བོད་རང་དབང་འཐབ་རྩོད་པ་རྣམས་ལ་རིམ་གྱིས་གཟེངས་རྟགས་དབུལ་རྒྱུ་ཡིན་འདུག 

བོད་རང་དབང་འཐབ་རྩོད་པའི་ལྷན་ཚོགས་ཐོག་བདེ་སྲུང་ལས་ཁུངས་ནས་ཁོང་རྣམ་པར་གཟེངས་བསྟོད་བྱ་དགའ་ཕུལ་ཡོད་འདུག་ལ་མ་འོངས་པར་རྒྱལ་གཅེས་དཔའ་བོ་དཔའ་མོ་རྣམས་ལ་རིམ་པ་བྱས་ཏེ་གཟེངས་རྟགས་དབུལ་རྒྱུ་ཡིན་འདུག

ཟླ་འདིའི་ཕྱི་ཚེས་ ༢༤ དང་ ༢༥ ཉིན་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་གོ་སྒྲིག་འོག ༧སྐུའི་གོ་སྟོན་བྱམས་བརྩེའི་ལོ་སྲུང་གཙིའི་ཆ་ཤས་སུ་བཞུགས་སྒར་དྷ་རམ་ས་ལར་བོད་རང་དབང་འཐབ་རྩོད་པའི་ལྷན་འཛོམས་ཞེས་པའི་ཉིན་གྲངས་གཉིས་རིང་གི་ཚོགས་འདུ་ཞིག་འཚོགས་ཡོད་པ་ལྟར། དེ་རིང་བཞུགས་སྒར་༧རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་རྗེས། ཐེག་ཆེན་ཆོས་གླིང་གཙུག་ལག་ཁང་དུ་མཇུག་སྡོམ་གྱི་མཛད་སྒོ་ཞིག་འཚོགས་སོང་ལ། ད་ལན་གྱི་ལྷན་ཚོགས་དེའི་ཐོག་ཆབ་སྲིད་བཙོན་ཟུར་དང་འབྲེལ་ཆགས། བོད་དམག་ཟུར་པ། ཆུ་སྒང་བསྟན་སྲུང་དང་བླངས་དམག་ཟུར། གློ་སྒྲིག་དམག་ཟུར། དམག་སྒར་ཨང་ ༢༢ པའི་དམག་ཟུར། ༧རྒྱལ་བའི་སྐུ་སྲུང་ཟུར་པའི་སྐུ་ཚབ། བདེ་སྲུང་ལས་ཁུངས་ཀྱི་འབྲེལ་ཡོད་སྐུ་ཚབ་བཅས་ཁྱོན་ཚོགས་བཅར་བ་ ༨༩ ཡིས། ལྷན་ཚོགས་ཐོག་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཕྱྭ་དང་འབྲེལ་ནས་དོན་ཚན་ཉེར་བརྒྱད་ཀྱི་གྲོས་ཆོད་ཀྱང་གཏན་འབེབས་གནང་འདུག 

དེ་རིང་མཇུག་སྡོམ་མཛད་སྒོའི་སྟེང་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། ཚོགས་འདུ་འཚོག་སྐབས་ཚོགས་ཆུང་གསུམ་ལ་བགོས་ནས་བགྲོ་གླེང་གནང་བའི་གནད་དོན་གཅིག་ནི། དུས་ད་ལྟ་བར་༧གོང་ས་རྒྱལ་་རིན་པོ་ཆེ་མཆོག་གི་དབུ་འཁྲིད་བཟང་པོ་དེའི་འོག་ནས། བོད་ཅེས་པ་དེ་ད་ལྟ་ཡིན་ཡང་གོ་རྒྱུ་ཡོད་པ། བོད་མི་ཞེས་པའང་ཡོད་པ། བོད་མིའི་འཐབ་རྩོད་དེའང་ལྷག་ཡོད་པ་ནི། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བྱུང་བ་ཡིན།  དེ་རིང་ཚོགས་འདུ་འདིར་ཕེབས་མཁན་རྣམས་ཀྱི་ནང་བོད་རང་དབང་འཐབ་རྩོད་ཆེད་རང་སྲོག་བློས་གཏོང་མཁན་ཧ་ལས་པའི་མང་པོ་ཡོད། རྒྱ་ནག་གཞུང་གིས་བོད་བཙན་འཕྲོག་བྱས་པའི་དབང་གིས། སྤྱི་ཡོངས་ནས་བསམ་བློ་བཏང་ན་བོད་མི་ས་ཡ་གཅིག་དང་འབུམ་གཉིས་ལྷག་རྐྱེན་འདས་སུ་གྱུར་བ་ནི་ཚང་མས་མཁྱེན་གསལ་རེད། དེ་བཞིན་བཙན་བྱོལ་ནང་ཚུར་ཡོང་ཐུབ་མཁན་ཁྲོད་ཀྱི་རྒན་རབས་པ་རྣམས་ལྷག་རྒྱུ་ཉུང་ཉུང་ཆགས་འདུག ཡིན་ཡང་། དེ་རིང་དངོས་གནས་དྲང་གནས་༧རྒྱལ་བ་རིན་པོ་ཆེ་མཆོག་གི་དབུ་འཁྲིད་འོག་ལ། བོད་རང་དབང་འཐབ་རྩོད་ཀྱི་ཆེད་དུ་རང་སྲོག་བློས་གཏོང་མཁན་གྱི་དཔའ་བོ་དཔའ་མོ་རྣམས་དྷ་རམ་ས་ལར་གདན་འདྲེན་ཞུ་ཐུབ་པའི་ཁྲོད། བོད་དམག་ཟུར་པ། དགའ་ལྡན་ཕོ་བྲང་དུས་སྐབས་ཀྱི་བོད་དམག བསྟན་སྲུང་དང་བླངས་དམག་ཟུར། གློ་སྒྲིག་འཛུགས་ཀྱི་སྐུ་ཚབ། བདེ་སྲུང་གི་འབྲེལ་ཡོད་ཁག་ཅིག ཆབ་སྲིད་བཙོན་ཟུར་དང་འབྲེལ་ཆགས་སོགས་ཕེབས་ནས། དོན་ཚན་རེ་རེའི་ཐོག་བགྲོ་གླེང་གནང་བ་དང་ལྷན་ཚོགས་སྐབས་རྒྱབ་གཉེར་དང་གཏན་འབེབས་ཞུས་པ་རེད། ཅེས་གསུངས་སོང་། 

