མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་བཅའ་ཁྲིམས་ཟེར་བ་ལག་བསྟར་དང་དྲིལ་བསྒྲགས་ཀྱི་ཚ་རླབས།
ཟླ་འདིའི་ཕྱི་ཚེས་ ༥ ཉིན་བོད་ཀྱི་རྒྱལ་ས་ལྷ་སར་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་ཟེར་བར་སློབ་སྦྱོང་དང་། དྲིལ་བསྒྲགས། ལག་བསྟར་བྱེད་པའི་བཞུགས་མོལ་ཚོགས་འདུ་ཞིག་འཚོགས་ཡོད་ཅིང་། ཚོགས་འདུ་དེའི་ཐོག་རྒྱ་ནག་གཞུང་གིས་བོད་ནང་མི་རིགས་མཐུན་སྒྲིལ་ཡར་སྐུལ་ཟེར་བའི་བཅའ་ཁྲིམས་ཀྱི་ནུས་པ་ཐོན་པར་སྐུལ་འདེད་དང་། བོད་ཁུལ་ཡོངས་ཀྱི་མི་མང་ཕལ་བའི་སྤྱི་ཚོགས་ཁྲོད་ལག་བསྟར་བྱེད་སྟངས། དེ་བཞིན་བཅའ་ཁྲིམས་དེ་དྲིལ་བསྒྲགས་དང་། ལག་བསྟར་གྱི་ལས་དོན་སྤེལ་རིང་། ལག་ལེན་གྱི་ཚད་གཞི་དམ་པོར་སྲུང་བ་ཟེར་བ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་པར་དམིགས་པ། ཁྲིམས་ལྟར་བཅོས་སྐྱོང་གི་གཞི་རྩའི་ཚད་གཞི་བརྟན་པོ་ཟེར་བ་ཞིག་སྲུང་ནས། དམངས་སེམས་གཅིག་སྒྲིལ་དང་མཉམ་ཤུགས་གཅིག་སྡུད་བྱ་དགོས་ལུགས་ཀྱི་ཐད་དྲིལ་བསྒྲགས་དང་གླེང་སློང་ཤུགས་ཆེན་བྱས་འདུག
ཟླ་འདིའི་ཕྱི་ཚེས་ ༥ ནས་ ༧ བར་ཉིན་གྲངས་གསུམ་རིང་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཝང་ཅུན་ཀྲེན་གྱིས་བོད་གཞིས་རྩེ་གྲོང་ཁྱེར་དང་། རྒྱལ་རྩེ་རྫོང་། པ་སྣམ་རྫོང་། བསམ་གྲུབ་རྩེ་ཁུལ་སོགས་སུ་ལྟ་སྐོར་དང་བརྟག་ཞིབ་བྱས་ཡོད་ཅིང་། སྐབས་དེར་ཁོས། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཟེར་བ་ཟབ་ཏུ་གཏོང་བ་དང་ཀྲུང་ཧྭ་མི་རིགས་གཅིག་མཐུན་ཚོགས་པ་ཟེར་བ་འཛུགས་བར་སྐུལ་འདེད་བྱས་ཏེ། ཕྱི་ལོ་ ༡༩༤༩ གོང་གི་བོད་ཀྱི་གནས་སྟངས་དང་རྒྱ་ནག་གཞུང་གིས་བོད་ས་བཙན་འཛུལ་རྗེས་ཀྱི་འཛུགས་སྐྲུན་གཉིས་གཤིབ་སྡུར་བྱས་ཏེ། པར་རིས་ལམ་ནས་ལོ་ཆུང་བྱིས་པ་རྣམས་ལ་བསྟན་ཏེ་སློབ་གསོ་ཟེར་བ་ཞིག་སྤྲད་དགོས་ལུགས་དང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་བཅའ་ཁྲིམས་ཟེར་བའི་དགོས་དམིགས་བཞིན། མི་རིགས་ཁག་བར་འགྲོ་འོང་དང་། སྤེལ་རེས། མཉམ་འདྲེས་བཅས་ལ་སྐུལ་འདེད་གཏང་དགོས་ལུགས་དང་། བོད་རང་སྐྱོང་ལྗོངས་ཟེར་བའི་རྫོང་ཁག་དེ་དག་ཏུ་གསར་བརྗེའི་ཁྲག་རྒྱུན་ཟེར་བ་ཞིག་རྒྱུན་འཛིན་བགྱིས་ཏེ་སློབ་སྦྱོང་བྱ་དགོས་ལུགས་སོགས་ནན་བརྗོད་བྱས་འདུག
