བོད་ཀྱི་དབུས་གཞོན་ནུ་ལྷན་ཚོགས་ཀྱི་གོ་སྒྲིག་འོག དཔའ་བོ་རང་བཙན་བློ་དགའ་ལགས་རྗེས་དྲན་གྱི་ཟས་བཅད་ངོ་རྒོལ་གྱི་ལས་འགུལ་ཞིག་སྤེལ་མགོ་བཙུགས་སོང་།
དེ་རིང་ཕྱི་ཚེས་ ༡༩ ཉིན་ནས་མགོ་བཙུགས་ཀྱིས་བཞུགས་སྒར་དྷ་སར་དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག རྒྱལ་གཅེས་དཔའ་བོ་རང་བཙན་བློ་དགའ་ལགས་རྗེས་དྲན་སླད། རྒྱལ་གཅེས་དཔའ་བོའི་མངོན་འདོད་རྒྱུན་མཐུད་ཀྱི་ཟས་བཅད་ངོ་རྒོལ་ཞིག་སྤེལ་མགོ་བཙུགས་ཡོད་ཅིང་། དེ་རིང་དབུས་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་ཟུར་བ་ཁག་ཅིག་གིས་ཆུ་ཚོད་ཉེར་བཞིའི་རིང་ཟས་བཅད་ངོ་རྒོལ་དང་། སང་ཉིན་ཞོགས་པའི་ཆུ་ཚོད་བདུན་པ་ནས་ཆུ་ཚོད་ཉེར་བཞིའི་རིང་གཞོན་ནུའི་དབུས་རྒྱུན་རྣམས་ཀྱིས་ཆུ་ཚོད་ཉེར་བཞིའི་རིང་ངོ་རྒོལ་ཟས་བཅད་གནང་རྒྱུ། དེ་ནས་ས་གནས་གཞོན་ནུའི་ཚོགས་མི་ཁག་དང་། ཚོགས་སྡེ་ཁག ལས་འགུལ་བ་སོགས་ཀྱིས་ཆུ་ཚོད་ཉེར་བཞིའི་རིང་མུ་མཐུད་ཟླ་བ་གཅིག་ལྷག་ཟས་བཅད་ངོ་རྒོལ་གྱི་ལས་འགུལ་དེ་སྤེལ་འཆར་འདུག
ད་ལན་གྱི་ཟས་བཅད་ངོ་རྒོལ་གྱི་ལས་འགུལ་དང་འབྲེལ་ནས། དེ་རིང་བོད་ཀྱི་གཞོན་ནུ་ལྷན་ཚོགས་ཀྱིས་བསྒྲགས་གཏམ་ཞིག་སྤེལ་བའི་ཁྲོད། བོད་ཀྱི་གཞོན་ནུ་ལྷན་ཚོགས་ཀྱིས་རྒྱལ་གཅེས་དཔའ་བོ་རང་བཙན་བློ་དགའ་ལགས་ལ་ཆེ་བསྟོད་ཆེད་རྒྱལ་སྤྱི་ས་ཁྱོན་ཡོངས་ལ་རྒྱུན་མཐུད་ལས་འགུལ་སྣ་མང་སྤེལ་རྒྱུ་དང༌། དགྲ་བོ་རྒྱ་དམར་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཁྲིམས་ཡིག་ཞེས་འབོད་པའི་ཁྲིམས་ཡིག་དེར་དགག་བྱ་བྱ་རྒྱུ་མ་ཟད། བོད་ཀྱི་གཞོན་ནུ་ལྷན་ཚོགས་ཀྱིས་འཛམ་གླིང་ཡོངས་ལ་ས་གནས་བོད་ཀྱི་གཞོན་ནུ་ལྷན་ཚོགས་ཁག་དང༌། བོད་དོན་རྒྱབ་སྐྱོར་བ་ཚོགས་སྒེར་ཁག་བརྒྱུད་ནས་བཞུགས་སྒར་དྷ་རམ་ས་ལ་ནས་མགོ་འཛུགས་ཀྱིས་འཛམ་གླིང་ཡོངས་སུ་བོད་དོན་འཐབ་རྩོད་ཀྱི་ལས་འགུལ་ཤུགས་ཆེ་སྤེལ་རྒྱུའི་གསལ་བསྒྲགས་བྱེད་ཀྱི་ཡོད། རྒྱལ་སྤྱིའི་རང་བཞིན་གྱི་ལས་འགུལ་འདི་ནི་རྒྱལ་གཅེས་དཔའ་བོ་རང་བཙན་བློ་དགའ་ལགས་ཀྱི་ཕྱི་ལོ་ ༢༠༢༦ ཟླ་བ་ ༧ ཚེས་ ༢ གཟའ་ཕུར་བུ་ཉིན་གྱི་ཕྱི་དྲོ་ཆུ་ཚོད ༥ པ་ཙམ་ལ་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ་བོད་རྒྱལ་ཁབ་ཆེན་པོའ་རྒྱལ་དར་ སྤོབས་པ་ཆེན་པོས་ཐོག་མཁའ་དབྱིངས་སུ་བསྒྲེངས་པ་དང་ཆབས་གཅིག རང་གི་གཅེས་པའི་སྐུ་ལུས་མེར་སྲེག་བཏང་ཞིང་། དཀར་གཙང་གི་ཤོག་ངོས་སུ་ ༼བོད་རང་བཙན་ཡིན། རྒྱ་མི་བོད་ནས་རྒྱུགས་ཤིག༽ ཅེས་བྲིས་པ་ཞིག་ནམ་མཁར་བཏོར་ནས་སྐུ་གཟུགས་འགྱེང་ངེར་བཞུགས་ཤིང༌། བྲག་ཁོག་ཡར་བཏེག་སྟེ་ལག་གཉིས་འཕྲེད་དུ་བརྐྱངས་པའི་ཐོག་བོད་མི་རིགས་དང་རང་དབང་རང་བཙན་གྱི་དོན་དུ་རང་ལུས་མེར་སྲེག་ནས་བོད་དེ་རྒྱ་དམར་སྲིད་གཞུང་གིས་བཙན་བཟུང་བྱས་པའི་རྒྱལ་ཁབ་ཅིག་ཡིན་པ་དང་། བོད་མིའི་མུ་མཐུད་རང་བཙན་འཐབ་རྩོད་བྱེད་བཞིན་ཡོད་པ་འཛམ་གླིང་ལ་དྲན་སྐུལ་གནང༌། རྒྱལ་གཅེས་དཔའ་བོ་རང་བཙན་བློ་དགའ་ལགས་ཀྱིས་བོད་བསྟན་སྲིད་མི་རིགས་ཀྱི་སླད་སྐུ་ལུས་མེར་བསྲེགས་པར། དེ་ནམ་ཡང་སྣང་མེད་དུ་འཇོག་ཏུ་མི་རུང་བ་དང༌། ཁོང་གི་རང་སྲོག་བློས་གཏོང་གནང་བ་དེ་ནམ་ཡང་སུབ་མི་ཐུབ། བོད་མིའི་རང་དབང་འཐབ་རྩོད་ལ་དོ་སྣང་དང༌། བོད་དོན་བདེན་མཐའ་མ་སེལ་བར་དུ་རྒྱལ་གཅེས་དཔའ་བོ་ཁོང་གི་མཐའ་མའི་འབོད་སྐུལ་དང་ཞལ་ཆེམས་དེ་བཞིན་འཛམ་གླིང་ཁྱོན་ཡོངས་སུ་སྒྲོག་རྒྱུ་ཡིན་པ་ང་ཚོས་ཆོད་སེམས་བརྟན་པོ་ཡོད། ཅེས་གསལ་འདུག
ཡང་བསྒྲགས་གཏམ་ཁྲོད། བོད་ཀྱི་གཞོན་ནུ་ལྷན་ཚོགས་ནས་དྷ་རམ་ས་ལ་ནས་རྒྱལ་གཅེས་དཔའ་བོའི་མངོན་འདོད་རྒྱུན་མཐུད་ཟས་བཅད་ངོ་རྒོལ་མགོ་བཙུགས་ཏེ་བོད་དོན་འཐབ་རྩོད་ཀྱི་ལས་འགུལ་སྤེལ་རྒྱུ་དང༌། འཛམ་གླིང་ཡོངས་ཀྱི་ས་གནས་གཞོན་ལྷན་ཁག་དང་བོད་དོན་རྒྱབ་སྐྱོར་བ་ཚོགས་སྒེར་ཁག་ནས་ཉིན་ལྟར་མཉམ་འབྲེལ་གྱིས་མུ་མཐུད་ནས་མཐུན་སྒྲིལ་མཉམ་རུབ་ཀྱི་ཐོག་ནས་ལས་འགུལ་སྤེལ་རྒྱུ་ཡིན། བོད་ཀྱི་ གཞོན་ནུ་ལྷན་ཚོགས་ནས་དགྲ་བོ་རྒྱ་དམར་སྲིད་གཞུང་གིས་བཙན་འགེལ་བྱས་པའི་ “མི་རིགས་མཐུན་སྒྲིལ་གྱི་བཅའ་ཁྲིམས་ཞེས་འབོད་པའི་མིང་དོན་མི་མཚུངས་པའི་ཁྲིམས་འགལ་གྱི་ཁྲིམས་ཡིག་དེ་ལ་ངོ་རྒོལ་སྐྱོན་བརྗོད་དང་དགག་པ་རྒྱག་གི་ཡོད། ཁྲིམས་འཆར་འདི་ནི་ཆིག་སྒྲིལ་གྱི་ཁྲིམས་ཤིག་མིན་པར་བོད་དང་། ཤར་ཏུར་ཀི་སི་ཐན། ལྷོ་སོག་པོ་སོགས་རྒྱ་དམར་སྲིད་གཞུང་གི་བཙན་འོག་ན་ཡོད་པའི་རྒྱལ་ཁབ་དང་མི་རིགས་ཁག་གི་སྐད་ཡིག་རྩ་བརླག་ཏུ་གཏང་རྒྱུ་དང་། མི་རིགས་བཙན་སྒྱུར། མི་རིགས་ཀྱི་ངོ་བོ་འདྲ་མིན་རྣམས་རྩ་མེད་དུ་གཏོང་རྒྱུའི་ཐབས་ཤེས་ཤིག་རེད། ཅེས་གསལ་འདུག
