རྒྱ་ནག་གཞུང་གིས་ས་དཀར་བཀྲ་ཤིས་ལགས་ཀྱི་བོད་ནང་གི་ནང་མི་རྣམས་ནག་ཉེས་ཅན་གྱི་ཐོ་གཞུང་དུ་བཅུག་འདུག

ཡུ་རོབ་ཀྱི་རྒྱལ་ཁབ་སྦེལ་ཇམ་དུ་གནས་སྡོད་བོད་མི་ས་དཀར་བཀྲ་ཤིས་ལགས་ཀྱིས་བོད་ནང་གི་དངོས་ཡོད་གནས་ཚུལ་ཕྱིར་བསྒྲགས་བྱས་པར་བརྟེན། རྒྱ་ནག་གཞུང་གིས་ཁོང་གི་ནང་མི་རྣམས་ཆབ་སྲིད་ཀྱི་མིང་ཐོ་ནག་པོའི་ཁོངས་སུ་བཅུག་སྟེ་སུན་གཙེར་དང་གནོན་ཤུགས་སྤྲོད་ཀྱི་ཡོད་འདུག

དེ་རིང་འདི་གའི་གསར་འགོད་པས་ཁ་པར་བརྒྱུད་ས་དཀར་བཀྲ་ཤིས་ལགས་སུ་ཁོང་གི་ནང་མིའི་གནས་སྟངས་དང་འབྲེལ་ནས་བཀའ་འདྲི་ཞུས་པར་ཁོང་གིས། བོད་ནང་དུ་ཡོད་པའི་ངའི་ནང་མི་རྣམས་ལ་དངོས་སུ་དཀའ་ངལ་འཕྲད་དང་ཕྲད་མུས་ཡིན་པ་མ་ཟད། ད་ལྟ་ཕྱི་ལོགས་སོགས་སུ་འགྲོ་བར་དཀའ་ངལ་མུ་མཐུད་འཕྲད་ཀྱི་ཡོད། ངས་བོད་ནང་གི་གནས་ཚུལ་དེ་དག་ཕྱི་ཕྱོགས་སུ་དགྲམ་དགོས་ཡོད་མེད་དང་ག་རེ་བྱ་དགོས་མིན་ཐད་བསམ་བློ་གཏོང་གིན་ཡོད། ད་ལྟ་ང་རང་གི་ནང་མི་རྣམས་ལ་ཛ་དྲག་གི་དཀའ་ངལ་དང་དམ་དྲག་བྱེད་ཀྱི་ཡོད་པར་བརྟེན། ད་ལྟའི་ཆར་བོད་ནང་དུ་ཡོད་པའི་ནང་མི་རྣམས་ལ་འབྲེལ་བ་བྱེད་ཀྱི་མེད། ཅེས་བརྗོད་བྱུང་།