ཟླ་འདིའི་ཕྱི་ཚེས་ ༣ ཉིན་མཚོ་སྔོན་ཞིང་ཆེན་དང་། འཐབ་ཕྱོགས་གཅིག་གྱུར་དང་མི་རིགས་ཆོས་ལུགས་སྡེ་ཁག་བཅས་ཀྱི་གོ་སྒྲིག་འོག ཟི་ལིང་དུ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་ཀྱི་གཅིག་བསྡུས་དྲིལ་བསྒྲགས་དང་། མི་རིགས་སོ་སོའི་འབྲེལ་འདྲེས་དང་བརྗེ་རེས། མཉམ་འདྲེས་ལ་སྐུལ་སྤེལ་གཏོང་ཟེར་བའི་གཞི་རྒྱ་ཆེ་བའི་ལས་འགུལ་ཞིག་སྤེལ་ཡོད་ཅིང་། བཅའ་ཁྲིམས་དྲིལ་བསྒྲགས་ཀྱི་ལས་འགུལ་དེའི་ཁྲོད། ཞིང་ཆེན་དང་གྲོང་ཁྱེར། ས་ཁུལ་དང་སྡེ་ཁག་མང་པོར་མི་རིགས་མཐུན་སྒྲིལ་ཡར་སྐུལ་གྱི་བཅའ་ཁྲིམས་ངོ་སྤྲོད་དང་། ནང་དོན་འགྲེལ་བཤད། དེ་བཞིན་ཡུལ་དངོས་སུ་འཁྲབ་སྟོན། ཁྲིམས་ལུགས་ཀྱི་ཡིག་ཆ་སོགས་བཀྲམ་སྟེ་རྣམ་པ་སྣ་ཚོགས་ཀྱི་ཐོག་ནས་དྲིལ་བསྒྲགས་ཤུགས་ཆེན་བྱས་ཡོད་པའི་མུར། ལས་འགུལ་དེའི་ཁྲོད་སྲིད་གཞུང་གི་ལས་བྱེད་དང་། ཤེས་ཡོན་ཅན། མི་མང་ཕལ་བ། བྱིས་པ་སོགས་ཀྱིས་མཉམ་ཞུགས་བྱ་རུ་བཅུག་སྟེ། ཁྲིམས་ལུགས་ཁྱབ་གདལ་ཟེར་བའི་མིང་ཐོག་ནས། ཚ་སྤེལ་དང་དྲིལ་བསྒྲགས་ཤུགས་ཆེན་བྱས་འདུག
ཟླ་འདིའི་ཕྱི་ཚེས་ ༡ ཉིན་ནས་ཟླ་ ༩ ཚེས་ ༣༠ བར་ཟླ་གསུམ་རིང་། བོད་རང་སྐྱོང་ལྗོངས་མི་རིགས་ལས་དོན་ལྷན་ཁང་དང་། བོད་ལྗོངས་སྨྱན་སྦྱོར་ཚོགས་པ་གཉིས་ཀྱི་གོ་སྒྲིག་འོག མི་རིགས་མཐུན་སྒྲིལ་ང་ཡིས་ལག་ལེན་བསྟར་ཟེར་བའི་ཡིག་གཟུགས་དང་པར་རིས་བརྩམས་ཆོས་བསྡུ་རུབ་འགྲེམས་སྟོན་དང་འཚོལ་བསྡུ་ཟེར་བའི་བྱེད་སྒོ་ཞིག་སྤེལ་མུས་ཡིན་ཞིང་། བྱེད་སྒོ་དེའི་ཡིག་གཟུགས་འགྲན་བསྡུར་ཁྲོད། མི་རིགས་མཐུན་སྒྲིལ་ཟེར་བ་བརྗོད་བྱ་གཙོ་བོར་བཟུང་ཡོད་པའི་མུར། པར་ལེན་བརྩམས་ཆོས་ཀྱང་མི་རིགས་མཐུན་སྒྲིལ་དང་། གྲོང་གསེབ་དར་རྒྱས། དམངས་འཚོ་ལེགས་གཏོང་ཟེར་བ། མི་རིགས་ཁག་བར་གྱི་འགྲོ་འོང་དང་། སྤེལ་རེས། མཉམ་འདྲེས་བཅས་ཀྱི་རྣམ་པ་འབུར་དུ་ཐོན་འཇུག་དགོས་པ་སོགས། ད་ལྟ་བོད་ནང་གི་ས་ཁུལ་མང་དག་ཅིག་ཏུ་རྣམ་པ་འདྲ་མིན་གྱི་ཐོག་ནས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་བཅའ་ཁྲིམས་ཟེར་བ་དང་འབྲེལ་བའི་ཚོགས་འདུ། བྱེད་སྒོ། འགྲན་སྡུར་སོགས་བྱས་ནས་སྲིད་ཇུས་དར་སྤེལ་བྱས་དང་བྱེད་མུས་ཡིན་འདུག
དམར་ཤོག་རིང་ལུགས་ཀྱི་ཆབ་སྲིད་སློབ་གསོའི་གནས་ཚུལ།
