དེ་རིང་དངོས་གཞིའི་འོས་བསྡུ་མགོ་འཛུགས་སྐབས་དབུས་འོས་བསྡུའི་འགན་འཛིན་བློ་བཟང་ཡེ་ཤེས་ལགས་ཀྱིས་རྒྱ་ནག་དམར་གཞུང་གིས་བཙན་བྱོལ་བོད་མིའི་འོས་བསྡུར་ཀླན་ཀ་བཙལ་བར་ལན་འདེབས་གནང་།
དེ་རིང་ཕྱི་ཚེས་ ༢༦ ཉིན་བཙན་བྱོལ་བོད་མིའི་སྐབས་བཅོ་བརྒྱད་པའི་སྤྱི་འཐུས་ཀྱི་དངོས་གཞི་འོས་བསྡུ་འཛམ་གླིང་རྒྱལ་ཁབ་ ༢༧ ཙམ་ནང་གནང་དང་གནང་བཞིན་པ་ཡིན་ལ། དེ་རིང་བཞུགས་སྒར་ཁུལ་གྱི་དངོས་གཞིའི་འོས་བསྡུ་གནང་སྐབས། དབུས་འོས་བསྡུ་ལས་ཁང་གི་འགན་འཛིན་བློ་བཟང་ཡེ་ཤེས་ལགས་ཀྱིས། རྒྱ་ནག་གཞུང་གིས་བོད་མིའི་སྒྲིག་འཛུགས་དང་བཙན་བྱོལ་བོད་མིའི་འོས་བསྡུ་དང་འབྲེལ་ནས་གང་ཡང་བཤད་པའི་དབང་ཚད་མེད་ལ། རྒྱ་གཞུང་གིས་དྲག་གནོན་བྱེད་པའི་གནས་སྟངས་ལ་ངོས་ལེན་རྩ་བ་ནས་མེད་སྐོར་དང་། བལ་ཡུལ་མཆོད་འཇོར་ས་གནས་ཀྱི་དངོས་གཞིའི་འོས་བསྡུ་ཕྱིར་འཐེན་དང་འབྲེལ་ནས་གསལ་བཤད་གང་ཡང་མེད་སྐོར་གསུངས་བྱུང་།
བལ་ཡུལ་མཆོད་འཇོར་ས་གནས་ཀྱི་དངོས་གཞིའི་འོས་བསྡུ་ཕྱིར་འཐེན་དང་འབྲེལ་ནས་བོད་མིའི་སྒྲིག་འཛུགས་ཀྱི་དབུས་འོས་བསྡུ་ལས་ཁང་གི་འགན་འཛིན་བློ་བཟང་ཡེ་ཤེས་ལགས་ཀྱིས། ད་ལྟ་འོས་བསྡུ་འགྲོ་མུས་ཡིན་པ་དང་། སང་ཉིན་ཨ་རིའི་ནང་འོས་བསྡུ་བྱ་རྒྱུ་དང་དེ་རྗེས་གྲངས་བཤེར་འགྲོ་ཡི་ཡོད་པ་རེད། དེར་བརྟེན་གནད་དོན་དེའི་ཐད་ང་ཚོའི་གསལ་བཤད་གང་ཡང་མེད། ང་ཚོའི་འགན་དེ་འོས་བསྡུ་འདི་ཞི་འཇམ་པོ་དང་ཚགས་ཚུད་པོའི་ཐོག་ནས་འགྲོ་དགོས་ཀྱི་ཡོད་པར་བརྟེན། འོས་བསྡུ་ལ་དོ་ཕོག་མི་འགྲོ་བའི་རྒྱུ་མཚན་གྱི་ཐོག་ནས་ཁ་སང་གི་ཐག་གཅོད་དེ་ལ་བརྒྱུད་བསྒྲགས་ཤུགས་ཆེན་བྱེད་མི་དགོས་པ་དང་། རྒྱལ་སྤྱིའི་སྡིངས་ཆའི་ནང་ལོགས་ལ་འཆར་མི་དགོས་པ། རྒྱལ་སྤྱིའི་ནང་འཆར་དགོས་པའི་གནད་དོན་ཆེན་པོ་ཞིག་མིན་པས། འོས་བསྡུ་འདི་རྩ་ཆེན་པོ་བརྩི་བའི་ཐོག་ནས་གསལ་བཤད་གང་ཡང་ཞུ་ཡི་མེད། དེར་བརྟེན་མ་འོངས་པར་དེའི་ཐོག་ལ་ཕྱི་གསལ་ནང་གསལ་བཟོ་དགོས་པའི་གནད་དོན་ཆགས་པ་ཡིན་ན། བརྒྱ་ཆ་ ༡༠༠ ཐམ་པ་རྣམ་པ་ཚང་མར་གསལ་བཤད་ཞིབ་ཕྲ་ཞུ་ཆོག ཅེས་གསུངས་སོང་།
ཐེངས་འདིའི་འོས་བསྡུ་དང་འབྲེལ་ནས་འགན་འཛིན་བློ་བཟང་ཡེ་ཤེས་ལགས་ཀྱིས་གསར་འགོད་པར། དེ་རིང་ནི་བོད་དོན་འཐབ་རྩོད་ཀྱི་བརྒྱུད་རིམ་ནང་བཙན་བྱོལ་བོད་མི་ཡོད་དོ་ཅོག་ལ་ཧ་ཅང་གལ་ཆེ་བའི་ཉིན་མོ་ཞིག་ཆགས་ཡོད། དེ་ཡང་བོད་མིའི་སྒྲིག་འཛུགས་ཀྱི་འཛིན་སྐྱོང་སྲ་བརྟན་དང་འབྲེལ་བའི་སྤྱི་འཐུས་ཀྱི་འོས་བསྡུ་རེད། མ་འོངས་པའི་བོད་དོན་འཐབ་རྩོད་ཀྱི་བརྒྱུད་རིམ་གང་དུ་བསླེབས་ཡོད་མེད་སྤྱི་འཐུས་ལྷན་ཚོགས་ཆགས་ཡོད་དུས། ད་ལན་གྱི་འོས་བསྡུ་ཧ་ཅང་གི་རྩ་ཆེན་པོ་རེད། དབུས་འོས་བསྡུ་ལྷན་ཁང་གིས་ཟླ་བ་མང་པོའི་རིང་གྲ་སྒྲིག་བྱས་ཏེ། ཕྱི་ཟླ་གཉིས་པའི་ཚེས་ ༡ ཉིན་སྔོན་འགྲོའི་འོས་བསྡུ་ཚགས་ཚུད་པོ་བྱུང་ཡོད། ད་ལན་འཛམ་གླིང་གི་རྒྱལ་ཁབ་ ༢༧ ནང་གང་དུ་གནས་ཡོད་ཀྱང་། བོད་མིའི་སྒྲིག་འཛུགས་ཀྱི་ལས་གཞིའི་ནང་དུ་ཆ་ཤས་ལེན་བཞིན་ཡོད་པ་རེད། དེ་རིང་ཉིན་མོ་འདི་དཔེ་མི་སྲིད་པའི་རྩ་ཆེ་བ་ཞིག་ལ་ངོས་འཛིན་ཞུ་ཡི་ཡོད། རྒྱུ་མཚན་གཙོ་བོ་གཅིག་ནི་༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་ལས་བསྐྱོན་ཏེ་བཙུགས་པའི་སྒྲིག་འཛུགས་འདི་བོད་དོན་འཐབ་རྩོད་དང་ཐད་ཀར་འབྲེལ་བ་ཆགས་ཡོད། བོད་མི་ཚོས་རྣམ་གཡེང་དང་ལྷོད་གཡེང་མེད་པའི་ཐོག་ནས་འོས་བསྡུ་ནང་ཆ་ཤས་ལེན་རྒྱུ་གལ་ཆེན་པོ་རེད། སྔོན་འགྲོའི་སྐབས་སུ་བློ་ཕམ་ཞིག་ལ་ཁག་ཅིག་གིས་ཆ་ཤས་ལེན་ཐུབ་མེད། དེའི་རྒྱུ་མཚན་གྱི་ཐོག་ནས་དེབ་སྐྱེལ་གྱི་བརྒྱ་ཆ་ཉུང་ཉུང་ཡིན་པས། རྒྱ་ནག་གཞུང་གིས་ཀྱང་བོད་མིའི་སྒྲིག་འཛུགས་ལ་ངོས་ལེན་མེད་པའི་འཁྱོག་བཤད་མུ་མཐུད་བྱས་ཡོད། སྔོན་འགྲོའི་འོས་བསྡུ་དེ་དགུན་ཁའི་དུས་ཚིགས་དང་ཁེལ་ཡོད་པས། བོད་མི་མང་པོ་ཞིག་འགྲུལ་བཞུད་ཀྱི་འཁྲུག་ཆ་དོད་པོ་ཆགས་པ་ལ་བརྟེན་ནས་འོས་བསྡུའི་ནང་ཆ་ཤས་ལེན་མ་ཐུབ་པ་ཞིག་ལ་ངོས་འཛིན་ཞུ་ཡི་ཡོད། བོད་མིའི་སྒྲིག་འཛུགས་ལ་ལྷག་བསམ་མེད་པ་དང་ཤ་ཚ་མེད་པ་ཞིག་ངོས་འཛིན་ཞུ་ཡི་མེད། རྒྱ་ནག་གཞུང་གིས་འཁྱོག་བཤད་ག་ཚོད་བྱས་ཀྱང་། འཛམ་གླིང་ཡོངས་ཀྱི་བོད་མི་རྣམས་རྒྱལ་ཞེན་ཡོད་པར་ངོས་འཛིན་ཞུ་ཡི་ཡོད། ཅེས་གསུངས།
