཛོམས་ཡོད་པ་དམིགས་ནས་ལས་འགུལ་སྤེལ་གྱི་ཡོད། ཅེས་དང་། བོད་དང་འགྲོ་བ་མིའི་ཐོབ་ཐང་འབྲེལ་མཐུད་ཁང་ཐོག་མར་བཙུགས་པའི་དམིགས་ཡུལ་དེ་བོད་པའི་འཐབ་རྩོད་དང་བདེན་མཐའ་གསལ་བའི་ཆེད་དུ། ལངས་ཕྱོགས་གང་ཡིན་ཡང་དབྱེ་བ་མེད་པའི་ཐོག་ནས་༧གོང་ས་མཆོག་གི་བཀའ་དགོངས་ཅི་སྒྲུབ་གནང་མཁན་ཡིན་ཚེ། ང་ཚོའི་ངོས་ནས་རྒྱབ་སྐྱོར་བརྒྱ་ཆའི་བརྒྱ་ཞུ་བཞིན་ཡོད། དེ་ཡང་ལོ་བཅུའི་རིང་བོད་ཀྱི་བུད་མེད་ཚོགས་པ་དང་། བོད་ཀྱི་གཞོན་ནུ་ལྷན་ཚོགས། རྒྱལ་སྤྱིའི་དབུ་མའི་ལམ་ལས་འགུལ་ཁང་། བོད་རང་བཙན་སློབ་ཕྲུག་ཚོགས་པ་སོགས་སུ་ཕྱག་རོགས་ཞུ་ཐུབ་པ་དེ་ཞུས་ཡོད། བོད་ཀྱི་རྩ་དོན་ཆེད་ལངས་ཕྱོགས་དབྱེ་བ་མེད་པའི་ཐོག་ཁ་ཞེ་གཉིས་མེད་ཀྱི་ཕྱག་ལས་གནང་མཁན་ཡིན་ཚེ་མུ་མཐུད་དུ་རྒྱབ་སྐྱོར་ཞུ་རྒྱུ་ཡིན། ཞེས་འགྲེལ་བརྗོད་གནང་བྱུང་།

སྐབས་དེར་ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ཁྲིན་ཁྲོ་ཙུའུ་ལགས་ཀྱིས། རྒྱ་གཞུང་གིས་བོད་ནང་གི་གཞི་རྩའི་འགྲོ་བ་མིའི་ཐོབ་ཐང་དང་། བོད་ཀྱི་ཆོས་དང་སྐད་ཡིག་རིག་གཞུང་སོགས་རྩ་གཏོར་གཏོང་པའི་ལས་འགུལ་མང་པོ་སྤེལ་བཞིན་ཡོད་པ་ལྟར། ཐའེ་ཝན་ནང་དུའང་རྒྱ་ནག་གིས་ཤུགས་རྐྱེན་མང་པོ་ཐེབས་བཞིན་ཡོད་པས། བོད་དོན་ཐོག་དཀའ་ངལ་འཕྲད་བཞིན་པ་དེ་རང་ཉིད་ཀྱི་དཀའ་ངལ་ཡིན་བསམ་སྟེ། ཐའེ་ཝན་གཞུང་དང་གཞུང་ཁོངས་མིན་པའི་ཚོགས་པ་ཁག དེ་བཞིན་མི་མང་ཡོངས་ཀྱིས་བོད་དོན་ཐོག་དོ་སྣང་བྱས་ནས་ནུས་པ་མཉམ་སྤུངས་བྱ་དགོས་རྒྱུ་གལ་ཆེན་པོ་རེད། ཉིན་གཅིག་ཐའེ་ཝན་ཐོག་བོད་ནང་བཞིན་དཀའ་ངལ་འཕྲད་སྲིད་པ་ཞིག་ཡིན་པས། ད་ལྟ་མིག་མཐོང་ལག་ཟིན་ཡིན་པ་དེ་ཤེས་ཀྱི་མེད་མདོག་བྱས་ཏེ་བསྡད་ན་འགྲིག་གི་མེད་སྐོར་གསུངས་འདུག

