རྒྱ་གར་གཞུང་གིས་རྒྱ་ནག་ལ་སྐྱོན་བརྗོད་ནན་མོ་བྱས་འདུག

རྒྱ་ནག་གཞུང་གིས་རྒྱ་གར་གྱི་མངའ་སྡེ་ཨ་རི་ན་ཅལ་གྱི་ས་ཁོངས་ལ་མིང་བསྒྱུར་གསར་བའི་ས་ཁམས་ཆབ་སྲིད་ཀྱི་གཡོ་ཐབས་གཤོམ་བཞིན་པར་རྒྱ་གར་གཞུང་གིས་བརྡ་ལན་ཚ་སློག་བྱས་འདུག

ཟླ་འདིའི་ཕྱི་ཚེས་ ༡༢ ཉིན་གནད་དོན་དེའི་ཐད་རྒྱ་གར་ཕྱི་སྲིད་ལྷན་ཁང་གིས། རྒྱ་ནག་གཞུང་གིས་ས་ཁུལ་གྱི་མིང་རྫུན་བཟོ་དང་གཞི་མེད་ཀྱི་འགྲེལ་བརྗོད་སྣ་ཚོགས་བྱས་ཏེ། ས་ཁོངས་ཀྱི་བདག་དབང་ཡོད་ཐབས་སྟོན་བཞིན་པ་དེས་ས་ཁུལ་དེ་དག་ཨ་རུ་ན་ཅལ་གྱི་མངའ་ཁོངས་ཡིན་པའི་དོན་དངོས་ལ་འགྱུར་བ་གཏོང་མི་ཐུབ་ཅེས་དང་། རྒྱ་ནག་གི་དམིགས་ཡུལ་ངན་པའི་བྱ་སྤྱོད་དེ་དག་ལ་ངོས་ལེན་མེད་པ་མ་ཟད། གནད་དོན་དེས་རྒྱ་དཀར་ནག་གཉིས་བར་གྱི་མཉམ་འབྲེལ་ལ་ཁྱད་གསོད་གཏོང་གི་ཡོད་པས། རྒྱ་ནག་གིས་ཕྱོགས་གཉིས་བར་གྱི་འབྲེལ་ལམ་གཏོར་བརླག་གཏོང་བའི་བྱ་སྤྱོད་དེའི་རིགས་ཕྱིར་འཐེན་བྱེད་དགོས་པའི་སྐུལ་མ་བྱས་འདུག

རྒྱ་གར་གཞུང་ཕྱོགས་ཀྱིས་བསྒྲགས་པའི་གནས་ཚུལ་ལྟར་ན། ཉེ་ལམ་རྒྱ་ནག་གཞུང་གིས་རྒྱ་གར་གྱི་མངའ་སྡེ་ཨ་རུ་ན་ཅལ་གྱི་ས་ཁུལ་ ༢༣ ལ་མིང་གསར་བ་བཏགས་ཡོད་ཅིང་། དེ་ནི་འདས་པའི་ལོ་ངོ་བཅུའི་རིང་རྒྱ་ནག་གཞུང་གིས་ཨ་རུ་ན་ཅལ་མངའ་སྡེ་དེ་བོད་ཀྱི་ལྷོ་རྒྱུད་དམ་ཡང་ན་ལྷོ་མོན་ཡུལ་ཞེས་པའི་ས་ཁོངས་སུ་བཅུག་པ་ཐེངས་དྲུག་པ་ཆགས་འདུག་ལ། ད་ལྟའི་ཆར་རྒྱ་ནག་གཞུང་གིས་མིང་བཏགས་པའི་ས་ཁུལ་དེ་དག་ཨ་རུ་ན་ཅལ་མངའ་ཁོངས་ཀྱི་ས་ཁུལ་གང་དག་ཡིན་མིན་དང་མིང་ཇི་ལྟར་བཏགས་ཡོད་མེད་སོགས་ཡོངས་གྲགས་ཐོག་གསལ་ཁ་མི་འདུག

ད་ཐེངས་ད་དུང་རྒྱ་ནག་གཞུང་གིས་ཤར་ཊུ་ཀི་སི་ཐན་དང་ལ་དྭགས་བར་ཆགས་པའི་(Karakoram) རི་རྒྱུད་དུ་མིང་ལ་སན་ལིང་  (Cenling) ཞེས་པའི་རྫོང་ཁུལ་གསར་བ་ཞིག་བཙུགས་ཡོད་ཅིང་། རྒྱ་གར་གཞུང་གིས་དེ་ནི་ལ་དྭགས་ཀྱི་མངའ་ཁོངས་ཡིན་པས། རྒྱ་ནག་གཞུང་གིས་འདས་པའི་ལོ་གཅིག་ལྷག་ཙམ་གྱི་རིང་ལ་དྭགས་ཀྱི་ས་ཁོངས་ཡིན་པའི་(Karakoram) རི་རྒྱུད་དུ་ཤར་ཊུ་ཀི་སི་ཐན་གྱི་མངའ་ཁོངས་ཡིན་ཤག་གིས་ཧེ་ཡེན་(Hean) དང་ཧེ་གང་(Hekang) དེ་བཞིན། སན་ལིང་ (Cenling) བཅས་རྫོང་གསུམ་གསར་དུ་བཙུགས་པར་ངོ་རྒོལ་ཡོད་པའི་སྐྱོན་བརྗོད་དྲག་པོ་བྱས་འདུག

