ཕྱི་ལོ་ ༢༠༠༨ ལོར་བོད་ནང་དོན་རྐྱེན་བྱུང་རྗེས་བོད་མི་སྐྱབས་བཅོལ་དུ་ཡོང་བའི་གྲངས་འབོར་ལ་འགྱུར་ལྡོག་ཆེན་པོ་ཕྱིན་ཡོད་སྟབས། ཕྱི་ཚེས་ ༡༦ ཉིན་འདི་གའི་གསར་འགོད་པ་ངྷ་རམ་ས་ལའི་སྣེ་ལེན་ཁང་དུ་བཅར་ཏེ། དབུས་སྣེ་ལེན་འགན་འཛིན་ངག་དབང་ནོར་བུ་མཆོག་ལ། སྣེ་ལེན་ཁང་གི་ལས་དོན་ཁག་ཅིག་དང་འབྲེལ་ཏེ། ཕྱི་ལོ་ ༢༠༠༨ ནས་ ༢༠༡༠ བར་བོད་ནས་རྒྱ་གར་ནང་གསར་དུ་འབྱོར་བའི་བོད་མི་སྐྱབས་བཅོལ་བའི་གནས་སྟངས་སྐོར་ལ་བཅར་འདྲི་ཞུས་ཡོད།
དྲི་བ། བོད་ཀྱི་དུས་བབ་གསར་ཁང་གིས་ལོ་རེའི་མཇུག་ཏུ་བོད་ནས་གསར་དུ་འབྱོར་རིགས་ཐད། དབུས་སྣེ་ལེན་ཁང་བརྒྱུད་གནས་ཚུལ་ཕྱོགས་བསྡོམས་བྱེད་ཀྱིན་ཡོད་ཀྱང་། ༢༠༠༨ ལོར་རྒྱུས་ལོན་བྱས་ཐུབ་མེད། དེར་བརྟེན། སྐུ་ཉིད་ཀྱིས་རང་ཉིད་ངོ་སྤྲོད་དང་བཅས་ཕྱི་ལོ་ ༢༠༠༨ དང་ ༢༠༠༩ གཉིས་ལ་བོད་ནས་གསར་དུ་འབྱོར་རིགས་སྐོར་གྱི་གནས་ཚུལ་ངོ་སྤྲོད་ཅིག་གནང་རོགས།
ལན། ངའི་མིང་ལ་ངག་དབང་ནོར་བུ་ཟེར་ལ། མ་སུ་རི་སློབ་གྲྭ་ཐོན་རྗེས་མཐོ་སློབ་ཏུ་ཕྱིན་པ་ཡིན། ༡༩༨༠ ལོ་ནས་བོད་གཞུང་ལ་ཞབས་ཞུ་ཞུས་ཤིང་། ༡༩༩༦ ལོ་ནས་ ༢༠༠༡ བར་འདི་ག་སྣེ་ལེན་ཁང་གི་འགན་འཛིན་ལས་རོགས་དང་། དེ་ནས་སྒང་ཐོག་ལ་གནས་སྤོར་བྱས། རྗེས་སུ་མོན་གྷོ་ཊིའི་གཞིས་མགོར་བསྐོ་བཞག་བྱས་པ་རེད། ༢༠༠༨ ཟླ་ ༤ ཙམ་ནས་བསྐྱར་དུ་དབུས་སྣེ་ལེན་ཁང་གི་འགན་འཛིན་དུ་མངགས་བྱུང་། སྔོན་མ་ལོ་ལྟར་བོད་ནས་འབྱོར་བའི་མི་འབོར་ ༢༥༠༠ནས་ ༣༠༠༠ བར་ཡིན་ཡང་། ༢༠༠༨ ལོར་བོད་ནང་དོན་རྐྱེན་བྱུང་བའི་དབང་གིས་བོད་ནས་གསར་འབྱོར་ཧ་ཅང་ཉུང་ཉུང་རེད། ལོ་དེའི་ཕྱི་ཟླ་ ༣ ནས་ ༩ བར་ཕལ་ཆེར་མི་གཅིག་ཀྱང་སླེབས་མི་འདུག་ཅིང་། ལོ་དེར་ཁྱོན་བསྡོམས་མི་ ༦༥༠ ཙམ་ལས་འབྱོར་མི་འདུག ༢༠༠༩ ལོར་བོད་ནས་གསར་དུ་འབྱོར་བ་ ༧༣༧ འདུག ད་ལོ་སྔོན་མ་དང་བསྡུར་ན་ཅུང་ཇེ་མང་དུ་འགྲོ་རྒྱུར་ཚོད་དཔག་བྱེད་ཀྱིན་ཡོད། ཟླ་འདིའི་ནང་གཅིག་པུར་མི་ ༨༠ ཙམ་འབྱོར་སོང་། ཁྱོན་བསྡོམས་ ༢༠༠༨ ལོའི་ཟླ་ ༣ ནས་ད་ལྟའི་བར་བོད་ནས་འབྱོར་བ་གྲངས་ ༡༤༦༧ འདུག་ལ། དེ་དག་ནང་ཆབ་སྲིད་བཙོན་པ་ཧ་ཅང་མང་པོ་འདུག
དྲི་བ། སྔོན་མ་ནས་ལོ་ལྟར་བོད་ནས་ཆབ་སྲིད་བཙོན་པ་ཡོང་གིན་ཡོད་ལ། དེ་དག་ནང་རེ་ཟུང་ཆབ་སྲིད་བཙོན་པ་ཡིན་མིན་དང་། ཡང་རེ་ཟུང་གིས་བོད་བསྟན་སྲིད་དོན་ལས་དོན་གལ་ཆེན་བསྒྲུབས་ཀྱང་ངོས་ལེན་མེད་པ་སོགས་ཀྱི་སྐད་ཆ་ཞིག་ཡོད་སྟབས། དེའི་ཐད་འདི་ག་སྣེ་ལེན་ཁང་ལ་དགོངས་ཚུལ་གང་འདྲ་ཡོད་དམ།
ལན། སྤྱིར་བཏང་ཆབ་སྲིད་བཙོན་པ་ཡིན་དང་མ་ཡིན་དེ་སྣེ་ལེན་ཁང་ལ་ཐད་ཀར་འབྲེལ་བ་ཆགས་མེད། བོད་གཞུང་བདེ་སྲུང་ལས་ཁུངས་ཀྱིས་ཐུགས་འགན་བཞེས་ཡོད། ཆབ་སྲིད་བཙོན་པ་ཡིན་མིན་གྱི་ཞིབ་འཇུག་དེ་བལ་ཡུལ་སྣེ་ལེན་ཁང་ནས་མགོ་འཛུགས་བྱེད་ཀྱིན་ཡོད། བལ་ཡུལ་སྣེ་ལེན་ཁང་དུ་བདེ་སྲུང་ལས་ཁུངས་ཀྱི་ཚིག་ཐོ་སྡེ་ཚན་ལོགས་སུ་ཡོད་ལ། ཁོང་ཚོས་ཞིབ་འཇུག་བྱས་པའི་འབྲས་བུ་དབུས་བདེ་སྲུང་ལས་ཁུངས་ལ་གཏོང་གིན་ཡོད་ལ། དེའི་ངོ་བཤུས་ཤིག་སྣེ་ལེན་ཁང་དུ་འབྱོར་གྱིན་ཡོད། ཆབ་སྲིད་བཙོན་པ་མིན་ཡང་ཆབ་སྲིད་བཙོན་པའི་ཐོབ་ཐང་རག་ཡོད་པ་རེ་ཟུང་ཡོང་གིན་ཡོད་ས་རེད། བདེ་སྲུང་ལས་ཁུངས་ཀྱིས་ཆབ་སྲིད་བཙོན་པ་ཡིན་པར་ངོས་བཞེས་ཐོབ་པ་དག་ལ་ང་ཚོས་མཐུན་རྐྱེན་སྦྱོར་བ་དང་། ཁང་པ་ལོགས་སུ་གོ་སྒྲིག་བྱེད་པ་སོགས་གང་ཐུབ་ཀྱིས་སྣེ་ལེན་ཡག་པོ་བྱེད་ཀྱིན་ཡོད།
