རྒྱལ་སྤྱིའི་གསར་འགོད་རང་དབང་ཉིན་མོ་སྲུང་གཙི་ཞུས་སོང་།

དེ་རིང་བཞུགས་སྒར་དྷ་སར་བོད་ཀྱི་གསར་འགོད་མཐུན་ཚོགས་ཀྱིས་རྒྱལ་སྤྱིའི་གསར་འགོད་རང་དབང་ཉིན་མོ་ཐེངས་ ༣༣ པ་སྲུང་གཙིའི་ལས་རིམ་འཚོགས་སོང་།

དེ་རིང་སྔ་དྲོའི་ཆུ་ཚོད་ ༡༠ སྟེང་གངས་སྐྱིད་ཉེ་འདབས་གྷམ་རོའུ་དོ་ར་ཇ་ཁང་དུ། བོད་ཀྱི་གསར་འགོད་མཐུན་ཚོགས་ཀྱིས་རྒྱལ་སྤྱིའི་གསར་འགོད་རང་དབང་ཉིན་མོ་སྲུང་གཙི་ཞུས་སོང་བ་དང་། མཛད་སྒོའི་སྟེང་བཞུགས་སྒར་དུ་རྟེན་གཞི་བྱས་པའི་བོད་པའི་གསར་ཁང་ཁག་གི་གསར་འགོད་པ་རྣམས་ལྷན་འཛོམས་ཐོག་གསར་འགོད་རང་དབང་དང་འབྲེལ་བའི་གཏམ་བཤད་དང་ཕན་ཚུན་བར་བསམ་ཚུལ་བརྗེ་རེས་སོགས་གནང་ཞིང་། སྐབས་དེར་ནོ་ཝེ་རླུང་འཕྲིན་ཁང་གི་གསར་འགོད་པ་བསྟན་འཛིན་འོད་ཟེར་ལགས་སུ་འདི་ལོའི་གསར་འགྱུར་ལས་རིགས་ཀྱི་ཞབས་ལོ་རིང་ཤོས་ཀྱི་གཟེངས་རྟགས་དང་ངོས་འཛིན་ལག་འཁྱེར་ཞིག་ཕུལ།  དེ་རིང་ནི་ཕྱི་ལོ་ ༡༩༩༣ ལོའི་ཟླ་ ༥ ཚེས་ ༣ ཉིན་མཉམ་འབྲེལ་རྒྱལ་ཚོགས་ཀྱིས་རྒྱལ་སྤྱིའི་གསར་འགོད་རང་དབང་ཉིན་མོ་གཏན་འབེབ་སྲུང་གཙི་བྱས་ནས་ལོ་ངོ་  ༣༣ འཁོར་བའི་ཉིན་མོ་ཡིན་ཞིང་། བཙན་བྱོལ་དུ་ཕྱི་ལོ་ ༡༩༩༧ ལོར་བོད་ཀྱི་གསར་འགོད་མཐུན་ཚོགས་དབུ་བརྙེས་ནས་ལོ་ངོ་ ༢༩ འཁོར་གྱི་འདུག

དེ་རིང་གི་གསར་འགོད་རང་དབང་ཉིན་མོའི་བསྒྲགས་གཏམ་ནང་། དེ་རིང་ང་ཚོས་ང་ཚོ་བཙན་བྱོལ་བའི་གནས་སྟངས་འོག་ནས་གསར་འགོད་རང་དབང་ཉིན་མོ་སྲུང་གཙི་བྱེད་བཞིན་ཡོད་ཀྱང་། ང་ཚོས་སྤོབས་པ་དང་ལྡན་པའི་ཐོག་ནས་རང་དབང་དང་འདྲ་མཉམ། དྲང་བདེན། འགྲོ་བ་མིའི་ཐོབ་ཐང་སོགས་སྲུང་སྐྱོབ་བྱེད་བཞིན་ཡོད་པ་མ་ཟད། བོད་རྒྱལ་ཁབ་ཀྱི་དམངས་གཙོའི་ལམ་ལུགས་ཀྱི་མ་འོངས་པའི་གཞི་རྟེན་བསྐྲུན་བཞིན་ཡོད།  དེ་བས་ང་ཚོས་ཉིན་མོ་འདི་ནི་ང་ཚོའི་སྤོབས་པ་དང་གཟི་བརྗིད་དུ་བརྩི་ཆོག

