དེ་རིང་བོད་མིའི་ཁྲིམས་ལུགས་རིག་པ་བའི་ཚོགས་པ་བརྒྱུད་བལ་ཡུལ་མཆོད་འཇོར་གྱི་ཞུ་སྦྱོར་བས་ཆེས་མཐོའི་ཁྲིམས་ཞིབ་ཁང་ལ་བར་བརྒལ་བཀའ་ཁྱབ་གཏོང་གནང་ཡོང་བའི་སྙན་ཞུ་བསྐྱར་དུ་ཕུལ་སོང་།
ཟླ་འདིའི་ཕྱི་ཚེས་ ༨ དང་ ༡༡ བཅས་སུ་བལ་ཡུལ་མཆོད་འཇོར་གྱི་ཞུ་སྦྱོར་བས་བོད་མིའི་ཁྲིམས་ལུགས་རིག་པ་བའི་ཚོགས་པ་བརྒྱུད་དེ། ཆེས་མཐོའི་ཁྲིམས་ཞིབ་ཁང་གིས་དབུས་འོས་བསྡུ་ལས་ཁང་ལ་བར་བརྒལ་བཀའ་ཁྱབ་གཏོང་གནང་ཡོང་བའི་སྙན་ཞུ་ཕུལ་ཡོད་ཀྱང་ངོས་བཞེས་གནང་མེད་སྟབས། དེ་རིང་ཕྱི་ཚེས་ ༢༩ ཉིན་བསྐྱར་དུ་བར་བརྒལ་བཀའ་ཁྱབ་གཏང་དགོས་པའི་སྙན་ཞུ་ཕུལ་ཏེ། ཁ་མཆུ་ཨང་ ༢༢ དང་འབྲེལ་བའི་ཞིབ་འཇུག་ཚོགས་ཆུང་ཞིག་འཛུགས་དགོས་པའི་དགོས་འདུན་བཏོན་སོང་། ཐེངས་འདི་ནི་བར་བརྒལ་བཀའ་ཁྱབ་གཏང་དགོས་པའི་སྙན་ཞུ་འབུལ་ཐེངས་གསུམ་པར་གྱུར་ཡོད།
གནད་དོན་དེ་དང་འབྲེལ་ནས་ཞུ་སྦྱོར་བ་བློ་བཟང་ཚེ་རིང་ལགས་ཀྱིས། དེ་རིང་ང་ཚོ་བར་བརྒལ་བཀའ་འཁྲོལ་ཞུ་སླད་བཅར་བ་ཡིན། ཁ་སྔོན་སྙན་ཞུ་ཡར་ཕུལ་བཞག་ཡོད་པ་དེར། ག་རེ་བྱུང་མིན་མར་བཀའ་ལན་ད་བར་ཕེབས་ཡོད་མ་རེད། བར་བརྒལ་བཀའ་འཁྲོལ་གནང་རོགས་གནང་ཞེས་ཞུ་ཡ་ཡིན། ཞེས་བརྗོད་བྱུང་།
ཁྲིམས་ལུགས་རིག་པ་བའི་ཚོགས་པའི་ཁྲིམས་རྩོད་པ་རིན་ཆེན་དབང་རྒྱལ་དབང་ལགས་ཀྱིས། བོད་མི་མང་སྤྱི་འཐུས་ལྷན་ཚོགས་ཀྱི་བར་བརྒལ་གྱི་ཚོགས་གཙོའི་དམ་འབུལ་དེ་ཆེས་མཐོའི་ཁྲིམས་ཞིབ་ཁང་གིས་གཙོ་སྐྱོང་གནང་གི་ཡོད་རེད། གནས་སྟངས་དེ་དང་འབྲེལ་ནས་ད་ལྟ་ཁ་མཆུ་འགྲོ་བཞིན་པའི་བར་བརྒལ་གྱི་བཀའ་འཁྲོལ་ཞུ་དགོས་དོན་གཙོ་བོ་ནི། སྤྱི་དམངས་ཁྲིམས་ཡིག་དོན་ཚན་བརྒྱད་ཅུའི་ནང་ཚན་ལ། ཆེས་མཐོའི་ཁྲིམས་ཞིབ་ཁང་གི་ཁྲིམས་ཡིག་དེའི་འོག་ནས་ཆ་རྐྱེན་གཅིག་དེ་ཞིབ་འཇུག་ཚོགས་ཚོགས་ཆུང་བཙུགས་པའི་ཆ་རྐྱེན་ཡོད་པ་རེད། ད་ལན་གྱི་གནད་དོན་ནི་འོས་བསྡུའི་ནང་དྲང་པོ་བྱུང་ཡོད་དང་མེད་ཀྱི་གནད་དོན་མང་པོ་ཞིག་ལྷག་ཡོད་སྟབས། གནད་དོན་དེ་གསལ་ཐག་མ་ཆོད་པའི་བར་དུ། ལས་རིམ་ཆ་ཚང་ཞིག་མུ་མཐུད་ནས་འགྲོ་བ་ཡིན་ན། ད་ལྟ་འདེམས་ཐོན་བྱུང་བའི་བཀུར་འོས་སྤྱི་འཐུས་རྣམས་མང་ཚོགས་ཀྱི་Legitimacy (ཁྲིམས་མཐུན་ཡིན་ཁུངས་དག་གི་རང་བཞིན) གང་འདྲ་ཞིག་ཆགས་མིན་གྱི་གནད་དོན་ཞིག་ལྷག་གི་ཡོད་སྟབས། གནས་སྟངས་དེའི་ཐོག་ནས་འདེམས་ཐོན་སྤྱི་འཐུས་རྣམས་མང་ཚོགས་ཀྱིས་ཁྲིམས་མཐུན་ངོས་འཛིན་ཡོང་ཐབས་སུ། ཁྲིམས་མཐུན་ཆ་རྐྱེན་གང་ཡོད་པ་དག་བེད་སྤྱོད་གཏང་རྒྱུ་དེ་གལ་ཆེན་པོ་ཡིན་པར་སོང་ཙང་། ད་ལན་གྱི་བར་བརྒལ་བཀའ་འཁྲོལ་དེའི་ནང་ལ། ཞུ་སྦྱོར་བའི་ངོས་ཐད་ནས་ས་གནས་ས་ཐོག་ལ་ཕྱིན་ནས། གནད་དོན་མང་པོ་ཞིག་ལ་རྟོགས་ཞིབ་བྱས་ཡོད་ཀྱང་། རིགས་གཅིག་ང་ཚོའི་ཁྱབ་ཁོངས་དང་ནུས་པས་མ་ལྕོགས་པ་ཁག་ཅིག་ཡོང་གི་ཡོད་རེད། གཙོ་ཆེ་ཤོས་དེ་གནད་དོན་གང་འདྲ་ཞིག་ཡིན་ཡང་། གསལ་པོ་དང་དྲང་པོ། ཕྱོགས་ཚང་མ་ནས་གནས་ཚུལ་སླེབས་དགོས་རྒྱུ་གལ་ཆེན་པོ་ཡིན་པ་སོང་ཙང་། དེ་རིང་བར་བརྒལ་བཀའ་ཁྱབ་དེའི་བརྒྱུད་ནས་ཁྲིམས་ཞིབ་ཁང་གིས་སྤྱི་དམངས་གཏུག་གཤེར་གྱི་དོན་ཚན་བརྒྱད་ཅུ་པ་དེ་ལག་བསྟར་གནང་ཐུབ་པ་ཡིན་ན། འོས་བསྡུ་དང་འབྲེལ་བའི་གནད་དོན་མང་པོ་ཞིག་གསལ་པོ་ཡོང་རྒྱུ་དང་། མང་ཚོགས་ཀྱིས་རྒྱབ་སྐྱོར་སླེབས་ཐུབ་ཡ་ཞིག་རེད། ཅེས་བརྗོད་བྱུང་།
ཁྲིམས་རྩོད་པ་རྣམས་བལ་ཡུལ་དུ་ཆེད་བཅར་གྱིས་གནས་ཚུལ་རྒྱུས་ལོན་བྱས་པ་དང་འབྲེལ་ནས་ཁོང་གིས་བརྗོད་དོན། ཕྱོགས་ཡོངས་ནས་བལ་ཡུལ་ནང་ཆབ་སྲིད་ཀྱི་ཐོག་ནས་ཚོར་སྣང་སྐྱེན་པོ་ཡིན་ཡང་། བལ་ཡུལ་དུ་རྒྱུས་ལོན་དང་ཞིབ་འཇུག་བྱས་པའི་ཁྲོད། དབུས་འོས་བསྡུ་ལྷན་ཁང་དང་ས་གནས་འོས་བསྡུ་ཚོགས་ཆུང་གི་བར་དུའང་སྟོང་ཆ་མང་དག་ཅིག་མཐོང་སྟབས། དེ་ནི་དེ་རིང་སླར་ཡང་ཆེས་མཐོའི་ཁྲིམས་ཞིབ་ཁང་དུ་ཆེད་བཅར་བྱས་ནས་ཡང་བསྐྱར་བར་བརྒལ་བཀའ་འཁྲོལ་ཞུ་དགོས་པའི་དམིགས་ཡུལ་གཙོ་བོར་གྱུར།
