བཙན་བྱོལ་བོད་མིའི་ཁྲིམས་བཟོ་ལྷན་ཁང་གི་འདྲ་འབག

བེ་རི་རིག་པའི་རྡོ་རྗེ།

རྩོམ་ཁུངས། བོད་ཀྱི་དུས་བབ།

༡༽ བཙན་བྱོལ་བོད་མིའི་དམངས་གཙོའི་རིན་ཐང་།

ད་ལོར་བཙན་བྱོལ་བོད་མིའི་བཀའ་སྤྱི་གཉིས་ཀྱི་འོས་བསྡུ་ཆེན་མོ་ཡིན་ཞེས་འུར་འུར་ཟིང་ཟིང་བྱེད་བཞིན་ཡོད་ལ། དབུས་འོས་བསྡུ་ལས་ཁུངས་ནས་ཀྱང་། ཕྱི་ལོ་ ༢༠༢༥ ཟླ་ ༡༠ ཚེས་ ༧ ཉིན་སྤེལ་བའི་གསར་འགོད་གསལ་བསྒྲགས་སུ། “བཙན་བྱོལ་བོད་མིའི་བཅའ་ཁྲིམས་དང་། བཙན་བྱོལ་བོད་མིའི་འོས་བསྡུའི་སྒྲིག་གཞིའི་དགོངས་དོན། ཕྱི་ལོ་ ༢༠༢༥-༢༠༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། བོད་མི་མང་སྤྱི་འཐུས་སྐབས་ ༡༨ པའི་འོས་བསྡུ་ཆེན་མོ་འདི་བཞིན་དྲང་བདེན་དང་། འདྲ་མཉམ། རང་དབང་བཅས་ཀྱི་ངང་བསྒྲུབ་རྒྱུའི་ཆོད་སེམས་བརྟན་པོ་ཡོད།” ཅེས་ད་ལན་གྱི་སྲིད་སྤྱིའི་འོས་བསྡུ་འདི་འདྲ་མཉམ་དང་། དྲང་བདེན་གྱི་ཐོག་ནས་ཕྱོགས་ལྷུང་མེད་པར་གནང་རྒྱུ་ཡིན་ཞེས་ཐག་བཅད་དེ་གསུངས་ཡོད།

དེར་བརྟེན་བཙན་བྱོལ་ཁྲོད་ཀྱི་ཇོ་ནང་པ་རྣམས་ཀྱིས་དེར་ཡིད་ཆེས་བྱས་ནས། དེ་ལུགས་ཀྱིས་ཇོ་ནང་རང་ཁོངས་ནས་ཆོས་བརྒྱུད་ཀྱི་སྤྱི་འཐུས་བཞེངས་རྒྱུ་དང་། དེ་དག་ལ་འོས་འཕེན་རྒྱུ་ཡིན་ཚུལ་གྱི་སྙན་ཞུ་ཞིག་ཨ་རིའི་ཇོ་ནང་མཐུན་ཚོགས་ནས་དབུས་འོས་བསྡུ་ལས་ཁུངས་ལ་ཕུལ་འདུག་ཀྱང་། “ཆུ་ཆེ་ཡང་ཟམ་པའི་འོག” ཟེར་བ་ལྟར། གོང་གི་གསལ་བསྒྲགས་ནང་གི་ཐ་ཚིག་“དྲང་བདེན་དང་། འདྲ་མཉམ། རང་དབང་”ཟེར་བ་དག་ནི་གསལ་བསྒྲགས་ཙམ་ལས། བཙན་བྱོལ་བོད་མིའི་བཅའ་ཁྲིམས་དབྱེ་འབྱེད་ཅན་དེའི་འོག་ནས་ཕྱག་ལེན་ལ་བསྟར་ཐབས་མ་བྱུང་བས། “བཙན་བྱོལ་བོད་མིའི་བཅའ་ཁྲིམས་དང་། བཙན་བྱོལ་བོད་མིའི་འོས་བསྡུའི་སྒྲིག་གཞིའི་དགོངས་དོན་འོག་སྤྱི་འཐུས་ཀྱི་ཡོང་ཁུངས་གྲུབ་ཆའི་ནང་ཇོ་ནང་པའི་ཆོས་བརྒྱུད་སྤྱི་འཐུས་ཀྱི་ཐོབ་ཁུངས་གཏན་འབེབས་མེད་པར་བརྟེན། ད་ལྟའི་ཆར་བཙན་བྱོལ་བོད་མིའི་བཅའ་ཁྲིམས་དང་། བཙན་བྱོལ་བོད་མིའི་འོས་བསྡུའི་སྒྲིག་གཞི་དགོངས་དོན་ལྟར་ལག་བསྟར་ཞུ་རྒྱུ་ལས། སྒྲིག་འགལ་གྱིས་བཀའ་འཁྲོལ་རིགས་གནང་ཐབས་མ་མཆིས་པ་དེ་དོན་དགོངས་འཇགས་ཞུ།” ཞེས་ཡིག་ལན་ཕེབས་འབྱོར་བྱུང་བ་འདིས། བཙན་བྱོལ་བོད་མིའི་གྲོས་ཁང་ནས་བཟོས་པའི་བཅའ་ཁྲིམས་ནང་གི་“བོད་ཀྱི་ཡུལ་མི་ཚང་མ་ཁྲིམས་ཀྱི་མདུན་སར་འདྲ་མཉམ་ཡིན།” ཟེར་བ་དང་། “ཆོས་ལུགས་ཚང་མ་ཁྲིམས་ཀྱི་མདུན་སར་འདྲ་མཉམ་ཡིན།” ཟེར་བ་ནི། གཡོ་ཐབས་ཙམ་ལས། དོན་ལ་ཆོས་ལུགས་དབྱེ་འབྱེད་ཀྱི་བཙོན་ར་ལས་ནམ་ཡང་ཐར་ཐབས་མེད་པ་ཞིག་ཡིན་པ་བདེན་དཔང་བྱས་ཡོད།

དེ་ལྟ་ན་ཡང་། ཉེ་བའི་ཆར་རྒྱ་ནག་རྒྱལ་ཡོངས་འཐུས་མི་ཚོགས་ཚོགས་ཆེན་ཐོག “མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་”ཟེར་བ་ཞིག་གཏན་འབེབ་བྱས་པར། བཙན་བྱོལ་བོད་མིའི་སྐབས་ ༡༧ གྲོས་ཚོགས་འཚོགས་དུས་ ༡༡ ཐོག་རྒྱ་ནག་གི་ཁྲིམས་ཡིག་དེར་ངོ་རྒོལ་དང་སྦྲགས། ཁྲིམས་ཡིག་དེ་ནི་རྒྱ་གཞུང་རང་གི་རྩ་ཁྲིམས་དང་རྒྱབ་འགལ་ཆགས་ཡོད་ལ། དེས་བོད་མིའི་གཞི་རྩའི་འགྲོ་བ་མིའི་ཐོབ་ཐང་ཡོངས་སུ་འཕྲོག་སྟེ། ཆོས་དད་རང་དབང་དང་། འགྲོ་སྡོད་རང་དབང་། སྨྲ་བརྗོད་རང་དབང་སོགས་མེད་པར་བཀག་སྡོམ་ནན་མོ་བྱེད་འཆར་ཡིན་པས་ངོས་ལེན་མེད་ཅེས་འུར་སྒྲ་སྒྲོག་གིན་ཡོད་མོད། དོན་ངོ་མར་ཁྱེད་ཚོར་འདི་ལྟར་བཤད་རྒྱུའི་ཐོབ་ཐང་དང་གནས་བབ་ཡོད་མེད་མཛུབ་མོ་ནང་དུ་བཀུག་ནས་བསམ་བློ་གཏོང་མྱོང་ངམ། གལ་ཏེ་འདི་ལྟར་བསམ་བློ་གཏོང་མྱོང་མེད་ན། ངས་འདི་ནས་ཁྱེད་ཚོར་ལག་ལེན་དམར་ཁྲིད་བྱེད་ཆོག ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག

བཙན་བྱོལ་བོད་མིའི་གྲོས་ཁང་ནས་གཏན་ལ་ཕབ་པའི་<བཙན་བྱོལ་བོད་མིའི་བཅའ་ཁྲིམས>ཟེར་བ་དེའི་དོན་ཚན་དགུ་པར། “བོད་ཀྱི་ཡུལ་མི་ཚང་མ་ཁྲིམས་ཀྱི་མདུན་སར་འདྲ་མཉམ་ཡིན།” ཞེས་དམངས་གཙོའི་རྒྱལ་ཁབ་ཁག་གི་རྩ་ཁྲིམས་ཇི་བཞིན་བཀོད་ཡོད། ད་དུང་དེའི་དོན་ཚན་བཅུ་བར། “ཆོས་ལུགས་ཡོངས་རྫོགས་ཁྲིམས་ཀྱི་མདུན་སར་འདྲ་མཉམ་ཡིན།” ཞེས་ཧ་ཅང་ཡིད་ལ་འབབ་པ་ཞིག་བྲིས་ཡོད། འོན་ཀྱང་སྟབས་མ་ལེགས་པ་ཞིག་ལ། དེའི་དོན་ཚན་ ༣༧ པར་སྤྱི་འཐུས་ཀྱི་ཡོང་ཁུངས་སམ་གྲུབ་ཆ་བཤད་སྐབས། “རྙིང་མ་དང༌། བཀའ་བརྒྱུད། ས་སྐྱ། དགེ་ལུགས། གཡུང་དྲུང་བོན་བཅས་ལྔ་པོ་རེ་རེ་ནས་འོས་བསྡུ་བྱས་པའི་སྤྱི་འཐུས་གཉིས་རེ།” ཞེས་ཆོས་བརྒྱུད་བཞི་དང་གཡུང་དྲུང་བོན་བཅས་ལྔ་ལས། བཙན་བྱོལ་ཁྲོད་ཀྱི་ཇོ་ནང་པ་རྣམས་ཀྱི་ཆོས་དད་རང་དབང་དང་། སློབ་གསོའི་རང་དབང་། གདམ་བྱ་འདེམས་བྱེད་ཀྱི་ཐོབ་ཐང་སོགས་ཁྲིམས་ཐོག་ནས་ཡོངས་སུ་བཙན་འཕྲོག་བྱས་ཡོད་པས། དོན་ཚན་འདི་དང་གོང་གི་དོན་ཚན་ ༩ དང་ ༡༠ ནང་འགལ་ཆགས་ཡོད་པ་མ་ཟད། བཙན་བྱོལ་བོད་མིའི་གྲོས་ཁང་ནས་ཕྱི་ལོ་ ༡༩༦༠ ལོ་ནས་བཟུང་བཙན་བྱོལ་ཁྲོད་ཀྱི་ཇོ་ནང་པ་རྣམས་ཀྱི་འགྲོ་བ་མིའི་གཞི་རྩའི་ཐོབ་ཆོས་དད་རང་དབང་དང་། སློབ་གསོའི་རང་རང་དབང་། གདམ་བྱ་འདེམས་བྱེད་ཀྱི་ཐོབ་ཐང་སོགས་ཁྲིམས་ཐོག་ནས་རྩ་མེད་བྱས་པ་མ་ཚད། ད་དུང་མཐོང་ཆུང་དང་། གཉའ་གནོན་ཚད་ལས་བརྒལ་བ་བྱེད་བཞིན་ཡོད། དེ་བྱེད་མཁན་བཙན་བྱོལ་བོད་མིའི་གྲོས་ཁང་ནང་གི་གྲོས་མི་སྐོར་ཞིག་ཡིན་པ་བརྗེད་སོང་བ་རེད་དམ།

འདི་ལྟར་རང་གིས་གཏན་ལ་ཕབ་པའི་བཅའ་ཁྲིམས་སུ་ཆོས་ལུགས་དབྱེ་འབྱེད་ཡོད་བཞིན་དུ། བཙན་བྱོལ་ཁྲོད་ཀྱི་ཇོ་ནང་པ་ཚོར་ཆོས་དད་རང་དབང་དང་། གདམ་བྱ་འདེམས་བྱེད་ཀྱི་ཐོབ་ཐང་སོགས་མདོར་ན་འགྲོ་བ་མིའི་གཞི་རྩའི་ཐོབ་ཐང་འདྲ་མཉམ་མེད་བཞིན་དུ། རྒྱ་ནག་སྲིད་གཞུང་གིས་བོད་མི་ཚོར་ཆོད་དད་རང་དབང་དང་། སྨྲ་བརྗོད་རང་དབང་སོགས་སྤྲོད་ཀྱི་མི་འདུག་ཅེས་སྡུག་སྐད་རྒྱག་རྒྱུར་ངོ་མི་ཚ་འམ། གཞན་ལ་ཁ་ཤོ་རེད་ཅེས་འཕྱ་སྨོད་བྱེད་མཁན་ཞིག་ཡིན་ན། མ་མཐའ་ཡང་རང་ཉིད་ཀྱི་ཁ་རྒྱུན་ལྡན་ཡིན་དགོས། “སྐྱག་པ་རྫ་མ་འདྲ་ཟིག་འོག་ལ་སྦས་ནས།། ཁུ་ཚུར་གནམ་ལྕགས་འདྲ་ཟིག་དགུང་ལ་འཕྱར།།” ཟེར་བའི་ཨ་མདོའི་གཏམ་དཔེ་འདི་བཙན་བྱོལ་གྲོས་ཁང་ལ་ཆེད་དུ་གདམས་པ་ལྟ་བུར་གྱུར་ཡོད།

གལ་ཏེ་བཙན་བྱོལ་སྤྱི་ཚོགས་ཁྲོད་ཀྱི་བོད་མི་ཡོད་དོ་ཅོག་ལ་ཁྲིམས་ཐོག་ནས་ཐོབ་ཐང་འདྲ་མཉམ་སྤྲད་ཡོད་ན། ཕན་ཐོགས་ཡོད་མེད་ལ་མ་ལྟོས་པར་རྒྱ་གཞུང་གིས་བོད་ནང་དུ་འགྲོ་བ་མིའི་ཐོབ་ཐང་དང་། ཆོས་དད་རང་དབང་སོགས་སྤྲོད་དགོས་ཞེས་ངོ་རྒོལ་བྱེད་ཆོག་ཅིང་། བོད་ནང་གི་གནས་སྟངས་ལོ་རེ་ནས་ལོ་རེར་ཇེ་སྡུག་ཇེ་ཞན་དུ་འགྲོ་བཞིན་འདུག་ཅེས་གདུང་སེམས་མཉམ་སྐྱེད་ཟེར་བའི་གྲོས་ཆོད་དེ་ཡང་འཇོག་ཆོག་ལ། འཇོག་རྒྱུའི་ཐོབ་ཐང་ཡང་ཡོད།

