སྤྱི་འཐུས་ཚོགས་གཙོ་མཆོག་གིས་སྤྲུལ་སྐུ་བསྟན་འཛིན་བདེ་ལེགས་ཀྱིས་བོད་མིའི་སྙིང་སྟོབས་མཚོན་ཞེས་གསུངས། 

དེ་རིང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཚ་མོ་ཉི་མ་ལྷ་མོའི་མི་ཚེ་དང་འབྲེལ་བའི་དབྱིན་ཡིག་དཔེ་དེབ་ཅིག་དབུ་འབྱེད་གནང་སྟེ། རིན་པོ་ཆེ་མཆོག་རྒྱ་གཞུང་གིས་སྐུ་བཀྲོངས་ནས་མི་ལོ་བཅུ་གཅིག་འཁོར་བའི་དུས་དྲན་སྲུང་གཙི་ཞུས། 

དེ་རིང་དྷ་ས་ནོར་བུ་གསོལ་མགྲོན་ཁང་དུ། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་ནག་གཞུང་གིས་སྐུ་བཀྲོངས་ནས་མི་ལོ་བཅུ་གཅིག་འཁོར་བའི་དུས་དྲན་དང་། ཚ་མོ་ཉི་མ་ལྷ་མོ་ལགས་ཀྱི་མི་ཚེ་དང་འབྲེལ་བའི་དཔེ་དེབ་ (NO TONGUES IN THEIR MOUTHS: ALLEGATIONS OF ASSASSINATION IN TENZIN DELEK RINPOCHE’S DEATH) ཅིག་དབུ་འབྱེད་གནང་སོང་། མཛད་སྒོའི་ཐོག་བོད་མི་མང་སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་དང་། བོད་ཀྱི་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་བསྟན་འཛིན་ཟླ་བ་ལགས། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཞབས་ཞུ་ཚོགས་པའི་ཚོགས་གཙོ་ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས་སོགས་ཆེད་ཕེབས་གནང་འདུག 

བོད་ཀྱི་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་བསྟན་འཛིན་ཟླ་བ་ལགས་ཀྱིས། དེ་རིང་ང་ཚོས་དཔེ་དེབ་གཅིག་དབུ་འབྱེད་ཀྱི་ཐོག་ནས་བོད་དོན་དང་འབྲེལ་བའི་གནས་ཚུལ་གལ་ཆེན་ཞིག་འཛམ་གླིང་ས་གནས་ཁག་གི་ཀློག་པ་པོར་ངོ་སྤྲོད་བྱེད་ཀྱི་ཡོད། ཐོག་མར་ངས་བརྗོད་དགོས་པ་ཞིག་ལ་དེ་རིང་གལ་ཆེའི་སྐུ་མགྲོན་གཉིས་ནས་སྤྲུལ་སྐུ་བསྟན་འཛིན་བདེ་ལེགས་མཆོག་གི་ལོ་རྒྱུས་དང་མཛད་པ་འཕྲིན་ལས་དང་འབྲེལ་བའི་གནད་དོན་ཐད་ཞིབ་ཕྲའི་ངོ་སྤྲོད་གནང་རྒྱུ་རེད། ངས་འདི་ནས་ཁོང་གི་རིན་ཐང་བྲལ་བའི་མཛད་པ་འཕྲིན་ལས་དེ་དག་བསྐྱར་བཤད་མ་ཞུས་པར་ད་རེས་དཔེ་དེབ་འདི་དབྱིན་སྒྱུར་བྱེད་པའི་རིན་ཐང་དང་། དེབ་འདིའི་རྩོམ་པ་པོ་ཉི་མ་ལྷ་མོ་ལགས་ཀྱི་ཁྱད་དུ་འཕགས་པའི་འགྲུལ་བཞུད་སྐོར་ལ་བཤད་འདོད་བྱུང་། དེབ་འདི་ལྟ་ཀློག་བྱས་པའི་བརྒྱུད་རིམ་ནང་ངའི་སེམས་ལ་བག་ཆགས་ཆེ་ཤོས་ནི་སྤྲུལ་སྐུ་བསྟན་འཛིན་བདེ་ལེགས་མཆོག་གི་ལོ་རྒྱུས་ཙམ་མ་ཡིན་པར་ད་ལྟའི་བོད་ཀྱི་འགྲོ་བ་མིའི་ཐོབ་ཐང་དང་འབྲེལ་བའི་གྱོད་གཞི་ཆེན་པོ་ཞིག་གི་དཔང་མི་ཡིན་པའི་བོད་རིགས་གཞོན་ནུ་མ་ཞིག་གི་ལོ་རྒྱུས་དེ་རེད། ཉི་མ་ལྷ་མོ་ལགས་ཀྱིས་ཁོང་གི་ཨ་ཞང་སྤྲུལ་སྐུ་བསྟན་འཛིན་བདེ་ལེགས་མཆོག་གིས་བོད་ཀྱི་ཆོས་དང་རིག་གཞུང་། སྐད་ཡིག་སྲུང་སྐྱོབ་དང་། དེ་བཞིན་སློབ་གྲྭ་གསར་འཛུགས་དང་ཁོར་ཡུག་སྲུང་སྐྱོབ་སོགས་སྤྱི་ཕན་གྱི་ཆེད་དུ་སྐུ་ངལ་ཇི་ཙམ་ཁྱད་བསད་གནང་བ་དངོས་སུ་མཐོང་ཡོད་ལ། མཐར་འཛིན་བཟུང་དང་། བཙོན་འཇུག་བཅས་ཀྱི་རྐྱེན་པས་ཁོང་གི་སྐུ་སྲོག་ཤོར་བའི་གནས་ཚུལ་ཡང་དངོས་སུ་མཐོང་ཡོད། ཡིན་ནའང་། ང་ལ་སེམས་འགུལ་ཆེ་ཤོས་ཐེབས་ས་ནི་དེའི་རྗེས་སུ་བྱུང་བའི་གནས་ཚུལ་རྣམས་རེད། མི་མང་པོ་ཞིག་གོད་ཆག་དེ་འདྲའི་འོག་གཉའ་ཆག་སྲིད་ཀྱང་། ཉི་མ་ལྷ་མོས་དེ་ལས་ལྡོག་སྟེ་བདེན་པ་དང་འགན་ཁྲི་ལྗིད་པོ་འཁུར་རྒྱུ་དེ་གདམ་ཁ་བྱས་པ་རེད། ཁོ་མོས་རང་ཉིད་ཀྱི་ཨ་ཞང་སྐུ་སྲོག་ཤོར་བའི་གནས་ཚུལ་དེ་དག་ཁུ་སིམ་ངང་ཡལ་དུ་མི་འཇུག་པའི་ཆེད་རང་ཉིད་ཀྱི་ཡོད་ཚད་བློས་གཏོང་བྱས་ཡོད། ཅེས་བརྗོད་སོང་། 

ཁོ་མོས། དཔེ་དེབ་འདིའི་ཡིད་དབང་འཕྲོག་པའི་གནད་དོན་གཞན་ཞིག་ནི་ཉི་མ་ལྷ་མོས་རང་ཉིད་ལ་འཕྲད་པའི་དཀའ་སྡུག་འདི་དག་གིས་རང་ཉིད་ལ་ཤུགས་རྐྱེན་ཇི་འདྲ་ཐེབས་པའི་ཐད་བདེན་པ་བདེན་ཐུབ་ཀྱིས་འགྲེལ་བརྗོད་བྱས་པ་དེ་རེད། དྲང་བདེན་མིན་པའི་གནོན་ཤུགས་ཀྱིས་རྐྱེན་པས་ཐ་ན་ཁོ་མོའི་འཚོ་གནས་ལ་ཉེན་ཁ་ཐུག་པའི་གནས་སྟངས་ཡང་གསལ་པོར་འགྲེལ་བརྗོད་བྱས་ཡོད། ཁོ་མོའི་ཞུམ་པ་མེད་པའི་སྙིང་སྟོབས་ལ་བསྔགས་བརྗོད་ཡོད། སྙིང་སྟོབས་ལ་བརྟེན་ནས་ནམ་ཡང་རེ་བ་མི་བརླག་པ་བྱ་དགོས་ཟེར་བ་དེ་ཁ་ནས་བཤད་པ་ཙམ་མ་ཡིན་པར། གཏན་ནས་མེད་པའི་སྐབས་སུའང་མུ་མཐུད་ནས་མདུན་བསྐྱོད་བྱེད་པའི་གདམ་ཁ་བྱེད་པ་དེ་རེད། ཉི་མ་ལྷ་མོ་ལགས་ཀྱིས་མུ་མཐུད་ནས་རྩོམ་འབྲི་དང་། གཏམ་གླེང་། འགན་འཁུར་དང་དྲང་བདེན་གླེང་བར་ཕེབས་པ་དེ་ནི་འགོག་རྒོལ་གྱི་བྱ་སྤྱོད་ཅིག་ཡིན། དེ་ལྟ་བུའི་དཀའ་ངལ་ལ་གདོང་ལེན་བྱས་པའི་སྙིང་སྟོབས་ནི་དཔེ་དེབ་འདི་ཀློག་དགོས་པའི་རྒྱུ་མཚན་དེ་རེད། ང་ཚོས་རིན་པོ་ཆེ་མཆོག་གི་གྱོད་གཞིར་ཕྱིར་མིག་བལྟ་སྐབས་ཁོང་གིས་བོད་ཀྱི་ཆོས་དང་རིག་གཞུང་། སྐད་ཡིག་སྲུང་སྐྱོབ་དང་། སྤྱི་ཚོགས་ཞབས་ཞུའི་ལས་དོན་ལ་འབད་བརྩོན་བྱས་པའི་རྐྱེན་གྱིས་དམ་དྲག་དང་བལྟ་སྲུང་འོག་ཚུད་པ་དང་། དེའི་རྗེས་གང་བྱུང་འཇུ་བཟུང་དང་། བཙོན་འཇུག་བྱས་ཏེ་མཐར་སྐུ་སྲོག་ཤོར་བའི་གནས་ཚུལ་དེ་དག་མཐོང་ཡོད་པས། དེ་ནི་མི་སྒེར་གྱི་ལོ་རྒྱུས་ཙམ་ག་ལ་ཡིན། ད་ལྟའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་ཆ་མཚོན་ན། དཔེ་དེབ་འདིས་བོད་ནང་ཡོངས་གྲགས་ཡིན་པའི་གནས་ཚུལ་མང་པོ་ཞིག་མཚོན་ཡོད་པ་སྟེ། ཆོས་ལུགས་དང་རིག་གཞུང་གི་རང་དབང་བཙན་འཕྲོག་དང་། གང་བྱུང་བཀག་ཉར། འགྲོ་བ་མིའི་ཐོབ་ཐང་དང་རྒྱལ་སྤྱིའི་ལྟ་ཞིབ་ཚོགས་སྡེ་ཁག་གིས་དྲང་བདེན་དང་ཁྲིམས་ཀྱི་གོ་རིམ་མེད་པར་སྐྱོན་བརྗོད་བྱས་པའི་ཁྲིམས་ཐོག་གི་བྱ་སྤྱོད་དང་། བཀག་ཉར་ཁང་དུ་མནར་གཅོད་དང་སྡུག་སྦྱོང་བཏང་བ་དང་། མཐར་ཚེ་སྲོག་ཤོར་བའི་གྱོད་གཞི་དེ་དག་རེད། ཅེས་བརྗོད་སོང་། 

