བཙན་བྱོལ་བོད་མིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུའི་སྐབས་སྒྲིག་གཞིར་འགལ་འཛོལ་བྱུང་རྐྱེན་བལ་ཡུལ་མཆོད་འཇོར་ས་གནས་ལ་དངོས་གཞིའི་འོས་བསྡུ་ཐེངས་གཅིག་ཕྱིར་འཐེན་གནང་འདུག
དབུས་འོས་བསྡུ་ལས་ཁང་གི་གསར་འགོད་གསལ་བསྒྲགས་ཀྱི་པར། ༢༠༢༦།༠༡།༢༨
འདི་ལོའི་བཙན་བྱོལ་བོད་མིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུའི་སྐབས་བལ་ཡུལ་མཆོད་འཇོར་ཁུལ་གྱི་འོས་བསྡུ་ཚགས་ཚུད་མ་བྱུང་བའི་ལབ་གླེང་ཞུ་གཏུག་བྱུང་བ་ལྟར། དབུས་འོས་བསྡུ་ལས་ཁང་གིས་འབྲེལ་ཡོད་ལ་འདྲི་བརྩད་དང་འོས་ཤོག་ལ་ཞིབ་འཇུག་གནང་བ་བརྒྱུད། ཁ་སང་ཕྱི་ཚེས་ ༢༣ ཉིན་མཆོད་འཇོར་ས་གནས་འོས་བསྡུའི་འགན་འཛིན་ལས་རོགས་ཀྱི་མིང་ཐོག་ཏུ་ཐག་གཅོད་ཡི་གེ་ཞིག་བཏང་གནང་བའི་ནང་དུ། འོས་བསྡུའི་སྒྲིག་གཞིའི་དགོངས་དོན་ཁག་དང་འགལ་འཛོལ་ཚབས་ཆེན་བྱུང་ཡོད་པ་ར་འཕྲོད་བྱུང་བ་གཞིར་བཟུང་ད་ལན་མཆོད་འཇོར་ས་གནས་ལ་དངོས་གཞིའི་འོས་བསྡུ་ཐེངས་གཅིག་ཕྱིར་འཐེན་ཞུ་རྒྱུའི་ཐག་གཅོད་གནང་བ་ཡིན་སྐོར་གསུངས་འདུག
དེ་ཡང་དབུས་འོས་བསྡུ་ལས་ཁང་གི་ཡི་གེ་དེའི་ནང་། འདི་ལས་ནས་དེ་སྔོན་བལ་ཡུལ་ས་གནས་འོས་བསྡུའི་འགན་འཛིན་རྣམས་ལ་ཕྱི་ལོ་ ༢༠༢༥་་༢༦ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུའི་ལས་དོན་བྱེད་ཕྱོགས་ཐོག་སྒྲིག་གཞི་དོན་ཚན་ ༢༦ ནང་གསེས་ ༡ གཞིར་བཟུང་། བལ་ཡུལ་ནང་ཆབ་སྲིད་ཀྱི་གནས་སྟངས་དཀའ་ངལ་ཅན་གྱི་ས་བབས་དང་བསྟུན་འོས་བསྡུའི་དུས་ཚོད་ལ་སྔ་སྣུར་ཆོག་པའི་བཀའ་འཁྲོལ་སྩལ་པ་ལས། གཞན་འོས་བསྡུའི་ལས་དོན་ཡོངས་རྫོགས་སྔར་ལམ་ལྟར་ས་གནས་ཀྱི་ཆབ་སྲིད་གནས་བབས་དང་བསྟུན་འོས་སྒྲིག་ལྟར་ཕྱག་བསྟར་གནང་དགོས་པའི་ལམ་སྟོན་ཞུས་ཡོད་སྐོར་དང་། བལ་ཡུལ་ནང་གི་འོས་བསྡུ་ཆེན་མོའི་ལས་རིམ་ལ་དོ་ཕོག་མི་འབྱུང་ཆེད་འདི་ནས་སྔོན་འགྲོའི་འོས་བསྡུའི་གྲུབ་འབྲས་གསལ་བསྒྲགས་ཞུ་རྒྱུ་དང༌། བལ་ཡུལ་ནང་གི་སྔོན་འགྲོའི་འོས་བསྡུའི་གྲུབ་འབྲས་རྩིས་མེད་བཏང་མི་དགོས་པའི་དགོངས་པ་ཆེ་བཞེས་ཀྱིས་ཐག་གཅོད་ཞུས་པ་དང༌། བལ་ཡུལ་ནང་སྔོན་འགྲོའི་འོས་བསྡུའི་ལས་དོན་རྣམས་སྒྲིག་མཐུན་བྱུང་ཡོད་མེད་ཐོག་ཞིབ་འཇུག་ཞུ་རྒྱུའི་ཐག་གཅོད་ཞུས་ཡོད་པ་མཁྱེན་གསལ་དང་། བལ་ཡུལ་ནང་སྤྱི་ཡོངས་ཆབ་སྲིད་གནས་བབས་སྤྱི་དང་། བྱེ་བྲག་ཏུ་འདི་ལས་ནས་དངོས་གཞིའི་འོས་བསྡུའི་ལས་རིམ་གཏན་འབེབས་ལྟར་དུས་ཚོད་འདེང་མིན་གྱིས། བལ་ཡུལ་ནང་སྔོན་འགྲོའི་འོས་བསྡུའི་ལས་དོན་བྱས་ཕྱོགས་ཐད་འདི་ནས་སྐབས་འཕྲལ་ས་ གནས་ས་ཐོག་ཏུ་ཆེད་བཅར་གྱིས་ཞིབ་འཇུག་བྱེད་ཐབས་བྲལ་བ་དངོས་གནས་ལ་བརྟེན། ས་གནས་ཀྱི་འོས་ཤོག་དང་། འབྲེལ་ཆགས་ཡིག་ཆ་ཁག དེ་བཞིན་འབྲེལ་ཡོད་ས་གནས་འོས་བསྡུའི་འགན་འཛིན་རྣམས་ལ་དྲྭ་ཐོག་དྲི་རྩད་ཞུས་པ་སོགས་ལ་གཞི་བཅོལ་གྱིས་ད་ལམ་ཞིབ་བཤེར་མཐིལ་ཕྱིན་ཞུས་འབྲས་སུ་སྐྱོན་གནད་མང་དག་ཅིག་མངོན་གསལ་ཐོག་འོས་བསྡུའི་སྒྲིག་འགལ་ཆགས་པ་དངོས་ར་འཕྲོད་པ་བྱུང་ཡོད། ཅེས་གསལ་འདུག
ས་གནས་ནས་འོས་བསྡུའི་སྒྲིག་གཞིར་འགལ་འཛོར་བྱུང་བའི་གནད་དོན་གསལ་སྟོན་གནང་བའི་ནང་། ༡། སྤྱིར་བཅའ་སྒྲིག་དགོངས་དོན་ལྟར་བོད་མི་འོས་འཕེན་པ་ཞིག་ལ་སོ་སོའི་ཐོབ་ཁུངས་ནས་འོས་གཅིག་གི་ཐོབ་ཐང་ལས་མེད་ནའང་། བལ་ཡུལ་མཆོད་འཇོར་ས་གནས་སུ་འོས་འཕེན་པ་གཅིག་གིས་འོས་ཤོག་གཅིག་ལས་མང་བ་འཕེན་པའམ། ཡིག་གཟུགས་གཅིག་གི་འོས་ཤོག་མང་པོར་བྲིས་པ་མང་དག་ཅིག་མངོན་གསལ་འདུག་པ་འོས་སྒྲིག་འགལ་འཛོལ་ཚབས་ཆེ་བྱུང་བ་དཔེར་ན། འོས་འཕེན་པ་ཁག་ཅིག་ནས་འོས་ཤོག་ ༡༠ དང་། ༢༠། ༤༠། ༧༠། ༡༠༠ ཡན་བརྒལ་བ་འབྲི་མཁན་མང་དག་ཅིག་བྱུང་འདུག
༢། འོས་མིའི་ཨང་རིམ་དང་མིང་གཞུང་གཅིག་གྱུར་ལེབ་བཤུས་བརྒྱབ་པའི་ཡིག་གཟུགས་གཅིག་པའི་འོས་ཤོག་མང་དག་ཁ་གསལ་མཐོང་རྒྱུ་འདུག་པ་ནི་ཚབས་ཆེའི་སྒྲིག་འགལ་ཆགས་ཡོད།
༣། འོས་བསྡུའི་དུས་ཡུན་ཉིན་གཅིག་དེ་རང་ལ་ཟིན་དགོས་ཀྱང་། དེ་ནས་ཁྱིམ་ཚང་སོ་སོ་དང་ཚོགས་སྡེ་ཁག་ལ་འོས་ཤོག་འགྲེམས་སྤེལ་བྱས་པའི་ཐོག འོས་ཤོག་ཕྱིར་བསྡུ་ཉིན་འགྱངས་ཀྱིས་བསྡུ་ལེན་བྱས་པའི་སྒྲིག་འགལ་བྱུང་འདུག
