ཨི་ཊ་ལིའི་ནང་རྒྱ་ནག་གི་མི་སེར་བརྒྱད་ཀྱིས་རྒྱ་ནག་གི་ཕྱི་སྡོད་ཉེན་རྟོག་པར་རྒྱབ་སྐྱོར་ཏེ་རྒྱལ་མཚམས་ལས་བརྒལ་བའི་དྲག་གནོན་གྱི་བྱ་སྤྱོད་སྤེལ་བར་བརྟེན། ཨི་ཊ་ལིའི་གཞུང་གིས་རྒྱ་མི་དེ་དག་ཨི་ཊ་ལི་ནས་ཕྱིར་ཕུད་བཏང་ཡོད་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཡུ་རོབ་རྒྱལ་ཁབ་ཨི་ཊ་ལི་གཞུང་གིས་རྒྱལ་ཁབ་ཀྱི་བདེ་འཇགས་ལ་ཉེན་ཁ་བསྐྲུན་གྱི་ཡོད་པའི་ངོས་འཛིན་འོག་རྒྱ་ནག་གི་མི་སེར་བརྒྱད་ཕྱིར་ཕུད་བཏང་བའི་ཐག་གཅོད་བྱས་ཡོད་ཅིང་། ཁོ་ཚོས་རྒྱ་ནག་གི་ཕྱི་སྡོད་ཉེན་རྟོག་པའི་ལས་དོན་ལ་རོགས་འདེགས་ཀྱིས། ཨི་ཊ་ལིའི་ནང་དུ་ཡོད་པའི་རྒྱ་ནག་གི་དམངས་གཙོ་དང་འགྲོ་བ་མིའི་ཐོབ་ཐང་རྩོད་ལེན་པ་རྣམས་ལ་སོ་ལྟ་དང་འཇིགས་སྐུལ་སོགས་ཀྱི་བྱ་སྤྱོད་སྤེལ་གྱི་ཡོད་འདུག
དེ་འབྲེལ་ཡུ་རོབ་རྒྱལ་ཁབ་སི་པན་ནང་རྟེན་གཞི་བྱས་པའི་རྒྱལ་སྤྱིའི་སྲུང་སྐྱོབ་པའི་བདེ་འཇགས་ཚོགས་པས་གནས་ཚུལ་སྤེལ་བ་ལྟར་ན། ཨི་ཊ་ལིའི་གཞུང་གིས་རྒྱལ་ཁབ་ཀྱི་བདེ་འཇགས་ལ་དམིགས་ནས་རྒྱ་ནག་གི་མི་སེར་ ༨ ཕྱིར་ཕུད་གཏོང་དགོས་པའི་བཀའ་རྒྱ་བཏང་ཡོད་པ་དང་། ད་ལྟ་མི་གསུམ་འཕྲལ་མར་ཕྱིར་ཕུད་བཏང་ཟིན་ཞིང་། མི་བཞི་ཨི་ཊ་ལིའི་མངའ་ཁོངས་ནས་ཕྱིར་བྲོས་ཡོད་འདུག་ལ། མི་གཅིག་སྐྱབས་བཅོལ་ཞུ་མཁན་གྱི་ཐོ་ཁོངས་སུ་ཡོད་སྟབས། གནས་སྐབས་བཀག་ཉར་འོག་བཞག་ཡོད་འདུག
ཨི་ཊ་ལིའི་ཐག་གཅོད་དེ་ནི་རྒྱ་ནག་གི་རྒྱལ་མཚམས་ལས་བརྒལ་བའི་དྲག་གནོན་སྲིད་ཇུས་ལ་གཞུང་འབྲེལ་གྱི་ཐོག་ནས་རྒོལ་ལན་བསློགས་པ་ཐོག་མར་གྱུར་ཡོད་ཅིང་། རྒྱ་ནག་གཞུང་གིས་ཨི་ཊ་ལིའི་ནང་གནས་སྡོད་བྱེད་བཞིན་པའི་རྒྱ་རིགས་དགེ་རྒན་ལི་ཞུ་བ་ཞིག་གཙོ་བྱས་པའི་དམར་ཤོག་ཚོགས་པའི་ཁ་གཏད་གཅོག་མཁན་རྣམས་ལ་ལོ་མང་རིང་གསང་ཉུལ་བྱས་ཏེ་ཉེན་བརྡ་དང་འཇིགས་སྐུལ་བྱས་པ་ཙམ་དུ་མ་ཟད། ཁོང་ཚོའི་ལས་འགུལ་ཁག་མཚམས་འཇོག་བྱས་ཏེ་ཕྱིར་རྒྱ་ནག་ཏུ་ལོག་པར་གནོན་ཤུགས་སྤྲོད་ཐབས་བྱས་ཡོད་འདུག