ཡང་བདེ་སྲུང་བཀའ་བློན་མཆོག་གིས། ད་ལན་ཚོགས་བཅར་བ་ཡོངས་ཀྱིས་སྤྱི་མོས་ཀྱི་ཐོག་ནས་༧གོང་ས་རྒྱལ་བ་རིན་པོ་ཆེ་མཆོག་ལ་དུས་རྒྱུན་དུ་ནས་ཞབས་ཕྱི་ཞུ་མཁན་གྱི་དགའ་ལྡན་ཕོ་བྲང་གི་ལས་བྱེད་རྣམས་ལ་ཐུགས་རྗེ་ལེགས་འབུལ་ཞིག་ངེས་པར་དུ་དབུལ་དགོས་པའི་གཏན་འབེབས་བྱུང་ཡོད། སྤྱི་མོས་གཏན་འབེབས་དེའང་བདེ་སྲུང་ལས་ཁུངས་ཀྱིས་སེམས་ནང་དྲན་པ་དེ་དང་ཏག་ཏག་ཅིག་བྱུང་ནས། བཀའ་བློན་དྲུང་ཆེ་སོགས་དང་རྒྱས་འཛོམས་བྱས་ཏེ། ད་ལན་ཚང་མ་ཡོད་ས་ནས་༧གོང་ས་རྒྱལ་བ་རིན་པོ་ཆེ་མཆོག་ལ་ཞབས་ཕྱི་ཞུ་མཁན་རྣམས་ལ་ཐུགས་རྗེ་ལེགས་འབུལ་གྱི་ལེགས་སྐྱེས་ཤིག་དབུལ་རྒྱུ་བྱུང་ན། ཚང་མ་བློ་བདེ་པོའི་ངང་ནས་ཕེབས་ཐུབ་པ་ཞིག་ཆགས་ཀྱི་རེད་བསམས་ནས་དེ་རིང་ཞོགས་པར་འདིར་འཛོམས་དགོས་པའི་དམིགས་ཡུལ་གཙོ་བོ་དེ་ཡིན། ཞེས་གསུངས་སོང་།