ཟླ་འདིའི་ཕྱི་ཚེས་ ༣ ཉིན་ཆུ་ཤུར་རྫོང་མཉེས་ཐང་ཤང་ར་སྟོད་དགོན་དུ། ཕྱི་ལོ་ ༢༠༢༦ ལོའི་ལྷ་ས་གྲོང་ཁྱེར་གྱི་དགོན་སྡེའི་འདུ་ཤེས་གསུམ་ཟེར་བའི་དྲིལ་བསྒྲགས་ཀྱི་འཆད་ཁྲིད་དང་རིག་གནས་སྒྱུ་རྩལ་དགོན་པ་ཁག་ཏུ་སྤེལ་བའི་བྱེད་སྒོ་ཐེངས་གཉིས་པ་དེ་འཚོགས་ཡོད་ཅིང་། བྱེད་སྒོ་དེའི་ཐོག་གྲོང་ཁྱེར་དམར་ཤོག་དྲིལ་བསྒྲགས་ལས་ཁུངས་དང་། འཐབ་ཕྱོགས་གཅིག་གྱུར་ཁང་། གྲོང་ཁྱེར་རིག་རྩལ་ལས་རིགས་མཉམ་འབྲེལ་ལྷན་ཚོགས། གྲོང་ཁྱེར་དྲ་རྒྱའི་གཞུང་ལས་ཁང་དང་ཁྲིམས་འཛིན་ལས་ཁུངས། དེ་བཞིན་ཆུ་ཤུར་རྫོང་འཐབ་ཕྱོགས་གཅིག་གྱུར་ལས་དོན་ཁང་དང་དྲིལ་བསྒྲགས་ཚན་པ། འཕྲོད་བསྟེན་ལྷན་ཁང་། ར་སྟོད་དགོན་པའི་དོ་དམ་ལྷན་ཁང་དང་གྲོང་ཁྱེར་ཡིག་གཟུགས་མཁས་པའི་མཐུན་ཚོགས་དང་དགོན་པའི་གྲྭ་བཙུན་གྲངས་ ༣༥༠ ལྷག་ཆེད་དུ་མཉམ་ཞུགས་བྱས་བཅུག་འདུག་ལ། སྐབས་དེར་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ཟེར་བ་ཇེ་དྲག་ཏུ་གཏོང་བ་དང་། རྒྱལ་གཅེས་ཆོས་གཅེས། མཐུན་སྒྲིལ་ཡར་ཐོན་བཅས་ཀྱི་བསམ་བློ་ཟེར་བ་བརྟན་དུ་བཏང་བ། དགོན་སྡེ་སོགས་སུ་སྤྱི་སྐད་ཟེར་བ་ཞིག་ཁྱབ་སྤེལ་དང་སྦྱང་བརྩོན་བྱ་དགོས་པའི་ཐད་གླེང་སློང་ཤུགས་ཆེན་བྱས་འདུག
ཟླ་འདིའི་ཕྱི་ཚེས་ ༡ ཉིན་ཏེ་རྒྱ་ནག་དམར་ཤོག་ཚོགས་པ་བཙུགས་ནས་མི་ལོ་ ༡༠༥ འཁོར་བ་དང་བསྟུན། རྒྱ་ནག་གཞུང་གིས་གཞིས་རྩེ་རིན་སྤུངས་རྫོང་བྱམས་ཆེན་དགོན་པར་བཙན་གྱིས་ཉིན་མོ་དེ་སྲུང་གཙི་བྱས་བཅུག་ཡོད་པ་མ་ཟད། དགོན་པ་དེར་དམར་པོའི་སློབ་གསོ་ཟེར་བ་དང་མི་རིགས་མཐུན་སྒྲིལ། ཆོས་ལུགས་སྲིད་ཇུས་སློབ་སྦྱོང་ཟེར་བར་ནན་ཏན་གྱིས་སློབ་སྦྱོང་བྱ་དགོས་ལུགས་དང་། དགོན་པའི་དོ་དམ་ལྷན་ཁང་གིས་དགོན་པ་དེའི་མི་རིགས་དང་ཆོས་ལུགས་ལས་དོན་སྐོར་གྱི་སྲིད་ཇུས་སློབ་སྦྱོང་བྱ་རྒྱུ་གཙོ་བོར་བཟུང་ནས་མི་རིགས་མཐུན་སྒྲིལ་ཡར་ཐོན་གྱི་སློབ་གསོའི་རྟེན་གཞིར་ཟེར་བར་ལྟ་སྐོར་དང་། དམར་ཤོག་འཛུགས་སྐྱོང་ལ་མུ་མཐུད་རྒྱུན་འཛིན་དང་། འདུ་ཤེས་གསུམ་ཟེར་བའི་སློབ་གསོ་དང་མི་རིགས་མཐུན་སྒྲིལ་ཡར་ཐོན་གཏོད་པའི་སློབ་གསོ་ཟེར་བར་སྐུལ་འདེད། ཆོས་ལུགས་མི་སྣ་དང་དད་ལྡན་མང་ཚོགས་ཚོས་ཐོག་མཐའ་བར་གསུམ་དུ་དམར་ཤོག་གི་དྲིན་དྲན་པ་དང་། ཁ་ལ་ཉན་པ། རྗེས་སུ་འབྲངས་པ་བཅས་བྱེད་པར་སྣེ་ཁྲིད་བྱ་དགོས་པའི་མུར། ཆོས་ལུགས་འཆམ་མཐུན་དང་། མི་རིགས་མཐུན་སྒྲིལ། སྤྱི་ཚོགས་བརྟན་ལྷིང་ཡོང་བར་ཤུགས་སྣོན་བརྒྱག་དགོས་ལུགས་སོགས་བཤད།
གསར་འགོད་པ། དཔལ་ལྡན།
