ལྡོག་གཏུག་གི་ཁ་མཆུ་དང་འབྲེལ་བའི་ཉན་ཞིབ་འཚོགས།

དེ་རིང་བཙན་བྱོལ་བོད་མིའི་ཁ་མཆུ་ཨང་ ༢༢ པ་དང་འབྲེལ། ཟླ་འདིའི་ཕྱི་ཚེས་ ༡༩ ཉིན་རྩོད་ལན་པ་དབུས་འོས་བསྡུ་ལས་ཁང་གིས་ཞུ་སྦྱོར་བ་ཁ་མཆུར་གཏུགས་པ་རྩིས་མེད་བཏང་བའི་ཐག་གཅོད་གནང་སོང་ལ། དེ་བཞིན་ཚེས་ ༡༩ ཉིན་ཞུ་སྦྱོར་བས་འོས་བསྡུ་ལས་ཁང་གི་ལས་བྱེད་ཁག་ཅིག་ལ་ཁྲིམས་མཐུན་གྱི་ཉེན་བརྡའང་བཏང་ཡོད་འདུག

དེ་རིང་ཉིན་རྒྱབ་ཆུ་ཚོད་ ༢།༣༠ ནས་བོད་ཀྱི་ཆེས་མཐོའི་ཁྲིམས་ཞིབ་ཁང་གི་གཏུག་བཤེར་ཁང་དུ། ཆེས་མཐོའི་ཁྲིམས་ཞིབ་ཁང་གིས་སྤྱི་མང་གཏུག་བཤེར་གྱི་དོན་ཚན་ ༣༥ ཡི་དགོངས་དོན་བཞིན། ཁ་མཆུ་ཞུ་སྦྱོར་དེབ་འགོད་ཨང་ ༢༢ པ་བལ་ཡུལ་མཆོད་འཇོར་ཁུལ་གྱི་དགོན་སྡེ་དྲུག་དང་མི་མང་ཁག་ཅིག་གི་འོས་བསྡུའི་ཐོབ་ཐང་འཕྲོག་པའི་གྱོད་གཞི་དང་འབྲེལ་ཕྱོགས་གཉིས་ཀྱི་ལྡོག་གཏུག་གི་ཞུ་རྩ་དང་། ཞུ་ལན་ཐོག་ངེས་བརྟན་བཟོ་རྒྱུའི་ཐོག་མའི་ཉན་ཞིབ་འཚོགས་ཏེ་ལྡོག་གཏུག་གི་ཁ་མཆུ་རྩིས་མེད་བཏང་ནས་ཕྱིར་ལོག་གནང་སོང་ལ། དེ་རིང་ཁྲིམས་རར་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གིས་གཙོས་དབུས་ཁྲིམས་ཞིབ་པ་གཞན་གཉིས་དང་། ཞུ་སྦྱོར་བ་བལ་ཡུལ་དགོན་སྡེ་དྲུག་དང་མི་མང་ཁག་ཅིག་གི་སྐུ་ཚབ་བློ་བཟང་ཚེ་རིང་ལགས་དང་ཁྲིམས་རྩོད་པ། རྩོད་ལན་པ་དབུས་འོས་བསྡུ་ལྷན་ཁང་གི་སྤྱི་ཁྱབ་འགན་འཛིན་བློ་བཟང་ཡེ་ཤེས་ལགས་སོགས་ཆེད་ཕེབས་གནང་སོང་། 

