དེ་རིང་བཀའ་བློན་གསར་པ་དྲུག་ནས་ལས་འཁུར་དམ་འབུལ་ཞུས་རྗེས། སྲིད་སྐྱོང་མཆོག་གིས་བཀའ་བློན་རྣམ་པར་ལས་ཁུངས་ཆ་བགོས་གནང་ཞིང་། སྐབས་བཅོ་བརྒྱད་པའི་གྲོས་ཚོགས་ཚོགས་དུས་དང་པོ་དེ་བཀའ་སྤྱི་གཉིས་ལྷན་འཛོམས་ཐོག་མཇུག་བསྒྲིལ་སོང་།
དེ་རིང་ཕྱི་ཚེས་ ༣ ཉིན་བོད་མིའི་སྒྲིག་འཛུགས་ཀྱི་གངས་སྐྱིད་སྲིད་སྐྱོང་ཚོགས་ཁང་དུ། སྐབས་བཅུ་བདུན་པའི་བཀའ་ཤག་གི་འོས་འདེམས་བྱུང་བའི་བཀའ་བློན་རྣམ་པ་དྲུག་གིས་ཆེས་མཐོའི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གི་མདུན་ནས་ལས་འཁུར་དམ་འབུལ་ཞུས་སོང་བ་དང་། དམ་འབུལ་ཞུས་གྲུབ་མཚམས་བཀའ་བློན་རྣམས་གནས་ཆུང་ཆོས་རྒྱལ་དང་། དགའ་གདོང་དགོན་པར་མཆོད་མཇལ་དུ་ཕེབས་རྗེས། སྲིད་སྐྱོང་སྤེན་པ་ཚེ་རིང་མཆོག་གིས་བཀའ་བློན་རྣམ་པ་དྲུག་ལ་ལས་ཁུངས་ཆ་བགོས་ཀྱི་ཕྱག་བྲིས་གནང་འདུག་ཅིང་། ཆོས་རིག་ལས་ཁུངས་ཀྱི་བཀའ་བློན་དུ་ཆུ་སྐྱ་སྦྲ་གཉིས་ཚེ་རྒྱལ་མཆོག་དང་། ཤེས་རིག་ལས་ཁུངས་ཀྱི་བཀའ་བློན་ནི་ཨོ་རྒྱན་བསྟན་འཛིན་མཆོག པདྨ་མཚོ་མཆོག་ནི་འཕྲོད་བསྟེན་ལས་ཁུངས་ཀྱི་བཀའ་བློན། དཔལ་འབྱོར་ལས་ཁུངས་ཀྱི་བཀའ་བློན་གྱང་གསར་ཚེ་རིང་དོན་གྲུབ་མཆོག བདེ་སྲུང་ལས་ཁུངས་ཀྱི་བཀའ་བློན་དུ་ཀུན་དགའ་བཀྲ་ཤིས་མཆོག ནང་སྲིད་ལས་ཁུངས་ཀྱི་བཀའ་བློན་དུ་དཔལ་ལྡན་དོན་གྲུབ་མཆོག་བཅས་ལ་བསྐོ་གཞག་གནང་འདུག་ལ། སྲིད་སྐྱོང་སྤེན་པ་ཚེ་རིང་མཆོག་གིས་གནས་སྐབས་རིང་སྲིད་སྐྱོང་དང་ཕྱི་དྲིལ་བཀའ་བློན་གཅིག་ལྕོགས་གནང་རྒྱུ་ཡིན་འདུག
དེའི་རྗེས་སྲིད་སྐྱོང་མཆོག་དང་བཀའ་བློན་རྣམ་པས་སྐབས་བཅོ་བརྒྱད་པའི་གྲོས་ཚོགས་ཚོགས་དུས་དང་པོའི་ལས་ཉིན་གཉིས་པའི་ཚོགས་ཐུན་ ༢ པའི་སྟེང་གྲོས་ཚོགས་སུ་ཆེས་ཐོག་མར་གཞུང་འབྲེལ་ཐོ་འགོད་ཀྱིས་མཉམ་ཞུགས་གནང་སོང་ལ། ཚོགས་ཐུན་གསུམ་པའི་སྟེང་ཚོགས་གཙོ་དབུ་བཞུགས་ཐོག་བོད་མི་མང་སྤྱི་འཐུས་རྣམས་ཀྱིས་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་དྲུག་སྤྱི་མོས་གཏན་འབེབས་བྱུང་མཚམས། ཚོགས་དྲུང་བསོད་ནམས་རྡོ་རྗེ་ལགས་ཀྱིས། སྤྱི་འཐུས་ཀུན་དགའ་བསོད་སྟོབས་ལགས་ཚོགས་དུས་ཧྲིལ་པོའམ་ཕྱི་ཚེས་ ༢ དང་ ༣ ཉིན་དགོངས་པ་ཞུས་པ་དང་སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་ཕྱི་ཚེས་ ༣ ཉིན་དགོངས་པ་ཞུས་པའི་གསལ་བསྒྲགས་བསྐྱངས།