ཡང་ཁོ་མོས། དེབ་འདི་དབྱིན་སྐད་ཤེས་མཁན་གྱི་ཀློག་པ་པོར་ངོ་སྤྲོད་བྱས་ཏེ་ཉི་མ་ལྷ་མོའི་ལོ་རྒྱུས་དེ་འཛམ་གླིང་ས་གནས་གང་སར་ཡོད་པའི་སྲིད་ཇུས་གཏན་འབེབས་བྱེད་མཁན་དང་། ཤེས་ཡོན་ཅན། གསར་འགོད་པ། འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་སོགས་ཀློག་པ་པོར་ངོ་སྤྲོད་བྱེད་འདོད་ཡོད་ལ། ཐབས་ལམ་འདི་ལ་བརྟེན་ནས་སྤྲུལ་སྐུ་བསྟན་འཛིན་བདེ་ལེགས་ཀྱི་གྱོད་གཞིར་སྔར་ལས་ལྷག་པའི་ཤེས་རྟོགས་ཟབ་ཏུ་འགྲོ་བ་དང་། བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ལ་སྔར་ལས་ལྷག་པའི་དོ་སྣང་ཡོང་བའི་རེ་བ་བྱེད་བཞིན་ཡོད། ང་ཚོས་དབྱིན་ཡིག་གི་པར་གཞི་འདི་དཔར་སྐྲུན་བྱེད་པའི་དམིགས་ཡུལ་ནི་སྤྲུལ་སྐུ་བསྟན་འཛིན་བདེ་ལེགས་མཆོག་དང་ཉི་མ་ལྷ་མོས་བདེན་དོན་འཚོལ་བའི་ཆེད་དུ་བློས་གཏོང་གནང་བའི་སྙིང་སྟོབས་དེ་དག་མི་རབས་རྗེས་མའི་དྲན་པའི་ནང་རྒྱུན་གནས་ཐུབ་པའི་ཆེད་དུ་ཡིན་ལ། ལོ་རྒྱུས་འདི་དག་ཉར་ཚགས་བྱས་པ་དེ་ཡང་དྲང་བདེན་གྱི་བྱ་སྤྱོད་གཅིག་ཡིན་པར་ཡིད་ཆེས་བྱེད་བཞིན་ཡོད། འགན་འཁྲི་ནི་དྲན་པ་ནས་འགོ་འཛུགས་དགོས་པ་དང་། དྲན་པ་ནི་དྲང་བདེན་བརྗོད་དགོས་པ་དེ་ཡིན། དཔེ་དེབ་འདི་ལྟ་ཀློག་བྱེད་མཁན་ཚང་མས་དེ་ནི་ཁྱིམ་ཚང་གཅིག་དང་མི་སྒེར་པ་གཅིག་གི་སྒྲུང་གཏམ་ལྟ་བུར་ངོས་འཛིན་མི་བྱེད་པར་ད་ལྟའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་སྔར་ལས་ལྷག་པའི་བསམ་གཞིགས་དང་། དྲང་བདེན། འགན་འཁྲི་བཅས་ཆེད་ང་ཚོ་ཐུན་མོང་གི་དམ་བཅའ་འཇོག་པའི་འབོད་བརྡ་ཞིག་ལ་ངོས་འཛིན་བྱེད་པའི་རེ་བ་འཆང་བཞིན་ཡོད། ཅེས་བརྗོད་སོང་། 

བོད་མི་མང་སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་གིས། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་སྐུ་ཚེའི་ལོ་རྒྱུས་ལ་ཆ་མཚོན་པ་ཡིན་ན། ཁོང་གི་སྐུ་ཚེའི་ལོ་རྒྱུས་ལས་བོད་ནང་གི་བོད་མི་རྣམས་ཀྱིས་རྒྱ་ནག་གཞུང་གི་འོག་ནས་མནར་གཅོད་གང་འདྲ་མྱངས་ཡོད་མེད་དང་། བོད་མི་རིགས་ཀྱི་ཆོས་དང་རིག་གཞུང་གི་ཆེད་དུ་