འོན་ཀྱང་རྒྱལ་ཁབ་ལྟ་ཅི། རང་ལ་དབང་བའི་ས་ཆ་ལག་མཐིལ་ཙམ་ཡང་མེད་པར་ནམ་རྒྱུན་མུག་སྐྱོབ་ཁོ་ནར་རེ་བའི་གྲོས་མི་སྐོར་ཞིག་གིས་ཁྲིམས་ཐོག་ནས། བཙན་བྱོལ་བོད་མི་བརྒྱད་ཁྲི་མ་ཟིན་ཙམ་པ་དེའི་ནང་ཆོས་ལུགས་བར་ལ་དབྱེ་འབྱེད་བྱེད་བཞིན། ཁྱོད་ཤི་ང་གསོན་གྱི་ནང་འཁྲུག་རྒྱག་བཞིན། ཆོལ་ཁའི་ཕྱོགས་ཞེན་གྱི་རལ་ཁ་འགྲན་བཞིན། ལྷ་འདྲེའི་འཐབ་རྩོད་ཀྱི་དམར་འཛིང་བྱེད་བཞིན། རྒྱ་ནག་རྒྱལ་ཡོངས་འཐུས་མི་ཚོགས་ཚོགས་ཆེན་ཐོག་གཏན་ལ་ཕབ་པའི་ཁྲིམས་ཡིག་དེ་ངོས་ལེན་མེད་ཟེར་བ་ནི་བཞད་གད་ཀྱི་གནས་སོ།།

འདི་ནི་བཙན་བྱོལ་བོད་མིའི་གྲོས་ཁང་ནས་གྲོས་མི་སྐོར་ཞིག་དཔུང་བསྒྲིགས་བྱས་ནས་གཏན་ལ་ཕབ་པའི་བཅའ་ཁྲིམས་ཀྱི་ངོ་གདོང་ངོ་མ་དེ་རེད། ཁོང་ཚོས་ད་དུང་འཛམ་གླིང་མི་མང་དང་། ལྷག་པར་རང་རིགས་མི་མང་ལ་སྐྱག་རྫུན་རྐྱང་རྐྱང་བཤད་ནས་མགོ་སྐོར་གཏོང་བཞིན་ཡོད། དཔེར་ན། བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་དགུ་བར། “བོད་ཀྱི་ཡུལ་མི་ཚང་མ་ཁྲིམས་ཀྱི་མདུན་སར་འདྲ་མཉམ་ཡིན།” ཞེས་དམངས་གཙོའི་རྒྱལ་ཁབ་ཁག་གི་རྩ་ཁྲིམས་ལ་ལད་ཟློས་བྱས་ཡོད། ཚིག་དུམ་འདི་འཛམ་གླིང་མི་དམངས་མགོ་སྐོར་གཏོང་ཆེད་བཅའ་ཁྲིམས་སུ་བཅུག་པ་རེད། དོན་ངོ་མར་བྱི་ལས་སྐྱག་པ་སྦེད་པ་བཞིན། དེའི་དོན་ཚན་སོ་བདུན་པར་ཆོས་བརྒྱུད་བར་ལ་དབྱེ་འབྱེད་དྲག་པོ་བྱས་ཏེ། ཇོ་ནང་པ་རྣམས་ལ་འགྲོ་བ་མིའི་གཞི་རྩའི་ཐོབ་ཐང་རྩ་བ་ཡན་ལག་དང་བཅས་པ་མེད་པ་བྱས་ཡོད།

དེར་བརྟེན་ད་ལན་དབུས་འོས་བསྡུ་ལས་ཁུངས་ཀྱི་གསལ་བསྒྲགས་ནང་། “དྲང་བདེན་དང་། འདྲ་མཉམ། རང་དབང་བཅས་ཀྱི་ངང་བསྒྲུབ་རྒྱུའི་ཆོད་སེམས་བརྟན་པོ་ཡོད།” ཅེས་གསུངས་པ་དེ་ཁ་བཤད་ཙམ་ལས། ཕྱག་ལེན་དུ་བསྟར་མ་ཐུབ་པའི་གནད་དོན། མཐར་གཏུགས་ན་བཙན་བྱོལ་བོད་མིའི་བཅའ་ཁྲིམས་དབྱེ་འབྱེད་ཅན་དེའི་དབང་གིས་ཡིན་པ་ལས། ཁོང་རྣམ་པར་དེ་ལྟའི་ཐུགས་བཞེད་མེད་པ་དང་། དེ་ལྟར་གནང་འདོད་མེད་པ་རྩ་བ་ནས་མ་རེད།

དེ་ལྟར་དྲང་བདེན་དང་འདྲ་མཉམ་གྱི་དྲི་ཙམ་མི་བྲོ་བའི་བཙན་བྱོལ་བོད་མིའི་གྲོས་ཁང་ནང་ནས་གཏན་ལ་ཕབ་པའི་བཅའ་ཁྲིམས་ཀྱིས། བཙན་བྱོལ་ཁྲོད་ཀྱི་ཇོ་ནང་པ་རྣམས་ཀྱི་གདམ་བྱ་འདེམས་བྱེད་ཀྱི་ཐོབ་ཐང་སོགས་ཡོངས་སུ་འཕྲོག་ཡོད། ད་དུང་ད་ལྟའི་བཀའ་སྤྱིའི་འོས་མི་སྐོར་ཞིག་ནས་ཕན་ཚུན་བགྲོ་གླེང་ས་བཅད་མ་སྟོང་ཙམ་རེ་བྱེད་བཞིན་ཡོད་མོད། བོད་མིའི་རྩ་དོན་འཐབ་རྩོད་ཆེད་ངས་འདི་བྱེད་ཀྱི་ཡིན་ཟེར་མཁན་འགའ་ཡང་མེད་ཁར། ཁག་ཅིག་ནི་ཆོལ་ཆོས་ཀྱི་ཞེན་ཁོག་གིས་འགྲེངས་བའི་ར་བཟི་སྐོར་ཞིག་ཡིན་པ་ཡང་། བཙན་བྱོལ་བོད་མིའི་བཅའ་ཁྲིམས་ཀྱི་ཤུགས་རྐྱེན་ཐེབས་པ་གསལ་པོ་རེད།