ད་ལན་གྱི་བོད་ཀྱི་གཞོན་ནུ་ལྷན་ཚོགས་ཀྱི་ངོ་རྒོལ་དང་འབྲེལ་ནས་འབོད་ཚིག་ལྔ་བསྒྲགས་པའི་ཁྲོད། ༡༽ རྒྱལ་སྤྱིའི་མཉམ་འབྲེལ་རྒྱལ་ཚོགས་ནས་དཔའ་བོ་རང་བཙན་བློ་དགས་མེར་སྲེག་དེར་ངེས་པར་འགན་འཁུར་དགོས་པ་མ་ཟད། བློ་དགའ་ལགས་ནས་བོད་རྒྱལ་ཁབ་དང་མི་རིགས་ཀྱི་དོན་དུ་རང་ལུས་མེར་སྲཉག་གི་བྱ་སྤྱོད་ངོ་མའི་ཐོག་ནས་རྒྱལ་སྤྱིའི་ཐོག་ཡ་ལན་དོན་ལྡན་ཞིག་ངེས་པར་སྤྲད་དགོས། ༢༽ རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་མདུན་དུ་རང་ལུས་མེར་སྲེག་གནང་མཁན་རྒྱལ་གཅེས་དཔའ་བོ་རང་བཙན་བློ་དགའ་ལགས་གཙོ་ བྱས་པའི་ད་བར་བོད་མི་རང་ལུས་མེར་སྲེག་གནང་མཁན་ཡོངས་ཀྱི་ཚེ་སྲོག་ལ་རྒྱ་དམར་སྲིད་གཞུང་ནས་འགན་འཁུར་དགོས། ༣༽ བོད་རང་དབང་རང་བཙན་ནི་ང་ཚོའི་ཐོབ་ཐང་ཡིན་པས་རྒྱལ་སྤྱིས་ངེས་པར་ངོས་འཛིན་དགོས་པ་དང་། བོད་ནི་ལོ་རྒྱུས་ཐོག་རང་བཙན་ རྒྱལ་ཁབ་ཅིག་ཡིན། བོད་ལ་རང་དབང་རང་བཙན་ཐོབ་དགོས་ཡོད། ༤ རྒྱ་དམར་སྲིད་གཞུང་ནས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཅེས་པའི་མིང་དོན་མི་མཚུངས་པའི་ཁྲིམས་འགལ་གྱི་ཁྲིམས་ཡིག་ མེད་ལ། བོད་ནང་ལག་བསྟར་བྱེད་མཚམས་འཇོག་དགོས། དེར་ང་ཚོས་ངོས་ལེན་རྩ་བ་ནས་མེད་ལ། བོད་ནང་ལག་བསྟར་བྱེད་མཚམས་འཇོག་དགོས། ༥༽༧ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་འཛམ་གླིང་ནང་གི་བོད་པའི་ཆབ་སྲིད་བཙོན་པ་ཆུང་ཤོས་དང་། ཁོར་ཡུག་སྲུང་སྐྱོབ་པ། བོད་ཀྱི་སྒྱུ་རྩལ་བ། འགྲོ་བ་མིའི་ཐོབ་ཐང་སྲུང་སྐྱོབ་པ། ཆབ་སྲིད་བཙོན་པ་གཞན་ཚང་མ་བཅས་ཆ་རྐྱེན་དང་འགོར་འགྱངས་གང་ཡང་མེད་པར་ཀློད་གྲོལ་གཏང་དགོས་བཅས་ཡིན་འདུག
སྤྱིར་འདས་པའི་ཉིན་ཤས་རིང་འཛམ་གླིང་ས་ཕྱོགས་གང་སར་རྣམ་པ་འདྲ་མིན་གྱི་ཐོག་ནས། རྒྱལ་གཅེས་དཔའ་བོ་རང་བཙན་བློ་དགའ་ལགས་སུ་རྗེས་དྲན་དང་གདུང་སེམས་མཉམ་སྐྱེད་ཞུ་མུས་ཡིན་པ་མ་ཟད། ཁ་སང་ཕྱི་ཚེས་ ༡༨ ཉིན་གཞུང་ཁོངས་མིན་པའི་ཚོགས་པ་དྲུག་གི་གོ་སྒྲིག་འོག དྷ་ས་མེག་ལོར་ནས་ཀ་ཅ་རི་དམག་མིའི་རྩེད་ཐང་བར་གཞི་རྒྱ་ཆེ་བའི་གོམ་འགྲོས་ཀྱི་ལས་འགུལ་ཞིག་ཀྱང་སྤེལ་སོང་།
གསར་འགོད་པ། དཔལ་ལྡན།