འདི་ལོའི་རྒྱལ་སྤྱིའི་གསར་འགོད་རང་དབང་ཉིན་མོ་ཐེངས་ ༣༣ ་པའི་གཏན་འབེབས་བརྗོད་གཞི་ནི། ཞི་བདེ་ལྡན་པའི་མ་འོངས་པ་ཞིག་འཛུགས་སྐྲུན་བྱེད། འགྲོ་བ་མིའི་ཐོབ་ཐང་དང་འཕེལ་རྒྱས། བདེ་འཇགས་སྲུང་སྐྱོབ་བཅས་ཀྱི་ཆེད་དུ་གསར་འགོད་རང་དབང་གོང་འཕེལ་གཏོང་། ཞེས་པ་འདི་ཡིན། ང་ཚོ་བོད་ཀྱི་གསར་འགོད་མཐུན་ཚོགས་ཀྱི་འདི་ལོའི་གསར་འགོད་རང་དབང་ཉིན་མོའི་གཏན་འབེབས་བརྗོད་གཞི་ནི། ཀ་ཁ་ག་ངའི་བདག་པོ་བོད་མི་ཡིན། ང་ཚོས་བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་བྱེད། ཅེས་པ་འདི་ཡིན། བརྗོད་གཞི་འདི་བདམས་དགོས་དོན་ནི། ཉེ་ལམ་ཕྱི་ཟླ་ ༣ ཚེས་ ༡༢ ཉིན་༸གོང་ས་རྒྱལ་བ་རིན་པོ་ཆེ་མཆོག་གིས་བོད་མི་རྣམས་ལ་བོད་ཀྱི་སྐད་ཡིག་སྦྱོང་སྤྱོད་དགོས་པ་དང་བོད་མི་ནང་ཁུལ་དུ་བོད་སྐད་མ་བཤད་པར་ཕྱིའི་སྐད་ཡིག་ལ་བརྟེན་དགོས་ན་ངོ་ཚ་དང་ཐབས་སྐྱོ་བོ་རེད་ཅེས་བཀའ་སློབ་བསྩལ་ཡོད། དེ་བཞིན། ༸པཎ་ཆེན་སྐུ་ཕྲེང་བཅུ་བ་མཆོག་གིས། ངས་རྒྱ་སྐད་བཤད་ཤེས་པ་ནི་ངའི་འཇོན་ཐང་དང་ཡོན་ཏན་རེད། གལ་སྲིད་ངས་མ་ཤེས་ནའང་ངོ་ཚ་དགོས་དོན་མེད། འོན་ཀྱང་གལ་སྲིད་ངས་བོད་སྐད་དང་བོད་ཡིག་མ་ཤེས་པ་ཡིན་ན། དེ་ནི་ངའི་ཞབས་འདྲེན་ཡིན་པས་ང་རང་ངོ་ཚ་དགོས་པ་ཞིག་རེད།” ཅེས་གསུངས་དྲོན་མོ་བཞག་ཡོད། ད་ལྟའི་ཆར་རྒྱ་ནག་གཞུང་གིས་ཀྲུང་ཧྭ་མི་རིགས་གཅིག་གྱུར་ཡར་ཐོན་སྐུལ་འདེད་ཟེར་བ་དང་མི་རིགས་བཅའ་སྡོད་སློབ་གྲྭ་ཟེར་བའི་ལམ་ལུགས་སོགས་བཙུགས་ཏེ་བོད་མི་རྒྱ་བསྒྱུར་གྱི་སྲིད་ཇུས་གཏིང་ནག་དེ་འདྲ་ལག་བསྟར་བྱེད་བཞིན་ཡོད་ལ། ལྷག་པར་དུ་ད་ལྟའི་བོད་ནང་གི་མི་རབས་གསར་བ་མང་པོ་ཞིག་ལ་རྒྱའི་སྐད་ཡིག་གི་ཤུགས་རྐྱེན་ཐེབས་ནས་རང་མི་རིགས་ཀྱི་སྐད་ཡིག་མི་ཤེས་པའི་མི་རབས་ཤིག་བསྒྱུར་དང་སྒྱུར་མུས་ཡིན་པ་སོགས་ལ་བརྟེན་ནས། ང་ཚོས་རང་མི་རིགས་ཀྱི་སྐད་ཡིག་སྦྱོང་སྤྱོད་སྤེལ་གསུམ་བྱ་རྒྱུ་གལ་ཆེན་དུ་བརྩིས་ནས་བརྗོད་གཞི་འདི་བདམས་པ་ཡིན། ཞེས་གསལ་འདུག

