རྒྱ་ནག་གཞུང་གིས་གློ་བུར་དུ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གིས་ཆེད་འཛུགས་གནང་བའི་གངས་ལྗོངས་གནའ་དེང་ཤེས་རིག་སློབ་གླིང་བཙན་གྱིས་སྒོ་བརྒྱབ་བཅུག་འདུག
རྒྱ་ནག་གཞུང་གིས་འདས་པའི་ལོ་གཉིས་ཙམ་གྱི་གོང་ནས་གངས་ལྗོངས་གནའ་དེང་ཤེས་རིག་སློབ་གླིང་དུ། རྒྱ་ནག་དམར་ཤོག་གཞུང་གི་ལྟ་བ་དང་འབྲེལ་བའི་སློབ་ཚན་འཆད་ཁྲིད་མ་བྱས་སྟབས་སློབ་མ་གསར་ཞུགས་བྱ་རྒྱུར་བཀག་འགོག་བྱས་ཏེ། ཉེ་ལམ་སློབ་གྲྭ་དེའི་མཐའ་མཇུག་གི་སློབ་མ་སུམ་ཅུ་ཙམ་སློབ་མཐར་ཕྱིན་རྗེས། ཟླ་འདིའི་ཕྱི་ཚེས་ ༢༤ ཉིན་རྒྱ་གཞུང་གིས་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གིས་ཆེད་འཛུགས་གནང་བའི་གངས་ལྗོངས་གནའ་དེང་ཤེས་རིག་སློབ་གླིང་བཙན་གྱིས་སྒོ་བརྒྱབ་བཅུག་འདུག
གནད་དོན་དེའི་ཐད་འབྲེལ་ཡོད་གནས་ཚུལ་མཁོ་སྤྲོད་པས། འདས་པའི་མི་ལོ་གཉིས་ཙམ་གྱི་གོང་ནས་རྒྱ་ནག་གཞུང་གིས་གངས་ལྗོངས་གནའ་དེང་ཤེས་རིག་སློབ་གླིང་དུ་རྒྱ་ནག་དམར་ཤོག་རིང་ལུགས་ཀྱིས་སློབ་གསོ་སོགས་དང་འབྲེལ་བའི་སློབ་ཚན་འཆད་ཁྲིད་མ་བྱས་ཚེ་སྒོ་བརྒྱག་རྒྱུ་ཡིན་ལུགས་ཀྱི་ཉེན་བརྡ་གཏོང་སྐབས། མཆོག་སྤྲུལ་རིན་པོ་ཆེ་མཆོག་གིས་དམར་ཤོག་གི་སློབ་གསོ་དང་འབྲེལ་བའི་སློབ་ཚན་འཆད་ཁྲིད་བྱ་རྒྱུར་མོས་མཐུན་མ་གནང་སྟབས། དེ་ནས་བཟུང་རྒྱ་ནག་གཞུང་གིས་སློབ་མ་གསར་ཞུགས་བྱ་རྒྱུར་བཀག་འགོག་བྱས་ཡོད་ཅིང་། ཉེ་ལམ་སློབ་གྲྭ་དེའི་མཐའ་མཇུག་གི་སློབ་མ་སུམ་ཅུ་ཙམ་བསླབ་པ་མཐར་སོན་བྱུང་རྗེས། རྒྱ་ནག་གཞུང་གིས་དངོས་སུ་སློབ་གྲྭ་དེ་སྒོ་བརྒྱབ་བཅུག་ཡོད་སྐོར་སོགས་བརྗོད་བྱུང་།
གངས་ལྗོངས་གནའ་དེང་ཤེས་རིག་སློབ་གླིང་དང་འབྲེལ་ནས་དེ་སྔ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གིས། ལྷག་བསམ་དང་དཀའ་ལས། སྙིང་རུས་དང་རིགས་ཞེན། དུས་ཚོད་དང་དངུལ་ནོར་སོགས་ཀྱི་མཐུ་ལ་ལྟོས་ཤིང་། དགེ་རྒན་དང་ལས་བཟོ་བ། སྒྲིག་ལམ་དམ་སྲུང་སོགས་མདོར་ན་འབད་རྩོན་དང་དཀའ་བ་བརྒྱ་ཕྲག་གི་འབྲས་བུ། བདག་གི་རིགས་ཞེན་དང་རུས་པ་ནི་གངས་ལྗོངས་གནའ་དེང་ཤེས་རིག་སློབ་གླིང་འདི་ཡིན་ནོ།། ཞེས་གསུངས་འདུག
སློབ་གྲྭ་དེའི་སློབ་མ་དང་སློབ་ཟུར་རྣམས་ཀྱིས་སྐྱོ་ངལ་དང་བཅས་རང་གི་སྐད་འཕྲིན་རྒྱབ་ལྗོངས་སུ། སྐྱེས་བུ་དམ་པ་ཁོང་སྐུ་ཚེ་གང་བོར་རྒྱལ་བསྟན་དང་གངས་རིའི་ཆེད་དུ་ཡོད་ཚད་འབུལ་ནས་ཕེབས་སོང་། གང་གི་ཞལ་གསུང་ཚན་པ་གཅིག་ལས། བདག་གི་རིགས་ཞེན་དང་རུས་པ་ནི་གངས་ལྗོངས་གནའ་དེང་ཤེས་རིག་སློབ་གླིང་འདི་ཡིན་ནོ།། ཞེས་གསུངས་ཡོད། ཅེས་དང་། སློབ་གླིང་དང་མཆོག་སྤྲུལ་རིན་པོ་ཆེ་མཆོག་གི་སྐུ་པར་སོགས་བཞག་སྟེ་སེམས་འཚབ་ཆེན་པོ་བྱེད་ཀྱིན་ཡོད་པ་རེད།