མཇུག་ཏུ་བོད་མི་མང་སྤྱི་འཐུས་ལྷན་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་གིས་མཇུག་སྡོམ་གསུང་བཤད་གནང་སྐབས། ད་ལན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས། བཀའ་བློན་གྱི་འོས་མི་མིང་འདོན་གནང་ནས་གྲོས་ཚོགས་འཐུས་མི་རྣམས་ཀྱིས་འདེམས་ཐོན་གནང་བའི་བཀའ་བློན་དྲུག་ཕེབས་པར། གྲོས་ཚོགས་སྐབས་བཅོ་བརྒྱད་པའི་ཐོག་ནས་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་དང་། ལས་དོན་ལྷུན་གྱིས་འགྲུབ་པ་དང་སྲིད་སྐྱོང་མཆོག་གིས་ཐུགས་རེ་གནང་བ་བཞིན། བོད་མིའི་རང་དབང་གི་བདེན་མཐའ་མ་གསལ་བར་བོད་མི་རིགས་འདི་གནས་པའི་རིང་ལ། དགོས་ངེས་མཁོ་ངེས་ཀྱི་ནད་པ་དང་། ཉམས་ཐག་སོགས་མ་ལུས་པར། བོད་མིའི་བདེ་སྡུག་ལ་གཟིགས་སྐྱོང་གནང་མཁན་ནི་འཛིན་སྐྱོང་ཆགས་ཀྱི་ཡོད་སྟབས། ལས་དོན་རྣམས་བྱ་བ་ལམ་འགྲོ་ཡོང་བའི་སྨོན་འདུན་ཞུ་ཡི་ཡོད། ད་ལན་གྲོས་ཚོགས་སྐབས་བཀའ་བློན་གདམ་རྒྱུའི་མཚོན་པའི་ལས་རིམ་མང་པོ་ཞིག་ཕྱིན་ཡོད་པའི་ཁྲོད། བཅའ་ཁྲིམས་དང་། ལས་དོན་བྱེད་ཕྱོགས་ཀྱི་སྒྲིག་གཞི་དེ་དག་གི་ཐོག་འདོད་པ་མཐུན་མ་མཐུན་དང་། འགྲེལ་བཤད་རྒྱག་སྟངས་འདྲ་མི་འདྲ་ཡོང་བར། ཁྲིམས་སྒྲིག་ནང་གསལ་ཁ་ཞིག་གཏོད་དགོས་པ་ནི་གལ་ཆེན་ཞིག་ཆགས་ཀྱི་ཡོད་སྟབས། མ་འོངས་པར་དཀའ་རྙོག་རིགས་མི་ཡོང་བའི་སླད། གྲོས་ཚོགས་ཀྱི་ཐོག་ནས་འགན་ཁུར་ཏེ་གསལ་ཁ་གཏོད་དགོས་རྒྱུ་དང་། རྒྱ་ཆེ་མང་ཚོགས་ཀྱིས་ཤེས་དགོས་པ་ཞིག་ལ། བཀུར་འོས་སྤྱི་འཐུས་རྣམས་ཀྱིས་ཁྲིམས་ལ་བགྲོ་གླེང་རྣམ་པ་སྣ་ཚོགས་གནང་སྐབས། ཁོར་ཡུག་དེ་སུན་སྣང་ཅན་དུ་དགོངས་པ་བཞེས་མི་ཉན། གང་ཡིན་ཟེར་ན། གྲོས་ཚོགས་འདི་དཔྱད་པ་བྱ་རྒྱུའི་དོ་ར་ཞིག་ཡིན་སྟབས། མང་ཚོགས་ཀྱི་གཟིགས་ཕྱོགས་ཀྱི་ཐད་ནས་སྤྱི་ཚོགས་ནང་ཐུགས་འཚབ་ཅིག་ཡོང་གི་འདུག་པས། མང་ཚོགས་ཀྱིས་སྐད་ཆ་བཤད་སར་བཤད་དགོས་པ་དང་བཞག་སར་གཞག་དགོས་པ་ནི་གལ་ཆེན་རེད། ཅེས་གསུངས་སོང་།
