ཨ་རིའི་གྲོས་ཚོགས་འཐུས་མི་གསུམ་གྱིས་ཨ་རིའི་བདེ་འཇགས་དང་ཞིབ་འཇུག་གི་གནས་བབ་སྲུང་སྐྱོབ་སླད་རྒྱ་ནག་སོགས་དང་འབྲེལ་བ་ཡོད་པའི་ཨ་རིའི་སློབ་ཆེན་ཁག་ལ་རོགས་དངུལ་སྤྲོད་ལེན་མཚམས་འཇོག་དགོས་པའི་ཁྲིམས་འཆར་བཏོན་འདུག
དེ་རིང་རྒྱ་གར་གྱི་ཨེ་ཨན་གསར་ཁང་སོགས་ཀྱིས་གནས་ཚུལ་སྤེལ་བ་ལྟར་ན། ཨ་རིའི་གྲོས་ཚོགས་འཐུས་མི་སྐུ་ཞབས་རིག་སི་ཁོ་ཊི་( Rick Scott ) ལགས་དང་། ཨི་ལི་སི་སི་ཊ་ཧྥ་ནི་ (Elise Stefani) ལགས། ཇོ་ཤི་གོ་ཐི་མར་(Josh Gottheimer) ལགས་བཅས་ཀྱིས། ཨ་རིའི་སློབ་ཆེན་ཁག་གིས་རྒྱ་ནག་སོགས་རྒྱལ་ཁབ་གཞན་གྱི་ཆེད་དུ་བཅོས་མའི་རིག་ནུས་དང་སྐྱེ་དངོས་འཕྲིན་རིག དེ་བཞིན། ཚད་རྡུལ་ཆ་འཕྲིན་ཚན་རིག་(Quantum Information Science) སོགས་ཀྱི་ཞིབ་འཇུག་ལས་དོན་གཉེར་ཡོད་ཚེ། ཨ་རིའི་གཞུང་གིས་དེར་རོགས་དངུལ་སྤྲོད་མཚམས་འཇོག་དགོས་པ་མ་ཟད། རྒྱབ་ཁབ་དེ་དག་གི་རོགས་དངུལ་ཡང་ལེན་མི་ཆོག་པའི་ཁྲིམས་འཆར་བཏོན་འདུག་ལ། ཁྲིམས་འཆར་དེ་ནི་ཨ་རིའི་སློབ་ཆེན་ཁག་ཏུ་རྒྱ་ནག་གཙོས་ཨ་རིར་འགལ་ཟླ་འཛིན་མཁན་གྱི་རྒྱལ་ཁབ་ཁག་གི་ཤུགས་རྐྱེན་བཀག་འགོག་བྱེད་ཐབས་ཙམ་དུ་མ་ཟད། ཨ་རིའི་རྒྱལ་སྲིད་བདེ་འཇགས་སམ་དམག་དོན་ལ་ཞིབ་འཇུག་བྱ་རྒྱུ་བཀག་འགོག་བྱེད་པའི་ཐབས་ཇུས་ཁྲིམས་འཆར་ཞིག་ཀྱང་ཡིན་པ་རེད།
ད་ལན་ཨ་རིའི་གྲོས་ཚོགས་འཐུས་མི་རྣམས་ཀྱིས་བཏོན་པའི་ཁྲིམས་འཆར་དེར་ནང་དོན་ཁྲིམས་འཆར་གཉིས་ཡོད་པའི་ཁྲོད། དང་བོ་ཨ་རིའི་ཞིབ་འཇུག་སྲུང་སྐྱོབ་ཀྱི་ཁྲིམས་འཆར་ཞེས་པ་འདི་ཡིན་ཞིང་། ཁྲིམས་འཆར་འདིས་ཨ་རིའི་སློབ་ཆེན་ཁག་གིས་ཞིབ་འཇུག་གི་ལས་དོན་ཆེད་གཞུང་གི་རྒྱབ་སྐྱོར་མ་དངུལ་ཞུ་བར་རྒྱལ་ཁབ་གཞན་གྱི་ནང་དུ་ཡན་ལག་སློབ་གཉེར་ཁང་བཙུགས་མེད་པའི་དཔང་རྟགས་སྤྲོད་དགོས་པ་དང་། གཉིས་པ་ཨ་རིར་འགལ་ཟླ་ཆེ་བའི་རྒྱལ་ཁབ་ཁག་ཏུ་ཡན་ལག་སློབ་གཉེར་ཁང་འཛུགས་མི་ཆོག་པའི་ཁྲིམས་འཆར་ཞེས་པ་འདིས། གལ་སྲིད་ཨ་རིའི་སློབ་ཆེན་ཁག་གིས་རྒྱ་ནག་སོགས་ཀྱི་རོགས་དངུལ་བླངས་ཏེ། ཨ་རིའི་རྒྱལ་སྲིད་བདེ་འཇགས་དང་འབྲེལ་བའི་ཞིབ་འཇུག་ལས་དོན་གཉེར་ཡོད་ཚེ། ཕྱི་ལོ་ ༢༠༢༡ ལོའི་ཨ་རིའི་རྒྱལ་སྲུང་འགན་དབང་གི་ཁྲིམས་ལུགས་ལྟར། སློབ་ཆེན་དེ་དག་ལ་ལོ་ལྔའི་མཚམས་སུ་ཐོབ་བཞིན་པའི་ཨ་རིའི་གཞུང་གི་རྒྱབ་སྐྱོར་མ་དངུལ་སྤྲོད་མཚམས་འཇོག་བཅུག་གི་ཡོད་འདུག འོན་ཀྱང་། ད་ལྟའི་ཆར་ཁྲིམས་འཆར་དེ་གཏན་འབེབས་གཞི་ནས་ཆགས་རྒྱུ་ལྷག་བསྡད་འདུག
གནད་དོན་དེ་དང་འབྲེལ་ནས། སྐུ་ཞབས་ཨི་ལི་སི་སི་ཊ་ཕ་ནི་ཀ་ (Elise Stefani) ལགས་ཀྱིས། ཕྱིའི་རྒྱལ་ཁབ་ཁག་གིས་ཨ་རིའི་གཙུག་ལག་སློབ་གཉེར་ཁང་རྣམས་ལ་མ་དངུལ་མང་པོ་ཞིག་བཏང་ནས་ཤུགས་རྐྱེན་ཐེབས་ཐབས་དང་། གལ་གནད་ཆེ་བའི་ཞིབ་འཇུག་ལས་གཞིར་ལག་པ་འཆང་ཐབས་བྱས་ཡོད་ལ། རྒྱ་ནག་དང་ཁ་ཊར་ལྟ་བུས་ཨ་རིའི་མཚན་སྙན་ཆེ་བའི་གཙུག་ལག་སློབ་གཉེར་ཁང་ཁག་ཅིག་ལ་ཨ་སྒོར་ས་ཡ་མང་པོ་བཏང་ཡོད། ཁོ་ཚོས་རོགས་དངུལ་དེར་བརྟེན་ནས་ཨ་རིའི་མཐོ་སློབ་ཁག་ཏུ་ཨ་རིར་ངོ་རྒོལ་གྱི་ལྟ་བ་སྤེལ་ཐབས་དང་། ཨ་རིའི་རྒྱལ་སྲིད་བདེ་འཇགས་དང་འབྲེལ་བའི་ཚོར་བ་སྐྱེན་པའི་ཞིབ་འཇུག་གི་ལས་དོན་ལ་རྒྱུས་ལོན་བྱེད་ཐབས་བྱེད་ཀྱི་ཡོད། འོན་ཀྱང་། ང་ཚོའི་ཁྲིམས་འཆར་འདིས་ཨ་རིའི་གཙུག་ལག་སློབ་གཉེར་ཁང་དག་གིས་ཤེས་རྟོགས་ལྡན་པའི་ཐོག་ནས་རྒྱལ་ཁབ་གཞན་གྱི་ནང་ཡན་ལག་སློབ་གཉེར་ཁང་འཛུགས་པ་དང་། ཁོ་ཚོའི་རོགས་དངུལ་བླངས་ནས་ཨ་རིའི་རྒྱལ་སྲིད་བདེ་འཇགས་དང་འབྲེལ་བའི་ཞིབ་འཇུག་ལས་དོན་གཉེར་རྒྱུ་བཀག་འགོག་ཐུབ་ཀྱི་ཡོད། ཅེས་བརྗོད་འདུག
དེ་བཞིན། ཨ་རིའི་གྲོས་ཚོགས་འཐུས་མི་སྐུ་ཞབས་ཇོ་ཤི་གོ་ཐི་མར་ལགས་ཀྱིས། ཨ་རིའི་མི་སེར་དང་ཡང་ན་སློབ་གཉེར་ཁང་དག་གི་དགེ་རྒན་རྣམས་ཀྱིས་གསང་བའི་ཞིབ་འཇུག་བྱེད་ཀྱི་ཡོད་པས་ཉེན་ཁར་འཕྲད་སྲིད་ལ། རྒྱ་ནག་དམར་ཤོག་ཚོགས་པར་དེ་ནས་ཁྲིམས་འགལ་གྱི་ཁེ་ཕན་ཞིག་ཀྱང་ཐོབ་སྲིད། ཅེས་བརྗོད་འདུག་ལ། ཁྲིམས་འཆར་འདོན་མཁན་གྱི་ཨ་རིའི་གྲོས་ཚོགས་འཐུས་རྣམས་ཀྱིས། ཁྲིམས་འཆར་དེ་ནི་ཨ་རིའི་ནང་ཕྱི་རྒྱལ་གྱི་ཐེ་ཇུས་འགོག་ཐབས་དང་། རྒྱ་ནག་དམར་ཤོག་ཚོགས་པ་དང་ཕྱིའི་རྒྱལ་ཁབ་ཁག་གི་ཤུགས་རྐྱེན་ཇེ་ཆེར་འགྲོ་མུས་ཡིན་པར་ཁ་གཏད་གཅོག་ཐབས་ཤིག་ཡིན། ཞེས་བརྗོད་འདུག