བོད་མགོ་ལོག་དགའ་བདེ་རྫོང་ལུང་སྔོན་དགོན་པའི་ཉེ་འགྲམ་དུ་ཡོད་པའི་གངས་ལྗོངས་གནའ་དེང་ཤེས་རིག་སློབ་གླིང་ནི་ཞིང་གཤེགས་དམ་པ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གིས་ཕྱི་ལོ་ ༢༠༠༨ ཟླ་ ༧ ཚེས་ ༦ ཉིན་ཆེད་འཛུགས་གནང་བ་ཞིག་ཡིན་ཞིང་། སློབ་གྲྭ་དེའི་ནང་བོད་ཡིག་གཙོས་བོད་ཀྱི་རིག་གཞུང་ཆེད་སྦྱོང་བྱེད་ཀྱིན་ཡོད་པ་མ་ཟད། དབྱིན་ཡིག རི་མོ། ཐང་ཀ ཡིག་གཟུགས་གཙོས་བོད་ཀྱི་སྲོལ་རྒྱུན་རིག་གནས་སྦྱང་བརྩོན་བྱ་སའི་སློབ་གླིང་ཆེན་པོ་ཞིག་ཡིན་འདུག
རྒྱ་ནག་གཞུང་གིས་ཕྱི་ལོ་ ༢༠༢༡ ཟླ་ ༧ པའི་ཟླ་མགོར་སེང་འབྲུག་སྟག་རྩེ་སློབ་གྲྭ་སྒོ་བརྒྱབ་པ་དང་འབྲེལ་ནས། མགོ་ལོག་ཁུལ་དར་ལག་རྫོང་ཁོངས་ཀྱི་སེང་འབྲུག་སྟག་རྩེའི་བཅའ་སྡོད་སློབ་གྲྭ་དང་། རྨ་ཆེན་རྫོང་ཁོངས་ཀྱི་སློབ་གྲྭ་གསུམ། དགའ་བདེ་རྫོང་ཁོངས་ཀྱི་སློབ་གྲྭ་གཅིག དེ་བཞིན་གཅིག་སྒྲིལ་རྫོང་ཁོངས་ཀྱི་སློབ་གྲྭ་གཉིས་བཅས་སྒེར་གཉེར་སློབ་གྲྭ་ཁག་བདུན་སྒོ་བརྒྱག་དགོས་པའི་བཀའ་བཏང་སྟེ་སྒོ་བརྒྱབ་བཅུག་ཡོད་པ་མ་ཟད། ཕྱི་ལོ་ ༢༠༢༤ ཟླ་ ༧ ཚེས་ ༡༤ ཉིན་རྒྱ་ནག་གཞུང་གིས་རྭ་རྒྱ་གངས་ལྗོངས་ཤེས་རིག་ནོར་བུའི་སློབ་གླིང་བཙན་གྱིས་སྒོ་བརྒྱབ་ཡོད་པ་རེད།
སྤྲུལ་སྐུ་ཧཱུྃ་ཀར་རྡོ་རྗེ་མཆོག་གིས་ཕྱི་ལོ་ ༢༠༠༤ ལོར་མཚོ་སྔོན་ཞིང་ཆེན་གེ་སར་གཞན་ཕན་ཐེབས་རྩ་གསར་འཛུགས་གནང་སྟེ་གེ་སར་རིག་གནས་རྒྱུན་འཛིན་ཐད་ཕྱག་ལས་མང་པོ་གནང་། ཕྱི་ལོ་ ༢༠༠༧ ལོ་ནས་མགོ་ལོག་ཁུལ་སྲིད་གཞུང་དང་སློབ་གསོ་ཁང་གི་ཆོག་མཆན་ཐོབ་པ་བརྒྱུད་དགེ་སློབ་ཆིག་སྟོང་ཙམ་ཡོད་པའི་ཧཱུྃ་ཀར་རྡོ་རྗེ་མི་རིགས་ལག་རྩལ་མཐོ་འབྲིང་གསར་འཛུགས་གནང་བ་སོགས་བོད་ཁུལ་གྱི་རོང་འབྲོག་གི་བྱིས་པ་སྟོང་ཕྲག་མང་པོར་རིན་མེད་ཐོག་ཤེས་ཡོན་སློབ་གསོའི་གོ་སྐབས་ཐོབ་སླད་སློབ་གྲྭ་ཆུང་འབྲིང་ ༡༤ ཙམ་སྔ་གཞུག་ཏུ་ཆེད་འཛུགས་གནང་ཡོད་པ་དང་། དེ་བཞིན་དགོན་པ་དང་བཤད་གྲྭ་མང་པོ་ཕྱག་བཏབ་སྟེ་བོད་ཀྱི་ཆོས་དང་རིག་གཞུང་སྐད་ཡིག་སོགས་མི་ཉམས་རྒྱུན་འཛིན་དང་ཉམས་པ་སླར་གསོའི་ཆེད་མཛད་འཕྲིན་རླབས་ཆེན་བསྐྱངས་ཡོད་པར་བརྟེན། རྒྱ་ནག་གཞུང་གིས་ཁོང་ལ་ཆབ་སྲིད་ཀྱི་སྙོན་འཛུགས་སྣ་ཚོགས་བྱས་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