ཡང་ཁོང་གིས། ད་ལན་གྱི་དངོས་གཞི་འོས་བསྡུའི་ནང་ཆ་ཤས་གང་མང་ལེན་ཐུབ་པ་དང་། འོས་བསྡུའི་བརྒྱུད་རིམ་གྱི་ཐོག་ནས་རྒྱ་ནག་གཞུང་ལ་བརྡ་ལན་གསལ་པོ་སྤྲོད་ཐུབ་པའི་རེ་བ་རྒྱག་གི་ཡོད། དངོས་གཞིའི་སྔོན་ལ་ས་གནས་ཁག་གི་འོས་བསྡུ་ཁང་བརྒྱུད་ནས་མི་མང་གིས་ཆ་ཤས་ལེན་སྟངས་ཐོག་ལ་ཤུགས་བརྒྱབ་ཡོད། ཐེངས་འདིའི་དངོས་གཞི་འོས་བསྡུའི་རྗེས་སུ་རྒྱ་གཞུང་ལ་ལན་གསལ་པོ་ཞིག་འགྲོ་ཐུབ་པའི་རེ་བ་བྱེད་བཞིན་ཡོད། སྤྱིར་རྒྱ་ནག་གཞུང་གིས་བོད་མིའི་སྒྲིག་འཛུགས་ལ་གང་ཡང་བཤད་པའི་དབང་ཚད་ཡོད་པ་མ་རེད། རྒྱུ་མཚན་ནི་རྒྱ་ནག་གི་སྲིད་གྲོས་དང་མི་མང་འཐུས་མི་ཚོགས་ཆེན་ནང་ཚོགས་མི་ག་ཚོད་ཡོད་ཀྱང་རང་དབང་ལྡན་པའི་ཐོག་ནས་འོས་བསྡུ་བྱས་ཐུབ་མེད། ལོ་ངོ་ ༧༠ ཙམ་རིང་བཙན་བྱོལ་བོད་མིས་འོས་བསྡུའི་ཐོག་ནས་སྒྲིག་འཛུགས་སྲ་བརྟན་བྱུང་ཡོད་ལ། བོད་དང་བོད་མིའི་དངོས་ཡོད་གནས་སྟངས་མཚོན་པའི་ཁྲིམས་མཐུན་གྱི་གཞུང་དེ་ཆགས་ཡོད། རྒྱ་ནག་གཞུང་གིས་ལོ་ ༧༠ རིང་བཙན་འཛུལ་བྱས་པ་མ་ཟད། ད་དུང་མུ་མཐུད་དུ་འཁྱོག་བཤད་བྱས་ཡོད་ལ། བོད་ནང་གི་བོད་མི་རྣམས་སྐྱིད་པོ་ཡོད་རབས་དང་། བཙན་བྱོལ་ནང་གི་བོད་མི་རྣམས་ཀྱིས་བོད་དོན་འཐབ་རྩོད་བྱེད་བཞིན་པ་ཁྲིམས་འགལ་ཡིན་ལུགས་སོགས་ཀྱི་འཁྱོག་བཤད་བྱས་ཡོད། ཉེ་ཆར་རྒྱ་གཞུང་གིས་བཙན་བྱོལ་བོད་མིའི་འོས་བསྡུ་ཡང་ཁྲིམས་འགལ་ཡིན་པའི་འཁྱོག་བཤད་བྱས་ཡོད། དེ་ནི་གད་མོ་ཤོར་བའི་གནས་སྟངས་ཤིག་ཆགས་ཡོད། གལ་སྲིད་བོད་ནང་བོད་མི་རྣམས་ལ་དངོས་གནས་རང་དབང་ཡོད་ཚེ། བོད་མི་རྣམས་ལ་རང་དབང་དང་གུ་ཡངས་ལྡན་པའི་ཐོག་ནས་འོས་བསྡུ་ཞིག་བྱས་དང་། དེ་ནས་རྒྱ་གཞུང་ལ་ལན་ཞིག་རག་ཐུབ་ཀྱི་རེད། བཙན་བྱོལ་ནང་དུ་བོད་མི་འོས་བསྡུའི་ཁྲོད་ཆ་ཤས་ཤིག་བླངས་པ་ཙམ་གྱིས་ཆབ་སྲིད་ཀྱི་ངོ་བོ་ཞིག་མཚོན་ཡོད་ལ། དེས་བོད་མི་རྣམས་ཀྱིས་བོད་དོན་འཐབ་རྩོད་བློས་བཏང་མེད་པ་དང་། རྒྱ་གཞུང་གིས་དྲག་གནོན་བྱེད་པའི་གནས་སྟངས་ངོས་ལེན་རྩ་བ་ནས་མེད་པའི་བརྡ་ལན་བཏང་ཡོད་པ་རེད། བོད་མི་ཡོངས་ཀྱིས་འགན་འཁུར་བའི་ཐོག་ནས་ཆ་ཤས་ལེན་དགོས་པ་གལ་ཆེན་པོ་རེད། ཅེས་འགྲེལ་བརྗོད་གནང་སོང་།
གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
