སྤྱི་འཐུས་ཚོགས་གཞོན་མཆོག་དང་འཛམ་གླིང་ས་ཕྱོགས་གང་སར་བཞུགས་པའི་བོད་མི་རྣམས་ཀྱིས་བོད་རང་བཙན་འཐབ་རྩོད་པ་བློ་དགའ་ལགས་སྐུ་གྲོངས་ནས་བདུན་ཚིགས་གཉིས་འཁོར་བར་རྣམ་པ་འདྲ་མིན་གྱི་ཐོག་ནས་མྱ་ངན་རྗེས་དྲན་ཞུ་བཞིན་འདུག
དེ་རིང་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་སྒེར་གྱི་ཨེག་སི་སྤྱི་ཚོགས་བརྒྱུད་ལམ་གྱི་སྟེང་དུ། བོད་ཀྱི་རང་བཙན་འཐབ་རྩོད་པ་བློ་དགའ་ལགས་སྐུ་གྲོངས་ནས་བདུན་ཚིགས་གཉིས་འཁོར་བ་དང་བསྟུན་གདུང་སེམས་མཉམ་སྐྱེད་ཀྱི་གསུང་འཕྲིན་ཞིག་ཕུལ་འདུག་ལ། གསུང་འཕྲིན་གྱི་ནང་དུ་རང་བཙན་བློ་དགའ་ལགས་ཀྱིས་ནེའུ་ཡོག་ཏུ་ཡོད་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་རྒྱ་ནག་གཞུང་གིས་བོད་ནང་དུ་ལག་བསྟར་བྱེད་བཞིན་པའི་སྲིད་ཇུས་ཁག་ལ་ངོ་རྒོལ་གྱིས་རང་ལུས་མེར་བསྲེགས་ཏེ་བདུན་ཚིགས་གཉིས་པ་འཁོར་ཡོད། ཁོང་གི་སྙིང་སྟོབས་ནམ་ཡང་བརྗེད་མི་རུང་ལ། ནམ་ཞིག་བོད་ཀྱི་སྐད་ཡིག་དང་རིག་གཞུང་། ཆོས་ལུགས་སོགས་སྲུང་སྐྱོབ་བྱས་པའི་ཐོག་ནས་རང་དབང་དང་ཆེ་མཐོང་ལྡན་པའི་ངང་འཚོ་གནས་ཐུབ་པའི་སྨོན་འདུན་ཞུ་ཞེས་གསུངས་འདུག
དེ་བཞིན། རང་བཙན་བློ་དགའ་ལགས་ཀྱི་བདུན་ཚིགས་གཉིས་པ་དང་བསྟུན། ཐེ་ཝན་གྱི་རྒྱལ་ས་ཐེ་པེའི་རང་དབང་མདུན་ཐང་དུ། བོད་མི་ལས་འགུལ་བ་དང་ཐེ་ཝན་གྱི་བོད་དོན་རྒྱབ་སྐྱོར་བ། འགྲོ་བ་མིའི་ཐོབ་ཐང་རྩོད་ལེན་པ། དགེ་འདུན་པ་སོགས་མི་གྲངས་ ༣༠༠ ཙམ་འདུ་འཛོམས་ཀྱིས་རང་བཙན་བློ་དགའ་ལགས་སུ་མར་མེ་མཆོད་འབུལ་གྱི་ལམ་ནས་མྱ་ངན་ཞུས་པ་དང་སྦྲགས། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཟེར་བར་ངོ་རྒོལ་ལས་འགུལ་སྤེལ་ཡོད་འདུག
ངོ་རྒོལ་ལས་འགུལ་དེར་མཉམ་ཞུགས་གནང་མཁན་ཊའེ་སི་ཁྲན་ལགས་ཀྱིས། ཐེ་ཝན་དང་བོད། ཧོང་ཀོང་། ཤར་ཊུ་ཀི་སི་ཐན་བཅས་ལ་དུས་ཡུན་རིང་པོར་ཧ་ཅང་གདུག་རྩུབ་ཅན་གྱི་རྒྱ་ནག་གི་འཇིགས་སྐུལ་གྱི་དཀའ་ཕྲད་དང་འཕྲད་མུས་ཡིན། རང་བཙན་བློ་དགའ་ལགས་ཀྱི་དོན་རྐྱེན་འདི་ཕྱིའི་ཁག་ཏུ་བྱུང་ཡོད་ནའང་། ང་ཚོ་ཚང་མར་འཕྲད་བཞིན་པའི་ཉེན་ཁ་ནི་གཞི་རྩའི་ཆ་ནས་གཅིག་མཚུངས་རེད་བསམ་གྱི་ཡོད། དེར་བརྟེན། ངས་ཁོང་ལ་གདུང་སེམས་མཉམ་སྐྱེད་ཞུ་རྒྱུ་ཡིན་ཞེས་བརྗོད་འདུག