གནད་དོན་དེ་དང་འབྲེལ་ནས་ཞུ་སྦྱོར་བའི་སྐུ་ཚབ་བོད་ཀྱི་ཁྲིམས་ལུགས་རིག་པ་བའི་ཚོགས་པའི་ཁྲིམས་རྩོད་པ་བྱམས་པ་དབང་ཕྱུག་ལགས་ཀྱིས། དེ་རིང་ཁ་མཆུའི་ཉན་ཞིབ་དེ་ཕྱིན་པ་རེད། སྤྱིར་བཏང་ཁ་མཆུ་དེའི་བྱུང་སྟངས་སྐོར་ལ་མདོར་བསྡུས་ཤིག་བཤད་ན། སྤྱིར་བཏང་དེ་སྔོན་དབུས་འོས་བསྡུ་ལྷན་ཁང་གིས་ཁ་མཆུ་ ༢༢ དང་འབྲེལ་བའི་ཞུ་ལན་ཕུལ་ཡོད། ང་ཚོར་ཕྱི་ཚེས་ ༡༩ ཉིན་ཁ་མཆུ་ ༢༢ དང་ལྡོག་གཏུག་གི་ཁ་མཆུ་ཞིག་ཀྱང་བྱུང་བ་རེད། ལྡོག་གཏུག་གི་ཁ་མཆུ་ཟེར་ན་ང་ཚོར་ཚུར་ཁ་མཆུ་བརྒྱབ་པ་རེད། ལྡོག་གཏུག་གི་ཁ་མཆུ་དེའི་ནང་གཟིགས་ཡོད་ན། གཙོ་བོ་ཉེས་མེད་ཉེས་འཛུགས་ཚད་མཐོ་བོའི་སྒང་ནས་བྱས་ཡོད་རེད། དབུས་འོས་བསྡུ་ལྷན་ཁང་དུ་ཕྱག་ལས་གནང་མཁན་གཙོ་བོ་གཞུང་ཞབས་པ་ཞིག་ཀྱང་ཆགས་ཀྱི་ཡོད་སྟབས། ཉེས་མེད་ཉེས་འཛུགས་དེ་འདྲ་ཞིག་བྱེད་དུས། དངོས་གནས་དེ་འདྲ་ཞིག་ཡིན་ན་བསམ་པའི་སེམས་ནང་ཚོར་བ་ཞིག་དང་། གང་ཟག་དེ་རིང་འདིར་ལངས་བསྡད་པ་ཡིན་ཡང་།  བོད་ནས་བྲོས་ཏེ་བཙན་བྱོལ་དུ་བསླེབས་ནས་སློབ་ཐོན་བྱུང་བ་ཞིག་ཡིན་ལ། ད་ལྟ་ཡིན་ནའང་སོ་སོའི་གཞུང་ལའང་ཕན་ཐོགས་ཡ་མ་གཏོགས་གནོད་སྐྱེལ་བའི་སེམས་བློ་ཡུལ་ལའང་མེད། ད་ལྟ་གནས་སྟངས་ག་རེ་ཆགས་འདུག་ཟེར་ན། ཁ་སང་ཕྱི་ཚེས་ ༡༩ ཉིན་དབུས་འོས་བསྡུ་ལྷན་ཁང་གི་ལས་བྱེད་ཁག་ཅིག་ལ་ཁྲིམས་མཐུན་གྱི་ཉེན་བརྡ་ཞིག་བཏང་ཡོད་རེད་ལ། ཉེས་བརྡ་བཏང་བའི་གནས་བབ་ཀྱང་དེ་འདྲ་བྱས་ནས་ཆགས་སོང་། ཞེས་བརྗོད་བྱུང་། 

ཡང་ཁྲིམས་རྩོད་པ་རིན་ཆེན་དབང་རྒྱལ་ལགས་ཀྱིས། ཁ་མཆུ་ཨང་ ༢༢ པའི་ངོ་ཚབ་ཆགས་ཀྱི་ཡོད་རེད། དེ་རིང་ཉན་ཞིབ་འཚོགས་པ་དེ་ཁ་མཆུ་ཨང་ ༢༢ པའི་རྐྱེན་རྩ་ལ་བརྟེན་ནས། ཞུ་རྩ་ཞུ་ལན་ཕུལ་དགོས་ཀྱི་ཡོད་པ་ནང་བཞིན། ཞུ་ལན་དང་མཉམ་ལྡོག་གཏུག་གི་ཁ་མཆུ་ཞིག་བྱུང་བ་རེད། ལྡོག་གཏུག་གི་ཁ་མཆུའི་ནང་ལ་རྩ་བའི་དོན་ཚན་དྲུག་ཡོད་པའི་ཁྲོད། དོན་ཚན་ལྔ་བ་དང་འབྲེལ་ནས་ཁྲིམས་མཐུན་གྱི་ཉེན་བརྡ་བཏང་ཡོད་རེད། དེའི་ནང་དོན་དེར་སྤྱི་དམངས་ཁྲིམས་ཡིག་དང་བཙན་བྱོལ་བོད་མིའི་བཅའ་ཁྲིམས་ཀྱི་ནང་དོན་གྱི་ཐོག་ནས་ཆེས་མཐོའི་ཁྲིམས་ཞིབ་ཁང་གི་སྐུ་དབང་གི་ཁྱབ་ཚད་ལ་མེད་པ་སོང་ཙང་། ཁྲིམས་མཐུན་གྱི་ཉེན་བརྡ་དེ་གཏང་དགོས་པའི་རྒྱུ་མཚན་དེ་ལ་ཐུག་ཡོད་རེད། ཡིན་ཡང་། དེའི་བྱུང་རྐྱེན་དང་དེ་གཏོང་དགོས་དོན་ནི་ཁྲིམས་ཞིབ་པ་བྱམས་པ་ལགས་ཀྱིས་གསུངས་བ་བཞིན་རེད།  ཅེས་དང་། སྤྱིར་ཁ་མཆུ་ཨང་ ༢༢ པ་དེ་མུ་མཐུད་ནས་འགྲོ་ཡི་རེད་དེ། དེ་རིང་ཁྲིམས་ཞིབ་པ་རྣམས་ཀྱིས་གསུང་རྒྱུ་དེ་ལྡོག་གཏུག་གི་ཁ་མཆུ་ནུས་མེད་ཡིན་ཞེས་གསུང་གི་ཡོད་རེད། ང་ལ་ཁས་ལེན་གྱི་ཡི་གེ་དེ་ཀློག་འདོན་བྱེད་དུ་བཅུག་སྟེ། ནང་དོན་རྣམས་རྣམ་པ་ཚོས་གསན་ཡོད་ངེས་རེད། དེའི་འགན་དབང་ང་ལ་ཡོད་པ་ནང་བཞིན་དབུས་འོས་བསྡུ་ལྷན་ཁང་ལའང་གཅིག་པ་གཅིག་རྐྱང་ཡོད་རེད། ཅེས་བརྗོད་བྱུང་། 

