ཁ་བའི་མེ་ཏོག་ཅེས་པའི་ཆེད་སྒྲིག་ལ་འཛམ་གླིང་རོལ་དབྱངས་ཆེད་སྒྲིག་ལེགས་ཤོས་ཀྱི་བྱ་དགའ་ཐོབ།

ཨོ་གླིང་དུ་གནས་སྡོད་བོད་ཀྱི་གཞས་པ་བསྟན་འཛིན་ཆོས་རྒྱལ་ལགས་ཀྱི་ཁ་བའི་མེ་ཏོག་ཅེས་པའི་ཆེད་སྒྲིག་ལ་འཛམ་གླིང་རོལ་དབྱངས་ཆེད་སྒྲིག་ལེགས་ཤོས་ཀྱི་བྱ་དགའ་ཐོབ།

ལོ་ལྟར་ཨོ་གླིང་གི་ཁུན་སི་ལན་ཌི་ (Queensland) རོལ་དབྱངས་མཐུན་ཚོགས་ཀྱིས་ཨོ་གླིང་གི་རོལ་དབྱངས་དང་སྒྱུ་རྩལ་ལ་ཆེ་བསྟོད་དང་གཟེངས་རྟགས་འབུལ་སྲོལ་ཡོད་པ་ལྟར། ཁ་སང་ཕྱི་ཚེས་ ༢༢ ཉིན་ཨོ་གླིང་གི་ཕྱི་ལོ་ ༢༠༢༦ ལོའི་ཁུན་སི་ལན་ཌི་གླུ་གཞས་སྒྱུ་རྩལ་གཟེངས་རྟགས་ (Queensland Music Award) གནང་བའི་ཁྲོད། ཨོ་གླིང་དུ་གནས་སྡོད་བོད་ཀྱི་གཞས་པ་བསྟན་འཛིན་ཆོས་རྒྱལ་ལགས་ཀྱི་ཁ་བའི་མེ་ཏོག་ཞེས་པའི་ཆེད་སྒྲིག་ལ་འཛམ་གླིང་རོལ་དབྱངས་ཆེད་སྒྲིག་ལེགས་ཤོས་ཀྱི་བྱ་དགའ་ཐོབ་འདུག

འདི་ལོའི་ཁུན་སི་ལན་ཌི་གླུ་གཞས་སྒྱུ་རྩལ་གཟེངས་རྟགས་ཁོངས་སུ། ལོ་འཁོར་མོའི་གཞས་རྩེ་གྲ་དང་། ལོ་འཁོར་མོའི་རོལ་དབྱངས་རྩེ་གྲ། བརྙན་ཡག་ཤོས། འཛམ་གླིང་རོལ་དབྱངས་ཆེད་སྒྲིག་ལེགས་ཤོས། བྱིས་པའི་གླུ་གཞས། དེང་རབས་ཆེད་སྒྲིག་ཡག་ཤོས། སྲོལ་རྒྱུན་གྱི་ཆེད་སྒྲིག་ལེགས་ཤོས། སྒྱུ་རྩལ་བ་ཡག་ཤོས་སོགས་ཁྱབ་ཁོངས་མི་འདྲ་བའི་གཟེངས་རྟགས་ ༢༠ འདུག་པ་དང་། གཞས་པ་བསྟན་འཛིན་ཆོས་རྒྱལ་ལགས་ཀྱི་ཆེད་སྒྲིག་ཁ་བའི་མེ་ཏོག་ཅེས་པར་འཛམ་གླིང་རོལ་དབྱངས་ཆེད་སྒྲིག་ལེགས་ཤོས་ཀྱི་བྱ་དགའ་ཐོབ་འདུག

དེ་འབྲེལ་བསྟན་འཛིན་ཆོས་རྒྱལ་ལགས་ཀྱི་སྒེར་གྱི་ངོ་དེབ་སྟེང་། ཁ་བའི་མེ་ཏོག་ཅེས་པའི་ཆིད་སྒྲིག་ལ་འཛམ་གླིང་རོལ་དབྱངས་ཆེད་སྒྲིག་ལེགས་ཤོས་ཀྱི་བྱ་དགའ་ཐོབ་པར་དགའ་སྤོབས་ཆེན་པོ་བྱུང་། ངའི་གྲོགས་པོ་དང་མཉམ་ལས་གནང་མཁན་མེ་ཐི་ཁོར་བྷེ་ (Matt Corby) དང་ཨེག་སི་ (Alex Henriksson)། རོ་ཧིན་ (Rohin Jones) ཚུད་པའི་ང་ལ་རྒྱབ་སྐྱོར་གནང་མཁན་ཡོངས་ལ་བརྩེ་སེམས་དང་བཅས་བཀའ་དྲིན་ཆེ་ཞུ་རྒྱུ་ཡིན། ད་ལན་མཛད་སྒོར་དངོས་སུ་བཅར་མ་ཐུབ་ཀྱང་། སྒྱུ་རྩལ་བ་གཞན་རྣམས་ལ་གཟེངས་རྟགས་ཐོབ་པར་འཚམས་འདྲི་ཞུ་རྒྱུ་ཡིན། ཞེས་བརྗོད་འདུག