སྐུ་ལས་ག་ཚོད་བསྐྱོན་ཡོད་མེད་ང་ཚོས་ཚོད་དཔག་ཐུབ་རྒྱུ་ཞིག་རེད། ཁོང་ནི་ང་ཚོའི་སྙིང་སྟོབས་ཀྱི་དཔའ་བོ་ཞིག་ཆགས་ཡོད་ལ། དམ་པ་ཁོང་བཙོན་འཇུག་བྱས་ཏེ་སྐུ་གྲོངས་པ་ཙམ་གྱིས་ང་ཚོས་རྗེས་དྲན་ཞུ་ཡི་ཡོད་མ་རེད། ཁོང་བཙོན་ཁང་ལ་ག་རེ་བྱས་ནས་ཕྱིན་པ་རེད། ག་རེ་བྱས་ནས་བཙོན་ཁང་དུ་དཀའ་སྡུག་མྱངས་ཡོད་མེད་ཀྱི་རྒྱུ་མཚན་དེར་བསམ་བློ་བཏང་ན། ད་གཟོད་ང་ཚོས་སྤྱི་ཚོགས་ཀྱི་བསླབ་བྱ་ག་རེ་བླང་དགོས་པར་བསམ་བློ་གཏང་རྒྱུའི་གཞི་ཞིག་རེད། ཅེས་དང་། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆ་ེམཆོག་གིས། ཕྱི་ལོ་ ༡༩༧༩ ལོར་བློ་བཟང་བསམ་གཏན་ལགས་གཙོ་བྱས་པའི་༧རྒྱལ་བ་རིན་པོ་ཆེ་མཆོག་གི་སྐུ་ཚབ་ཚོགས་ཆུང་ལ་ཉེན་ཁར་མ་འཛེམ་པར་གསང་སྟབས་ཀྱིས་ཕེབས་ནས། ལི་ཐང་དགོན་ཆེན་རྒྱ་ནག་གཞུང་གིས་གང་འདྲ་བྱས་ནས་གཏོར་བའི་གནས་ཚུལ་དེ་དག་སྙན་ལམ་དུ་འཁོད་པར་བྱས་འདུག གནད་དོན་དེའི་སྒང་ནས་ག་རེ་སྟོན་གྱི་རེད་ཟེར་ན། ཁོང་ཉིད་དགུང་ལོ་གཞོན་དུས་ནས་བོད་ཀྱི་ཁྱད་ནོར་དེ་དག་རྒྱ་ནག་གཞུང་གིས་ག་རེ་བྱས་ནས་མེད་པར་བཟོ་ཡི་ཡོད་མེད་དང་། རྒྱ་ནག་གིས་མེད་པ་གང་འདྲ་བཟོས་མིན་སོགས་དཔང་རྟགས་དང་བཅས་ལོ་རྒྱུས་ཀྱི་དེབ་ཐེར་དུ་གནས་དགོས་པར་གསལ་ངེར་མཁྱེན་གྱི་ཡོད་པ་རེད། དེ་གཅིག་པུར་བསམ་བློ་བཏང་ན། དེང་སང་ང་ཚོ་བོད་པའི་ནང་སེམས་ལ་བསམ་ཡང་བྱ་མི་ཐུབ་མཁན་མང་པོ་ཞིག་ཡོད་རེད། ཡིན་ཡང་། སེམས་ལ་བསམས་ནས་བྱ་ཐུབ་མཁན་ཁ་ཤས་ཤིག་རྒྱ་ནག་གཞུང་གིས་མེད་པར་བཟོ་དོན་ནི། དེ་དག་གིས་མགོ་ཁྲིད་ནས་རྒྱ་ཆེ་མང་ཚོགས་ཁོང་ཚོའི་རྗེས་སུ་ཕྱིན་པ་ཡིན་ན། རྒྱ་ནག་གཞུང་གི་མགོ་ཁྲིད་ཚོའི་དབང་ཆ་ལ་དོ་ཕོག་དང་དྲི་བ་ཡོང་གི་ཡོད་ཙང་། བྱས་པ་ཅན་གྱི་མི་སྣ་དེ་དག་མེད་པར་བཟོ་ཡི་ཡོད་རེད། ཅེས་གསུངས་སོང་། 