ད་དུང་སྐབས་དེར་ཐེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས། རང་བཙན་བློ་དགའ་ལགས་ཀྱིས་རང་ཉིད་ཀྱི་ལུས་པོ་གཅིག་པུ་མེར་བསྲེགས་ཡོད། འོན་ཀྱང་། ཁོང་གིས་གསལ་འདོན་བྱས་པ་ནི་ལོ་ངོ་ ༧༠ ལྷག་གི་རིང་བོད་དེ་རྒྱ་ནག་དབང་སྒྱུར་འོག་ནས་ཐར་མ་ཐུབ་པའི་མུན་ནག་དེ་རེད། ཅེས་བརྗོད་འདུག
Photo: Tu Chien-rong, Taipei Times
ཡང་ཨ་རིའི་ནེའུ་ཡོག་དང་ནེའུ་ཇར་སི་དང་ཁེ་ན་ཌའི་གངས་ལྗོངས་ཆོས་ལྡན་གླིང་བོད་རིགས་སྤྱི་མཐུན་ཚོགས་པ་སོགས་ཀྱིས། རང་བཙན་བློ་དགའ་ལགས་ཀྱི་བདུན་ཚིགས་གཉིས་པར་རྗེས་དྲན་མཚོད་སླད་མཆོད་འབུལ་སྨོན་ལམ་འཚོགས་ཟིན་ཞིང་། དེ་རིང་ཉིན་རྒྱབ་ཆུ་ཚོད་ ༣།༣༠ སྟེང་ཐེག་ཆེན་ཆོས་གླིང་གཙུག་ལག་ཁང་དུ་བཞུགས་སྒར་ཁུལ་གྱི་བོད་མིའི་ལམ་ཁྲོམ་ཚོགས་པའི་གོ་སྒྲིག་འོག རྣམ་རྒྱལ་གྲྭ་ཚང་གི་དགེ་འདུན་པ་རྣམས་དབུ་བཞུགས་ཐོག་རང་བཙན་བློ་དགའ་ལགས་ཀྱི་བདུན་ཚིགས་གཉིས་པར་མྱ་ངན་དང་གདུང་སེམས་མཉམ་སྐྱེད་མཚོད་སླད་མཆོད་འབུལ་སྨོན་ལམ་འཚོག་རྒྱུ་ཡིན་པའི་གསལ་བསྒྲགས་སྤེལ་འདུག
དགུང་གྲངས་ ༥༢ ཡིན་པའི་རང་བཙན་བློ་དགའ་འམ་དངོས་མིང་ལ་བློ་བཟང་དཔལ་ལྡན་ལགས་ཀྱིས་ཟླ་འདིའི་ཕྱི་ཚེས་ ༢ ཉིན་ནེའུ་ཡོག་ཏུ་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་རྒྱ་གཞུང་གི་བོད་ཐོག་འཛིན་པའི་སྲིད་ཇུས་ཁག་ལ་ངོ་རྒོལ་གྱིས་རང་ལུས་མེར་བསྲེགས་གནང་ཡོད། ཁོང་གིས་ཤུལ་ལུས་བོད་མི་ཡོངས་ལ་ཁ་ཆེམས་བཞག་པའི་ནང་། བོད་ནང་གི་བོད་མི་ཚོར་འགྲོ་བ་མིའི་གཞི་རྩའི་ཐོབ་ཐང་དང་རང་དབང་སོགས་གང་ཡང་མེད་པ་ནི་བོད་རང་བཙན་ཤོར་བའི་རྒྱུ་མཚན་ཡིན་པར་བརྟེན་བོད་རང་བཙན་རྩོད་དགོས་པ། བཙན་བྱོལ་གཞུང་མང་གི་བོད་མི་ཡོངས་ནས་ཆོལ་གསུམ་དབྱེ་བ་མེད་པར་ནང་ཁུལ་མཐུན་སྒྲིལ་བགྱིས་ཏེ་བོད་མི་རིགས་ཀྱི་འཐབ་རྩོད་རྒྱུན་སྐྱོང་བྱེད་དགོས་པ། མ་འོངས་པའི་བོད་རྒྱལ་ཁབ་སླར་གསོ་དགོས་པ་སོགས་གསུངས་ཡོད།
གསར་འགོད་པ། སྐལ་བཟང་སྦྱིན་པ།
