ཨ་རིའི་སྲིད་འཛིན་ཊོམ་ཕུ་མཆོག་དང་རྒྱ་ནག་གི་མགོ་ཁྲིད་ཞི་ཅིན་ཕིང་གཉིས་ཐུག་འཕྲད་གནང་།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིས་བོད་ཐོག་འཛིན་པའི་སྲིད་ཇུས་ལ་བཟང་ཕྱོགས་ཀྱི་འགྱུར་བ་མ་གཏོགས་ངན་ཕྱོགས་ཀྱི་འགྱུར་བ་གང་ཡང་མེད་ཅེས་གསུངས་སོང་།

Chinese President Xi Jinping and U.S. President Donald Trump during a meeting in Beijing on Thursday, May 14, 2026 (IANS)

ཁ་སང་ཕྱི་ཚེས་ ༡༣ ཉིན་ཨ་རིའི་སྲིད་འཛིན་ཊོམ་ཕུ་མཆོག་རྒྱ་ནག་ནང་རྒྱལ་དོན་འཚམས་གཟིགས་སུ་འབྱོར་ཡོད་པ་དང་། དེ་རིང་རྒྱ་ནག་གི་མགོ་ཁྲིད་ཞི་ཅིན་ཕིང་དང་ཐུག་འཕྲད་གནང་སྟེ་ཨ་རྒྱ་གཉིས་ཀྱི་ཚོང་འབྲེལ་དང་། ཨི་རན་གྱི་དམག་འཁྲུག མིས་བཟོས་རིག་ནུས། ཐའེ་ཝན་གྱི་གནད་དོན་སོགས་ཀྱི་ཐོག་གྲོས་མོལ་བྱས་ཡོད་འདུག སྐབས་དེར་ཞི་ཅིན་ཕིང་གིས་ཐའེ་ཝན་ནི་ཨ་རྒྱ་རྒྱལ་ཁབ་གཉིས་བར་གྱི་གནད་དོན་ཆེན་པོ་ཞིག་ཡིན་པས། ཕྱོགས་གཉིས་ཀའི་ཐག་གཅོད་ཡག་པོ་མ་བྱས་ཚེ་འཁྲུག་རྩོད་ཀྱི་གཞི་ཞིག་ཏུ་འགྱུར་སྲིད་སྐོར་བརྗོད་འདུག