༤། དེ་གའི་ས་གནས་ཁག་ཅིག་ལ་ཚོགས་ཆུང་གི་ཚོགས་མི་གཅིག་རང་བརྒྱུད་འགྱིག་ཤོག་འཁྱེར་ཏེ་འོས་ཤོག་བགོས་འགྲེམས་དང་བསྡུ་ལེན་བྱས་རིགས་བྱུང་ཡོད་ཚོད་འདུག
༥། འོས་ཤོག་ཁག་ཅིག་སྟེང་འོས་མིའི་མིང་ཙམ་ལས་གཞན་འབྲུ་དོན་ཆ་ཚང་བཀོད་མེད་པར་འོས་མི་ངོ་རྟགས་ཆོད་པའི་ཁུངས་སྐྱེལ་ཁ་གསལ་མེད་པ་དང༌། འོས་མིའི་མིང་དང་ལོ་རྒྱུས་མ་མཐུན་པ་བཀོད་རིགས་ཁག་གཅིག་རྩིས་འགྲོ་བཏང་བ་ཡང་བྱུང་ཡོད་པ་ནི། འོས་བསྡུའི་སྒྲིག་གཞི་དོན་ཚན་ ༣༤(༢།ཅ) ནང་དོན་སྔོན་འགྲོའི་སྐབས་འོས་མིའི་ངོ་རྟགས་ཆོད་པའི་ཁུངས་སྐྱེལ་ཁ་གསལ་མེད་ན་འོས་ཤོག་རྩིས་མེད་གཏོང་རྒྱུ་ཞེས་པའི་དགོངས་དོན་དང་འགལ་འཛོལ་བྱུང་འདུག
༦། འོས་ཤོག་གཅིག་གི་སྟེང་ཡིག་གཟུགས་མི་འདྲ་བའི་མི་གཉིས་ནས་འོས་ཤོག་བསྐངས་བ་གང་ཙམ་བྱུང་འདུག
༧། ཨ་རི་ནས་ཡིན་པའི་འོས་འཕེན་པ་ཞིག་ལ་རྒྱ་བལ་འབྲུག་གསུམ་གྱི་ཆོལ་ཁའི་ཐོབ་ཁུངས་ལ་འོས་འཕངས་བ་སྒྲིག་འགལ་བྱུང་འདུག
༨། ད་ལན་བལ་ཡུལ་ནང་གི་འོས་བསྡུའི་ལས་དོན་བྱས་ཕྱོགས་ཐོག་འདི་གའི་ཞིབ་འཇུག་གི་བརྒྱུད་རིམ་ནང་། ཉིད་རང་ལ་ཐེངས་གསུམ་དྲི་རྩད་བྱས་སྐབས་བལ་ཡུལ་མཆོད་འཇོར་ནང་འོས་བསྡུའི་སྐབས་སྒྲིག་འགལ་གང་ཡང་བྱུང་མེད་པའི་ཚགས་ཚུད་ངང་གྲུབ་ཡོད་ལུགས་སྐོར་འགྲེལ་བརྗོད་ནན་གཏན་གནང་ཡོད་པ་མ་ཟད། འོས་ཤོག་གྲངས་བཤེར་སྐབས་ཚོགས་མི་དང་ཟུར་དཔང་སུ་ཐད་ནས་མི་གཅིག་གིས་འོས་ཤོག་མང་པོ་བྲིས་ཡོད་པ་ཤེས་རྟོགས་བྱུང་མེད་པའི་འགྲེལ་བརྗོད་བྱུང་བ་མ་ཟད། མཆོད་འཇོར་མི་མང་བརྒྱ་ཆ་ ༦༠ གྲྭ་ཟུར་དང་བཙུན་ཟུར་ཡིན་པ་དང་། བླ་མ་གཅིག་གི་སློབ་མ་ཡིན་པའི་རྒྱུ་མཚན་གྱིས་ཡིག་གཟུགས་གཅིག་པ་ཡོང་སྲིད་པའི་གསལ་བཤད་བྱས་ཡོད། ལྷག་པར་དུ་ད་སྐབས་བལ་ཡུལ་ནང་གི་སྔོན་འགྲོའི་འོས་བསྡུ་ལས་དོན་ཐོག་འདི་ག་དབུས་སུ་ཞིབ་འཇུག་འགྲོ་བཞིན་པ་ཤེས་བཞིན་དུ་ཡང་ཡང་དབུས་ལ་འབྲེལ་བ་བྱས་ཏེ་གནོན་ཤུགས་ལྟ་བུའི་བསུན་གཙེར་བཟོས་པ་དང་། ཕྱི་ལོ་ ༢༠༢༦ ཟླ་ ༤ ཚེས་ ༢༢ ཉིན་ཡིག་ཐོག་ནས་ཞིབ་འཇུག་ལ་ཐེ་ཇུས་ལྟ་བུའི་ཉེན་བརྡ་༼སྐུ་ཉིད་ནས་སྤྱི་ཚོགས་འཁྲུག་གཞི་མི་ཡོང་བའི་འགན་འཁུར་གཙོ་བོ་བཞེས་ནས། འདི་ག་བལ་ཡུལ་མཆོད་འཇོར་ས་གནས་ཁེར་རྐྱང་ལ་འོས་ཤོག་བཏང་བདེ་མ་མཆིས་པའི་ཁྲིམས་མཐུན་གྱི་དཔང་རྟགས་དང་། ལུང་འདྲེན་ཁ་གསལ་འཁོད་པའི་བཀའ་ཡིག་ཞིག་གང་མྱུར་གནང་སྐྱོང་ཡོང་བ་ཞུ༽ ཞེས་བསམ་ཡུལ་ལས་འདས་པའི་ས་གནས་འོས་བསྡུའི་འགན་འཛིན་ལས་རོགས་ཞིག་ནས་དབུས་འོས་བསྡུ་ལས་ཁང་ལ་ཞིབ་འཇུག་ཐོག་ལས་འགན་གྱི་ཆ་ཤས་སུ་མཐུན་འགྱུར་རམ་འདེགས་ཞུ་རྒྱུ་ལྟ་ཞོག དེ་ལས་ལྡོག་སྟེ་འདི་གར་སྐྱོན་བརྗོད་དང་འཇིགས་བསྐུལ་ལྟ་བུའི་སྒྲིག་འགལ་གྱི་ཡིག་ཆུང་བཏང་བ་འོས་འཚམས་གཏན་ནས་མ་མཐོང་བས་ཡིད་གཟབ་གནང་གལ། ཞེལ་གསལ་འདུག
མཇུག་གི་ཐག་གཅོད་ནང་དུ། བལ་ཡུལ་ནང་འོས་བསྡུའི་ལས་དོན་ཡོངས་རྫོགས་ས་གནས་ཀྱི་དམིགས་བསལ་ཆབ་སྲིད་ཀྱི་དཀའ་ངལ་གྱི་གནས་བབས་འོག་ཐབས་བརྒྱ་བྱུས་སྟོང་ངང་སྒྲུབ་དགོས་པའི་གནས་སྟངས་འོག་འོས་འཕེན་པ་ཁག་ཅིག་ནས་འོས་བསྡུ་སྤྱི་ལ་ཕན་གནོད་འབྲེལ་བའི་ངན་ཇུས་ཀྱིས་འོས་ཤོག་བེད་ལོག་བྱས་རྐྱེན་འོས་བསྡུ་སྤྱིའི་གྲུབ་འབྲས་ཁ་ལོ་བསྒྱུར་ཉེན་དང་། འོས་བསྡུ་རང་དབང་དྲང་བདེན་དང་། གསང་བའི་ཐོག་ནས་གྲུབ་ཐུབ་མེད་པ་ངོས་འཛིན་གྱིས། བཙན་བྱོལ་བོད་མིའི་བཅའ་ཁྲིམས་དོན་ཚན་ ༩༧(༦) དང་། དོན་ཚན་ ༨(༢) ནང་ ”འོས་བསྡུའི་ལས་དོན་དང་འབྲེལ་བའི་རྩོད་རྙོག་ཇི་བྱུང་ལ་ཞིབ་འཇུག་དང་། ཐག་གཅོད་ཆ་ཚང་དབུས་འོས་བསྡུ་ལས་ཁང་ནས་བྱེད་དགོས།”ཞེས་པའི་དགོངས་དོན་ལྟར། འོས་བསྡུའི་སྒྲིག་གཞི་དོན་ཚན་ ༥༩(༥) དང་། དོན་ཚན་ ༡༩། དོན་ཚན་ ༣༢(༡) བཅས་ཀྱི་སྒྲིག་གཞིའི་དགོངས་དོན་འགལ་འཛོལ་ཚབས་ཆེ་བྱུང་ཡོད་པའི་ར་འཕྲོད་བྱུང་བའི་འགལ་འཛོལ་ལ་གཞིགས་པའི་ད་ལན་མཆོད་འཇོར་ས་གནས་ལ་དངོས་གཞིའི་འོས་བསྡུ་ཐེངས་གཅིག་ཕྱིར་འཐེན་ཞུ་རྒྱུའི་ཐག་གཅོད་ཞུས་པ་ཡིན་ཞེས་གསུངས་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