འདས་ལོའི་ཕྱི་ཟླ་ ༡༠ ཙེས་ ༢༢ ཉིན་ཨོ་གླིང་གི་སྒྲ་ཕབ་ལས་བཟོ་མཐུན་ཚོགས་ཀྱིས་ཕྱི་ལོ་ ༢༠༢༥ ལོའི་ཨ་རེ་ཡ་ (Aria) གླུ་གཞས་སྒྱུ་རྩལ་གཟེངས་རྟགས་གནང་བའི་ཁྲོད། སྒྱུ་རྩལ་བ་བསྟན་འཛིན་ཆོས་རྒྱལ་ལགས་ཀྱི་ནམ་མཁའི་སྔུར་སྒྲ་ཞེས་པའི་ཆེད་སྒྲིག་ལ་དེང་རབས་ཆེད་སྒྲིག་ཡག་ཤོས་ཀྱི་བྱ་དགའ་ཐོབ་ཡོད་ལ། ཁོང་གི་གླུ་གཞས་ཁ་བའི་མེ་ཏོག་ཅེས་པའི་ཆེད་སྒྲིག་ལ་ཨོ་གླིང་གི་ཨ་རེ་ཡ་གླུ་གཞས་སྒྱུ་རྩལ་གྱི་གཟེངས་རྟགས་ཀྱི་འོས་གཞིའི་ཁོངས་སུ་ཚུད་ཡོད་འདུག

ཕྱི་ལོ་ ༢༠༢༠ ལོར་བསྟན་འཛིན་ཆོས་རྒྱལ་ལགས་ཀྱི་བརྩམས་ཆོས་བར་དོ་ཞེས་པ་རྒྱལ་སྤྱིའི་གྷེ་རམ་མེ་ (Grammy) གཟེངས་རྟགས་ཀྱི་ཁོངས་སུ་ཚུད་མྱོང་ཡོད་ལ། དེ་ནི་བོད་མི་སྒེར་བ་ཞིག་གི་རོལ་དབྱངས་སྒྱུ་རྩལ་གྱི་བརྩམས་ཆོས་གྷེ་རམ་མེ་ (Grammy) གཟེངས་རྟགས་ཀྱི་ཁོངས་སུ་ཚུད་པ་ཐེངས་གཉིས་པ་དེ་ཡིན་ཞིང་། ཕྱི་ལོ་ ༢༠༠༡ ལོར་གླིང་བུ་བ་ངག་དབང་མཁས་མཆོག་ལགས་ཀྱི་གླུ་གཞས་རྒྱང་རིང་གི་ས་དེ་ན་ཞེས་པའང་ཚུད་ཡོད་འདུག ཕྱི་ལོ་ ༢༠༠༤ ལོར་སྟོད་རྒྱུད་གྲྭ་ཚང་གི་དགེ་འདུན་པ་བཞིའི་ཆོས་དབྱངས་གྷི་རམ་མེ་གཟེངས་རྟགས་ཀྱི་འོས་གཞིའི་ཁོངས་སུ་ཚུད་དེ་མཇུག་མཐར་བྱ་དགའ་ཡང་ཐོབ་ཡོད་འདུག

འདི་ལོར་༧གོང་ས་རྒྱལ་བ་རིན་པོ་ཆེ་མཆོག་གི་སྒོམ་སྒྲུབ་དང་ཁོང་གི་དགོངས་བཞེད་ཀྱི་སྐོར་ལ་བརྗོད་པའི་གསུང་དེབ་(Meditations: The Reflections of His Holiness the Dalai Lama) ཞུ་བར་གྷ་རཱ་མི་ (Grammy) རྒྱལ་སྤྱིའི་ཕུལ་བྱུང་གསུང་དེབ་སྒྲ་འཇུག་དང་། གཏམ་རྒྱུད་སྒྲུང་འགྲེལ་གྱི་གཟེངས་རྟགས་ཕུལ་ཡོད་པ་རེད།

བོད་ཀྱི་སྒྱུ་རྩལ་བ་བསྟན་འཛིན་ཆོས་རྒྱལ་ལགས་ནི་གཞས་པ་དང་རོལ་དབྱངས་བ། དབྱངས་རྩོམ་པ་པོ་བཅས་ཡིན་འདུག་ལ། རོལ་དབྱངས་ཆེད་བསྒྲིགས་གྲངས་ ༩ ཙམ་ཡོད་འདུག ཁོང་ནི་བོད་མངའ་རིས་ཁུལ་གྱི་ས་མ་འབྲོག་གི་གཞི་ཁྱིམ་དཀྱུས་མ་ཞིག་ཏུ་སྐྱེས་ཤིང་། ཕྱི་ལོ་ ༡༩༧༠ དོན་གྲངས་ནང་རྒྱ་གར་ནང་བཙན་བྱོལ་དུ་སླེབས་ཏེ་བཞུགས་སྒར་དྷ་སའི་ཁུལ་གྱི་བོད་ཁྱིམ་སློབ་གྲྭའི་ནང་འཚར་ལོངས་བྱུང་ཡོད་པ་དང་། ཕྱི་ལོ་ ༡༩༩༧ ལོར་ཨོ་གླིང་དུ་གཞིས་སྤོས་བྱས་རྗེས་རྐྱང་གཞས་དང་ཕྱིའི་རོགས་ཚོགས་གཞན་དང་ལྷན་དུ་གླུ་གཞས་སྣ་ཚོགས་བཏང་དང་གཏོང་བཞིན་ཡོད་འདུག་ལ། ཨོ་གླིང་གྲོས་ཚོགས་སུ་བོད་དོན་ཞུ་གཏུགས་དང་ཨོ་གླིང་དུ་བོད་མིའི་གནད་ཡོད་མི་སྣ་གདན་འདྲེན་སོགས་ཞུས་ཏེ་བོད་དོན་ལས་འགུལ་སྤེལ་བ་སོགས་གནང་ཡོད་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།