དེ་རིང་གསར་འགོད་པས་ཨ་རིའི་སྲིད་འཛིན་ཊོམ་ཕུའི་འཚམས་གཟིགས་ནང་བོད་དོན་ཐོག་ཤུགས་རྐྱེན་ཡོང་མིན་སྐོར་དྲིས་པར་སྲིད་སྐྱོང་སྤེན་པ་ཚེ་རིང་མཆོག་གིས། ཆུ་ཚོད་གཅིག་གི་སྔོན་ཙམ་ལ་ཨ་རིའི་སྲིད་འཛིན་ཊོམ་ཕུ་མཆོག་དང་རྒྱ་ནག་སྲིད་འཛིན་ཞི་ཅིན་ཕིང་གཉིས་འཛོམས་ནས་བཀའ་མོལ་ཞུས་དང་ཞུ་བཞིན་པ་རེད། ནང་དོན་གཙོ་བོ་དབུས་ཤར་ཨེ་ཤ་ཡའི་དམག་འཁྲུག་གི་རྐྱེན་གྱིས་འཛམ་གླིང་ནང་དཀའ་ངལ་འཕྲད་བཞིན་པ་དེ་གླེང་དགོས་ཀྱང་། འབབ་ས་གང་འདྲ་ཞིག་ལ་ཕབ་དགོས་མིན་བཤད་རྒྱུ་ཁག་པོ་རེད། དེ་བཞིན་ཨ་རྒྱ་གཉིས་བར་གྱི་ཚོང་འབྲེལ་གྱི་གནད་དོན་དང་། ཐའེ་ཝན་གྱི་གནད་དོན། སྣུམ་གྱི་གནད་དོན། བདེ་འཇགས་གནད་དོན་སོགས་ཡོད་པ་རེད། ད་ལན་གྱི་ཚོགས་འདུ་དེའི་ནང་དུ་བོད་ཀྱི་གནད་དོན་ཇི་ཙམ་གླེང་སློང་བྱ་ཐུབ་མིན་ཞུ་ཚོད་ཁག་པོ་རེད། སྤྱིར་རྒྱ་ནག་གི་ངོས་ནས་བོད་ཀྱི་གནད་དོན་དེ་ཨ་རིའི་བེད་སྤྱོད་བཏང་ཡོང་བསམ་པ་དེ་ཤེས་ཀྱི་ཡོད། རྒྱ་གཞུང་གི་མི་སྣ་ཁ་ཤས་ཀྱིས་ཨ་རིའི་གཞུང་གིས་བོད་ཐོག་སྲིད་ཇུས་འཛིན་ཕྱོགས་སྐོར་ལ་ཉམས་ཞིབ་བྱེད་བཞིན་འདུག དེའི་ཐོག་གླེང་སློང་བྱ་སྲིད་པའི་གྲ་སྒྲིག་བྱས་ཡོད་ས་རེད། ཨ་རྒྱ་གཉིས་ཀྱི་སྲིད་འཛིན་གྱི་ཐུག་འཕྲད་དེ་ཡང་ཟླ་གཅིག་གི་སྔོན་ནས་ཕྱིར་འགྱངས་བྱས་པ་ཞིག་ཡིན་པ་དང་། དེའི་བར་དུ་དབུས་ཤར་ཨེ་ཤ་ཡའི་ནང་དུ་གནས་ཚུལ་མང་པོ་ཞིག་བྱུང་བསྡད་པ་རེད། དབུས་ཤར་ཨེ་ཤ་ཡའི་གནས་ཚུལ་དེའི་རྐྱེན་གྱིས་རྒྱ་ནག་ལ་དོ་ཕོག་ཤུགས་ཆེན་འགྲོ་བཞིན་ཡོད་པ་རེད། ཉེ་ལམ་ཉམས་ཞིབ་པ་མང་པོ་ཞིག་གིས་ད་ལན་གྱི་ཚོགས་འདུའི་ཐོག་ཆབ་སྲིད་དང་ཚོང་འབྲེལ་གྱི་ཐོག་ནས་རེ་བ་རྒྱག་རྒྱུ་ཁག་པོ་ཡིན་པ་བརྗོད་ཀྱི་འདུག དེ་རིང་ཚོགས་འདུའི་ཐོག་སྲིད་འཛིན་ཊོམ་ཕུས་སྲིད་འཛིན་གཉིས་གྲོགས་པོ་ཡིན་པ་དང་། མ་འོངས་པར་ཨ་རྒྱ་གཉིས་ཀྱི་བར་བཟང་ཕྱོགས་ཐོག་འབྲེལ་ལམ་ཡར་རྒྱས་འགྲོ་རྒྱུ་ཡིན་པའི་སྐོར་གསུངས་སོང་། རྒྱ་ནག་གི་སྲིད་འཛིན་གྱིས་ཀྱང་ཁོང་ཚོའི་ཁེ་ཕན་གྱི་སྐོར་བརྗོད་ཡོད། ད་ལྟའི་ཆར་རྒྱལ་སྤྱིའི་ཁྱོན་ཡོངས་སུ་འཁྲུག་ཆ་ཆེན་པོ་ཞིག་ཐེབས་ཡོད་པས། དེ་ཅུང་ཙམ་ལྷིང་འཇགས་མ་བྱུང་བར་དུ་ཨ་རིའི་འབྲེལ་བ་གཅིག་པོའི་ཐོག་ནས་ཡར་རྒྱས་འགྲོ་རྒྱུ་ཁག་པོ་རེད་བསམ་གྱི་འདུག ད་ལྟའི་འཛམ་གླིང་གི་འཁྲུག་ཆ་དོད་པོ་འདིའི་ནང་དུ་འགྲོ་བ་མིའི་ཐོབ་ཐང་ལ་དོ་སྣང་སླེབས་རྒྱུ་ཁག་པོ་ཆགས་འདུག ཨ་རྒྱ་སྲིད་འཛིན་གཉིས་ཀྱི་ཐུག་འཕྲད་ཐོག་བོད་དོན་གླེང་སློང་ཇི་ཙམ་ཡོང་མིན་མེི་ཤེས་ཀྱང་། ཐའེ་ཝན་གྱི་གནད་དོན་ཐོག་ཐག་གཅོད་ཞིག་བྱ་སྲིད་པའི་སེམས་འཚབ་ཡོང་གི་ཡོད་པ་རེད། དེ་ཡང་མཐའ་གཅིག་ཏུ་ཡོང་ཐུབ་མིན་བཤད་ཤེས་ཀྱི་ཡོད་པ་མ་རེད། ཅེས་གསུངས་སོང་།