ཁོ་མོས། ཕྱི་ལོ་ ༡༩༨༠ ཡས་མས་ཤིག་ལ་བོད་ནང་ཕྲན་བུའི་གུ་ཡངས་འབྱུང་སྐབས། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གིས་༧པཎ་ཆེན་རིན་པོ་ཆེ་མཆོག་གི་སྐུ་མདུན་ལ་ཕེབས་ནས། རིགས་གནས་གསར་བརྗེ་སྐབས་སུ་དཀའ་ངལ་མང་པོ་ཞིག་བྱུང་བ་རེད། ད་ལྟ་ང་ཚོས་ག་རེ་བྱ་དགོས་འདུག་ཅེས་བཀའ་སློབ་ལམ་སྟོན་ཞུ་སྐབས། ༧པཎ་ཆེན་རིན་པོ་ཆེ་མཆོག་གིས་ད་གུ་ཡངས་ཕྱིན་པ་རེད། སྔོན་མ་ཞྭ་མོ་གཡོགས་པ་དེ་དག་ཕུད་རྒྱུ་དང་། དགོན་པ་དེ་དག་ཉམས་གསོ་ཞུ་རྒྱུའི་གོ་སྐབས་རག་གི་རེད་ཅེས་བཀའ་སློབ་གནང་ཡོད། གནས་སྟངས་དེ་འདྲ་ཞིག་གི་སྐབས་ལས་དོན་དེ་འདྲ་ཞིག་གཉེར་ཐུབ་པ་ནི་རླབས་ཆེན་ཞིག་རེད། དེ་བཞིན་ས་གནས་སྲིད་གཞུང་གིས་ཉེན་ཁ་ཡོད་རུང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གིས་དང་དུ་བླངས་ནས་སྐུ་ལས་བསྐྱོན་འདུག དེ་དག་གིས་བོད་མི་རིགས་ཀྱི་སྙིང་སྟོབས་མཚོན་གྱི་ཡོད། བྱས་ཙང་ཁོང་སྙིང་སྟོབས་ཀྱི་མཚོན་རྟགས་ཤིག་ཡིན་སྟབས་རྗེས་དྲན་དང་། སྙིང་སྟོབས་དེ་ནས་ང་ཚོས་སྙིང་སྟོབས་ཤིག་བླངས་ནས་ཆང་ང་ཆུང་ངེའི་སྤྱི་ཚོགས་ཀྱི་གནད་དོན་དང་འགྲིག་མ་འགྲིག་ལ་མ་བལྟས་པར། དོན་དངོས་ཀྱི་ཐོག་ནས་རིན་པོ་ཆེ་མཆོག་གིས་ག་རེ་གནང་བ་ནང་བཞིན་གྱི་བོད་མི་རིགས་ལ་ཞབས་ཕྱི་ཞུ་རྒྱུའི་བསམ་བློ་གཏང་དགོས་ཀྱི་ཡོད་རེད་མ་གཏོགས། དྲ་ལམ་ཁག་ལ་སྐད་ཅོར་བརྒྱབ་ནས་སྤྱི་ཚོགས་དེ་གཏོར་བཤིག་བཏང་ཐུབ་ཙམ་བྱས་པ་ཡིན་ན། ངས་རྒྱལ་གཅེས་བློས་གཏོང་གནང་མཁན་གྱི་དཔའ་བོ་དཔའ་མོ་དེ་དག་ལའང་ལས་རྒྱུ་འབྲས་འགྲོ་ཡི་མ་རེད་བསམ་གྱི་འདུག ང་ཚོ་མིའི་སྤྱི་ཚོགས་རེད། ཤེས་ཡོན་སྣ་ཚོགས་ཡོད་རེད། ཤེས་པ་ཕྱེད་ཀ་དང་མ་ཤེས་པ་ཕྱེད་ཀ་ཡོང་གི་རེད་ལ། སྐུ་གྲལ་བསྒྲིགས་པ་འདྲ་ཡོང་གི་མ་རེད་དེ། བོད་མི་རིགས་དང་བོད་རྒྱལ་ཁབ་ཀྱི་ལ་རྒྱ་ཡི་ཆེད་དུ་ག་རེ་བྱ་དགོས་མིན་དང་། ད་ལྟ་སེམས་ན་བསམ་པ་དང་མགྲིན་ནས་བསྒྲག་དགོས་པའི་དུས་སྐབས་ཤིག་རེད་ལ། རང་ཉིད་འདོད་པ་མ་ཚིམས་པ་དང་དྲང་པོ་མ་ཆགས་པའི་རིགས་ཡོང་གི་ཡོད་ཀྱང་། བོད་མི་རིགས་ཀྱི་འཐབ་རྩོད་ཀྱི་ཆེད་དུ་ཞབས་ཕྱི་ག་རེ་བསྒྲུབ་དགོས་མིན་ཐད་བསམ་བློ་གཏང་དགོས་རྒྱུ་ཞིག་རེད། ཅེས་གསུངས་སོང་། 

