ཨ་ཧྥི་རི་ཁའི་རྒྱལ་ཁབ་དགུས་བསྡུས་པའི་དམག་འཁྲུག་དང་སི་རི་ཡའི་དམག་འཁྲུག དེ་བཞིན་འདས་པའི་མི་ལོ་བཞི་ལྷག་རིང་གོ་ལ་ཧྲིལ་པོར་བརྡབ་གསིག་གཏོང་བའི་ཨུ་ཡུ་གཉིས་ཀྱི་དམག་འཁྲུག་བཅས་ཀྱི་ཁྲོད་ཉུང་མཐར་མི་གྲངས་ས་ཡ་ ༤།༠༢ ལྷག་རྐྱེན་འདས་སུ་གྱུར་འདུག
དེ་རིང་ཡུ་ཁེ་རིན་གྱི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྟ་ཞིབ་ལས་དོན་ཚོགས་ཆུང་ (HRMMU) གིས་སྤེལ་བའི་གནས་ཚུལ་ལྟར་ན། འདི་ལོའི་ཕྱི་ཟླ་ ༦ པ་ནི་ཕྱི་ལོ་ ༢༠༢༢ ལོར་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱས་ནས་ད་བར་ཡུ་ཁེ་རིན་གྱི་མི་སེར་དམར་གསོད་གཏོང་བའི་གྲངས་འབོར་མང་ཤོས་དེ་གྱུར་ཡོད་ཅིང་། འདི་ལོའི་ཕྱི་ཟླ་ ༦ གཅིག་པུའི་ནང་ཨུ་རུ་སུས་ཡུ་ཁེ་རིན་གྱི་མི་སེར་ ༢༩༣ གཏོར་རྒོལ་གྱི་ཁྲོད་ནས་དམར་གསོད་བཏང་ཡོད་འདུག་ལ། ཕྱི་ལོ་ ༢༠༢༢ ལོ་ནས་ད་བར་ཨུ་རུ་སུས་ཉུང་མཐར་ཡུ་ཁེ་རིན་གྱི་མཐའ་སྲུང་དམག་མི་འབུམ་གཅིག་དང་ཁྲི་ལྔ་དང་། མི་སེར་ཕལ་མི་གཅིག་ཁྲི་དྲུག་སྟོང་ལྷག་དམར་གསོད་བཏང་ཡོད་པ་མ་ཟད། ཨུ་ཡུ་གཉིས་ཀྱི་དམག་འཁྲུག་ནི་དུས་རབས་ཉེར་གཅིག་པའི་འཛམ་གླིང་ལོ་རྒྱུས་ཁྲོད་ཀྱི་གོ་ལའི་སྲིད་འབྱོར་གཉིས་ལ་དོ་ཕོག་ཆེན་པོ་ཐེབས་པའི་གཡུལ་འགྱེད་ཅིག་ཏུའང་ངོས་འཛིན་བྱེད་ཀྱིན་འདུག
རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྟ་རྟོག་ལས་ཁུངས་ཀྱིས་བཏོན་པའི་གྲུབ་དོན་ལྟར་ན། འདི་ལོའི་ཕྱི་ཟླ་ ༦ ནང་ཨུ་རུ་སུས་ཡུ་ཁེ་རིན་གྱིས་མི་མང་ཕལ་བ་དམར་གསོད་གཏོང་བའི་བརྒྱ་ཆ་དེ། འདི་ལོའི་ཕྱི་ཟླ་ ༥ ནང་ཡུ་ཁེ་རིན་གྱི་མི་གྲངས་ ༢༨༢ དམར་གསོད་དང་། མི་གྲངས་ ༡༧༩༤ ལ་རྨས་སྐྱོན་ཕོག་པ་དང་བསྡུར་ན་བརྒྱ་ཆ་བཅུ་འཕར་འདུག་ལ། འདི་ལོའི་ཕྱི་ཟླ་ ༡ དང་ ༢ ལ་བསྡུར་ན་ལྡབ་གཉིས་ལྷག་འཕར་འདུག སྤྱིར་ཕྱི་ལོ་ ༢༠༢༦ གཅིག་པུའི་ནང་ཨུ་རུ་སུས་ཡུ་ཁེ་རིན་གྱི་མི་སེར་ཕལ་བ་གྲངས་ ༡༣༩༦ ལྷག་གཏོར་རྒོལ་གྱི་ཁྲོད་ནས་དམར་གསོད་བཏང་ཡོད་པས། ཕྱི་ལོ་ ༢༠༢༥ དང་བསྡུར་ན་བརྒྱ་ཆ་ ༣༧ འཕར་ཡོད་འདུག
གནད་དོན་དེ་དང་འབྲེལ་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྟ་རྟོག་ལས་ཁུངས་ཀྱི་མགོ་ཁྲིད་བྷེལ་ (Danielle Bell) ལགས་ཀྱིས། ཕྱི་ཟླ་ ༦ ནང་མི་སེར་ཕལ་བ་དམར་གསོད་དུ་བཏང་བའི་གྲངས་འབོར་འཕར་མུས་ཡིན་པ་ནི་སེམས་འཚབ་བྱ་དགོས་པའི་གནད་དོན་ཞིག་ཡིན་ལ། དམར་གསོད་དེ་དག་ནི་དྲག་པོའི་གོ་མཚོན་གྱིས་མི་གྲངས་མང་བའི་གྲོང་ཁྱེར་དེ་དག་ལ་གཏོར་རྒོལ་བྱེད་སྐབས་བྱུང་བ་ཞིག་ཡིན། དེ་ནི་གཙོ་བོ་ཨུ་རུ་སུས་ཡུ་ཁེ་རིན་གྱི་རྒྱལ་ས་ཀི་ཡིབ་ཚུད་པའི་ཌི་ནི་པོ་རོ་ (Dnipro)། ཨོ་ཌེ་ས་ (Odesa) ཡི་ཁང་བརྩེགས་དག་ལ་གཏོར་རྒོལ་བྱས་པ་ལས་བྱུང་བ་རེད། ཅེས་བརྗོད་འདུག
ཨ་ཧྥི་རི་ཁའི་དམག་འཁྲུག་ཆེན་མོ་དང་སི་རི་ཡའི་ཡོ་ལང་།
ཕྱི་ལོ་ ༡༩༩༨ ནས་ ༢༠༠༣ ལོ་བར་ཨ་ཧྥི་རི་ཁའི་ཀོང་གོ་རྒྱལ་ཁབ་ཏུ་བྱུང་བའི་དམག་འཁྲུག་ནི་དུས་རབས་ཉེར་གཅིག་པའི་འཛམ་གླིང་ལོ་རྒྱུས་ཁྲོད་ཀྱི་མི་གྲངས་ཆེས་མང་ཤོས་རྐྱེན་འདས་སུ་གྱུར་བའི་དམག་འཁྲུག་ཅིག་ཏུ་ངོས་འཛིན་བྱེད་མུས་ཡིན་པ་མ་ཟད་ཨ་ཧྥི་རི་ཁའི་དམག་འཁྲུག་ཆེན་མོ་ཞེས་ཡོངས་སུ་གྲགས། ཕྱི་ལོ་ ༡༩༩༧ ལོར་རྒྱལ་ཁབ་དེའི་ཆབ་སྲིད་ཚོགས་པ་གཉིས་ཀྱི་བར་ལྟ་བ་མ་མཐུན་པ་དང་དབང་ཆ་འཐབ་རྩོད་བྱས་མཐར། ཨ་ཧྥི་རི་ཁའི་རྒྱལ་ཁབ་བརྒྱད་ཀྱིས་ལག་པ་བསྲིངས་ནས་ཆབ་སྲིད་ཚོགས་པ་གཉིས་ཀྱི་རྒྱབ་རྟེན་དུ་ལངས་རེས་བྱས་ཏེ། ཨ་ཧྥི་རི་ཁའི་རྒྱལ་ཁབ་དགུས་བསྡུས་པའི་དམག་འཁྲུག་ཅིག་ཏུ་གྱུར་ནས། དམག་འཁྲུག་གི་ཁྲོད་དུ་དམར་གསོད་དང་། ནད་ཡམས། མུ་གེ་སོགས་རྐྱེན་དུ་བྱས་ནས་ཉུང་མཐར་ཡང་མི་གྲངས་ས་ཡ་ ༣ ལྷག་རྐྱེན་འདས་སུ་གྱུར།
སི་རི་ཡའི་ནང་ད་ལྟའང་དམར་གསོད་དོན་རྐྱེན་མང་དག་ཅིག་འབྱུང་མུས་ཡིན་པའི་ཁྲོད། ད་བར་ཉུང་མཐར་ཡུལ་དེའི་མི་གྲངས་འབུམ་ ༤།༧ ལྷག་རྐྱེན་འདས་སུ་གྱུར་ཡོད་སྟབས། དེ་ནི་དུས་རབས་ཉེར་གཅིག་པའི་འཛམ་གླིང་དམག་འཁྲུག་ཁྲོད་མི་གྲངས་རྐྱེན་འདས་སུ་གྱུར་བའི་གྲངས་འབོར་མང་ཤོས་གཉིས་པར་གྲགས། ཕྱི་ལོ་ ༢༠༡༡ ལོའི་ཕྱི་ཟླ་ ༣ ནང་དང་ཐོག་སི་རི་ཡའི་ཤར་ཕྱོགས་ཌེ་རཱ་ (Deraa) གྲོང་ཁྱེར་ནང་སློབ་ཕྲུག་ཁག་ཅིག་གིས་ཊོ་ནེ་ཤི་ཡ་དང་ཨེ་ཇེབ་གྱེན་ལངས་པའི་འབོད་ཚིག་སྟེ། མི་མང་ལ་དགོས་པ་ནི་ད་ལྟའི་གཞུང་མགོ་རྟིང་བསློག་དགོས། མི་མང་ལ་རང་དབང་དང་དམངས་གཙོ་དགོས་སོགས་ཀྱི་སྦྱར་ཡིག་བཀྲམ་སྟབས་གཞུང་དམག་གིས་སློབ་ཕྲུག་ ༡༥ ཙམ་འཛིན་བཟུང་བྱས་པར་ས་གནས་མང་ཚོགས་ཚོས་གཞུང་ལ་ངོ་རྒོལ་བྱས་རྐྱེན། ལོ་དེའི་ཕྱི་ཟླ་ ༣ ཚེས་ ༡༨ ཉིན་གྲོང་ཁྱེར་དེའི་མང་ཚོགས་མང་པོ་ཁྲོམ་གཞུང་དུ་ཐོན་ཏེ་གཞུང་གི་བྱ་སྤྱོད་ལ་ངོ་རྒོལ་ཁྲོམ་སྐོར་བྱས་པར་གཞུང་དམག་གིས་དྲག་གནོན་བྱས་པ་ནས་སི་རི་ཡའི་ཟིང་འཁྲུག་མགོ་ཚུགས་ཡོད། རྒྱལ་ཁབ་དེའི་གཞུང་འཛིན་ཚོགས་པ་དང་ཁ་གཏད་ཚོགས་པའི་བར་གདོང་ཐུག་དྲག་པོ་བྱུང་བ་དང་། ལྷག་པར་དམར་གསོད་ཀྱི་དོན་རྐྱེན་མང་དག་གཅིག་ཡང་དང་བསྐྱར་དུ་བྱུང་།