ཡང་ཨ་རིས་བོད་དོན་ཐོག་འཛིན་པའི་སྲིད་ཇུས་ལ་འགྱུར་བ་འགྲོ་མིན་སྐོར་ལ་སྲིད་སྐྱོང་མཆོག་གིས། ད་ལྟ་བར་དུ་ང་ཚོས་ངན་ཕྱོགས་ཀྱི་འགྱུར་བ་གང་ཡང་མཐོང་གི་མེད། ཨ་རིའི་བོད་དོན་དམིགས་བསལ་འབྲེལ་མཐུད་པའང་སྲིད་འཛིན་ཊོམ་ཕུའི་སྐབས་དང་པོ་ལས་སྐབས་གཉིས་པར་བསྐོ་གཞག་བྱས་ཐུབ་ཡོད། རྒྱ་གར་གནས་སྡོད་ཨ་རིའི་གཞུང་ཚབ་པའང་བོད་དོན་ཐོག་དོ་སྣང་ཤུགས་ཆེན་པོ་རེད། ཨ་རིའི་ཕྱི་སྲིད་ལས་ཁུངས་ཀྱིས་ཀྱང་བོད་དོན་ཐོག་དོ་སྣང་ཤུགས་ཆེན་བྱེད་བཞིན་ཡོད། ཟླ་འདིའི་ཕྱི་ཚེས་ ༢༤ ཉིན་ལྡི་ལི་རུ་ཨ་རི་རང་བཙན་ཐོབ་ནས་ལོ་ངོ་ ༢༥༠ འཁོར་བའི་དུས་དྲན་ཐོག་ཆེད་བཅར་བྱ་རྒྱུ་ཡིན་འདུག དེ་དག་གི་རྣམ་འགྱུར་སྟོན་སྟངས་ལ་བལྟས་ཚེ་བོད་དོན་ཐོག་བཟང་ཕྱོགས་ཀྱི་འགྱུར་བ་མ་གཏོགས་ངན་ཕྱོགས་ཀྱི་འགྱུར་བ་གང་ཡང་མི་འདུག ཅེས་གསུངས་སོང་།

དེ་བཞིན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་སྒེར་གྱི་སྤྱི་ཚོགས་དྲ་ལམ་ཨེག་སི་ (X) སྟེང་། ཨ་རིའི་སྲིད་འཛིན་ཊོམ་ཕུ་རྒྱ་ནག་ལ་གཞུང་འབྲེལ་འཚམས་གཟིགས་གནང་བཞིན་པའི་སྐབས་འདིར། ང་ཚོས་གུས་བརྩི་ཆེན་པོའི་ཐོག་ནས་ཁོང་ལ་བོད་ཀྱི་གནད་དོན་གླེང་སློང་གནང་རོགས་ཞེས་འབོད་སྐུལ་ཞུ་རྒྱུ་ཡིན་ལ། ༸གོང་ས་རྒྱལ་བ་རིན་པོ་ཆེ་མཆོག་གི་འཚེ་མེད་ཞི་བའི་ལམ་སྟོན་འོག་བོད་མིའི་འཐབ་རྩོད་ལ་རྒྱལ་སྤྱིའི་ཐོག་རྒྱབ་སྐྱོར་གནང་རོགས། ཞེས་གསུངས་འདུག

གསར་འགོད་པ། བྱམས་པ་ཚེ་རིང་།