བོད་དོན་ཐོག་རྒྱུན་རིང་རྒྱབ་སྐྱོར་བྱེད་མཁན་ཐའེ་པེ་ས་གནས་གྲོས་ཚོགས་འཐུས་མི་ལིན་ལིང་ཁྲོན་ལགས་ཀྱིས། འདས་ལོའི་ཕྱི་ཟླ་ ༧ ཚེས་ ༢ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ ༸རྒྱལ་དབང་སྐུ་ཕྲེང་རྒྱུན་མཐུད་ཕེབས་ངེས་ཡིན་པའི་ཡོངས་ཁྱབ་གསལ་བསྒྲགས་མཛད་ཡོད་པ་དེར། རྒྱ་ནག་གཞུང་གིས་གནས་ཚུལ་འདྲ་མིན་སྤེལ་བྱེད་བཞིན་ཡོད་ཀྱང་། ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པ་དང་ས་གནས་གྲོས་ཚོགས་འཐུས་མི་རྣམས་ཀྱིས་རྒྱབ་སྐྱོར་ཤུགས་ཆེན་བྱེད་བཞིན་ཡོད།  དེ་བཞིན་ཐའེ་ཝན་མི་མང་ཡོངས་ཀྱིས་བོད་དོན་ཐོག་དམིགས་བསལ་ཐུགས་སྣང་གནང་རྒྱུ་གལ་ཆེན་པོ་ཡིན་སྐོར་བརྗོད་འདུག།

ཐའེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས། འདི་ལོའི་གསུམ་བཅུའི་དུས་དྲན་དེ་བོད་མིའི་རང་དབང་སྒེར་ལངས་བྱུང་ནས་ལོ་ངོ་ ༦༧ འཁོར་བཞིན་ཡོད་ཅིང་། དེ་ནི་རྒྱལ་སྤྱི་སྤྱི་ཚོགས་སོགས་སུ་འབོད་སྐུལ་ཞུས་པ་ཙམ་མ་ཡིན་པར་བོད་མི་རྣམས་ཀྱིས་དཀའ་སྡུག་མང་པོ་ཞིག་མྱངས་ཡོད། དེ་རིང་ང་ཚོས་རང་དབང་དང་དམངས་གཙོའི་ཆེད་དུ་སྐད་འབོད་བྱེད་བཞིན་ཡོད་ལ། དེ་ཡང་ཐའེ་ཝན་གྱི་མི་མང་དང་སྤྱི་ཚོགས་སུ་དྲན་སྐུལ་བྱེད་བཞིན་ཡོད། བོད་དང་ཤར་ཏུར་ཁི་སི་ཐན། སོག་པོ་སོགས་རྒྱ་ནག་གི་མནར་གཅོད་འོག་ཡོད་པའི་དཔེ་མཚོན་ལྟ་བུ་ཞིག་ཆགས་ཡོད། ཐའེ་ཝན་མི་མང་གིས་ད་ལྟ་མཐོང་བཞིན་པའི་བོད་ཀྱི་གནས་སྟངས་ལ་བསམ་བློ་ཡག་པོ་བཏང་སྟེ། མ་འོངས་བའི་ཐའེ་ཝན་གྱི་གནས་སྟངས་ཡར་རྒྱས་སུ་གཏོང་རྒྱུ་གལ་ཆེན་པོ་ཡིན་སྐོར་བརྗོད་འདུག