ད་ལྟའང་སི་རི་ཡ་ནི་འཛམ་གླིང་ནང་གི་སྐྱབས་བཅོལ་བ་དང་མི་ཆོས་རིང་ལུགས་ཀྱི་དཀའ་ངལ་ཆེ་ཤོས་ཀྱི་རྒྱལ་ཁབ་ཅིག་ཏུ་གྱུར་ཡོད། དམག་འཁྲུག་མ་བྱུང་གོང་གི་མི་འབོར་གྱི་བརྒྱ་ཆ་ ༦༠ ལྷག་ཙམ་གནས་སྤོ་བྱས་ཏེ། རྒྱལ་ཁབ་གཞན་དུ་འགྲོ་དགོས་བྱུང་བའི་སི་རི་ཡའི་མི་གྲངས་ས་ཡ་ ༦།༢ ལྷག་ཙམ་ལ་དཔལ་འབྱོར་གྱི་དཀའ་ངལ་དང་། ལས་ཀ་དང་སྡོད་ཁང་འཚོལ་བར་དཀའ་ངལ་ཕྲད་དང་འཕྲད་བཞིན་ཡོད་པ་མ་ཟད། ནང་ཁུལ་དུ་གནས་སྤོ་བྱས་པའི་སི་རི་ཡའི་མི་གྲངས་ས་ཡ་ ༧།༤ ལྷག་གི་ཁྲོད། མང་དག་ཅིག་སླར་ཡང་ས་གནས་གཞན་དང་གཞན་དུ་ཐེངས་མང་པོར་གནས་སྤོར་བྱ་དགོས་བྱུང་ཡོད་ཅིང་། འདས་ལོའི་ལོ་མགོར་མཉམ་འབྲེལ་རྒྱལ་ཚོགས་ཀྱིས་སི་རི་ཡར་གནས་སྡོད་བྱེད་མུས་ཡིན་པའི་མི་གྲངས་ས་ཡ་ ༡༦།༥ ཙམ་ལ་འགྲོ་བ་མིའི་ཐོབ་ཐང་གི་གཞི་རྩའི་ཐོབ་ཐང་གི་གནས་བབ་གཞིར་བཞག་གི་ཐོག་ནས་རོགས་རམ་གནང་།
ཨུ་ཡུ་གཉིས་ཀྱི་གཡུལ་འགྱེད་ཀྱི་འབྱུང་རྩ།
ཕྱི་ལོ་ ༢༠༢༢ ལོར་ཨུ་རུ་སུ་དང་ནུབ་གླིང་རྒྱལ་ཁབ་ཀྱི་མགོ་ཁྲིད་དབར་གྲོས་མོལ་རིམ་པ་བྱས་ཏེ་ཡུ་ཁེ་རིན་གྱི་དཀའ་རྙོག་སེལ་ཐབས་དང་། ཕྱོགས་གཉིས་ཀྱི་གནས་སྟངས་ཞི་འགྲིག་ཡོང་ཐབས་བྱས་ཡོད་ནའང་ལམ་ལྷོངས་མ་སོང་བར་ཨུ་རུ་སུས་ཡུ་ཁེ་རིན་གྱི་བྱང་ཕྱོགས་སུ་ཡོད་པའི་རང་གི་མཐུན་གྲོགས་རྒྱལ་ཁབ་བྷེ་ལེ་རུ་སི་ (Belarus) དང་། ཕྱི་ལོ་ ༢༠༡༤ ལོར་ཡུ་ཁེ་རིན་གྱི་ས་ནས་བཙན་འཕྲོག་བྱས་ཏེ་རང་ཁོངས་སུ་བཅུག་པའི་ཁེ་རེ་མི་ཡ་ (Crimea) ཁུལ་དུ་དཔུང་དམག་གྲ་སྒྲིག་བྱས་ཏེ་སེམས་འཚབ་ཀྱི་གནས་སུ་གྱུར་བར་བརྟེན། ཨ་རི་དང་རྒྱ་གར་སོགས་འཛམ་གླིང་རྒྱལ་ཁབ་ཕལ་ཆེ་བས་ཡུ་ཁེ་རིན་དུ་ཡོད་པའི་རང་གི་གཞུང་འབྲེལ་མི་སྣ་དང་མི་སེར་དཀྱུས་མ་རྣམས་ཕྱིར་ཐོན་དགོས་པའི་ལམ་སྟོན་བྱས་ཡོད་པ་རེད། ཕྱི་ལོ་ ༢༠༡༤ ཙམ་ནས་ཨུ་རུ་སུ་དང་ཡུ་ཁེ་རིན་གྱི་དཀའ་རྙོག་དེ་རྒྱལ་སྤྱིའི་དཀའ་རྙོག་ཅིག་ཏུ་གྱུར་ཏེ། ལོ་དེའི་ནང་ཧྥ་རན་སི་དང་འཇར་མ་ནི་གཉིས་ཀྱིས་གཟུ་དཔང་བྱས་ཏེ་ཡུ་ཁེ་རིན་དང་། ཨུ་རུ་སུ། ཡུ་རོབ་ཀྱི་བདེ་སྲུང་དང་མཉམ་ལས་སྒྲིག་འཛུགས་ (OSCE) དབར་ལ་མིན་སི་ཀི་གྲོས་ཆོད་ (Minsk Agreement) ཅེས་པའི་གྲོས་ཆོད་ཐེངས་གཉིས་བཞག་ཡོད་ནའང་། ཕྱོགས་གཉིས་ཀས་གྲོས་ཆོད་ཀྱི་དགོངས་དོན་རྡོག་རོལ་བཏང་བའི་རྐྱེན་གྱིས་ད་བར་ཡུ་ཁེ་རིན་གྱི་དཀའ་རྙོག་དེ་སེལ་ཐུབ་མེད་པ་རེད། ཕྱི་ལོ་ ༢༠༢༢ ལོའི་ཟླ་ ༢ ཚེས ༢༤ ཉིན་ཨུ་རུ་སུས་ཡུ་ཁེ་རིན་ལ་དངོས་སུ་བཙན་འཛུལ་བྱེད་མགོ་བཙུགས་ཏེ། ཡུལ་མི་བརྒྱ་ཆ་ ༣༦ ལྷག་ཁྱིམ་མཚེས་རྒྱལ་ཁབ་ཁག་ལ་དངོས་སུ་སྐྱབས་བཅོལ་དུ་འགྲོ་མགོ་བཙུགས།
ཕྱི་ལོ་ ༡༩༩༡ ལོར་ཨུ་རུ་སུ་མཉམ་འབྲེལ་དུམ་བུར་འཐོར་ཏེ་སྤྱི་མཐུན་རྒྱལ་ཁབ་གསར་པ་མང་པོར་གྱུར་ཡོད་ནའང་། དེ་དག་ཕལ་ཆེ་བ་ཨུ་རུ་སུའི་ཕྱོགས་སུ་མ་བསྡད་པར་ཡུ་རོབ་ཀྱི་ཕྱོགས་གཏོགས་ལྟ་བུར་གྱུར་བ་མ་ཟད། ཨུ་རུ་སུ་མཉམ་འབྲེལ་ནུབ་བརྒྱུད་རྒྱལ་ཕྲན་ཕལ་ཆེ་བ་ཡུ་རོབ་མཐུན་ཚོགས་ནང་ཞུགས་ཏེ། ཨུ་རུ་སུའི་ཤུགས་རྐྱེན་ཇེ་ཆུང་དང་ནུབ་གླིང་གི་ཤུགས་རྐྱེན་ཇེ་ཆེར་འགྲོ་བཞིན་པའི་སྐབས་དེར། ཨུ་རུ་སུས་ཡུ་ཁེ་རིན་རང་ཁོངས་སུ་བསྒྱུར་ཐབས་དང་། ནུབ་ཆིངས་སྒྲིག་འཛུགས་སོགས་སུ་ཞུགས་པར་འགོག་རྒོལ་སླད་འཐབ་རྒོལ་བྱས་ཡོད་ཅིང་། ཕྱི་ལོ་ ༢༠༠༢ དང་། ༢༠༠༨། ༢༠༡༧། ༢༠༡༩། དང་ ༢༠༢༢ བཅས་སུ་ཡུ་ཁེ་རིན་ནུབ་ཆིངས་སྒྲིག་འཛུགས་སུ་ཞུགས་པར་རེ་སྐུལ་ཞུས་ཡོད། ནེ་ཊོའམ་ནུབ་ཆིངས་སྒྲིག་འཛུགས་ (The North atlantic Treaty Organization) དེ་ཉིད་ཐོག་མར་འཛམ་གླིང་དམག་ཆེན་གཉིས་པ་མཇུག་བསྒྲིལ་རྗེས། ཕྱི་ལོ་ ༡༩༤༩ ལོར་ཨ་རི་གཙོས་པའི་རྒྱལ་ཁབ་ ༡༢ ཀྱིས་ཡུ་རོབ་གླིང་ཕྲན་ནང་ཨུ་རུ་སུའི་ཤུགས་རྐྱེན་ཟློག་ཐབས་ཀྱི་ཆེད་དུ་བཙུགས་པ་ཞིག་ཡིན་ཞིང་། ཚོགས་ཁོངས་རྒྱལ་ཁབ་ཅིག་ལ་དམག་གི་དཔུང་འཇུག་སླེབས་པའི་སྐབས་སྒྲིག་འཛུགས་ངོས་ནས་དེར་འཐབ་རོགས་དགོས་པའི་གན་རྒྱ་བཞག་ཡོད་པ་རེད། ད་ལྟའི་ཆར་ནུབ་ཆིངས་སྒྲིག་འཛུགས་འདིའི་ནང་ཚོགས་ཁོངས་རྒྱལ་ཁབ་ ༣༢ ཡོད།
འདས་པའི་མི་ལོ་བཞི་ལྷག་གི་རིང་ལ་ཨུ་རུ་སུ་ཡུ་ཁེ་རིན་ལ་བཙན་འཛུལ་བྱས་ཏེ། ད་བར་ཉུང་མཐར་ཨུ་རུ་སུའི་དམག་མི་འབུམ་བཞི་ནས་ལྔ་བར་རྐྱེན་འདས་དང་། མི་གྲངས་ས་ཡ་ ༡།༤ ལྷག་ལ་རྨས་སྐྱོན་ཕོག་ཡོད་འདུག ཡུ་ཁེ་རིན་གྱི་དམག་མི་ཉུང་མཐར་མི་གྲངས་འབུམ་ ༡།༥ དང་མི་གྲངས་འབུམ་ ༦ ཙམ་ལ་རྨས་སྐྱོན་ཚབས་ཆེན་ཕོག་ཡོད་འདུག
ཡུ་ཁེ་རིན་གྱི་སྐྱབས་བཅོལ་བའི་གྲངས་འབོར་དང་གནས་བབ།
ཕྱི་ལོ་ ༢༠༢༢ ལོར་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱས་རྗེས། འདས་པའི་མི་ལོ་བཞི་ལྷག་རིང་ཡུ་ཁེ་རིན་གྱི་གོད་ཆག་དང་། བཙན་འཛུལ་སོགས་ཀྱི་དབང་གིས་ཡུ་རོབ་ཀྱི་རྒྱལ་ཁབ་ཆེ་ཤོས་གཉིས་པར་གྲགས་པའི་ཡུ་ཁེ་རིན་གྱི་མི་སེར་གྲངས་ས་ཡ་ ༥ ལྷག་ཁྱིམ་མཚེས་རྒྱལ་ཁབ་ལ་སྐྱབས་བཅོལ་དུ་ཕྱིན་ཡོད་པའི་ཁར། ཉུང་མཐར་མི་གྲངས་ས་ཡ་ ༣།༧ ལྷག་ས་གནས་གཞན་དང་གཞན་དུ་གནས་སྤོར་བྱ་དགོས་ཁེལ་ཡོད། ལྷག་པར་ཡུ་ཁེ་རིན་གྱི་ཡུལ་མི་མང་དག་ཅིག་གནས་སྤོར་དང་གཡུལ་འགྱེད་ཀྱི་གོད་ཆག་ཐེབས་པའི་དབང་གིས། ཡུ་ཁེ་རིན་གྱི་མི་རབས་གཞོན་པ་མང་དག་ཅིག་གི་སྤྱི་ཚོགས་དང་སེམས་ཁམས་ལ་གནོད་འཚེ་ཤུགས་ཆེན་ཐེབས་ཡོད་པའི་ཁྲོད། ཡུ་ཁེ་རིན་གྱི་བྱིས་པ་བརྒྱ་ཆ་ཉེར་ལྔ་ཙམ་སློབ་གྲྭར་བསྐྱོད་ཐུབ་མེད་པའི་ཁར། ཁག་ཅིག་གིས་ཨུ་རུ་སུའི་བཙན་འཛུལ་གྱི་དབང་གིས་སློབ་གྲྭ་བསྐྱོད་ཐུབ་མེད་ལ། ཕ་མ་ཕལ་མོ་ཆེས་རང་གི་མིག་མདུན་ན་བྱིས་པ་ཉར་ཚགས་བྱས་པ་དེ་བདེ་འཇགས་ཆེ་ཤོས་སུ་ངོས་འཛིན་བྱས་ཏེ། བྱིས་པ་རྣམས་རང་རང་གི་ཉེ་འཁྲིས་སུ་བདག་ཉར་བྱེད་མུས་ཡིན་ཡང་། མི་ལོ་གསུམ་ལྷག་གི་འཐབ་རྩོད་ཀྱི་དབང་གིས་བྱིས་པ་མང་དག་ཅིག་ལ་འཇིགས་ཞུམ་དང་དངངས་སྐྲག་གི་ན་ཚ་ཕོག་ཡོད་པ་མ་ཟད། སེམས་སུ་ན་ཟུག་དང་སྔར་མེད་ཀྱི་རྨ་ཁ་ཆེན་པོ་ཞིག་ཆགས། རྒྱལ་སྤྱིའི་སྐྱབས་བཅོལ་བའི་ཆེས་མཐོ་ལྷན་ཚོགས་ཀྱིས་ཤེས་རྟོགས་བྱུང་བ་ལྟར་ན། ཡུ་ཁེ་རིན་མི་གྲངས་ཀྱི་ཁྱིམ་ཚང་བརྒྱ་ཆ་ ༦༣ ལ་དམག་འཁྲུག་གི་དབང་གིས་སེམས་ཁམས་འཕྲོད་བསྟེན་གྱི་དཀའ་ངལ་འཕྲད་པའི་ཁྲོད། ཉུང་མཐར་ཡང་བྱིས་པ་གྲངས་ས་ཡ་ ༡།༥ ལ་ཡིད་ཞུམ་གྱི་ན་ཚ་ཕོག་ཡོད་འདུག
ད་ལྟ་ཡུ་རོབ་རྒྱལ་ཁབ་ཁག་ཅིག་དང་། ཨ་རི། ཁེ་ན་ཌ་སོགས་ཀྱི་ཡུ་ཁེ་རིན་གྱི་མི་སེར་རྣམས་སྐྱབས་བཅོལ་དུ་བླངས་དང་ལེན་མུས་ཡིན་པ་ལྟར། ད་ལྟ་ཡུ་རོབ་ཀྱི་འཇར་མན་རྒྱལ་ཁབ་ཏུ་ཡུ་ཁེ་རིན་གྱི་སྐྱབས་བཅོལ་བ་ཉུང་མཐར་མི་གྲངས་ས་ཡ་ ༡།༢ ལྷག་དང་། པོ་ལེན་ཌི་ལ་ས་ཡ་གཅིག་ལྷག ཅེག་སྤྱི་མཐུན་རྒྱལ་ཁབ་ལ་འབུམ་བཞི་ལྷག མལ་དྷོ་བ་(Moldova) རྒྱལ་ཁབ་ལ་ཉུང་མཐར་མི་གྲངས་འབུམ་ ༣།༦ ལྷག་དང་། དེ་བཞིན་ཡུ་རོབ་ཀྱི་རྒྱལ་ཁབ་གཞན་དང་། ཨ་རི། ཁེ་ན་ཌ་སོགས་ལ་སྐྱབས་བཅོལ་བ་མི་ཉུང་བ་ཞིག་ཡོད་པ་རེད།
གསར་འགོད་པ། དཔལ་ལྡན།