སྤྱིར་བཏང་དམངས་གཙོ་ཟེར་བ་ནི། མང་མོས་ཀྱིས་ཉུང་མོས་ལ་ཐུབ་ཚོད་དང་། བཙན་བཀའ། གཉའ་གནོན། མཐོང་ཆུང་བྱེད་པའི་ལམ་ལུགས་ཤིག་མ་ཡིན་པར། མི་ཕལ་བའམ་མི་དམངས་གཙོ་བོར་འཛིན་པ་ལ་ཟེར། དེ་ལྟ་བུའི་དམངས་གཙོའི་ལམ་ལུགས་ནང་ཆེས་གལ་ཆེ་བ་ནི་ཐོབ་ཐང་འདྲ་མཉམ་དང་། རང་དབང་། དྲང་བདེན་བཅས་ཡིན་ལ། གང་དུ་དབྱེ་འབྱེད་དང་གཉའ་གནོན་ཡོད་ན། དེ་རུ་ཞི་བདེ་དང་མཐུན་སྒྲིལ་ཟེར་བ་ཡོང་ཐབས་མེད་པས། བཙན་བྱོལ་གྲོས་ཁང་ནས། མཐུན་སྒྲིལ་ཞེས་ཁ་གཡང་ཇི་ལྟར་བསྒྲགས་ཀྱང་། ཁྲིམས་ཐོག་ནས་ཆོས་བརྒྱུད་ཚང་མར་ཐོབ་ཐང་འདྲ་མཉམ་མ་སྤྲད་པ་དེ་སྲིད་དུ། དོན་དམ་པའི་མཐུན་སྒྲིལ་དང་། ཞི་བདེ་ཟེར་བ་དེ་ཡོང་ཐབས་མེད། ལྷག་པར་དུ་ཁྲིམས་ཐོག་ནས་ཆོས་བརྒྱུད་བྱེ་བྲག་པ་ཞིག་གི་མངོན་འདོད་དང་ཐོབ་ཐང་ལ་བརྩི་བཀུར་མེད་པར་དབྱེ་འབྱེད་བྱས་ན། དེས་སྤྱི་ཚོགས་ནང་བསམ་བཞིན་རྙོག་དྲ་གཏིང་སློང་བྱས་ཏེ་ཁ་བྲལ་ལས་འགུལ་གྱི་སྣེ་ཁྲིད་བྱས་པ་རེད། བོད་ཀྱི་གཏམ་དཔེར། “གྲལ་མགོ་ནས་སྟག་འཛིང་བྱེད་ན།། གྲལ་རྔ་ནས་ཁྱི་འཛིང་ལོས་བྱེད།།” ཟེར་བ་ལྟར། “བསྟན་པ་མགོ་ནས་བཤིགས་”ཟེར་བ་འདི་རེད།

བཙན་བྱོལ་བོད་མིའི་གྲོས་མི་ཁག་ཅིག་གིས། ཁོང་ཚོ་ནི་དྲང་བདེན་དང་ཞི་བདེའི་ལམ་ནས་བོད་ཀྱི་རྩ་དོན་སྒྲུབ་མཁན་ཡིན་ཞེས་ཟེར་བཞིན་ཡོད་ལ། ད་དུང་བཙན་བྱོལ་བོད་མིའི་གྲོས་ཁང་ནི། འཛམ་གླིང་སྟེང་གི་དམངས་གཙོའི་མིག་དཔེ་ཞིག་ཏུའང་བརྩིས་ན་ཆོག་ཅེས་ཤོད་བཞིན་ཡོད་པ་མ་ཟད་། དེའི་བཅའ་ཁྲིམས་ཡང་དྲང་བདེན་དང་། འདྲ་མཉམ་གྱི་གཞི་རྩའི་རིན་ཐང་ཐོག་ནས་བཞེངས་སྐྲུན་བྱས་ཡོད་ཅེས་སྒྲོག་བཞིན་ཡོད་མོད།

སྟབས་ཉེས་པ་ཞིག་ལ། བཙན་བྱོལ་བོད་མིའི་གྲོས་ཚོགས་ཀྱིས་གཏན་ལ་ཕབ་པའི་བཅའ་ཁྲིམས་ནང་དུ། ཆོས་བརྒྱུད་དབྱེ་འབྱེད་བྱས་ནས་ཇོ་ནང་ཆོས་བརྒྱུད་ལ་ཆོས་བརྒྱུད་གཞན་དང་འདྲ་མཉམ་གྱི་ཐོབ་ཐང་སྤྲད་མེད་པ་ནི། ༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་གསོལ་བསྩལ་གནང་བའི་བཙན་བྱོལ་བོད་མིའི་དམངས་གཙོའི་ལམ་ལུགས་ཀྱི་ལོ་རྒྱུས་ནང་བསུབ་ཐབས་མེད་པའི་ནག་ཐིག་ཅིག་དང་། དམངས་གཙོའི་ལམ་སྲོལ་གྱི་འོ་ཟངས་ནང་དུ་བཏབ་པའི་དུད་ནག་ཅིག་ཅི་ལ་མིན།

༢༽ བཅའ་ཁྲིམས་ཀྱི་ནང་འགལ།

ད་ལྟའི་བཙན་བྱོལ་བོད་མིའི་བཅའ་ཁྲིམས་ཀྱི་ལེའུ་གཉིས་པ། གཞི་རྩའི་ཐོབ་ཐང་དང་། ལས་འགན། ཞེས་པའི་དོན་ཚན་དགུ་བར། “བོད་ཀྱི་ཡུལ་མི་ཚང་མ་ཁྲིམས་ཀྱི་མདུན་སར་འདྲ་མཉམ་ཡིན། ཕོ་མོ་དང༌། རིགས་རུས། སྐད་ཡིག ཆོས་ལུགས། སེར་སྐྱ། དབུལ་ཕྱུག སྐྱེས་ཡུལ། སྤྱི་ཚོགས་ཀྱི་འབྱུང་ཁུངས། གོ་གནས། གནས་སྟངས་གཞན་དག་བཅས་ཀྱི་ཐོག་ནས་དབྱེ་འབྱེད་མེད་པར་ལེའུ་འདིར་འཁོད་ཀྱི་ཐོབ་ཐང་ཁག་ལ་ལོངས་སུ་སྤྱོད་ཆོག་པ་ཡིན།” ཞེས་བོད་མི་ཚང་མ་ཁྲིམས་ཀྱི་མདུན་སར་འདྲ་མཉམ་ཡིན་པ་དང་། ཆོས་ལུགས་དབྱེ་འབྱེད་མེད་པར་ཐོབ་ཐང་འདྲ་མཉམ་ཡོད་ཚུལ་བཀོད་ཡོད།

འོན་ཀྱང་དོན་དངོས་ཐོག ཆོས་བརྒྱུད་བྱེ་བྲག་པ་ཞིག་ལ་གདམ་བྱ་འདེམས་བྱེད་ཀྱི་ཐོབ་ཐང་མེད་པ་བྱས་ཡོད། དེ་ཡང་དེའི་དོན་ཚན་སོ་བདུན་པའི་ནང་གསེས་ ༡ ཁ པར། “རྙིང་མ་དང༌། བཀའ་བརྒྱུད། ས་སྐྱ། དགེ་ལུགས། གཡུང་དྲུང་བོན་བཅས་ལྔ་པོ་རེ་རེ་ནས་འོས་བསྡུ་བྱས་པའི་སྤྱི་འཐུས་གཉིས་རེ།” ཞེས་ཆོས་བརྒྱུད་དབྱེ་འབྱེད་ཚབ་ཆེན་བྱས་ཏེ། ཇོ་ནང་ཆོས་བརྒྱུད་ལ་སྤྱི་འཐུས་གདམ་རྒྱུའི་ཐོབ་ཐང་མེད་པར་བྱས་ཡོད་པ་ནི། བཅའ་ཁྲིམས་རང་གི་གཞི་རྩའི་ཐོབ་ཐང་དང་ཡོངས་སུ་འགལ་ཡོད་ལ། འདི་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་དང་། འཛམ་གླིང་དམངས་གཙོའི་རྒྱལ་ཁབ་ཁག་གི་རྩ་ཁྲིམས་དང་ཡང་ཡོངས་སུ་རྒྱབ་འགལ་ཆགས་ཡོད་ཅིང་། དམངས་གཙོའི་རྒྱལ་ཁབ་ཅིག་གི་ངོས་ནས་བཤད་ན། འདི་ནི་དཔེ་མཚོན་བྲལ་བའི་ནོར་འཁྲུལ་ཚབ་ཆེན་ཞིག་དང་། དམངས་གཙོའི་ལམ་ལུགས་རྨང་ནས་གཏོར་བའི་འགད་རྫས་ཤིག་ཡིན།

