སྲི་ཞུའི་ལས་བྱེད་གཉིས་ལ་ཕྱི་ལོ་ ༢༠༢༥ ལོའི་ལས་དོན་གཟེངས་ཐོན་གྱི་གཟེངས་རྟགས་དབུལ་རྒྱུ་ཡིན་འདུག 

ད་ལྟ་སྦིར་བོད་ཚོགས་ཀྱི་ས་གནས་མགོ་འཛིན་ཀརྨ་རྣམ་རྒྱལ་ལགས་དང་། མེའོ་ཆོས་འཕེལ་གླིང་ས་གནས་མགོ་འཛིན་ལས་ཁུངས་ཀྱི་ལས་དོ་ཚེ་རིང་ནོར་བུ་ལགས་གཉིས་སུ་ཕྱི་ལོ་ ༢༠༢༥ ལོའི་ལས་བྱེད་ལས་དོན་གཟེངས་ཐོན་གྱི་གཟེངས་རྟགས་དབུལ་རྒྱུ་ཡིན་འདུག 

དེ་རིང་བོད་མིའི་སྒྲིག་འཛུགས་ཀྱི་དྲ་རྒྱའི་སྟེང་སྤེལ་བའི་གནས་ཚུལ་ལྟར་ན།  ཕྱི་ལོ་ ༢༠༢༥ ལོའི་ལས་བྱེད་ལས་དོན་གཟེངས་ཐོན་གྱི་གཟེངས་རྟགས་དེ། ད་ལྟ་སྦིར་བོད་ཚོགས་ཀྱི་ས་གནས་མགོ་འཛིན་ཀརྨ་རྣམ་རྒྱལ་ལགས་དང་། མེའོ་ཆོས་འཕེལ་གླིང་ས་གནས་མགོ་འཛིན་ལས་ཁུངས་ཀྱི་ལས་དོ་ཚེ་རིང་ནོར་བུ་ལགས་གཉིས་སུ་ཐོབ་ཡོད་ཅིང་། འདི་ལོའི་༧སྐུའི་འཁྲུངས་སྐར་དང་བསྟུན་བོད་མིའི་སྒྲིག་འཛུགས་ཀྱི་ལས་བྱེད་ལས་དོན་གཟེངས་རྟགས་དེ་དབུལ་རྒྱུ་ཡིན་འདུག 

དབུས་བོད་མིའི་སྒྲིག་འཛུགས་ཀྱི་དྲ་རྒྱ་ལྟར་ན། སྦིར་བོད་ཚོགས་ཀྱི་ས་གནས་མགོ་འཛིན་ཀརྨ་རྣམ་རྒྱལ་ལགས་ནི། ཕྱི་ལོ་ ༢༠༡༠ ཟླ་ ༥  ཚེས་ ༥ ནས་འཕྲོད་བསྟེན་ལས་ཁུངས་སུ་ལས་དོའི་གནས་རིམ་དུ་ཚོད་ལྟའི་ཐོག་ལས་འགན་བཀོད་སྒྲིག་དང་། ཕྱི་ལོ་ ༢༠༡༧ ཟླ་ ༥ ཚེས་ ༡ ནས་སྡེ་འགན་དུ་གནས་སྤར་གྱིས་ཨོ་ཌི་ཤ་ཕུན་ཚོགས་གླིང་ས་གནས་མགོ་འཛིན་ལས་ཁུངས་སུ་ལས་འགན་བཀོད་སྒྲིག་གནང༌། ཕྱི་ལོ་ ༢༠༡༨ ཟླ་ ༨ ཚེས་ ༢༧ ནས་སྒང་ཏོག་ས་གནས་མགོ་འཛིན་ལས་ཁུངས་ཀྱི་སྡེ་འགན། ཕྱི་ལོ་ ༢༠༢༢ ཟླ་ ༨ ཚེས་ ༡༧ ནས་དྲུང་ལས་ས་མིག་ཐོག་སྦིར་བོད་ཚོགས་ཀྱི་ས་གནས་མགོ་འཛིན། ཕྱི་ལོ་ ༢༠༢༤ ཟླ་ ༡ ཚེས་ ༣ ནས་དྲུང་གཞོན་ལས་རོགས་སུ་གནས་སྤར་གྱིས་སྦིར་བོད་ཚོགས་ཀྱི་ས་གནས་མགོ་འཛིན་གྱི་ལས་འགན་རང་འཇགས་བཀོད་སྒྲིག་གནང་འདུག 

ཁོང་གིས་འདས་པའི་ལོ་གསུམ་གྱི་རིང་དམིགས་བསལ་ཞབས་ཕྱི་ཞུས་པའི་ཁྲོད། སྦིར་བོད་ཚོགས་གཞིས་ཆགས་སུ་ས་གནས་རྒྱུན་གྲོན་རང་ཁ་རང་གསོའི་ཆེད་ཕྱི་ལོ་ ༢༠༢༥ ནས་མགྲོན་ཁང་དང་ཚོང་ཁང་བོགས་གཏོང་བརྒྱུད་ལོ་རེར་ཧིན་སྒོར་འབུམ་ ༢༣ རེ་ཡོང་འབབ་བསྐྲུན། སྦིར་བོད་ཚོགས་ས་གནས་མགོ་འཛིན་ལས་ཁུངས་ཆེད་སྒོར་འབུམ་ ༡༩ ཐབས་འཚོལ་གྱིས་གཞུང་འཁོར་གསར་ཉོ་དང་། ཧིན་སྒོར་འབུམ་ ༥།༦༦ ཐབས་འཚོལ་གྱིས་འཕྲུལ་ཆས་དང་འཛིན་ཆས་མཁོ་སྒྲུབ་ཞུས། སྦིར་གཞིས་ཆགས་ནང་ཉམ་ཐག་དཀའ་ངལ་ཅན་ཞིག་གི་སྡོད་ཁང་དང་གསང་སྤྱོད་ཉམས་གསོའི་ཆེད་ཧིན་སྒོར་འབུམ་ ༢།༤༢ ཐབས་འཚོལ་གྱིས་དཀའ་སེལ།  སྦིར་སཾ་བྷོ་ཊ་ཉིན་མོ་སློབ་གྲྭའི་རྩེད་ཐང་ཉམས་གསོའི་ཆེད་ཧིན་སྒོར་འབུམ་ ༡༠།༨༠ ཐབས་འཚོལ་ཞུས་པ་དང་། མང་ཚོགས་ཀྱི་འཕྲོད་བསྟེན་ཡར་རྒྱས་ཆེད་བསྐུ་མཉེ་གཏོང་སའི་ཉལ་ཁྲི་ (Cerago MasterV4)གསར་ཉོ་ཞུས་ཡོད་འདུག 