རྒྱལ་སྤྱིའི་སྲུང་སྐྱོབ་པའི་བདེ་འཇགས་ཚོགས་པས། རྒྱ་ནག་གིས་རྒྱལ་མཚམས་ལས་བརྒལ་བའི་དྲག་གནོན་གྱི་ལས་འགུལ་བརྒྱུད་རྒྱ་ནག་གི་ཁ་གཏད་དུ་ལངས་མཁན་རྣམས་ལ་གསང་ཉུལ་བྱས་ཏེ་དྲ་ཐོག་ནས་སྐྱོན་བརྗོད་དང་སོ་ལྟ་སོགས་བྱེད་བཞིན་ཡོད་པ་མ་ཟད། ད་དུང་ཁོང་ཚོའི་ཕ་མ་དང་གཉེན་ཉེ་རྣམས་ལ་འཇིགས་སྐུལ་སོགས་བྱེད་བཞིན་ཡོད་སྐོར་བརྗོད་འདུག
གནད་དོན་དེའི་ཐད་དགེ་རྒན་ལི་ལགས་ཀྱིས། ང་ཚོས་རྒྱ་ནག་གཞུང་གིས་ཡུན་རིང་རྒྱལ་མཚམས་བརྒལ་བའི་དྲག་གནོན་བྱས་པར་བཟོད་བསྲན་བྱས་ཡོད། ང་དང་ངའི་ལས་རོགས་ཚོ། ང་ཚོའི་ཁྱིམ་མི་བཅས་ཀྱིས་རྒྱུན་མཐུད་ནས་རྒྱ་ནག་གི་འཇིགས་སྐུལ་དང་ཉེན་བརྡ། ཐུབ་ཚོད་བཅས་ལ་གདོང་ལེན་བྱས་ཡོད། ཨི་ཊ་ལིའི་གཞུང་གིས་རྒྱ་ནག་གི་རྒྱལ་མཚམས་ལས་བརྒལ་བའི་དྲག་གནོན་གྱི་བྱ་སྤྱོད་ལ་རྒོལ་ལན་བསློགས་པ་མཐོང་དུས་ང་ཚོའི་སེམས་ཤུགས་འཕེལ་བྱུང་། འདི་ནི་ང་ཚོར་སྲུང་སྐྱོབ་བྱས་པ་ཙམ་མིན་པར། དམངས་གཙོའི་རྩ་དོན་དང་ཁྲིམས་ལུགས་ཀྱི་དབང་བསྒྱུར་སྲུང་སྐྱོབ་བྱས་པ་ཞིག་ཀྱང་རེད། ཅེས་བརྗོད་འདུག
ཕྱི་ལོ་ ༢༠༢༢ ལོ་ནས་ཨི་ཊ་ལི་དང་རྒྱ་ནག་གི་བདེ་འཇགས་ལས་ཁུངས་གཉིས་བར་རྒྱལ་སྤྱིའི་ཉེན་རྟོག་པའི་སྒྲིག་འཛུགས་དང་ཉེས་ཅན་རྩིས་སྤྲོད་ཀྱི་མོས་མཐུན་གན་རྒྱ་བཞག་ཡོད་སྟབས། དུས་དེ་ནས་བཟུང་ཨི་ཊ་ལི་ནི་རྒྱ་ནག་གི་རྒྱལ་མཚམས་ལས་བརྒལ་བའི་དྲག་གནོན་ལས་འགུལ་སྤེལ་ཡུལ་གཙོ་བོ་ཞིག་ཏུ་གྱུར་ཡོད་ཀྱང་། ཕྱི་ལོ་ ༢༠༢༤ དང་ ༢༠༢༥ ནང་རྒྱ་ནག་གཞུང་གིས་རྒྱབ་རྟེན་བྱས་པའི་དྲ་ལམ་འཇབ་རྒོལ་བ་དག་གིས། ཨི་ཊ་ལིའི་གསང་བའི་ལས་ཁུངས་དང་འབྲེལ་བའི་ལས་བྱེད་སྟོང་ཕྲག་མང་པོའི་མིང་དང་གོ་གནས། ལས་ཁུངས་སོགས་ཀྱི་གནས་ཚུལ་རྐུ་འཁྱེར་བྱས་པ་ཕྱིར་ཤོར་བ་དང་འབྲེལ། འདས་ལོ་ནས་ཨི་ཊ་ལིས་རྒྱ་ནག་དང་ལྷན་དུ་བཞག་པའི་མཉམ་ལས་ཀྱི་གན་རྒྱ་ཚང་མ་ཕྱིར་འཐེན་བྱས་ཡོད་པ་དང་། ད་ལྟ་ཨི་ཊ་ལིའི་ནང་རྒྱལ་མཚམས་ལས་བརྒལ་བའི་དྲག་གནོན་གྱི་བྱ་སྤྱོད་སྤེལ་མཁན་རྣམས་ཕྱིར་ཕུད་གཏོང་བའི་ཐག་གཅོད་དེས། ཨི་ཊ་ལིའི་ནང་དམངས་གཙོ་དང་འགྲོ་བ་མིའི་ཐོབ་ཐང་རྩོད་ལེན་བྱེད་མཁན་རྒྱ་རིགས་རྣམས་ལ་དྲག་གནོན་བྱེད་མཚམས་བཞག་པ་མ་ཟད། ཨི་ཊ་ལིའི་ནང་རྒྱ་ནག་འཐབ་ཕྱོགས་གཅིག་གྱུར་ཁང་གི་ཆབ་སྲིད་ཀྱི་ཤུགས་རྐྱེན་ཐེབས་རྒྱུ་གཏན་འགོག་བྱས་ཡོད་འདུག