འདི་ལོའི་བཙན་བྱོལ་བོད་མིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུའི་སྐབས་བལ་ཡུལ་མཆོད་འཇོར་ཁུལ་གྱི་འོས་བསྡུ་ཚགས་ཚུད་མ་བྱུང་བའི་ལབ་གླེང་ཞུ་གཏུག་བྱུང་བ་ལྟར། དབུས་འོས་བསྡུ་ལས་ཁང་གིས་འབྲེལ་ཡོད་ལ་འདྲི་བརྩད་དང་འོས་ཤོག་ལ་ཞིབ་འཇུག་གནང་བ་བརྒྱུད། ཕྱི་ཟླ་ ༤ ཚེས་ ༢༣ ཉིན་མཆོད་འཇོར་ས་གནས་འོས་བསྡུའི་འགན་འཛིན་ལས་རོགས་ཀྱི་མིང་ཐོག་ཏུ་ཐག་གཅོད་ཡི་གེ་ཞིག་བཏང་སྟེ། འོས་བསྡུའི་སྒྲིག་གཞིའི་དགོངས་དོན་ཁག་དང་འགལ་འཛོལ་ཚབས་ཆེན་བྱུང་ཡོད་པ་ར་འཕྲོད་བྱུང་བ་གཞིར་བཟུང་མཆོད་འཇོར་ས་གནས་ལ་དངོས་གཞིའི་འོས་བསྡུ་ཐེངས་གཅིག་ཕྱིར་འཐེན་ཞུ་རྒྱུའི་ཐག་གཅོད་གནང་བ་ཡིན་སྐོར་བཀོད་ཡོད་པ་རེད།
གནད་དོན་དེ་དང་འབྲེལ་ནས་ཕྱི་ཟླ་ ༥ ཚེས་ ༥ ཉིན་གྱི་ཉིན་རྒྱབ་ཏུ་བལ་ཡུལ་ནས་ཕེབས་པའི་བློ་བཟང་ཚེ་རིང་ལགས་ཀྱིས་བོད་མིའི་ཁྲིམས་ལུགས་རིག་པ་བའི་ཚོགས་པའི་ཁྲིམས་རྩོད་པ་བརྒྱུད་བལ་ཡུལ་མཆོད་འཇོར་མི་མང་ལ་དངོས་གཞི་འོས་བསྡུའི་ཐོབ་ཐང་འཕྲོག་པའི་གནད་དོན་དང་འབྲེལ་ནས་དབུས་འོས་བསྡུ་ལས་ཁང་ཆེས་མཐོའི་ཁྲིམས་ཞིབ་ཁང་ལ་ཁྲིམས་གཏུགས་བྱས། ཕྱི་ཚེས་ ༧ ཉིན་ཁྲིམས་གཏུགས་ངོས་བཞེས་ཀྱིས་ཁ་མཆུ་ཨང་ ༢༢ པར་ངོས་བཞེས་དེབ་འགོད་གནང་། ཕྱི་ཚེས་ ༨ ཉིན་ཞུ་སྦྱོར་བས་བཙན་བྱོལ་བོད་མིའི་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་དོན་ཚན་ ༧༦ པའི་དགོངས་དོན་བར་བརྒལ་གྱི་བཀའ་ཁྱབ་གཏོང་གནང་ཡོང་བའི་སྙན་ཞུ་ཕུལ་འདུག་ཀྱང་ངོས་བཞེས་གནང་མེད་པ་རེད། བལ་ཡུལ་མཆོད་འཇོར་ཁུལ་གྱི་མི་མང་གི་འཐུས་ཚབ་དང་དགོན་པ་ཁག་གི་སྐུ་ཚབ་སོགས་ནས་ཚོགས་འདུ་བསྡུས་ཏེ་འོས་བསྡུའི་གནད་དོན་དང་འབྲེལ་བའི་གྲོས་བསྡུར་གནང་རྩིས་བྱས་དང་བྱེད་བཞིན་ཡོད་ཀྱང་ད་བར་དོན་འབྲས་སོན་པ་ཞིག་བྱུང་ཐུབ་མེད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