དྲི་བ། སྔར་དགུ་བཅུ་གོ་གྲངས་ནང་གི་གསར་འབྱོར་དང་ཉིས་སྟོང་ལོའི་རྗེས་ཀྱི་གསར་འབྱོར་གཉིས་བར་སློབ་སྦྱོང་དང་བསམ་བློའི་གོ་རྟོགས། དཔལ་འབྱོར་གྱི་ཆ་རྐྱེན་བཅས་ལ་ཁྱད་པར་དང་འགྱུར་བ་འདྲ་མཐོང་གིན་འདུག་གམ།
ལན། ང་རང་གིས་དབུས་སྣེ་ལེན་ཁང་ནས་ལོ་གང་འཚམ་ཞིག་ལ་ལས་ཀ་བྱས་མྱོང་ཡོད། སྐད་ཆ་དྲང་མོར་བཤད་དགོས་པ་རེད། བོད་ནས་གསར་དུ་འབྱོར་བ་ཚོ་སྔོན་མ་དང་བསྡུར་ན་ཕྱོགས་ཚང་མ་ནས་ཡར་རྒྱས་ཆེན་པོ་ཕྱིན་འདུག ཆུང་ས་ནས་བཤད་ན་གཟུགས་པོའི་སྟེང་གི་དྲི་མ་ཡང་ལོག་ག་རེད། སྔོན་མ་དགུ་བཅུ་གོ་གྲངས་ནང་འབྱོར་མཁན་ཚོར་ཆ་རྐྱེན་དང་སློབ་སྦྱོང་ཕར་ཞོག འཕྲོད་བསྟེན་ཡང་ཧ་ཅང་སྐྱོ་བོ་ཡིན། ཕྱིས་སུ་འབྱོར་བ་མང་ཆེ་བ་སློབ་གྲྭར་འགྲོ་མྱོང་མཁན་རེད་ལ། སློབ་སྦྱོང་གི་གནས་ཚད་མཐོ་པོ་ཡོད་མཁན་ཡང་མང་པོ་འདུག དེ་བཞིན་གཟུགས་པོའི་འཕྲོད་བསྟེན་དང་འགྲོ་འདུག་སྤྱོད་གསུམ་ལ་འགྱུར་བ་ཆེན་པོ་ཕྱིན་འདུག བསམ་བློ་གཏོང་ཕྱོགས་ཀྱི་ཐད་ནས་ཀྱང་ཆབ་སྲིད་ལ་དོ་སྣང་ཡོང་གིན་འདུག སྔོན་མ་སྣེ་ལེན་ཁང་ནས་རྒྱག་རེས་རྒྱག་པ་དང་ཁྲོམ་ནས་དོན་དག་བཟོ་མཁན་མང་པོ་ཡོད་མོད། ད་ཆར་དེ་རིགས་རྩ་བ་ནས་མེད་པ་ཆགས་འདུག ས་བྱི་ཞི་རྒོལ་ཆེན་མོའི་རྗེས་ནས་ཡོང་མཁན་ཚོར་མཐུན་ལམ་རྡོག་རྩ་གཅིག་སྒྲིལ་གྱི་འདུ་ཤེས་ཧ་ཅང་ཡག་པོ་འདུག ལྷག་པར་དུ་ཆ་རྐྱེན་ཐད་འགྱུར་བ་ཆེན་པོ་འདུག གྱོན་ཆས་དང་ལག་དངུལ། བཅའ་ལག་འདྲ་མིན་སོགས་ལ་བལྟས་ན་ཧ་ལས་དགོས་པ་རེད།