ཡང་ཁོ་མོས། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གིས་བོད་ཀྱི་ན་གཞོན་ཤེས་ཡོན་ཅན་གང་མང་སྐྱེས་སྲིང་བྱ་རྒྱུར་དམིགས་ནས། བོད་མི་གཞོན་སྐྱེས་རྣམས་ཀྱིས་ཤེས་རིག་ལ་སྦྱང་བརྩོན་དགོས་པའི་བསླབ་གདམས་གནང་བ་དང་སྦྲགས། བོད་ནང་དུ་སློབ་གྲྭ་གསར་འཛུགས་དང་དབུལ་ཕོངས་ཀྱི་བྱིས་པ་རྣམས་ལ་ཟས་གོས་གནས་མལ་ཚང་མ་སྦྱིན་ནས་ཤེས་ཡོན་གྱི་གོ་སྐབས་གནང་སྟེ་བོད་མི་ན་གཞོན་ཤེས་ཡོན་པ་སྐྱེས་སྲིང་བྱེད་པར་སྐུ་ལས་ཚད་མེད་བསྐྱོན་ཡོད་སྐོར་དང་། རྒས་ཁོག་རྣམས་ལ་རྒས་གསོ་ཁང་གསར་འཛུགས།  བོད་ཀྱི་རང་བྱུང་ཁོར་ཡུག་བདག་གཅེས་དང་། ལྷག་པར་རྒྱ་ནག་གཞུང་གིས་བོད་ཀྱི་ཤིང་ནགས་གཅོད་བྲེག་བྱས་པར་ངོ་རྒོལ་ཤུགས་ཆེན་གནང་བ་སོགས། བོད་ཀྱི་ཆོས་རིག་སྲུང་སྐྱོབ་དང་། ཁོར་ཡུག་བདག་གཅེས། བོད་སྐད་ཡིག་སྦྱང་བརྩོན། བོད་ཀྱི་ཡུལ་སྲོལ་གོམས་གཤིས་བདག་གཅེས་ཀྱི་ཐད་ལ་སྐུ་ལས་བསྐྱོན་ནས། མཐར་རྒྱ་ནག་གཞུང་གི་མིག་ལམ་གྱི་ཚེར་མ་ལྟ་བུར་གྱུར་ནས་སྐུ་བཀྲོངས་པ་ཡིན་སྐོར་སོགས་གསུངས་སོང་ལ། དེ་བཞིན་དེ་རིང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཞབས་ཞུ་ཚོགས་པའི་ཚོགས་གཙོ་ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས་དང་། སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་རྣམ་གཉིས་ཀྱིས། བཙན་བྱོལ་བོད་མི་རྣམས་ཀྱིས་བོད་ནང་གི་བོད་མི་རྣམས་ཀྱི་སེམས་མི་ཕམ་སླད། ཆོལ་ཁ་དང་ཆོས་ལུགས་དབྱེ་མེད་ཀྱིས་མཐུན་སྒྲིལ་དང་འཐབ་རྩོད་ཀྱི་ལས་དོན་གཉེར་དགོས་སྐོར་སོགས་གསུངས་སོང་། 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།