དཀར་མཛེས་ཁུལ་སྐྱེ་ཁམས་ཁོར་ཡུག་ཚན་པའི་འགན་འཛིན་ཟུར་བ་དཀོན་མཆོག་གིས་རྒྱ་ནག་དམར་ཤོག་ཚོགས་པར་བཟུང་པའི་བསམ་འདུན་ཉམས་པ་སོགས་ཀྱི་དབང་གིས་རྒྱ་ནག་དམར་ཤོག་ཚོགས་པའི་སྐྱིད་སྡུག་ཟེར་བ་ནས་ཕྱིར་ཕུད་བྱས་ཏེ་ཞིབ་བཤེར་བྱེད་མུས་ཡིན་འདུག
ཉེ་ལམ་དཀར་མཛེས་ཁུལ་གྱི་རྒྱ་ནག་དམར་ཤོག་ཚོགས་པའི་ལྟ་ཞིབ་ཨུ་ཡོན་ལྷན་ཁང་གི་རྒྱུན་ལས་ཨུ་ཡོན་ལྷན་ཚོགས་ཟེར་བའི་ཞིབ་དཔྱོད་བརྒྱུད། དཀར་མཛེས་ཁུལ་སྐྱེ་ཁམས་ཁོར་ཡུག་ཚན་པའི་འགན་འཛིན་ཟུར་བ་དཀོན་མཆོག་གིས། རྒྱ་ནག་དམར་ཤོག་ཚོགས་པར་བཟུང་བའི་བསམ་འདུན་ཉམས་པ་དང་། ཁྲིམས་ལུགས་འགལ་བ། དེ་བཞིན་རྒྱ་ནག་དམར་ཤོག་ཚོགས་པའི་ཚོགས་ཆེན་ཐེངས་བཅོ་བརྒྱད་རྗེས་སུ་དམར་ཤོག་ལ་བཟུང་བའི་ཀུན་སློང་གཙང་མ་མིན་ལུགས་སོགས་བཤད་ནས། ཁོང་གི་རྒྱུ་དངོས་གཞུང་བཞེས་དང་ཏང་གི་སྐྱིད་སྡུག་ཟེར་བ་ནས་ཕྱིར་ཕུད་བྱས་ཏེ་ཞིབ་བཤེར་བྱེད་མུས་ཡིན་འདུག
རྒྱ་ནག་གཞུང་འབྲེལ་གསར་ལམ་ཁག་ལྟར་ན། བོད་མི་དཀོན་མཆོག་ཟེར་བས་རྒྱ་ནག་དམར་ཤོག་ཚོགས་པར་ལས་དོན་གཉེར་སྐབས། ཏང་གི་སྒྲིག་ཁྲིམས་ཟེར་བ་དང་རྒྱལ་ཁབ་ཀྱི་ཁྲིམས་སྲོལ་ཟེར་བར་སྒྲིག་འགལ་དང་། ལས་རིགས་དང་འབྲེལ་ནས་ཉེས་པ་བསགས་པ། དམར་ཤོག་ཚོགས་པར་བཟུང་བའི་ལྟ་བ་དང་ཡིད་ཆེས་བརླགས་པ། ཐོག་མའི་བསམ་འདུན་ཟེར་བ་ཞིག་ལས་འགལ་ནས་གོ་གནས་བེད་སྤྱད་དེ་ཁྲིམས་འགལ་གྱིས་རྒྱུ་དངོས་དང་ལེགས་སྐྱེས་བླངས་པ་སོགས་ཀྱི་དབང་གིས། རྒྱ་ནག་དམར་ཤོག་ཚོགས་པའི་ཚོགས་མི་ཟེར་བ་དག་ལ་མིག་དཔེ་ངན་པ་བསྟན་པས་ཉེས་ཆད་ནན་མོ་བཅད་ནས། ཏག་གི་སྐྱིད་སྡུག་ཟེར་བ་ནས་ཕྱིར་ཕུད་དང་། རྒྱུ་དངོས་གཞུང་བཞེས། དེ་བཞིན་ཁོང་གི་འབྲེལ་ཡོད་སོགས་ལའང་ཞིབ་དཔྱོད་བྱ་རྒྱུ་ཡིན་ལུགས་བསྒྲགས་འདུག
དཀོན་མཆོག་ནི་ཕྱི་ལོ་ ༡༩༦༤ ལོའི་ཟླ་ ༤ ནང་ཟི་ཁྲོན་ཞིང་ཆེན་འདབ་པ་རྫོང་དུ་སྐྱེས་ཤིང་། ཞིང་ཆེན་གྱི་རྒྱ་ནག་དམར་ཤོག་ཚོགས་པའི་སློབ་གྲྭ་ནས་སློབ་སྦྱོང་བྱས་ཏེ། ཕྱི་ལོ་ ༡༩༨༤ ནས་ ༡༩༩༡ བར་འདབ་པ་རྫོང་གི་སྡོམ་རྩིས་ལས་ཁུངས་དང་ནགས་ལས་ལས་ཁུངས་སུ་ལས་ཀ་གཉེར། ཕྱི་ལོ་ ༡༩༩༡ ནས་ ༢༠༠༡ བར་འདབ་པ་རྫོང་གི་ནགས་ལས་ལས་ཁུངས་ཀྱི་འགན་འཛིན་དང་འགན་འཛིན་གཞོན་པ། དེ་བཞིན་རྫོང་སྲིད་གཞུང་གི་རྫོང་དཔོན་གཞོན་པ། འདབ་པ་རྫོང་གི་རྒྱ་ནག་དམར་ཤོག་ཚོགས་པའི་ཚོགས་གཙོ་སོགས་བྱས་ཏེ། ཕྱི་ལོ་ ༡༩༩༢ ལོར་རྒྱ་ནག་དམར་ཤོག་ཚོགས་པར་ཞུགས། ཕྱི་ལོ་ ༢༠༠༡ ནས ༢༠༢༦ བར་འབབ་ཐང་རྫོང་གི་དམར་ཤོག་ཚོགས་པའི་རྒྱུན་ལས་དང་རྫོང་དཔོན་གཞོན་པ། དེ་བཞིན་ཉག་རོང་རྫོང་གི་དམར་ཤོག་ཚོགས་པའི་མགོ་ཁྲིད་སོགས་བྱས། ཕྱི་ལོ་ ༢༠༡༦ ནས་ ༢༠༢༤ བར་དཀར་མཛེས་ཁུལ་གྱི་དམར་ཤོག་ཚོགས་པའི་དྲུང་ཡིག་ཆེན་མོ་གཞོན་པ་དང་། དཀར་མཛེས་ཁུལ་ཁོར་ཡུག་སྲུང་སྐྱོབ་ཚན་པའི་མགོ་ཁྲིད། དཀར་མཛེས་ཁུལ་སྐྱེ་ཁམས་ཁོར་ཡུག་གི་འགན་འཛིན། དཀར་མཛེས་ཁུལ་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་རིམ་པ་དང་པོའི་ཞིབ་འཇུག་པ་བཅས་ཡིན་འདུག
བོད་རིགས་གཙོས་མི་སྒེར་སུ་ཞིག་རྒྱ་ནག་དམར་ཤོགས་ཚོགས་པའི་སྐྱིད་སྡུག་ཟེར་བར་ཞུགས་སྐབས། རང་མོས་ཐོག་ཀྲུང་གོའི་གུང་ཁྲན་ཏང་ནང་དུ་ཞུགས་ཏེ། ཏང་གི་རྩ་འཛིན་ལ་བརྩི་བཀུར་དང༌། ཏང་གི་སྒྲིག་ཡིག་བརྩི་སྲུང་། ཏང་ཡོན་གྱི་འོས་འགན་ལེགས་འགྲུབ། ཏང་གི་ཆོད་དོན་ལག་བསྟར། ཏང་གི་སྒྲིག་ཁྲིམས་ནན་སྲུང་། ཏང་གི་གསང་དོན་དམ་སྲུང༌། ཏང་ལ་བློ་དཀར་ཟོལ་མེད། ལས་སྒྲུབ་ཧུར་ཐག་བཅས་བྱས་ནས། གུང་ཁྲན་རིང་ལུགས་ཀྱི་དོན་དུ་ཚེ་གང་འབད་འཐབ་དང༌། དུས་དང་རྣམ་པ་ཀུན་ཏུ་ཏང་དང་མི་དམངས་ཀྱི་དོན་དུ་རང་ཉིད་ཀྱི་ཡོད་དགུ་བློས་གཏང་རྒྱུའི་གྲ་སྒྲིག་བྱེད་ཅིང༌། དུས་ནམ་ཡང་ཏང་ལ་རྒྱབ་གཏོད་མི་བྱེད། ཅེས་པ་སོགས་ཀྱི་དམ་བཅའ་འཇོག་དགོས་པས། ད་ལྟ་བོད་ནང་གི་རྒྱ་ནག་གཞུང་གི་ལས་བྱེད་མང་པོ་ཞིག་ཆོས་ཕྱོགས་ཀྱི་བྱེད་སྒོར་ཞུགས་མི་ཆོག་པ་མ་ཟད། རང་གི་ནང་མི་ཞིག་འདས་གྲོངས་སུ་གྱུར་ཀྱང་བདུན་ཚིགས་དང་འདས་མཆོད་སྐབས་སུ་མཉམ་ཞུགས་བྱེད་ཆོག་གི་མེད་པའི་ཁར། མཐའ་ན་ཕུང་པོ་མེར་སྲེག་གམ་དགོན་པ་སོགས་སུ་དུར་ལས་བྱེད་སྐབས་ཀྱང་མཉམ་ཞུགས་བྱ་ཆོག་གི་མེད་སྟབས། བོད་རིགས་ལས་བྱེད་རྣམས་ལ་ཕྱོགས་མང་པོ་ཞིག་ནས་ལུས་སེམས་ཀྱི་ཐོག་དཀའ་ངལ་མི་ཉུང་བ་ཞིག་འཕྲད་ཀྱིན་ཡོད།