ད་དུང་བཙན་བྱོལ་བོད་མིའི་གྲོས་མི་རྣམས་ཀྱིས་ཁྲིམས་ཐོག་ནས། ཕྱི་སྡོད་ཇོ་ནང་པ་རྣམས་ཀྱི་ཆོས་དད་རང་དབང་ཡང་བཙན་འཕྲོག་བྱས་ཡོད། དེ་ཡང་བཅའ་ཁྲིམས་ཀྱི་དོན་ཚན་བཅུ་བར། “ཆོས་དད་རང་དབང༌། ཆོས་ལུགས་ཡོངས་རྫོགས་ཁྲིམས་ཀྱི་མདུན་སར་འདྲ་མཉམ་ཡིན།” ཞེས་བཀོད་ཡོད་མོད། བཅའ་ཁྲིམས་དོན་ཚན་ ༣༧ ནང་གསེས་ ༡ ཁ ཇོ་ནང་ཆོས་བརྒྱུད་ལ་སྤྱི་འཐུས་གདམ་རྒྱུའི་ཐོབ་ཐང་མ་སྤྲད་པ་དེས། བཙན་བྱོལ་ཁྲོད་ཀྱི་ཇོ་ནང་པ་རྣམས་ཀྱི་ཆོས་དད་རང་དབང་བཙན་འཕྲོག་བྱས་ཡོད་པ་ལྷང་ལ་ཕུད་ཡོད།

གལ་ཏེ་བཙན་བྱོལ་བོད་མིའི་གྲོས་མི་རྣམས་གྲོས་མི་ཚད་ལྡན་ཞིག་ཡིན་ན། བཅའ་ཁྲིམས་ནང་གི་འགལ་བའི་ཆ་རྣམས་གཙང་སེལ་བྱེད་རྒྱུའི་འགན་ཡོད། འདི་བཅའ་ཁྲིམས་ཀྱིས་བསྐུར་བའི་འགན་དབང་ཡིན། དཔེར་ན་བཅའ་ཁྲིམས་ཀྱི་དོན་ཚན་ ༣༧ ནང་གི་དབྱེ་འབྱེད་ཀྱི་ཆ་དེ། བཅའ་ཁྲིམས་རང་གི་རྩ་འཛིན། དོན་ཚན་ལྔ་པ། བཅའ་ཁྲིམས་ཀྱི་ཚད་འཛིན་ཞེས་པར། “༡ ཁྲིམས་ལུགས་དང༌། ཆབ་སྲིད་དབང་འཛིན་གྱི་བཀའ། སྒྲིག་གཞི་བཅས་གང་ཡང་བཅའ་ཁྲིམས་འདིའི་དོན་ཚན་གང་རུང་དང་འགལ་ཚེ་འགལ་བའི་ཆ་དེ་རྩ་འཛིན་མེད་པ་བྱ་རྒྱུ།” ཟེར་བ་དང་རྒྱབ་འགལ་ཆགས་ཡོད་པས། འགལ་བའི་ཆ་སྟེ་དོན་ཚན་ ༣༧ པ་འདི་རྩ་མེད་གཏོང་རྒྱུའི་དུས་ལ་བབས་ཡོད་མོད། ད་ལྟའི་གྲོས་མི་སྐོར་ཞིག་གིས་བོད་ཀྱི་སྤྱི་དོན་ལས་ཆོལ་ཆོས་དང་། གཞུང་ལས་སྒེར། བཅའ་ཁྲིམས་ཀྱི་རྩ་འཛིན་ལས་ནང་གསེས་ཀྱི་དོན་ཚན་རེ་ཟུང་གལ་ཆེན་དུ་བརྩིས་པ་ནི། ཁྲིམས་བཟོ་ལྷན་ཚོགས་ཀྱིས་བཅའ་ཁྲིམས་ལ་བརྩི་བཀུར་བྱེད་སྟངས་རེད།

༣༽ བཙན་བྱོལ་ལོ་རྒྱུས་ནང་གི་ནག་ཉེས།

ཁྲིམས་ཐོག་ནས་ཆོས་བརྒྱུད་དབྱེ་འབྱེད་བྱས་པའི་གནད་དོན་འདིས། བཙན་བྱོལ་ཁྲོད་ཀྱི་ཇོ་ནང་ཆོས་བརྒྱུད་ཀྱི་རྗེས་འཇུག་རྣམས་ཀྱི་འདྲ་མཉམ་ཐོབ་ཐང་བཙན་འཕྲོག་བྱས་ཡོད་པ་མ་ཟད། ལག་ལེན་གྱི་ཐོག་ནས་ཀྱང་གཉའ་གནོན་དང་། མཐོང་ཆུང་དྲག་པོ་བྱས་ཡོད་པས། ཇོ་ནང་པའི་དད་ལྡན་མང་ཚོགས་ཀྱི་སེམས་ཁོང་དུ་བརྗེད་ཐབས་བྲལ་བའི་རྨ་ཁ་བཟོས་ཡོད། དེར་བརྟེན་བོད་མིའི་ཆིག་སྒྲིལ་དང་མཐུན་ལམ་ལ་གནོད་སྐྱོན་ཆེན་པོ་ཐེབས་ཡོད་ལ། བོད་མི་ཚང་མ་ཁྲིམས་ཀྱི་མདུན་སར་འདྲ་མཉམ་མིན་པའི་བདེན་དཔང་ཡང་བྱས་ཡོད་པས། དམངས་གཙོའི་ཁྲིམས་ལུགས་རིག་པའི་ཐོག་ནས་བལྟས་ན། རྒྱལ་སྤྱིའི་དམངས་གཙོའི་རྩ་ཁྲིམས་དང་ཡོངས་སུ་འགལ་བའི་ནག་ཉེས་ཤིག་ཆགས་ཡོད།