ཡང་ས་དཀར་བཀྲ་ཤིས་ལགས་ཀྱིས། སྤྱིར་བཏང་ངས་སྤྱི་ཚོགས་དྲ་ལམ་ཨེག་སི (X) སོགས་སུ་བོད་ནང་གི་དངོས་ཡོད་གནས་ཚུལ་དེ་དག་དྲིལ་བསྒྲགས་དང་གོ་རྟོགས་སྤེལ་བར་བརྟེན། རྒྱ་ནག་གིས་ངའི་ནང་མི་ལ་གནོན་ཤུགས་སྤྲད་དེ། དྲ་ཐོག་ཏུ་གནས་ཚུལ་དེ་འདྲ་བྲིས་ཚེ་ཡག་པོ་མེད་པ་མ་ཟད། བོད་ནང་དུ་ཡོད་པའི་ངའི་ནང་མི་ལའང་དཀའ་ངལ་འཕྲད་རྒྱུ་དང་། བོད་ནང་དུ་འགྲོ་སྐྱོད་ཐུབ་ཀྱི་མེད་པའི་ཉེན་བརྡ་ཐེངས་མང་བཏང་བྱུང་། རྒྱ་ནག་ཉེན་རྟོག་པས་བོད་ནང་དུ་ཡོད་པའི་ནང་མི་རྣམས་ཐེངས་གཅིག་དངོས་སུ་སྐད་གཏོང་གི་ཡོང་མྱོང་བ་དང་། ཁ་པར་བརྒྱུད་ནས་ཐེངས་འགའི་རིང་སྐད་བཏང་མྱོང་འདུག  འོན་ཀྱང་། ཁོང་ཚོས་ང་ལ་ཅི་གང་ལབ་མ་སོང་། ད་དུང་ངའི་གྲོགས་པོ་ཁ་ཤས་བོད་ནང་དུ་གུང་གསེང་ནས་ཕྱིར་ལོག་སྐབས། རྒྱ་གཞུང་གིས་ཁོང་ཚོར་བཀྲ་ཤིས་ཟེར་བ་ཞིག་གིས་དྲ་ཐོག་ནས་འདྲ་མིན་བྱེད་ཀྱི་ཡོད་པ་དང་། ཁོ་རང་བོད་ནང་དུ་ཡོང་ཐུབ་ཀྱི་མེད་པས། སློབ་གསོ་རྒྱག་རོགས་ཞེས་བཤད་དེ་དེ་སྔ་ནས་གནོན་ཤུགས་སྤྲད་དང་སྤྲོད་མུས་རེད། དེ་ཡང་དེ་སྔ་ཏོག་དབྱིབས་གཉན་རིམས་སྐབས་ཏེ། ཕྱི་ལོ་ ༢༠༢༠ ལོར་ང་ལ་ཉི་མ་བླ་བྲང་ཞེས་པའི་སྐད་འཕྲིན་ཚོགས་པ་ཞིག་ཡོད་པའི་ནང་ཚོགས་ཞུགས་པ་ ༥༠༠ ཙམ་ཡོད་ཅིང་། དེའི་ཁྲོད་བོད་ནང་དུ་ཡོད་པའི་བོད་མི་དང་གྲྭ་པ་སོགས་ཡོད། ཚོགས་མི་རྣམས་ཀྱིས་རྒྱ་ནག་གི་སྲིད་དབང་སྒེར་གཅོད་རིང་ལུགས་དང་དབང་སྒྱུར་ལ་གདོང་ལེན་བྱེད་ཀྱི་ཡོད། རྒྱ་ནག་གིས་ངས་ཚོགས་པ་དེའི་ནང་ཕྱིའི་གནས་ཚུལ་རྣམས་བོད་ནང་དུ་བཤད་པ་དང་བོད་ནང་གི་གནས་ཚུལ་རྣམས་ཕྱིར་བསྒྲགས་བྱེད་ཀྱི་ཡོད་པ་ཤེས་རྟོགས་བྱུང་སྟེ། དྲ་ཚིགས་དེ་མེད་པར་བཟོས་པ་མ་ཟད། གྲྭ་བ་མང་པོ་ཞིག་གི་ཁ་པར་བཙན་འཕྲོག་བྱས་པའི་གནས་ཚུལ་སོགས་བྱུང་བ་རེད། ཅེས་བརྗོད་བྱུང་།