ཡང་ཁོང་མོས་གསུང་དོན། དེང་གི་དུས་སྐབས་འདིར་སྤྱི་འཐུས་རྣམས་ཀྱིས་འགན་འཁུར་གྱི་འདུ་ཤེས་ཡོད་པའི་ཐོག་ནས་གྲོས་ཚོགས་སུ་ཆ་ཤས་བླང་དགོས་པའི་མུར། དཔྱད་ཞིབ་ཀྱི་གྲུབ་དོན་དང་ཁྲིམས་སྒྲིག་གི་ལས་དོན་ཐད་བགྲོ་གླེང་གནང་སྐབས། སྤྱི་ཚོགས་ཀྱི་གནས་བབ་དང་དོན་དངོས་ཀྱི་བདེན་པ་སོགས་ལ་གཞིགས་ནས་བསམ་ཚུལ་བཤད་དགོས་པ་དང་། རང་གིས་གཞན་ལ་བལྟས་ནས་སྐད་ཆ་བཤད་པ་བཞིན། རང་འགན་རང་འཁུར་གྱིས་ལས་དོན་གཉེར་དགོས་པ་ནི་ཤིན་ཏུ་གལ་ཆེན་ཡིན་པའི་ཁར། གྲོས་ཚོགས་ཀྱི་ཆེ་མཐོང་དང་གཟི་བརྗིད། གུས་བརྩི་གཙུག་ཏུ་བཀུར་ནས་བཀའ་མོལ་གནང་རྒྱུ་ནི་གལ་གནད་ཅིག་དང་། བོད་མི་རྣམས་ནི་ཆབ་སྲིད་ཀྱིས་འཕོངས་པའི་སྐྱབས་བཅོལ་བ་ཞིག་ཡིན་པ་མ་ཟད། རྒྱ་ནག་གཞུང་གིས་དེང་སྐབས་བོད་ནང་དུ་རྒྱ་བསྒྱུར་གྱི་ཆབ་སྲིད་སློབ་གསོ་ཟེར་བ་ཞིག་སྤེལ་ནས། བོད་ནང་བོད་ཀྱི་རིག་གནས་དང་། སྐད་ཡིག བོད་མིའི་ངོ་བོ་སོགས་ཀྱི་གནས་བབ་ཛ་དྲག་ཏུ་གྱུར་ཡོད་སྟབས། བོད་མི་མི་རབས་རྒན་པ་རྣམས་དང་ཕ་མ་རྣམས་ཀྱིས་རང་རང་གི་ཕྲུ་གུར་བོད་ཀྱི་སྲིད་འབྱོར་རིག་གསུམ་དང་། ལྷག་པར་བོད་མི་རིགས་ཀྱི་ལ་རྒྱའི་གསོན་ཤུགས་ལྡན་པའི་མི་རབས་གཞོན་པ་སྐྱེས་བསྲིང་བྱ་རྒྱུ་ནི་གལ་གནད་ཅིག་དང་། བོད་མི་རྣམས་ཀྱིས་ང་དང་ཁྱོད་ཅེས་པའི་ཆོལ་ཞེན་གྱི་སྐད་ཆ་དང་། བོད་མིའི་མཐུན་སྒྲིལ་གྱི་གོང་བུར་གཏོར་གཤིབ་ཏུ་འགྲོ་བའི་ལས་དོན་གཉེར་མི་ཉན་ཞེས་གསུངས་སོང་།
དེ་རིང་ཉིན་རྒྱབ་གྲོས་ཚོགས་མཇུག་བསྒྲིལ་བ་དང་བཀའ་ཤག་གི་ཚོགས་ཁང་དུ། སྐབས་བཅུ་བདུན་པའི་བཀའ་ཤག་ལྷན་རྒྱས་ཀྱི་ཚོགས་འདུ་ཐོག་མ་དེ་འཚོགས་གནང་འདུག་ལ། སང་ཉིན་ཕྱི་ཚེས་ ༤ ཉིན་གྱི་སྔ་དྲོའི་ཆུ་ཚོད་ ༧ པའི་སྟེང་སྐབས་བཅུ་བདུན་པའི་བཀའ་ཤག་གིས་གནས་ཆུང་གྲྭ་ཚང་དུ་གཞུང་འབྲེལ་གནས་ཆུང་ཆོས་རྒྱལ་ཆེན་པོ་དབྱར་གསོལ་སྤྱན་འདྲེན་དང་། བཞུགས་སྒར་༸རྒྱལ་བའི་ཕོ་བྲང་དུ་༸གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་རྒྱུ་ཡིན་འདུག གནངས་ཉིན་ཕྱི་ཚེས་ ༥ ཉིན་གྱི་སྔ་དྲོ་ཆུ་ཚོད་ ༡༠ པ་ནས་བཀའ་ཤག་ལྷན་ཚོགས་གནང་རྒྱུ་རེད་འདུག
གསར་འགོད་པ། དཔལ་ལྡན། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