དེ་རིང་གསར་འགོད་རང་དབང་ཉིན་མོ་སྲུང་གཙི་དང་བསྟུན། ད་ལྟ་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་། སྐད་དང་ཡི་གེ ལོ་རྒྱུས་དང་བཅས་པ་རྒྱ་བསྒྱུར་བྱེད་བཞིན་པའི་ཛ་དྲག་གི་གནས་སྟངས་དང་འབྲེལ་ནས་རྒྱ་ནག་གཞུང་ལ་གཤམ་འཁོད་དགོས་འདུན་དོན་ཚན་བཞི་དང་དགག་བྱ་གཅིག་བཅས་བཏོན། དང་པོ། རྒྱ་ནག་གཞུང་གིས་༸ཀུན་གཟིགས་པན་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་དབུས་པའི་བོད་ཀྱི་ཆབ་སྲིད་བཙོན་པ་ཡོངས་ཆ་རྐྱེན་གང་ཡང་མེད་པའི་ཐོག་ནས་འཕྲལ་དུ་ཀློད་གྲོལ་གཏོང་དགོས་པ་དང་། རྒྱའི་བཙོན་ཁང་ནས་གར་སོང་ཆ་མེད་དུ་གྱུར་བའི་བོད་མི་ཆབ་སྲིད་བཙོན་མ་རྣམས་ཀྱི་གནས་ཚུལ་ཁ་གསལ་བཟོ་དགོས། གཉིས་པ། རྒྱལ་སྤྱིའི་གསར་འགོད་པ་དང་རང་དབང་ཅན་གྱི་རྒྱལ་སྤྱིའི་སྐུ་ཚབ་ཚོགས་པ་རང་དབང་གི་ཐོག་ནས་བོད་ནང་དུ་བསྐྱོད་བཅུག་སྟེ་བོད་ནང་གི་བོད་མིའི་དངོས་ཡོད་ཀྱི་གནས་སྟངས་རྣམས་རྒྱལ་སྤྱིའི་སྤྱི་ཚོགས་ལ་ཕྱི་གསལ་ནང་གསལ་གྱི་ཐོག་ནས་འགྲེལ་བརྗོད་ཞུ་ཆོག་དགོས། གསུམ་པ། རྒྱ་ནག་གཞུང་གིས་ཆ་རྐྱེན་གང་ཡང་མེད་པའི་ཐོག་ནས་བོད་རྒྱ་གྲོས་མོལ་སླར་གསོ་བྱས་ཏེ་བོད་རྒྱའི་དཀའ་རྙོག་མགྱོགས་མྱུར་སེལ་དགོས། བཞི་པ། རྒྱ་ནག་གཞུང་གིས་བོད་མི་ལོ་ཆུང་རྣམས་བཅའ་སྡོད་སློབ་གྲྭར་བཅུག་སྟེ་བོད་མི་རྒྱ་བསྒྱུར་གྱི་གཡོ་ཇུས་ལག་བསྟར་བཞིན་པ་འཕྲལ་དུ་མཚམས་འཇོག་དགོས། བོད་ཀྱི་བྱིས་པ་ཚོར་ཀྲུང་ཧཱ་མི་རིགས་ཀྱི་རྩ་ཁྲིམས་ནང་གསལ་ལྟར། སོ་སོའི་སྐད་ཡིག་རིག་གཞུང་ལ་སློབ་སྦྱོང་བྱེད་པ་དང་གཅེས་སྤྲས་བྱེད་པའི་ཐོབ་ཐང་སྤྲོད་དགོས། ལྔ་པ། ཀྲུང་ཧ་མི་རིགས་གཅིག་གྱུར་ཡར་ཐོན་སྐུལ་འདེད་ཀྱི་ཁྲིམས་ཟེར་བ་ནི་བོད་ཀྱི་ཆོས་དང་རིག་གཞུང་། སྐད་ཡིག་སོགས་མི་རིགས་རྩ་གཏོར་གྱི་གཡོ་ཇུས་ཤིག་ཡིན་པས་མཐའ་གཅིག་ཏུ་དགག་པ་བྱ་རྒྱུ་ཡིན།

གསར་འགོད་པ། སྐལ་བཟང་སྦྱིན་པ།