ཟླ་འདིའི་ཕྱི་ཚེས་ ༢༣ ཉིན་བོད་གནས་ལྟ་ཞིབ་ཁང་གིས་གནས་ཚུལ་སྤེལ་བ་ལྟར་ན། ཕྱི་ལོ་ ༢༠༢༠ ལོ་ནས་རྒྱ་ནག་གཞུང་གིས་ས་དཀར་བཀྲ་ཤིས་ལགས་སུ་གནོན་ཤུགས་སྤྲོད་མགོ་བཙུགས་ཡོད་ཅིང་། ལོ་དེར་ཁོང་གིས་ཉི་མ་བླ་བྲང་ཞེས་པའི་སྐད་འཕྲིན་ཚོགས་པ་ཞིག་བཙུགས་ཏེ་བོད་ནང་གི་གནས་ཚུལ་ཕྱི་ཕྱོགས་སུ་སྤེལ་ཐབས་དང་ཕྱིའི་གནས་ཚུལ་བོད་ནང་དུ་སྤེལ་ཐབས་བྱས། ཚོགས་པ་དེའི་ནང་བཙན་བྱོལ་གྱི་བོད་མི་ཤེས་ཡོན་ཅན་རྣམས་མགྲོན་འབོད་བགྱིས་ཏེ། བོད་ཀྱི་འདས་མ་ད་གསུམ་གྱི་བརྗོད་གཞི་གལ་ཆེན་རིགས་ལ་གྲོས་བསྡུར་ཞུས་ཡོད་ཅིང་། ༸སྐུའི་གཅེན་པོ་རྒྱལ་ལོ་དོན་གྲུབ་མཆོག་གི་ལོ་རྒྱུས། བཙན་བྱོལ་བོད་མིའི་འོས་བསྡུ་དང་རྒྱལ་སྤྱིའི་གསར་ཁང་ཁག་གིས་རྒྱ་ནག་དང་འབྲེལ་བའི་གནས་ཚུལ་ཅི་སྤེལ་སོགས་ཀྱི་སྐོར་ལ་བགྲོ་གླེང་འཚོགས་ཡོད་འདུག་ལ། ཕྱི་ལོ་ ༢༠༢༢ ལོའི་མགོ་སྟོད་དུ་སྐད་འཕྲིན་ཚོགས་པའི་ནང་གི་ཚོགས་མི་རྣམས་རིམ་གྱིས་ཇེ་ཉུང་དུ་ཕྱིན་པ་དང་ཚོགས་པ་སྒོ་བརྒྱབ།  ཕྱིས་སུ་རྒྱ་ནག་གཞུང་གིས་བོད་ནང་དུ་ཡོད་པའི་ཚོགས་པ་དེའི་ཚོགས་མི་རྣམས་ལ་འདྲི་བརྩད་དང་ཁ་པར་བཙན་འཕྲོག་བྱས་པའི་གནས་ཚུལ་སོགས་བྱུང་སྟབས། དུས་དེ་ནས་བཟུང་རྒྱ་ནག་གཞུང་གིས་ཁོང་དང་ཁོང་གི་ནང་མིར་དམ་དྲག་དང་ལྟ་ཞིབ་ནན་པོ་བྱེད་མགོ་ཚུགས་ཡོད་འདུག

ཕྱི་ལོ་ ༢༠༢༣ ལོར་རྒྱ་ནག་གཞུང་གིས་ཏོག་དབྱིབས་གཙང་སེལ་གྱི་སྲིད་ཇུས་ཟེར་བ་མེད་པར་བཟོས་ཏེ། ཡུ་རོབ་རྒྱལ་ཁབ་ཁག་ཏུ་ཡོད་པའི་བོད་མི་སྐྱབས་བཅོལ་བ་རྣམས་ལ་བོད་ནང་འགྲུལ་བཞུད་བྱེད་ཆོག་པའི་སྲིད་ཇུས་གཏན་འབེབས་བྱས་སྟབས། ཕྱི་ལོ་ ༢༠༢༥ ལོའི་ལོ་སར་སྐབས་བཀྲ་ཤིས་བོད་ནང་དུ་བསྐྱོད་རྒྱུའི་ཚབ་ཏུ། རྒྱ་ནག་འཐབ་ཕྱོགས་གཅིག་གྱུར་ཁང་གིས་ཁོང་གི་རྨོ་ལགས་སུ་བཀྲ་ཤིས་མི་སྒེར་གྱི་གནས་ཚུལ་དང་བུ་སོགས་ཀྱི་སྐོར་ལ་འདྲི་བརྩད་བྱས་པ་དང་། ནང་མི་གཞན་ལ་འགྲོ་སྐྱོད་ཀྱི་ཡིག་ཆ་མ་སྤྲད་པའི་གནས་ཚུལ་སོགས་བྱུང་བ་མ་ཟད། ཕྱི་ལོ་ ༢༠༢༦ ཟླ་ ༥ ཚེས་ ༢༢ ཉིན་བཀྲ་ཤིས་ཀྱི་ཨ་མས་ཁོང་ལ། ཁྱེད་ཀྱིས་ཅི་ཞིག་སྒྲུབ་ཀྱིན་ཡོད་དམ། མཚམས་འཇོག་བྱེད་རོགས། ཁ་དྲོ། ཞེས་འབོད་སྐུལ་ཞུས་ཡོད་འདུག་ལ། འདི་ལོའི་ཕྱི་ཟླ་  ༥ པའི་ནང་ས་དཀར་བཀྲ་ཤིས་ལགས་ཀྱི་ནང་མི་ཞིག་གནས་སྐོར་དུ་འགྲོ་བར་གཞུང་གི་ནག་ཉེས་མེད་པའི་ཡིག་ཆ་དགོས་སྟབས། རྒྱ་གཞུང་ལས་བྱེད་པས་སྐབས་དེར་ཁྱེད་ཚོ་ཐོའི་ནང་བཅུག་ཡོད་པས་ཡིག་ཆ་སྤྲོད་མི་ཐུབ་ཚུལ་བཤད་ཡོད་འདུག ས་དཀར་བཀྲ་ཤིས་ལགས་ཀྱིས་བོད་ནང་གི་དངོས་ཡོད་གནས་ཚུལ་ཕྱིར་བསྒྲགས་བྱས་པར་བརྟེན། ད་ལྟ་དགུང་ན་མཐོ་བའི་རང་གི་ཨ་མར་འབྲེལ་བ་བྱེད་མི་ཐུབ་པའི་དཀའ་ངལ་དང་། གལ་ཏེ་འབྲེལ་བ་བྱས་ཚེ་ཨ་མ་ལགས་ལ་སེམས་ཁམས་ཀྱི་ཐོག་ནས་གནོན་ཤུགས་སྤྲོད་ཀྱིན་ཡོད་སྟབས། ཁོང་གིས་ནང་མི་རྣམས་ལ་ཉེན་ཁ་ཡོད་པ་ཤེས་པའི་ཐོག་ནས་ནང་མིར་འབྲེལ་བ་བྱེད་མཚམས་འཇོག་དགོས་བྱུང་ཡོད་འདུག