ཞུ་སྦྱོར་བ་བློ་བཟང་ཚེ་རིང་ལགས་ཀྱིས། ད་བར་ང་ཚོས་ཞུ་གཏུག་བྱས་ནས་ཟླ་བ་གཉིས་མ་ཟིན་ཙམ་འགྲོ་ཡི་ཡོད་ཀྱང་། ད་བར་ཉམས་ཞིབ་གཅིག་ཀྱང་གནང་ཡོད་མ་རེད། ང་ཚོས་མི་མང་ཉམ་ཆུང་ལ་ག་རེ་བྱུང་བ་དེ་བདེན་པ་ཞུ་ཡི་ཡོད་རེད་མ་གཏོགས། གཞན་པ་གང་ཡང་ཞུ་ཡི་མེད་པས་དེར་དགོངས་བཞེས་གནང་དགོས་རེད། ད་བར་ཐེངས་བཞི་ལ་ཞུས་ཀྱང་ཉན་ཞིབ་འཚོག་གནང་ཡོད་མ་རེད། ཁྲིམས་ལུགས་ཀྱི་འགྲོ་སྟངས་དེ་ངས་མི་ཤེས་ཀྱང་། ངས་ང་ཚོ་མི་མང་ལ་བདེན་པ་བདེན་གཏུགས་ཀྱི་མཐོང་ཆུང་དང་ཁྱད་གསོད་བྱས་པའི་གནད་དོན་ཞུས་ཀྱང་ཉན་ཞིབ་གནང་ཡོད་མ་རེད། མ་གནང་བ་ཡིན་ནའང་ཁྲིམས་ཀྱི་ཐག་གཅོད་གནང་དགོས་པའང་མགྱོགས་པོ་གནང་ན་ཡག་པོ་འདུག་མ་གཏོགས། ༧གོང་ས་རྒྱལ་བ་རིན་པོ་ཆེ་མཆོག་ནས་མི་མང་ཉམ་ཆུང་གིས་གཏུག་ས་དེ་ཁྲིམས་ཞིབ་ཁང་བཙུགས་ཡིན་གསུང་གི་ཡོད་པས། དེ་ལྟར་གནང་དགོས་རེད། ཁྲིམས་ཞིབ་པ་རྣམ་པ་གསུམ་དང་ལས་བྱེད་སུ་ཡིན་ནའང་། དམ་འབུལ་ཞུ་དུས་ག་རེ་བྱས་ནས་དམ་འབུམ་ཞུས་གནང་ཡོད་རེད། དེ་གཞིར་བཟུང་ཕྱག་ལས་ཤིག་གནང་དགོས་རེད། ང་ཚོ་མི་མང་ཉམ་ཆུང་གིས་ཁྲིམས་གང་ཡང་ཤེས་ཀྱི་མ་རེད་དེ། ང་ཚོས་བདེན་པ་གང་ཡིན་པ་དེ་ཞུ་ཡི་ཡོད་མ་གཏོགས་རྫུན་མ་ཞུ་ཡི་མེད། ཅེས་བརྗོད་བྱུང་། 