ཕྱི་ལོ་ ༢༠༡༢ ཙམ་རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་རྒྱ་ནག་དམར་ཤོག་གི་ལངས་ཕྱོགས་དང་མི་མཐུན་པའི་ལྟ་སྤྱོད་ཅན་དང་། བཙན་བཟུང་འོག་ཡོད་པའི་གྲངས་ཉུང་མི་རིགས་ཁག་གི་དཔོན་རིགས་ཚོར་སྟག་དང་སྦྲང་མ་ལེབ་རྡུང་གི་སྲིད་ཇུས་འོག་ནས། ཞིབ་བཤེར་དང་བཙོན་འཇུག་ཁྲིམས་ཐག་གཅོད་ཀྱིན་ཡོད་པ་ལྟར། འདི་ལོའི་ཕྱི་ཟླ་ ༥ ནང་བོད་རང་སྐྱོང་ལྗོངས་ཟེར་བའི་ལྷ་ས་གྲོང་ཁྱེར་གྱི་སྤྱི་ཁྱབ་གཞོན་པ་དགྲ་འདུལ་དང་། གཞིས་རྩེ་གྲོང་ཁྱེར་ཁང་དམར་རྫོང་གི་རྫོང་དཔོན་ཀྲུའུ་ཐའོ། ཆབ་མདོ་གྲོང་ཁྱེར་མི་དམངས་སྲིད་གཞུང་གི་དྲུང་ཆེ་གཞོན་པ་ཕུར་བཀྲ་བཅས་ཀྱིས་ཁྲིམས་འགལ་ཚབས་ཆེན་བྱས་ཡོད་པའི་དོགས་གཞིའི་འོག་ཞིབ་བཤེར་བྱེད་མགོ་བཙུགས་ཡོད་པའི་མུར། ཟླ་སྔ་མར་རྒྱ་ནག་གི་ཁྲུང་ཆིང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་དང་པོ་ཟེར་བས་རྒྱལ་ཡོངས་སྲིད་གྲོས་སྐབས་བཅུ་བཞི་པའི་རྒྱུན་ལས་ཟུར་བ་དང་། བོད་རང་སྐྱོང་ལྗོངས་སྲིད་གཞུང་ཟེར་བའི་མགོ་འཁྲིད་ཟུར་བ་ཆེ་དགྲ་ལྷས་ལྐོག་རྔན་བླངས་པའི་དབང་གིས། ཚེ་བཙོན་གྱི་ཉེས་ཆད་བཅད་པ་དང་ཚེ་གང་ཆབ་སྲིད་ཀྱི་དབང་ཆ་ཕྲོགས།
གནད་དོན་དབྱེ་ཞིབ་པ་མང་པོས། སྟག་དང་སྦྲང་མ་ལེབ་རྡུང་བྱས་པའི་འགུལ་སྐྱོད་ཆེན་མོ་དེ་ནི་ཞི་ཅིན་ཕིན་གྱི་ཆབ་སྲིད་ཤོག་ཁག་གི་དབང་ཆ་བརྟན་སྲུང་གི་གཡུལ་འགྱེད་ཆེན་མོ་ཞིག་ཏུ་ངོས་འཛིན་བྱེད་ཀྱི་ཡོད་ལ། གཡུལ་འགྱེད་དེའི་ཁྲོད་དབུས་གཞུང་གི་གཏན་འབེབས་དོན་ཚན་བརྒྱད་དང་འགལ་བ། རྒྱལ་ཁབ་ལ་བློ་མི་དཀར་བ། དྲིན་ལན་ལོག་འཇལ། དད་སེམས་ཉམས་པ། ཕུགས་འདུན་བརླག་པ་སོགས་ཀྱི་ཉེས་མིང་ཚུད་ཡོད་པ་མ་ཟད། ལྐོག་རྔན་བླངས་བ་དང་ལྐོག་ཟ་རུལ་སུངས་བྱས་པ། སྤྱི་ཚོགས་བརྟན་ལྷིངས་ལ་གནོད་སྐྱོན་བཟོས་པ་དང་རྒྱལ་ཁབ་ཁ་བྲལ་གཏོང་ཐབས་བྱས་པ་ཟེར་བའི་ཉེས་མིང་དེ་དག་དམར་ཤོག་གི་ལྟ་བར་འདོད་མོས་མེད་མཁན་གྱི་ཤེས་ཡོན་པའི་སྡེ་དང་ཁོར་ཡུག་སྲུང་སྐྱོབ་པ། འགྲོ་བ་མིའི་ཐོབ་ཐང་འཐབ་རྩོད་པ་སོགས་ལ་མང་དུ་གཡོགས་ཏེ་ཚར་གཅོད་བྱས་དང་བྱེད་མུས་ཡིན།
གསར་འགོད་པ། དཔལ་ལྡན།