འདི་གའི་གསར་འགོད་པས་བདེ་སྲུང་དྲུང་ཆེ་ཀརྨ་རིན་ཆེན་ལགས་སུ་བོད་རང་དབང་འཐབ་རྩོད་པའི་ལྷན་འཛོམས་དེ་འཚོག་དགོས་པའི་དམིགས་ཡུལ་དང་ལྷན་ཚོགས་སྐབས་དོན་ཚན་ག་རེ་གཏན་འབེབས་བྱུང་ཡོད་པའི་སྐོར་བཀའ་འདྲི་ཞུས་པར་ཁོང་གིས། ཚོགས་འདུ་འདི་དགོས་པ་དང་རྒྱུ་མཚན་གཙོ་བོ་གཉིས་བྱས་ནས་འཚོགས་པ་ཞིག་ཡིན་ཞིང་། དོན་ཚན་དང་པོ་དེ་ད་ལོ་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་དགུ་བཅུ་ལ་ཕེབས་ནས་སྐུའི་གོ་སྟོན་སྲུང་གཙི་ཞུས་དང་ཞུ་མུས་དང་བསྟུན། ལྷན་འཛོམས་ཡག་པོ་ཞིག་བྱུང་ན་བསམ་པའི་བསམ་བློ་དང་། ད་ལན་ཚོགས་ཞུགས་ཁོངས་སུ་ཁོངས་མི་འདྲ་བ་མང་པོ་ཞིག་ནས་ཡོད་སྐབས། ཚང་མ་རུབ་རུབ་བཟོས་ཏེ་ཁོང་ཅག་གི་དགོངས་འཆར་ག་རེ་ཡོད་པ་དེ་དག་བདེ་སྲུང་ལས་ཁུངས་ཀྱིས་རྟོགས་ཐུབ་ཐབས་དང་། ཚོགས་ཞུགས་པ་རྣམས་དངོས་གནས་ལུས་སྲོག་བློས་གཏོང་ཐུབ་མཁན་ཡིན་སྟབས། ཁོང་རྣམ་པའི་དགོངས་འཆར་ལ་ཉན་ནས་ལག་བསྟར་གནང་ཐུབ་རྒྱུ་ག་རེ་ཡོད་མེད་དང་། བདེ་སྲུང་ལས་ཁུངས་ཀྱིས་ཁོང་རྣམ་པའི་དགོངས་པ་དེ་དག་གལ་ཆེན་དང་རྩ་ཆེན་པོར་བརྩིས་ནས་ལྷན་ཚོགས་བསྡུ་སྐོང་བྱས་པ་ཡིན། ཞེས་དང་། ད་ལན་ལྷན་ཚོགས་སྟེང་གྲོས་གཞི་ཉེར་བརྒྱད་ཀྱི་ཐོག་ལ་གླེང་སློང་དང་གཏན་འབེབས་བྱས་ཡོད་པའི་ཁྲོད། ༧གོང་ས་རྒྱལ་བ་རིན་པོ་ཆེ་མཆོག་གི་དགོངས་གཞི་བཞིན་ཇི་ལྟར་ཤར་བསྐྱོད་བྱ་དགོས་པའི་གནད་དོན་དང་འབྲེལ་ནས། ང་ཚོའི་སྤྱི་ཚོགས་ནང་མཐུན་སྒྲིལ་རྡོག་རྩ་ཆིག་སྒྲིལ་དགོས་པ། དགྲ་གཉེན་ངོ་ཤེས་པའི་ཐོག་ནས་ལས་དོན་གཉེར་དགོས་པའི་ཐད་གླེང་སློང་བྱུང་སོང་། ཞེས་དང་། རྗེས་ཕྱོགས་གཞུང་འབྲེལ་གྱི་སྲིད་ཇུས་ཐོག་ནས་བོད་ཀྱི་རང་དབང་འཐབ་རྩོད་པ་རྣམས་ལ་ངོས་འཛིན་ཡོད་པ་སུས་བལྟས་ཀྱང་ཤེས་ཐུབ་པ་ཞིག་ཡོང་ཐབས་སུ་གཟེངས་རྟགས་དབུལ་བའི་མགོ་བཙུགས་ཡོད་སྐོར་འགྲེལ་བརྗོད་གནང་བྱུང་།

དེ་རིང་བདེ་སྲུང་ལས་ཁུངས་ཀྱིས་བོད་རང་དབང་འཐབ་རྩོད་པའི་ལྷན་འཛོམས་དང་འབྲེལ་ནས་གསར་འགོད་བསྒྲགས་གཏམ་ཤིག་སྤེལ་བའི་ཁྲོད། ལྷན་འཛོམས་འདིའི་གྲོས་གཞི་གཙོ་བོ་སྤྱི་ནོར་༸གོང་ས་༧སྐྱབས་མགོན་ཆེན་པོ་མཆོག་དགུང་གྲངས་ ༩༠ ལ་ཕེབས་པའི་སྐུའི་གོ་སྟོན་ལ་རོལ་བའི་དུས་ཚིགས་ཁྱད་པར་ཅན་དང་བསྟུན། མགོན་པོ་གང་ཉིད་མཆོག་སྐུ་ཚེ་ཞབས་པད་བརྟན་པ་དང་། ཐུགས་ཀྱི་བཞེད་དགོངས་མཐའ་དག་གེགས་མེད་ལྷུན་གྱིས་འགྲུབ་སླད་གཞུང་དམངས་གཉིས་ནས་འདས་པའི་ལོ་རྒྱུས་དང་། ད་ལྟའི་གནས་བབ། དཔའ་བོ་དཔའ་མོ་རྣམས་ཀྱི་ཉམས་མྱོང་བཅས་ལ་གཞི་བཅོལ་ཏེ་ལས་དོན་བསྒྲུབ་དགོས་པ་ཇི་མཆིས་སྐོར་དང་། བདེ་སྲུང་ལས་ཁུངས་ཀྱི་ཕྱག་ལས་གནང་ཕྱོགས་བཅས་ཀྱི་ཐོག་གྲོས་ཆོད་བཞག་ཡོད་པ་རྣམས་མཇལ་བཅར་སྐབས་སྙན་སྒྲོན་ཞུས་ཡོད་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།