དྷ་སར་བོད་རང་དབང་འཐབ་རྩོད་པའི་ལྷན་འཛོམས་འཚོག་རྒྱུ་རེད་འདུག

བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱིས་༸སྐུའི་གོ་སྟོན་བྱམས་བརྩེའི་ལོ་སྲུང་གཙིའི་ཆ་ཤས་སུ་བོད་རང་དབང་འཐབ་རྩོད་པའི་ལྷན་འཛོམས་ཉིན་གྲངས་གཉིས་རིང་འཚོག་རྒྱུ་རེད་འདུག

ཟླ་འདིའི་ཕྱི་ཚེས་ ༢༤ དང་ ༢༥ ཉིན་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱིས། ༸སྐུའི་གོ་སྟོན་བྱམས་བརྩེའི་ལོ་སྲུང་གཙིའི་ཆ་ཤས་སུ་བཞུགས་སྒར་དྷ་རམ་ས་ལར་བོད་རང་དབང་འཐབ་རྩོད་པའི་ལྷན་འཛོམས་ཚོགས་འདུ་ཞེས་རྒྱལ་གཅེས་དཔའ་བོ་དཔའ་མོ་རྣམས་ལྷན་འཛོམས་གནང་རྒྱུ་ཡིན་འདུག

འདས་ལོའི་བོད་མི་མང་སྤྱི་འཐུས་ཀྱི་གྲོས་ཚོགས་ཚོགས་དུས་ ༡༠ པའི་ཐོག བདེ་སྲུང་བཀའ་བློན་མཆོག་གིས་ཚོགས་འདུ་འདི་དང་འབྲེལ་བའི་སྤྱི་འཐུས་ཀྱི་དྲི་བར་ལན་འདེབས་གནང་སྐབས།  ༸སྐུའི་གོ་སྟོན་དང་འབྲེལ་ནས་བདེ་སྲུང་ལས་ཁུངས་ཀྱིས་༸གོང་ས་མཆོག་གི་དགོངས་གཞི་དང་བོད་སྤྱིའིི་རྩ་དོན་དང་འབྲེལ་བའི་ལས་གཞི་སྤེལ་རྒྱུར་བགྲོ་གླེང་བྱུང་སྟེ། བོད་བསྟན་སྲིད་དང་མི་རིགས་ཀྱི་ཆེད་དུ་བློས་བཏང་བྱེད་མཁན་མང་པོ་ཞིག་འདས་གྲོངས་སུ་ཕྱིན་ཡོད་པ་དང་། ད་དུང་འཚོ་བཞུགས་ཡོད་མཁན་ཁག་ཅིག་ཡོད་པ་རེད། ཁོང་རྣམ་པར་བཀའ་དྲིན་རྗེས་དྲན་དང་ལྷན་འཛོམས་ཡོང་ཆེད། གོ་སྟོན་དང་བསྟུན་ནས་བོད་ཀྱི་དཔའ་བོ་དཔའ་མོའི་ལྷན་འཛོམས་ཞེས་པ་གནང་རྒྱུ་བྱས་པ་རེད། དེའི་ཁྲོད་དུ་ཆུ་བཞི་སྒང་དྲུག་བསྟན་སྲུང་དང་བླངས་དམག་མི་ཟུར་བ་དང་། གློ་སྒྲིག་འཛུགས། མི་སྒེར་གྱི་ཐོག་ནས་མཉམ་ཞུགས་བྱེད་མཁན་གྱི་ཐོ་བསྡུས་ཡོད།  སྐབས་དེའི་སྐུ་མགྲོན་དུ་ཨ་འབྲུག་མགོན་པོ་བཀྲ་ཤིས་ཀྱི་བུ་དང་། སྐུ་ངོ་རྒྱ་ལོ་དོན་འགྲུབ་ཀྱི་བུ་སོགས་གདན་འདྲེན་གྱིས་ཆོལ་གསུམ་དཔའ་བོ་དཔའ་མོ་མཉམ་འཛོམས་ཐོག་རྒྱལ་ཞེན་དང་ཆིག་སྒྲིལ་གྱི་ནུས་པ་འཕེལ་ཐུབ་པའི་རེ་བ་བྱེད་བཞིན་ཡོད། ཅེས་གསུངས་སོང་།

སྤྱིར་བོད་རང་དབང་འཐབ་རྩོད་པའི་ལྷན་འཛོམས་དེ། ཕྱི་ལོ་ ༢༠༢༦ ཟླ་ ༢ ཚེས་ ༢༤ ནས་ ༢༧ བར་འཚོག་གཏན་ཁེལ་ཡོད་ཀྱང་། དབུས་འོས་བསྡུ་ལས་ཁང་གིས་འོས་བསྡུའི་ལས་རིམ་འགྲོ་བཞིན་པའི་སྐབས་སུ་ལྷན་འཛོམས་གནང་སྐབས་མ་མཆིས་པས། དངོས་གཞིའི་འོས་བསྡུ་མ་གྲུབ་བར་དུ་ཕར་འགྱངས་དགོས་པའི་བཀོད་ཁྱབ་གནང་ཡོད་འདུག་པས། ཚོགས་འདུའི་དུས་ཚོད་ལ་འགྱུར་བ་ཞིག་ཕྱིན་ཡོད་འདུག

གསར་འགོད་པ། སྐལ་བཟང་སྦྱིན་པ།