གཞན་ཡང་བོད་གནས་ལྟ་ཞིབ་ཁང་གི་གནས་ཚུལ་ནང་། བཙན་བྱོལ་དུ་གནས་པའི་བོད་མི་གཞན་གཉིས་ལའང་དཀའ་ངལ་གཅིག་མཚུངས་འཕྲད་ཡོད་ཅིང་། ཁོང་ཅག་གི་ཕ་ཡུལ་གྱི་ནང་མི་རྣམས་བལ་ཡུལ་སོགས་སུ་གནས་སྐོར་དུ་འགྲོ་བར་ཐོངས་མཆན་སྤྲད་མེད་པའི་ཁར། མི་གཅིག་ལ་ནང་མི་དང་ལྷན་དུ་རྒྱ་ནག་ཉེན་རྟོག་པས་ཁ་པར་བཏང་སྟེ་ཁ་བྲལ་རིང་ལུགས་པ་ཡིན་ཚུལ་དང་རྒྱ་ནག་གཞུང་ཚབ་ཁང་དུ་མི་སྒེར་གྱི་ཡིག་ཆ་དང་པར་སོགས་མཁོ་སྤྲོད་བྱེད་དགོས་པའི་འཇིགས་སྐུལ་ཡང་བྱས་ཡོད་འདུག

རྒྱ་ནག་གི་གནོན་ཤུགས་ཀྱི་ལས་འགུལ་འདི་ནི་རྒྱ་ནག་འཐབ་ཕྱོགས་གཅིག་གྱུང་ཁང་ (United Work Front Department) གིས་སྤེལ་བཞིན་པ་ཞིག་ཡིན་ཞིང་། ལས་ཁུངས་འདིས་རྒྱ་ནག་གི་སྤྱི་དམངས་དང་་བདེ་འཇགས་ལས་ཁུངས་མཉམ་དུ་བོད་མི་རྣམས་ལ་ཕ་ཡུལ་དང་རྒྱལ་མཚམས་བརྒལ་ནས་གཉའ་གནོན་བྱེད་པར་མཉམ་ལས་བྱེད་ཀྱི་ཡོད། འཐབ་ཕྱོགས་གཅིག་གྱུར་ཁང་གིས་བོད་ནང་དུ་བོད་མིའི་ཆོས་ལུགས་དང་། སྐད་ཡིག འགྲོ་འོང་སོགས་ལ་དམ་དྲག་དང་ཚོད་འཛིན་ནན་པོ་བྱེད་ཀྱི་ཡོད་པ་མ་ཟད། རྒྱ་ནག་ཕྱི་ལོགས་སུ་བོད་མི་དང་བོད་མིའི་ཕྱི་རྒྱལ་གྱི་རྒྱབ་སྐྱོར་བ་རྣམས་ལ་སུན་གཙེར་དང་། ལྟ་ཞིབ། གནོན་ཤུགས་སྤྲོད་པའི་དྲ་ལམ་མཐུན་སྦྱོར་བྱེད་ཀྱི་ཡོད་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།