སྤྱིར་བཏང་བཤད་ན། བཙན་བྱོལ་བོད་མི་རྣམས་ནི་འཐབ་རྩོད་པ་ཞིག་ཡིན་ལ། དེའི་རྩ་དོན་འཐབ་རྩོད་ཀྱི་སྲོག་རྩ་ནི་མཐུན་སྒྲིལ་དང་ཆིག་སྒྲིལ་ཡིན་མོད། དེའི་གྲོས་ཁང་ནས་བཟོས་པའི་བཅའ་ཁྲིམས་ནང་འགལ་ཅན་འདིས། བཙན་བྱོལ་བོད་མིའི་སྤྱི་ཚོགས་ནང་དབྱེ་འབྱེད་ཀྱི་གཡུལ་འཁྲུག་དྲག་པོ་བསླངས་ཏེ། ཆོས་བརྒྱུད་བར་གྱི་མཐུན་ལམ་དང་། བོད་མིའི་ཆིག་སྒྲིལ་གྱི་གོང་བུ་རྩ་གཏོར་བཏང་ཡོད་པས། མ་འོངས་པར་ལོ་རྒྱུས་རིག་པའི་ལྟ་སྟངས་ཐོག་ནས་བཙན་བྱོལ་བོད་མིའི་ལོ་རྒྱུས་དངོས་འབྲི་བྱེད་སྐབས། བཙན་བྱོལ་བོད་མིའི་གྲོས་ཁང་ནས་དམངས་གཙོའི་མིང་བྱང་འོག ཇོ་ནང་ཆོས་བརྒྱུད་བོད་ཀྱི་ཆོས་གྲལ་ནས་ཕུད་ཅིང་། བྱེས་སྡོད་ཇོ་ནང་པ་རྣམས་ཀྱི་འགྲོ་བ་མིའི་གཞི་རྩའི་ཐོབ་ཐང་འདྲ་མཉམ་དང་། ཆོས་དད་རང་དབང་བཙན་འཕྲོག་བྱས་ཏེ། གདམ་བྱ་འདེམས་བྱེད་ཀྱི་ཐོབ་ཐང་མེད་པར་བྱས་པ་སོགས་སྐྱུག་བྲོ་བའི་ཟིན་ཐོ་དེ་དག བཙན་བྱོལ་བོད་མིའི་ལོ་རྒྱུས་དང་ཁ་འབྲལ་ཐབས་མེད་ཅིང་། དེ་དག་ཞིབ་འབྲི་མི་བྱེད་ཐབས་མེད་ཡིན་པས། འདི་ལ་བཙན་བྱོལ་ལོ་རྒྱུས་ནང་གི་ནག་ཉེས་དང་ཉེས་ཅན་པ་ཟེར་བ་ལས། གཞན་ལོ་རྒྱུས་ཐོག་གི་ཉེས་ཅན་པ་ཟེར་དུས་མགོ་ལ་ལྕགས་ཀྱི་རྭ་དང་། རྐང་ལག་ལ་ཟངས་ཀྱི་སྡེར་མོ་ཡོད་པ་ཞིག་ཡིན་མི་དགོས།

༤༽ ༸གོང་ས་མཆོག་གི་དགོངས་གཞི་དང་འགལ་བ།

༧སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་ཐུགས་ཀྱི་དམ་བཅའ་བཞིའི་ནང་གི་ཆོས་ལུགས་མཐུན་སྒྲིལ་གྱི་དགོངས་བཞེད་བཞིན། ཁོང་གིས། ནམ་རྒྱུན་དུས་འཁོར་བསྟན་པའི་བཀའ་བབས་རྒྱལ་བ་ཇོ་ནང་པ་ཞེས་ཚད་མཐོའི་བསྟོད་བསྔགས་དང་གདེང་འཇོག་ཐེངས་དུ་མར་གནང་ཡོད་པ་མ་ཟད། ཕྱི་ལོ་ ༢༠༠༡ ཟླ་ ༡༡ ཚེས་ ༢༣ ཉིན་བརྩམས་གནང་མཛད་པའི་ཇོ་ནང་བསྟན་པ་རྒྱས་པའི་སྨོན་ལམ་དུ། “མདོ་རྒྱུད་གཞན་དང་བཞད་སྲོལ་མི་འདྲ་བའི།། ཤིང་རྟའི་སྲོལ་ཆེན་དུས་ཀྱི་འཁོར་ལོའི་རྒྱུད།། མི་ཉམས་འཛིན་ཅིང་སྤེལ་བའི་བཀའ་བབས་པ།། ཇོ་ནང་པ་ཡི་བསྟན་པ་རྒྱས་གྱུར་ཅིག།” ཅེས་སངས་རྒྱས་བསྟན་པའི་སྙིང་པོ་ངེས་དོན་བསྟན་པ་དར་རྒྱས་ཡོང་བའི་ཐུགས་སྨོན་མཛད་ཡོད་ལ། ད་དུང་ཕྱི་ལོ་ ༢༠༡༥ ཟླ་ ༩ ཚེས་ ༣ ཉིན། ཇོ་ནང་ཆོས་བརྒྱུད་ལ་བསྩལ་བའི་བཀའ་ཡིག་ཏུ། “ཆོས་བརྒྱུད་ཆེན་པོ་འདིའི་ལུང་རྟོགས་ཀྱི་བསྟན་པ་ཡུན་གནས་ཆེད་མཐུན་རྐྱེན་གང་ཐུབ་སྒྲུབ་པ་ཚང་མའི་ཐུགས་ངེས་ཡིན་ལ།” ཞེས་ཆོས་བརྒྱུད་བྱེ་བྲག་པ་ཞིག་ཏུ་ངོས་འཛིན་གསལ་བོར་གནང་ཐོག ཆོས་བརྒྱུད་ཆེན་པོའི་ཐ་སྙད་ཀྱང་དངོས་སུ་སྦྱར་དེ་ནན་ཏན་དུ་གསུངས་ཡོད།

འོན་ཀྱང་། བཙན་བྱོལ་བོད་མིའི་གྲོས་ཚོགས་ཀྱིས། ༸གོང་ས་མཆོག་གི་རླབས་ཆེན་དགོངས་གཞི་དང་ཡོངས་སུ་འགལ་བའི་བཅའ་ཁྲིམས་བཟོས་པ་ནི། ༧གོང་ས་མཆོག་གིས་གསོལ་བསྩལ་མཛད་པའི་བཙན་བྱོལ་བོད་མིའི་དམངས་གཙོའི་ལམ་ལུགས་གཙབ་རལ་དུ་བཏང་བ་ཡིན་ལ། ཁྲིམས་ཐོག་ནས་༧གོང་ས་མཆོག་གི་དགོངས་གཞི་དང་། འགྲོ་བ་མིའི་གཞི་རྩའི་ཐོབ་ཐང་གི་ཁ་གཏད་དུ་ལངས་པ་ཡིན།

༤༽ འཛམ་གླིང་རྒྱལ་སྤྱིའི་མདུན་གྱི་ངོ་ཚ།

ང་ཚོས་རྒྱལ་སྤྱིའི་ཐོག་བོད་ནང་དུ་ཆོས་དད་རང་དབང་དང་། འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་འདུག་ཅེས་ཞུ་གཏུག་བྱེད་ཀྱིན་ཡོད་མོད། དོན་ངོ་མར་སོ་སོ་རང་ཉིད་ཀྱི་དམངས་གཙོའི་སྒྲིག་འཛུགས་ནང་ཆོས་བརྒྱུད་བྱེ་བྲག་པ་ཞིག་གི་འདྲ་མཉམ་གྱི་ཐོབ་ཐང་། ཁྲིམས་ཐོག་ནས་བཙན་འཕྲོག་བྱས་ཤིང་། ད་དུང་གཉའ་གནོན་དང་མཐོང་ཆུང་ཚད་ལས་འདས་པ་གཏོང་བཞིན་ཡོད་པ་ནི། དམངས་གཙོའི་རྒྱལ་ཁབ་ཁག་གཞིར་བཞག ཐ་ན་དགྲ་བོའི་མདུན་དུ་ཡང་ངོ་ཚ་ཞིང་ཡ་ང་བའི་གནས་སྟངས་ཤིག་ཆགས་ཡོད་པ་མ་ཟད། དེ་ལ་ཉེ་བར་མཁོ་བའི་གསལ་བསྒྲགས་ཀྱི་རྒྱུ་ཆ་གལ་ཆེན་ཁག་ཀྱང་མཁོ་སྤྲོད་བྱས་ཡོད།