དྲི་བ། བོད་ནས་གསར་དུ་འབྱོར་བ་ཕལ་ཆེ་བ་སྐྱབས་བཅོལ་བ་ཡིན་ཡང་། བལ་ཡུལ་རྒྱ་གར་གཞུང་ཚབ་ཀྱི་ལག་དེབ་དཀར་པོའི་སྟེང་། གནས་སྐོར་དང་སློབ་སྦྱོང་། གཞན་སོགས་བཀོད་སྟབས་སྐྱབས་བཅོལ་ལག་འཁྱེར་བཟོ་རྒྱུར་དཀའ་ངལ་འཕྲད་ཀྱིན་ཡོད། འགའ་རེ་དེབ་དཀར་པོའི་སྟེང་གི་ལོ་ཚད་ཀྱི་དབང་གིས་སློབ་གྲྭར་འཛུལ་ཞུགས་ལ་དཀའ་ངལ་འཕྲད་ཀྱིན་ཡོད་པའི་ཐད་གསལ་བཤད་ཅིག་གནང་རོགས།
ལན། སྤྱིར་བོད་ནས་གསར་དུ་འབྱོར་རིགས་ཚོར་སྣེ་ལན་ཁང་གིས་དོ་བདག་གི་ལག་ཏུ་འགེངས་ཤོག་བཞག་སྟེ། སོ་སོའི་མིང་དང་ཕ་ཡུལ། སྐྱེས་ལོ་སྐྱེས་ཚེས་སོགས་གསལ་བོར་འབྲི་རུ་འཇུག་གིན་ཡོད་མོད། རྒྱ་གར་གཞུང་ཚབ་ཀྱིས་སྣེ་ལེན་ཁང་གི་འགེངས་ཤོག་དེ་རྩ་འཛིན་བྱེད་ཀྱི་མི་འདུག དེ་ལ་ཁག་ཀྱང་ཡོད་པ་མ་རེད། ལོ་བཞི་བཅུ་ཡས་མས་ཅན་གྱིས་ལོ་ཉི་ཤུ་བརྒྱབས་ནས་ཡོང་གིན་འདུག རྒྱ་གར་གཞུང་ཚབ་ཀྱིས་ཡང་བསྐྱར་སྐད་ཆ་འདྲི་བ་དང་། གཟུགས་པོའི་བབ་ལ་བལྟས་ཏེ་ཐག་གཅོད་བྱེད་ཀྱིན་འདུག སྔོན་མ་ལག་དེབ་དཀར་པོའི་ནང་རིགས་བཞི་ཡོད། སློབ་སྦྱོང་དང་གནས་སྐོར། སྐྱབས་བཅོལ། གཞན་བཅས་རེད། སྐྱབས་བཅོལ་དང་སློབ་སྦྱོང་ཟེར་བ་གཉིས་ལ་སྐྱབས་བཅོལ་ལག་དེབ་བཟོ་བཞིན་ཡོད། འོན་ཀྱང་རྗེས་སུ་སྐྱབས་བཅོལ་ཟེར་བ་དེ་མེད་པ་ཆགས་འདུག གནས་སྐོར་དང་གཞན་གཉིས་ལ་སྐྱབས་བཅོལ་ལག་ཁྱེར་བཟོ་རྒྱུར་དཀའ་ངལ་ཡོད་མོད། བདེ་སྲུང་ལས་ཁུངས་ཀྱིས་རྒྱ་གར་གཞུང་ལ་སྙན་གསེང་ཞུས་ཏེ། ད་ཆར་ཐབས་ལམ་འཚོལ་གྱིན་ཡོད་པ་རེད། དཀའ་ངལ་གཞན་ཞིག་ལ། དེབ་དཀར་པོའི་ནང་སྐྱེས་ལོ་སྐྱེས་ཚེས་ནོར་བ་དང་། མིང་ནོར་བ་མང་པོ་ཡོང་གིན་འདུག སྔོན་མ་དེ་དག་བལ་ཡུལ་སྣེ་ལེན་ཁང་བརྒྱུད་དེ་རྒྱ་གར་གཞུང་ཚབ་ནས་བཟོ་བཅོས་གཏོང་གིན་ཡོད་མོད། ཉེ་ལམ་ཞིག་ནས་ཁོང་ཚོས་ངོས་ལེན་གནང་གི་མི་འདུག