རྒྱ་གཞུང་གིས་རྒྱ་གར་ཨ་རུ་ནཱ་ཅལ་མངའ་སྡེ་ནི་བོད་ཀྱི་ལྷོ་མོན་ས་ཁུལ་ཡིན་པས་རྒྱ་ནག་གི་མངའ་ཁུངས་ཡིན་ལུགས་ཀྱི་འཁྱོག་བརྗོད་ལན་མང་བྱས་ཡོད་པ་མ་ཟད། ཕྱི་ལོ་ ༢༠༡༧ དང་ ༢༠༢༡། ༢༠༢༣། ༢༠༢༤ དང་ ༢༠༢༥ བཅས་སུ་ཨ་རུ་ནཱ་ཅལ་གྱི་ས་གནས་མང་དག་ཅིག་ལ་མིང་གསར་བ་བཏགས་ནས། ཁུལ་དེའི་རི་ཆུ་ནགས་གསུམ་གྱི་མིང་བསྒྱུར་ཐབས་བྱས་ཡོད་ཅིང་། དེའི་ཁྲོད་ཧ་དོང་ལ་ཟེར་བ་དང་། ཁྲི་ལམ་ཚོ། འབེ་རྩེ་གླིང་། མཁར་མང་ཆུ། མག་སྒོ། རླི་ཚོ། འཁྱགས་བཏུམ་རི། འབྲས་སྤྲུངས་རི། མཐོ་ལྕོག་རི། བདེ་པོ་རི། ཅི་ལོ། མཐོ་པོ་ལ། ཨ་ཤིང་རྩེ་ལ། སྤྲིན་དཀར་ལ། སྤང་སྒོར། མོ་ཤིང་། ཀུན་རིན། རིན་རྐང་། རྟ་སྒ་ལ། གཡང་བཟང་ཆུ། ཉ་མོ་རི་ཆུ། ཆུ་སྒང་། རྡོ་རི། ལུང་འགོ་ཁ་ལ། སྤང་ཁུག་ཆུ་འཛོམས། སོ་ལྟ་མཚོ། ད་བུ་ཧོ་གོང་། ཟླ་བ་སྒང་། གཉའ་ཨ་ཤ་བི་ལ་ཆུ། སྟ་ཀ་ཤིང་ཟེར་བ་སོགས་ལ་མིང་གསར་པ་བཏགས་ཡོད་འདུག

རྒྱ་ནག་རྒྱལ་སྲིད་སྤྱི་ཁྱབ་ཁང་ས་མིང་དོ་དམ་ལྷན་ཁང་ཟེར་བས་བོད་ལྷོ་རྒྱུད་ཁུལ་གྱི་ས་ཁུལ་ཁག་ཅིག་ལ་མིང་བཏགས་ནས།  རྒྱ་གར་བྱང་ཤར་ཁུལ་གྱི་ས་གནས་ ༢༦ ལྷག་བོད་མཚོ་སྣ་རྫོང་དང་ལྷུན་རྩེ་རྫོང་། རྫ་ཡུལ་རྫོང་། མེ་ཏོག་རྫོང་བཅས་ཀྱི་ཁོངས་སུ་བཅུག་ཡོད་ལ། དེ་བཞིན་ཕྱི་ལོ་ ༢༠༡༧  ཟླ་ ༤ ཚེས་  ༡༩ ཉིན་རྒྱ་ནག་གཞུང་གིས་ཨ་རུ་ནཱ་ཅལ་ཁུལ་གྱི་ཨོ་རྒྱན་གླིང་དང་མི་ལ་རི། མཆོད་རྟེན་དཀར་པོ་རི། སྨན་ཆུ་ཁ། པུས་མོའི་ལ། ནམ་མཁའ་ཕུབ་རི་བཅས་ཀྱང་རྒྱ་ནག་གི་མངའ་ཁོངས་ཡིན་ལུགས་ཀྱི་དྲིལ་བསྒྲགས་བྱས་ཡོད་པ་མ་ཟད། གྷོ་གྷུལ་ (Google) སོགས་སུའང་ནང་འཇུག་བྱས་འདུག

གསར་འགོད་པ། སྐལ་བཟང་སྦྱིན་པ།