དཔེར་ན། ནམ་རྒྱུན་ཕར་ཕྱོགས་ནས། “ཡུལ་གྱར་བོད་མིའི་སྲིད་གཞུང་དམངས་གཙོ་མ་རེད། དྲང་བདེན་མ་རེད། བྲན་གཡོག་ལམ་ལུགས་དང་། བཀས་བཀོད་རྒྱུད་འཛིན་གྱི་ལམ་ལུགས་རྙིང་པ་དེ་བསྐྱར་གསོ་བྱས་པ་རེད།” ཅེས་སྐྱོན་བརྗོད་དང་། ཡོངས་བསྒྲགས་བྱེད་བཞིན་ཡོད་པ་འདི་མཐར་གཏུག་ན། གནད་དོན་འདི་དང་འབྲེལ་བ་ཆེན་པོ་ཡོད་པས། འདིས་བོད་མིའི་རྩ་དོན་འཐབ་རྩོད་ཀྱི་གནས་བབས་ལ་ཡང་གནོད་པ་ཚབ་ཆེན་བཟོས་ཤིང་། ཕར་ཕྱོགས་གཞུང་གི་དྲིལ་བསྒྲགས་ལ་གོ་སྐབས་དང་མཐུན་རྐྱེན་མང་པོ་སྤྲད་ཡོད།

ད་དུང་བཙན་བྱོལ་བོད་མིའི་བཅའ་ཁྲིམས་དང་ལག་ལེན་གཉིས་ཀྱི་ཐོག་ནས། རྒྱལ་སྤྱིའི་དམངས་གཙོའི་ལྟ་གྲུབ་དང་ཡོངས་སུ་འགལ་བའི་སྤྱོད་ངན་རིམ་གྲངས་ཅན་དུ་སྤེལ་ཡོད། དཔེར་ན། རྒྱལ་སྤྱིའི་སྤྱི་ཚོགས་ནང་དམངས་གཙོ་ཟེར་དུས་ཆོས་ལུགས་དང་། མི་རིགས། ཕོ་མོ། ཤ་མདོག་སོགས་གང་ཡིན་ལ་མ་ལྟོས་པར་མི་རེ་ངོ་རེར་ཐོབ་ཐང་འདྲ་མཉམ་ཡོད་དགོས་མོད། བཙན་བྱོལ་སྤྱི་ཚོགས་ཆུང་ཆུང་འདིའི་ནང་ཇོ་ནང་ལ་ཆོས་བརྒྱུད་སྤྱི་མཚུངས་ལྟར་འཐུས་མིའི་ཐོབ་ཐང་མེད་ལ། ཝར་ཎཱ་སློབ་ཆེན་སོགས་སུ་སློབ་ཞུགས་བྱེད་རྒྱུའི་གོ་སྐབས་ཀྱང་སྤྲད་མེད།

དེ་ལྟ་བུའི་བཙན་བྱོལ་བོད་མིའི་གྲོས་ཁང་ནས་གཏན་ལ་ཕབ་པའི་དམངས་གཙོ་འདི། འདྲ་མཉམ་དང་དྲང་བདེན་མེད་པ། དམངས་གཙོའི་ལུགས་སྲོལ་དང་ཡོངས་སུ་མི་མཐུན་པའི་སྲོལ་ངན་ཞིག་ཆགས་ཡོད་པས། གལ་ཏེ་ནུབ་ཕྱོགས་དམངས་གཙོའི་རྒྱལ་ཁབ་ཁག་གི་ཆབ་སྲིད་པ་དང་། ཁྲིམས་ལུགས་རིག་པའི་མཁས་དབང་ཚོས་གསལ་བོར་ཤེས་ན། འདི་ནི་དམངས་གཙོའི་གཞི་རྩའི་ལྟ་བ་དང་རྒྱབ་འགལ་དུ་ཆགས་པའི་སྲོལ་ངན་ཞིག་ཏུ་ངོས་འཛིན་བྱེད་རྒྱུར་གདོན་མི་ཟ་ལ། དེའི་རྐྱེན་གྱིས་བཙན་བྱོལ་བོད་མི་རྣམས་ཀྱིས་རྒྱལ་སྤྱིའི་སྡིང་ཆའི་ཐོག་དམངས་གཙོ་དང་། འགྲོ་བ་མིའི་ཐོབ་ཐང་སྐོར་ལ་སྐད་ཆ་ཤོད་སྐབས་ནུས་མེད་ཆགས་རྒྱུ་མ་ཟད། གཞན་གྱིས་ཟུར་ཟ་དང་། མཐོང་ཆུང་བྱེད་པའི་གཞི་རུ་ཡང་འགྱུར་སྲིད།

མདོར་ན་བཙན་བྱོལ་བོད་མིའི་གྲོས་ཁང་ནས་ཇོ་ནང་ཆོས་བརྒྱུད་ལ་ཐོབ་ཐང་འདྲ་མཉམ་སྤྲད་མེད་པའི་གནད་དོན་འདི་ནི། བཙན་བྱོལ་བོད་མིའི་སྤྱི་ཚོགས་ནང་གི་ཆབ་སྲིད་དང་ཆོས་ལུགས་ཀྱི་དཀའ་རྙོག་ཆེ་ཤོས་ཤིག་དང་། དེང་རབས་མང་གཙོའི་ལམ་ལུགས་ཀྱི་ཁ་གཏད་དུ་ལངས་པའི་གནད་དོན་ཆེན་པོ་ཞིག་ཀྱང་ཆགས་ཡོད།

༥༽ བཅའ་ཁྲིམས་བསྐྱར་བཅོས་ཀྱི་དགོས་མཁོ།

བཙན་བྱོལ་བོད་མིའི་བཅའ་ཁྲིམས་ནི། ཕྱི་སྡོད་བོད་མི་སྲུང་སྐྱོབ་ཀྱི་མཁར་རྫོང་དང་གོ་མཛོད་ལྟ་བུ་ཡིན་ལ། དེ་ཡང་ཕྱི་སྡོད་བོད་མི་དམངས་ཀྱི་བཅའ་ཁྲིམས་ཡིན་པ་ལས། གྲོས་ཁང་ཁོ་ནར་དབང་བ་ཞིག་མིན། དེར་བརྟེན་བཅའ་ཁྲིམས་དེ་ཉིད་ཕྱོགས་མེད་དང་རིས་མེད་ཅིག་ཡིན་དགོས། གལ་ཏེ་དམངས་གཙོ་ཡིན་པར་ཁས་འཆེ་བའི་གཞུང་ངམ་སྒྲིག་འཛུགས་ཤིག་གི་རྩ་ཁྲིམས་སམ། བཅའ་ཁྲིམས་ནང་དུ་ནང་འགལ་དང་། ལྷག་པར་ཆོས་ལུགས་དང་མི་རིགས་སོགས་དབྱེ་འབྱེད་ཀྱི་ཚིག་ཡོད་ན། དེའི་རྐྱེན་གྱིས་སྤྱི་ཚོགས་ནང་འཁྲུག་རྩོད་དང་། འཐེན་འཁྱེར། རྩོད་གླེང་སོགས་རྒྱུན་མི་ཆད་པར་འབྱུང་ཞིང་། མཐུན་སྒྲིལ་གོང་བུ་གཅིག་གྱུར་ལ་གནོད་པ་ཚབ་ཆེན་གཏོང་བཞིན་ཡོད་པས། ༧གོང་ས་ཐམས་ཅད་མཁྱེན་པའི་རླབས་ཆེན་ཐུགས་ཀྱི་དམ་བཅའ་ཁག་གཞིར་བཟུང་། རྒྱལ་སྤྱིའི་དམངས་གཙོའི་ཁྲིམས་ལུགས་རིག་པའི་མཁས་དབང་དང་། ཉམས་མྱོང་ཅན་ལས་གྲུབ་པའི་ཚོགས་ཆུང་རྩ་འཛུགས་སམ། ཡང་ན་དེ་དག་ལས་ལམ་སྟོན་དང་བཀའ་སློབ་ཞུས་ཏེ། བཅའ་ཁྲིམས་ལ་བསྐྱར་ཞིབ་དང་བསྒྱུར་བཅོས་བྱས་ནས། ཆོས་བརྒྱུད་ཚང་མ་ཁྲིམས་ཀྱི་མདུན་སར་འདྲ་མཉམ་བྱས་ཏེ། གྲོས་ཁང་དུ་བོད་ཀྱི་ཆོས་བརྒྱུད་ཚང་མར་སྤྱི་འཐུས་ཀྱི་ས་མིག་ཡོད་ན་ཡོད་མཉམ་དང་། མེད་ན་མེད་མཉམ་བྱེད་དགོས།