ཕྱི་ལོ ༢༠༢༠ ཟླ་ ༥ ཚེས་ ༤ ཉིན་ཨ་རིའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་མའེ་ཁལ་མེག་ཁོལ་ (Michael McCaul) ལགས་ཀྱི་གཙོས་ཕྱག་རོགས་དྲུག་གིས་ཨ་རིའི་ཤེས་རིག་ལྷན་ཁང་ལ་བསྐུར་བའི་ཡི་གེའི་ནང་། ཨ་རིའི་གཞུང་སྒེར་གཉིས་ཀྱི་མཐོ་སློབ་ཁག་གི་ནང་རྒྱ་ནག་གི་སྲིད་ཇུས་ལྡན་པའི་མ་འཛུགས་བྱས་པའི་གནད་དོན་ཐད་ཞིབ་འཇུག་དགོས་པ་དང་། ཨ་རིའི་བདེ་འཇགས་སོགས་ཀྱི་སླད་ཨ་རིའི་མཐོ་སློབ་ཁག་ཏུ་རྒྱ་ནག་གི་ཆབ་སྲིད་དྲིལ་བསྒྲགས་བྱེད་ཀྱིན་ཡོད་པའི་གནད་དོན་ལ་དོགས་ཟོན་དགོས་པའི་རེ་སྐུལ་ཞུས་ཏེ། ཨ་རིའི་ཤེས་ཡོན་གྱི་ལྟེ་གནས་ཁང་ཁག་ཏུ་རྒྱ་ནག་དམར་ཤོག་རིང་ལུགས་ཀྱི་ཤུགས་རྐྱེན་འགོག་ཐབས་བྱས་ཡོད།
དེ་བཞིན་འདས་ལོར། ཨ་རིའི་སྲིད་གཞུང་གིས་ཨ་རིར་ཡོང་མཁན་གྱི་རྒྱ་རིགས་སློབ་མ་དང་ལྷག་པར་དུ་རྒྱ་ནག་དམར་ཤོག་ཚོགས་པར་འབྲེལ་བ་ཡོད་པའི་སློབ་མ་རྣམས་ཀྱི་ཐོངས་མཆན་ཕྱིར་བསྡུ་བྱ་རྒྱུ་ཡིན་པའི་གསལ་བསྒྲགས་ཤིག་བྱས་ཏེ། ཨ་རིར་གནས་སྤོར་བྱེད་མུས་ཡིན་པའི་རྒྱ་རིགས་ཀྱི་གྲངས་འབོར་ལ་ཚོད་འཛིན་བྱེད་མགོ་བཙུགས་ཡོད་ཀྱང་། རྒྱ་རིགས་སློབ་མ་ནི་ཨ་རིར་སློབ་སྦྱོང་བྱེད་མཁན་གྱི་སློབ་མའི་གྲངས་འབོར་མང་ཤོས་གཉིས་པར་གྱུར་ཡོད་ཅིང་། ཕྱི་ལོ་ ༢༠༢༤ ནས ༢༠༢༥ བར་གྱི་སློབ་དུས་གཅིག་པུའི་ནང་རྒྱ་རིགས་སློབ་མ་གྲངས་ ༢༦༥༩༡༩ ལྷག་འདུག་པས། དེས་ཨ་རིའི་ཕྱི་རྒྱལ་སློབ་མའི་གྲངས་འབོར་གྱི་བརྒྱ་ཆ་ཉེར་གསུམ་ཟིན་འདུག་ལ། ཕྱི་ལོ་ ༢༠༢༥ ནས་ ༢༠༢༦ གི་སློབ་དུས་ནང་རྒྱ་རིགས་སློབ་མ་ ༢༦༦༠༠༠ ལྷག་གིས་མུ་མཐུད་དུ་ཨ་རིར་སློབ་གཉེར་བྱེད་མུས་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