དེ་རིང་འདི་གའི་གསར་འགོད་པས། དབུས་འོས་བསྡུ་ལས་ཁང་གི་འགན་འཛིན་བློ་བཟང་ཡེ་ཤེས་ལགས་སུ། ལྡོག་གཏུག་གནང་དགོས་དོན་དང་ཁ་མཆུ་ཨང་ ༢༢ དང་འབྲེལ་བའི་ཐད་བཀའ་འདྲི་ཞུ་ཐབས་བྱས་ཀྱང་། ཆེས་མཐོའི་ཁྲིམས་ཞིབ་ཁང་གིས་ཁ་མཆུ་ ༢༢ དང་འབྲེལ་བའི་ཐད་ཁ་མཆུ་མཇུག་མ་སྒྲིལ་བར་གང་ཡང་བཤད་ཆོག་གི་མེད་སྐོར་གྱི་བཀའ་དགོངས་བཞིན། གང་ཡང་བཤད་ཡ་མེད། ཅེས་གསུངས་སྟབས། ང་ཚོས་ཐེངས་གཉིས་ལ་ཆེད་བཅར་ཞུས་ཏེ་ཡང་དང་བསྐྱར་དུ་བཀའ་འདྲི་ཞུ་ཐབས་བྱས་ཀྱང་། བཀའ་ལན་གང་ཡང་གནང་མ་སོང་བས། གསར་འགོད་པ་རྣམས་ལ་རྩོད་ལན་པ་དང་འབྲེལ་བའི་གནས་ཚུལ་མཁོ་བསྡུ་དང་ཞིབ་དཔྱོད། རྒྱུས་ལོན་བྱ་རྒྱུའི་གོ་སྐབས་མ་བྱུང་། 

འདི་ལོའི་བཙན་བྱོལ་བོད་མིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུའི་སྐབས་བལ་ཡུལ་མཆོད་འཇོར་ཁུལ་གྱི་འོས་བསྡུ་ཚགས་ཚུད་མ་བྱུང་བའི་ལབ་གླེང་ཞུ་གཏུག་བྱུང་བ་ལྟར། དབུས་འོས་བསྡུ་ལས་ཁང་གིས་འབྲེལ་ཡོད་ལ་འདྲི་བརྩད་དང་འོས་ཤོག་ལ་ཞིབ་འཇུག་གནང་བ་བརྒྱུད། ཕྱི་ཟླ་ ༤ ཚེས་ ༢༣ ཉིན་མཆོད་འཇོར་ས་གནས་འོས་བསྡུའི་འགན་འཛིན་ལས་རོགས་ཀྱི་མིང་ཐོག་ཏུ་ཐག་གཅོད་ཡི་གེ་ཞིག་བཏང་སྟེ། འོས་བསྡུའི་སྒྲིག་གཞིའི་དགོངས་དོན་ཁག་དང་འགལ་འཛོལ་ཚབས་ཆེན་བྱུང་ཡོད་པ་ར་འཕྲོད་བྱུང་བ་གཞིར་བཟུང་མཆོད་འཇོར་ས་གནས་ལ་དངོས་གཞིའི་འོས་བསྡུ་ཐེངས་གཅིག་ཕྱིར་འཐེན་ཞུ་རྒྱུའི་ཐག་གཅོད་གནང་བ་ཡིན་སྐོར་བཀོད་ཡོད་པ་རེད། 

ཕྱི་ཟླ་ ༥ ཚེས་ ༥ ཉིན་གྱི་ཉིན་རྒྱབ་ཏུ་བལ་ཡུལ་ནས་ཕེབས་པའི་བློ་བཟང་ཚེ་རིང་ལགས་ཀྱིས་བོད་མིའི་ཁྲིམས་ལུགས་རིག་པ་བའི་ཚོགས་པའི་ཁྲིམས་རྩོད་པ་བརྒྱུད་བལ་ཡུལ་མཆོད་འཇོར་མི་མང་ལ་དངོས་གཞི་འོས་བསྡུའི་ཐོབ་ཐང་འཕྲོག་པའི་གནད་དོན་དང་འབྲེལ་ནས་དབུས་འོས་བསྡུ་ལས་ཁང་ཆེས་མཐོའི་ཁྲིམས་ཞིབ་ཁང་ལ་ཁྲིམས་གཏུགས་བྱས། ཕྱི་ཚེས་ ༧ ཉིན་ཁྲིམས་གཏུགས་ངོས་བཞེས་ཀྱིས་ཁ་མཆུ་ཨང་ ༢༢ པར་ངོས་བཞེས་དེབ་འགོད་གནང་། ཕྱི་ཚེས་ ༨ ཉིན་ཞུ་སྦྱོར་བས་བཙན་བྱོལ་བོད་མིའི་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་དོན་ཚན་ ༧༦ པའི་དགོངས་དོན་བར་བརྒལ་གྱི་བཀའ་ཁྱབ་གཏོང་གནང་ཡོང་བའི་སྙན་ཞུ་ཕུལ་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།