བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་དྷ་ས་ས་གནས་མགོ་འཛིན་ལས་ཁུངས་མཉམ་འབྲེལ་གྱི་གོ་སྒྲིག་འོག ཟླ་འདིའི་ཕྱི་ཚེས་ ༢༨ ནས་ ༣༠ བར་དྷ་རམ་ས་ལའི་ཉེན་རྟོག་ལས་ཁུངས་ཀྱི་རྩེད་ཐང་དུ་བོད་ཀྱི་རིག་གཞུང་དུས་སྟོན་འཚོག་རྒྱུ་རེད་འདུག
ཟླ་འདིའི་ཕྱི་ཚེས་ ༢༨ ནས་ ༣༠ བར་ཉིན་གྲངས་གསུམ་རིང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་དྷ་ས་ས་གནས་མགོ་འཛིན་ལས་ཁུངས་གཉིས་མཉམ་འབྲེལ་གྱི་གོ་སྒྲིག་འོག དྷ་རམ་ས་ལའི་ཉེན་རྟོག་ལས་ཁུངས་ཀྱི་རྩེད་ཐང་དུ། ༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་པའི་བྱམས་བརྩེའི་ལོ་སྲུང་གཙིའི་ཆ་ཤས་སུ། བོད་ཀྱི་རིག་གཞུང་དུས་སྟོན་འཚོག་རྒྱུ་རེད་འདུག
འདི་གའི་གསར་འགོད་པས། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཁྱབ་ཁོངས་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་སུ་རིག་གཞུང་དུས་སྟོན་འཚོག་དགོས་པའི་དམིགས་ཡུལ་སྐོར་དྲིས་པར་ཁོང་གིས། བོད་པའི་གནད་དོན་དེ་རྒྱལ་སྤྱིའི་སྟེང་ཕྱི་བསྒྲགས་ཡོང་གི་ཡོད་ཀྱང་། འདས་པའི་ལོ་ངོ་ ༦༠ ལྷག་གི་རིང་༸རྒྱལ་བའི་བཞུགས་སྒར་དང་བོད་མིའི་སྒྲིག་འཛུགས། དེ་བཞིན་གཞུང་འབྲེལ་མིན་པའི་ཚོགས་སྡེ་ཁག་སོགས་དྷ་རམ་ས་ལར་གནས་སྡོད་བྱས་ཡོད་ཅིང་། ང་ཚོས་ས་གནས་ཡུལ་མི་དང་བོད་མིའི་བར་གྱི་འབྲེལ་ལམ་གལ་ཆེན་དུ་བརྩིས་ནས། རིག་གཞུང་གི་དུས་སྟོན་འདི་བརྒྱུད་རྒྱ་གར་གྱི་ཡུལ་མི་ཚོར་བོད་དོན་སྐོར་ལ་བཤད་ཐུབ་པ་ཡིན་ན། ང་ཚོར་ཁེ་ཕན་ཆེན་པོ་ཡོད་རེད་བསམ་གྱི་འདུག དེ་མིན་ལྡི་ལི་དང་ཕྱི་རྒྱལ་སོགས་སུ་དུས་སྟོན་འཚོག་རྒྱུ་གལ་ཆེན་ཡིན་ཡང་། གལ་ཆེ་ཤོས་ནི་སོ་སོ་གནས་སྡོད་བྱེད་སའི་ཡུལ་མི་དང་འབྲེལ་ལམ་དམ་ཟབ་བཟོ་རྒྱུ་གནད་འགོག་ཏུ་མཐོང་གི་ཡོད། དེར་བརྟེན། ད་རེས་བོད་ཀྱི་རིག་གཞུང་དུས་སྟོན་འདི་རྒྱ་གར་ཡུལ་མི་དང་ང་ཚོའི་མཐུན་ལམ་བཟང་དུ་གཏོང་སླད་འཚོག་གི་ཡོད། ཅེས་གསུངས་སོང་།