མེའོ་ཆོས་འཕེལ་གླིང་ས་གནས་མགོ་འཛིན་ལས་ཁུངས་ཀྱི་ལས་དོ་ཚེ་རིང་ནོར་བུ་ལགས་ནི། ཕྱི་ལོ་ ༢༠༡༧ ཟླ་ ༤ ཚེས་ ༡༢ ནས་འཕྲོད་བསྟེན་ལས་ཁུངས་སུ་རྒན་དྲུང་གནས་རིམ་དུ་ཚོད་ལྟའི་ཐོག་ལས་འགན་བཀོད་སྒྲིག་དང་། ཕྱི་ལོ་ ༢༠༡༧ ཟླ་ ༡༡ ཚེས་ ༢༠ ནས་ལས་དྲུང་ས་མིག་ཐོག་བསྟན་འཛིན་སྒང་ས་གནས་མགོ་འཛིན་ལས་ཁུངས་ཀྱི་རྒན་དྲུང༌། ཕྱི་ལོ་ ༢༠༢༠ ཟླ་ ༦ ཚེས་ ༡༢ ནས་ལས་དྲུང་གནས་རིམ་དུ་གནས་སྤར་གྱིས་འབུམ་ལ་བསྟན་འཛིན་སྒང་ས་གནས་མགོ་འཛིན་ལས་ཁུངས་ཀྱི་ལས་དྲུང་། ཕྱི་ལོ་ ༢༠༢༠ ཟླ་ ༩ ཚེས་ ༧ ནས་ཀོ་ལི་གྷལ་དོན་ལྡན་གླིང་ས་གནས་མགོ་འཛིན་ལས་ཁུངས་ཀྱི་ལས་དྲུང༌། ཕྱི་ལོ་ ༢༠༢༤ ཟླ་ ༦ ཚེས་ ༧ ནས་ལས་དོའི་གནས་རིམ་དུ་གནས་སྤར། ཕྱི་ལོ་ ༢༠༢༤ ཟླ་ ༧ ཚེས་ ༡༥ ནས་སྡེ་འགན་ས་མིག་ཐོག་མེའོ་ཆོས་འཕེལ་གླིང་ས་གནས་མགོ་འཛིན་ལས་ཁུངས་ཀྱི་ལས་དོའི་ལས་ཁུར་ཞུ་མུས།

ཁོང་གིས་འདས་པའི་ལོ་གསུམ་གྱི་རིང་དམིགས་བསལ་ཞབས་ཕྱི་ཞུས་པའི་ཁྲོད། ཀོ་ལི་གྷལ་ས་གནས་སུ་ལས་ཁུར་ཞུས་རིང༌། ས་གནས་མགོ་འཛིན་གྱི་འགན་གཙོ་བཞེས་ཀྱིས་དོན་ལྡན་གླིང་གཞིས་ཆགས་དབུ་བརྙེས་ནས་ལོ་ངོ་ ༥༠ འཁོར་བའི་དུས་སྟོན་སྐབས། ས་གནས་གནད་ཡོད་མི་སྣ་ཡོངས་ནས་མི་མང་གི་ཚབ་ཞུས་ཏེ་བསྔགས་བརྗོད་དང་སྦྲགས་ཐུགས་རྗེ་ལེགས་འབུལ་མཚོན་བྱེད་ལག་རྟགས་གནང་སོན་བྱུང༌།  བོད་མིའི་སྒྲིག་འཛུགས་ནས་གྲོན་དངུལ་གནང་སོན་བཞིན། ས་གནས་བུ་བཅོལ་ཁང་རྒྱ་སྐྱེད་དང་། ས་གནས་མགོ་འཛིན་ཆེད་ལས་ཤག་དང་ར་བ། ཆུ་མཛོད་འཇོག་སྟེགས་གསར་རྒྱག དགོས་མཁོའི་ནང་ཆས་གསར་ཉོ་བཅས་ཀྱི་ལས་གཞི་ལེགས་གྲུབ། མངའ་གཞུང་ནས་གྲོན་དངུལ་ཧིན་སྒོར་ ༥༠,༠༠,༠༠༠།༠༠ གནང་སོན་བཞིན་ས་གནས་ཀྱི་ཚོགས་ར་གསར་རྒྱག་ལས་གཞི་ལེགས་པར་གྲུབ་བྱུང་འདུག 

གསར་འགོད་པ་དཔལ་ལྡན་གྱིས་དབུས་བོད་མིའི་སྒྲིག་འཛུགས་ཀྱི་དྲ་རྒྱ་ནས་བཏུས།