ཕྱི་ལོ་ ༢༠༢༤ ལོའི་བཙན་བྱོལ་བོད་མིའི་སྐབས་ ༡༧ གྲོས་ཚོགས་འཚོགས་དུས་བརྒྱད་པའི་ཐོག བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་ནས་དྲང་བདེན་གཙུག་ཏུ་བཀུར་ཏེ། བཅའ་ཁྲིམས་བསྐྱར་བཅོས་དང་། ཇོ་ནང་ཆོས་བརྒྱུད་ལ་ཐོབ་ཐང་འདྲ་མཉམ་ཡོང་སླད། ཁྲིམས་འཆར་གྲོས་ཚོགས་སུ་ཕུལ་ཡང་། ཆོས་ལུགས་ཕྱོགས་ཞེན་ལ་ཤི་འཐམ་རོ་འཐམ་བྱས་ནས། སྡིག་པ་མིག་བཙུམ་བྱེད་མཁན་གྱི་གྲོས་མི་གླད་སྟོང་སྐོར་ཞིག་གིས་བཀག་འགོག་བྱས་པ་སོགས་ནམ་རྒྱུན་གྲོས་ཁང་ནང་ཆོལ་ཆོས་འཐེན་འཁྱེར་གྱི་ངུར་སྒྲ་བར་མེད་དུ་བསྒྲགས་ཏེ། བཙན་བྱོལ་བོད་མིའི་ཁོར་ཡུག་ཆུང་ཆུང་དེ་ཁྲག་ལྟར་དཀྲུགས་པས། སྤྱི་ཚོགས་ནང་གླང་གཙོ་དང་གླང་དམར་ཞེས་པའི་མིང་གི་ཆོ་ལོ་ཐོབ་ཡོད།

བཅའ་ཁྲིམས་ལ་བསྐྱར་བཅོས་བྱེད་དགོས་པ་ནི། དེའི་ཁྱབ་ཁོངས་སུ་ཡོད་པའི་ཆོས་བརྒྱུད་བྱེ་བྲག་པ་ཞིག་ལ་ཐོབ་ཐང་འདྲ་མཉམ་ཡོང་ཐབས་ཁོ་ན་མ་ཡིན་པར། བཙན་བྱོལ་བོད་མིའི་བཅའ་ཁྲིམས་འདི་ཆོས་ལུགས་ཀྱི་དབྱེ་མཚམས་ལས་བརྒལ་ཏེ། འདྲ་མཉམ་དང་དྲང་བདེན་གྱི་རྨང་གཞིའི་ཐོག དེང་རབས་དམངས་གཙོའི་བཅའ་ཁྲིམས་ཤིག་ཏུ་བསྒྱུར་ཐུབ་ན། དེས་བོད་མིའི་སྒྲིགས་འཛུགས་འདི་སྲ་བརྟན་དང་། ཆོལ་གསུམ་ཆོས་ལུགས་ཀྱི་མཐུན་སྒྲིལ། བོད་མིའི་རྩ་དོན་འཐབ་རྩོད་ཀྱི་ནུས་ཤུགས་གོང་དུ་འཕེལ་བ་སོགས་མདོར་ན་ཕུག་རྒྱང་རིང་པོའི་དགོས་དམིགས་དང་ཁེ་ཕན་ཆེན་པོ་ཡོད་ལ། བཙན་བྱོལ་བོད་མིའི་དམངས་གཙོའི་མཚན་སྙན་ཡང་ཇེ་མཐོར་གཏོང་ཐུབ།

༦༽ མཇུག་བསྡོམས།

བཙན་བྱོལ་བོད་མིའི་བསྒྲུབ་བྱ་གཙོ་བོ་ནི། བོད་རང་བཙན་ནམ། དབུ་མའི་ལམ་གྱི་སྲིད་བྱུས་ཀྱི་ཐོག་ནས་བོད་ལ་མིང་དོན་མཚུངས་པའི་ཚད་མཐོའི་རང་སྐྱོང་ཐོབ་ཐབས་བྱེད་རྒྱུ་དེ་ཡིན་མོད། ཤིན་ཏུ་སྟབས་ཉེས་པ་ཞིག་ལ། བཅའ་ཁྲིམས་ཀྱི་ཚིག་ཟིན་ལྟར་ཆོས་བརྒྱུད་དབྱེ་འབྱེད་དང་། དུས་རབས་ ༡༧ པའི་ནང་གི་བཀས་བཀོད་རྒྱུད་འཛིན་གྱི་ལམ་ལུགས་རྙིང་བར་ཨ་འཐས་གོ་འཐས། ཤི་འཐུས་རོ་འཐས་སུ་སོང་བས། དུས་རབས་གཅིག་ལྷག་གི་རིང་། ཆོལ་ཁ་དང་ཆོས་བརྒྱུད་ཀྱི་གཡུལ་འགྱེད་རྐྱང་རྐྱང་བྱས་ནས་བསྡད་པ་ནི། གཙོ་བོ་བཙན་བྱོལ་གྲོས་ཁང་ནང་གི་གྲོས་མི་སྐོར་ཞིག་གི་བྱས་ཉེས་ཁོ་ན་ཡིན་པས། ལོ་རྒྱུས་ཀྱི་ནག་ཉེས་འདི་དག་ངོས་འཛིན་གྱིས་བཙན་བྱོལ་ཁྲོད་ཀྱི་བོད་མི་ཚོར་ཁྲིམས་ཐོག་ནས་ཐོབ་ཐང་འདྲ་མཉམ་སྤྲད་དེ། གཞིས་བཞུགས་བོད་མི་ཡོངས་དང་། བཙན་བྱོལ་བོད་མིའི་མི་རབས་གསར་པ་ཚོར་དགོངས་དག་ཞུ་རྒྱུ་ཕྱི་དྲགས་པ་ལས་སྔ་མེད་དོ།།

མཆན། གོང་འཁོད་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་དགོངས་ཚུལ་ཡིན་པས་མ་ཁྱབ།