རིག་གཞུང་དུས་སྟོན་གྱིས་རྒྱ་གར་སྤྱི་ཚོགས་ནང་བོད་དོན་གོ་རྟོགས་ག་ཚོད་ཅིག་སྤེལ་ཐུབ་ཀྱི་ཡོད་སྐོར་ལ་བསྟན་འཛིན་ལེགས་བཤད་ལགས་ཀྱིས། ང་ཚོར་རྒྱལ་སྤྱིའི་སྟེང་ནས་ལུང་པ་ཐག་ཉེ་ཤོས་དང་གལ་ཆེ་ཤོས་དེ་རྒྱ་གར་ཆགས་བསྡད་ཡོད་ལ། ལོ་རྒྱུས་ཀྱི་སྟེང་ནས་ཀྱང་རྒྱ་གར་ཆགས་བསྡད་ཡོད། རྒྱ་གར་ལ་མཚོན་ན་འཛམ་གླིང་གི་མི་འབོར་ཆེ་ཤོས་ཡིན་པས། བོད་མིའི་སྒྲིག་འཛུགས་ཀྱི་ངོས་ནས་རྒྱ་གར་གྱི་ཡུལ་མི་དང་ལས་ཀྱི་སྣེ་མོ་བ། ཚགས་པར་རྒྱག་མཁན། བློ་འདོན་བསྟི་གནས་ཁང་སོགས་ཀྱིས་བོད་ཀྱི་དངོས་ཡོད་གནས་དོན་ཤེས་རྟོགས་དགོས་རྒྱུ་གལ་ཆེན་རེད་བསམ་གྱི་ཡོད། དེ་སྔ་ལྡི་ལི་དང་མོན་བྷའེ་སོགས་ས་གནས་གང་ཞིག་ཏུ་དུས་སྟོན་ག་འདྲ་ཞིག་འཚོགས་ཡོད་ཀྱང་རྒྱ་གར་གྱི་ཡུལ་མི་ཚོར་བོད་ཀྱི་གནས་དོན་ར་སྤྲོད་ཡོང་རྒྱུ་གནད་འགོག་ཏུ་མཐོང་། ད་ལན་དམིགས་བསལ་གོ་སྟོན་གྱི་ལས་འཆར་འོག་ ༸སྐྱབས་མགོན་རིན་པོ་ཆེ་མཆོག་བཞུགས་སྒར་དྷ་སར་བཞུགས་ནས་ལོ་ངོ་དྲུག་ཅུ་ལྷག་ཕྱིན་ཡོད་སྟབས། ང་ཚོས་ཕྱི་ནས་རིག་གཞུང་དུས་སྟོན་འཚོགས་པ་ལས་བཞུགས་སྒར་རང་དུ་འཚོགས་པ་ཡིན་ན། འདི་ནས་མིག་དཔེ་དང་བག་ཆགས་བཟང་པོ་ཞིག་བསྐྲུན་ཐུབ་པའི་རེ་བ་ཞུ་བཞིན་ཡོད། ཅེས་གསུངས་སོང་།
འདི་ལོའི་བོད་ཀྱི་རིག་གཞུང་དུས་སྟོན་སྟེང་། ༸གོང་ས་རྒྱལ་བ་རིན་པོ་ཆེ་མཆོག་གི་མཛད་འཕྲིན་མཚོན་པའི་ཕྱག་དེབ་དང་གློག་བརྙན། བོད་ཀྱི་ཡུལ་ལུང་འདྲ་མིན་གྱི་ཆས་གོས་འགྲེམས་སྟོན། བོད་ཀྱི་དངོས་བྱུང་གློག་བརྙན་དང་ཟློས་གར་འཁྲབ་སྟོན། བོད་ཟས་ཚོང་འགྲེམས། བོད་པའི་དངོས་ཟོག་ཚོང་འགྲེམས། བོད་ནང་གི་ད་ལྟའི་ཛ་དྲག་གནས་སྟངས་སྐོར་གྱི་པར་རིས་སོགས་འགྲེམས་སྟོན་གནང་རྒྱུ་ཡིན་འདུག
གསར་འགོད་པ། སྐལ་བཟང་སྦྱིན་པ།