དེ་བཞིན་གཞུང་ཁོངས་མིན་པའི་སྐུ་ཚབ་ཡང་ཚུན་ལི་(yang Tsung li) ལགས་ཀྱིས། བོད་ཀྱི་ལོ་རྒྱུས་ནང་༧རྒྱལ་དབང་སྐུ་ཕྲེང་བཅུ་གསུམ་པའི་སྐབས་སུ་བོད་རང་བཙན་བསྐྱར་གསོ་གསལ་བསྒྲགས་གནང་ཡོད་ཅིང་། དེའི་ཐོག་ནས་བོད་ལ་རང་བཙན་དང་དམངས་གཙོའི་ཐོབ་ཐང་ཡོད་པ་ཤེས་རྟོགས་ཐུབ་ཀྱི་འདུག ད་ལྟའི་ཆར་རྒྱ་ནག་གི་མནར་གཅོད་འོག་ཏུ་ཡོད་པའི་གྲངས་ཉུང་མི་རིགས་བོད་དང་ཤར་ཏུར་ཁི་སི་ཐན་སོགས་ཐའེ་ཝན་ནང་དུ་ཡོང་སྟེ་རྒྱའི་སྐད་ཡིག་ཐོག་ནས་རྒྱ་གཞུང་ལ་ངོ་རྒོལ་བྱེད་བཞིན་ཡོད། དེ་ནི་ཐའེ་ཝན་ནང་དུ་རང་དབང་ཡག་པོ་ཡོད་པ་ལ་བརྟེན་ནས་འབྱུང་བཞིན་ཡོད་པ་ཞིག་རེད། ཐའེ་ཝན་གྱི་མ་འོངས་བའི་རང་དབང་ཐོག་བསམ་བློ་གཏོང་དགོས་ཚེ། ད་ལྟ་ནས་མགོ་བརྩམས་ཏེ་བོད་དོན་ཐོག་རྒྱབ་སྐྱོར་བྱ་རྒྱུ་གལ་ཆེན་པོ་ཡིན་སྐོར་བརྗོད་འདུག

ཕྱི་ལོ་ ༢༠༡༦ ལོར་བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་བཙུགས་ཤིང་། འབྲེལ་མཐུད་ཁང་གི་རྒྱུན་ལས་ཕལ་ཆེ་བ་གཞུང་ཁོངས་མིན་པའི་ཚོགས་པ་ཁག་གི་འགན་འཛིན་ཆགས་ཡོད། ལས་འགུལ་འདིའི་ནང་དུ་གཞུང་ཁོངས་མིན་པའི་ཚོགས་པ་ ༡༢ ལྷག་མཉམ་ཞུགས་གནང་གི་ཡོད་ཅིང་། མཉམ་ཞུགས་པ་ཕལ་མོ་ཆེ་སློབ་ཆེན་གྱི་དགེ་རྒན་དང་གཞོན་སྐྱེས་ཡིན་པ་མ་ཟད། ཉི་ཧོང་གི་མི་ཁག་ཅིག་ཀྱང་མཉམ་ཞུགས་བྱས་ཡོད་འདུག་ལ། ལས་འགུལ་སྤེལ་ཐེངས་རེར་མི་གྲངས་ ༢༠ ནས་ ༣༠ བར་མཉམ་ཞུགས་བྱེད་ཀྱི་ཡོད་འདུག གཙོ་བོ་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་ལ་བརྟེན་ནས་བཙན་བྱོལ་ནང་བོད་མི་ཚོས་དམངས་གཙོ་ལོངས་སུ་སྤྱོད་བཞིན་ཡོད་པ་ངོ་སྤྲོད་དང་། བོད་དང་རྒྱ་ནག་ནང་དུ་འགྲོ་བ་མིའི་ཐོབ་ཐང་དང་དམངས་གཙོ། རང་དབང་མེད་པར་གདུག་རྩུབ་དང་མནར་གཅོད་གཏོང་བཞིན་ཡོད་པའི་གནས་སྟངས་རྣམས་རྒྱ་ནག་ནས་ཡོང་བའི་རྒྱ་མི་དང་། ཐའེ་ཝན་མི་མང་ནང་གོ་རྟོགས་སྤེལ་བཞིན་ཡོད་པ་ཞིག་ཡིན་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།