མཚོ་སྔོན་བོད་སྐད་རླུང་འཕྲིན་ཟླ་གཅིག་ལྷག་མཚམས་འཇོག་བྱ་རྒྱུ་ཡིན་འདུག 

སང་ཉིན་ནས་མཚོ་སྔོན་བོད་སྐད་རླུང་འཕྲིན་ཁང་གི་རྒྱང་སྒྲོག་གི་བརྡ་རྟགས་སྤུས་ཚད་མཐོ་རུ་གཏོང་ཆེད་དང་། སྒྲིག་ཆས་གསར་སྒྱུར་སླད་རླུང་འཕྲིན་གྱི་ལས་རིམ་ཟླ་གཅིག་ལྷག་མཚམས་འཇོག་བྱ་རྒྱུ་ཡིན་ཟེར།

ཟླ་འདིའི་ཕྱི་ཚེས་ ༢༣ ནས་ཕྱི་ཟླ ༧ ཚེས་ ༣༠ བར་མཚོ་སྔོན་བོད་སྐད་རླུང་འཕྲིན་ཁང་གིས་མཚོ་སྔོན་བོད་སྐད་རླུང་འཕྲིན་དང་རྒྱ་ནག་རྒྱལ་ཡོངས་རླུང་འཕྲིན། དབུས་བོད་ཀྱི་རླུང་འཕྲིན་སོགས་གནས་སྐབས་ཀྱི་སྒྲིག་བཟོ་དང་། སྤུས་ཚད་ཇེ་ལེགས་སུ་གཏོང་སླད་ཟླ་གཅིག་ལྷག་གི་རིང་མཚམས་འཇོག་བྱ་རྒྱུ་ཡིན་སྐོར་བསྒྲགས་འདུག

དེ་འབྲེལ་མཚོ་སྔོན་བོད་སྐད་རླུང་འཕྲིན་ཁང་གི་གསལ་བསྒྲགས་ནང་། མཚོ་སྔོན་རླུང་འཕྲིན་དང་བརྙན་འཕྲིན་ལས་ཁུངས་ཀྱིས་ཟླ་འདིའི་ཕྱི་ཚེས་ ༢༣ ནས་ཟླ་ ༧ ཚེས་ ༣༠ བར་རྒྱ་ནག་དབུས་རྒྱལ་སྤྱིའི་རླུང་འཕྲིན་དང་དབུས་བོད་སྐད། མཚོ་སྔོན་བོད་སྐད་བཅས་རླུང་འཕྲིན་གྱི་ལེ་ཚན་ཡོངས་ཀྱི་རྒྱང་སྒྲོག་གི་བརྡ་རྟགས་སྤུས་ཚད་མཐོ་རུ་གཏོང་ཆེད་དང་། སྒྲིག་ཆས་གསར་སྒྱུར། བཟོ་བཅོས་ཀྱི་ལས་གཞི་ཞིག་སྤེལ་རྒྱུ་ཡིན་སྟབས་རླུང་འཕྲིན་ལས་རིམ་ཟླ་གཅིག་ལྷག་རིང་མཚམས་འཇོག་བྱ་རྒྱུ་ཡིན། ཞེས་བསྒྲགས་འདུག 

འདི་གའི་གསར་འགོད་པས། བོད་ནང་གི་འབྲེལ་ཡོད་བོད་མི་གསུམ་ལ་འབྲེལ་བ་ཞུས་ནས། མཚོ་སྔོན་བོད་སྐད་རླུང་འཕྲིན་ཁང་གནས་སྐབས་མཚམས་འཇོག་བྱ་དགོས་པའི་རྒྱུ་མཚན་སོགས་ཀྱི་སྐོར་ལ་འདྲི་སྐབས། དེ་ནི་གཙོ་བོ་གནས་སྐབས་རིང་མ་ལག་དང་། ཅ་དངོས། རྒྱུ་སྤུས་སོགས་ཡར་རྒྱས་གཏོང་སླད་གནས་སྐབས་རིང་ཤར་གཏོང་བྱེད་མཚམས་བཞག་པ་རེད། ཅེས་བརྗོད་བྱུང་། 

ཡང་འབྲེལ་ཡོད་བོད་མི་ཞིག་གིས། ད་ལྟ་རྒྱ་ནག་གཞུང་གིས་བོད་ནང་ཤར་གཏོང་བྱེད་མུས་ཡིན་པའི་རླུང་འཕྲིན་རྣམས་བོད་ནང་གི་ས་གནས་གང་སར་ཁྱབ་སྤེལ་བྱེད་མུས་ཡིན་ཡང་། བོད་མགོ་ལོག་དགའ་བདེ་ཁུལ་གྱི་བོད་སྐད་བརྙན་འཕྲིན་གནས་སྐབས་རིང་ཉམས་གསོ་དང་བསྒྱུར་བཅོས་ཀྱི་སླད་ཟླ་གཅིག་གི་རིང་མཚམས་འཇོག་བྱས་ཡོད་སྐོར་བརྗོད་སོང་ལ། བོད་ནང་གི་འབྲེལ་ཡོད་ཀྱིས། དེ་རིང་ཕྱི་ཚེས་ ༢༢ ཉིན་མཚོ་སྔོན་བོད་སྐད་བརྙན་འཕྲིན་སོགས་ཤར་གཏོང་བྱེད་མུས་ཡིན་ཡང་། གནས་སྐབས་མཚམས་འཇོག་བྱ་རྒྱུའི་གསལ་བསྒྲགས་མཐོང་མེད་པའི་ཁར། དེང་སྐབས་སྐད་འཕྲིན་གཙོས་དྲ་ལམ་ཁག་ཏུ་བོད་ཡིག་བྲིས་ན་རླུང་འཕྲིན་ཁང་སོགས་ཀྱི་སྤྱི་སྟེགས་འཚོལ་ཞིབ་བྱ་མི་ཐུབ་སྐོར་སོགས་བརྗོད་བྱུང་། 

བོད་ནང་གི་དྲ་ལམ་ཁག་ཏུ་གསལ་བའི་གནས་ཚུལ་ལྟར་ན། མཚོ་སྔོན་བོད་སྐད་རླུང་འཕྲིན་ནི་ ༡༩༥༢ ཟླ ༧ ཚེས་ ༢༢ ཉིན་ཐེངས་དང་པོར་ཤར་གཏོང་བྱེད་མགོ་བཙུགས་ཡོད་ཅིང་། རྒྱང་སྒྲོག་ལེ་ཚན་ཆུ་ཚོད ༡༧ དང་སྐར་མ་ ༡༠ ལ་གཏོང་བཞིན་ཡོད་འདུག དེ་ནི་རྒྱལ་ཡོངས་ཞིང་ཆེན་རིམ་པའི་བོད་སྐད་རླུང་འཕྲིན་ཆེས་སྔ་ཤོས་དང་། ཨ་མདོ་ཁ་སྐད་ཀྱི་ལམ་ནས་གཏོང་བའི་ཞིང་ཆེན་རིམ་པའི་བོད་སྐད་རླུང་འཕྲིན་ཁོ་ན་ཡང་ཡིན་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།