དྲི་བ། བོད་ནས་གསར་དུ་འབྱོར་རིགས་ཚོར་བལ་ཡུལ་སྣེ་ལེན་ཁང་གིས་ལམ་སྟོན་གནང་ཕྱོགས་གང་འདྲ་ཡིན་པ་དང་། སློབ་གྲྭ་ཁག་ལ་གོ་སྒྲིག་བྱེད་སྐབས་ལོ་ཚོད་བརྩད་ཞིབ་བྱེད་སྟངས་གང་འདྲ་ཡིན་ནམ།
ལན། བོད་ནས་གསར་དུ་འབྱོར་བ་སུ་ཞིག་ཡིན་རུང་བལ་ཡུལ་སྣེ་ལེན་ཁང་དུ་འབྱོར་ཏེ་མི་ ༢༠ རེ་འཛོམས་མ་ཐག སྣེ་ལེན་འགན་འཛིན་རང་གི་ངོས་ནས་འཚམས་འདྲི་དང་སྦྲགས་ཏེ། རྒྱ་གར་ནང་གི་སློབ་གྲྭ་དང་གྲྭ་ས་ཁག་ལ་འགྲོ་ལུགས་འགྲོ་སྟངས་ངོ་སྤྲོད་ཆ་ཚང་བྱེད་ཀྱིན་ཡོད། རྒྱ་གར་གཞུང་ཚབ་ཁང་དུ་མ་སོང་སྔོན་ལ་ལམ་སྟོན་ཆ་ཚང་བ་བྱེད་ཀྱིན་ཡོད། དེ་བཞིན་ཁོང་ཚོ་རྒྱ་གར་གཞུང་ཚབ་ཁང་དུ་གཏོང་སྐབས་ཀྱང་ང་ཚོའི་ལས་བྱེད་ཅིག་མཉམ་དུ་འགྲོ་བཞིན་ཡོད། རྒྱ་གར་གཞུང་ཚབ་ཁང་དུ་བོད་རིགས་ལས་བྱེད་སྐད་བསྒྱུར་བ་ཞིག་འདུག་མོད། ཐོ་འགོད་བྱེད་སྐབས་གོ་བརྡ་མ་འཕྲོད་པ་དང་། མིའི་གཟུགས་བབ་ལ་བལྟས་ཏེ་ཐོ་འགོད་བྱེད་ཀྱིན་ཡོད་སྟབས། སྐྱབས་བཅོལ་ལག་འཁྱེར་བཟོ་ཐུབ་མིན་གྱི་དཀའ་རྙོག་ཡོང་གིན་ཡོད། གཞན། སློབ་གྲྭ་ཁག་ནང་ལོ་ཆེ་ཆུང་ཚད་ལྡན་མིན་པའི་གནས་སྟངས་ཤིག་སྔོན་མ་ནས་ཡོད་ལ། ཕྱིས་སུ་ལག་དེབ་དཀར་པོ་གཞིར་བཟུང་སློབ་གྲྭར་གཏོང་དགོས་པ་ཆགས་པ་ནས་བཟུང་། དཀའ་ངལ་ལྷག་མ་ཞིག་ཡོང་གིན་འདུག ཉེ་ཆར་རང་ལ་བྱིས་པ་ ༥ ལ་ལོ་གཅིག་གི་ཁྱད་པར་ཤོར་ཏེ་གསོག་སྒར་སློབ་གྲྭར་གཏོང་དགོས་པ་ཆགས་སོང་།
དྲི་བ། སྔར་རྒྱ་གར་ལ་ཐེངས་རེ་གཉིས་ཡོང་མྱོང་མཁན་དང་། བཙན་བྱོལ་ནས་སྐྱེས་ཀྱང་བལ་ཡུལ་སྣེ་ལེན་ཁང་བརྒྱུད་གསར་འབྱོར་བའི་ཁོངས་སུ་འཛུལ་བ། གྲྭ་ས་ནས་བལ་ཡུལ་སྣེ་ལེན་ཁང་ལ་ཐོ་བརྒྱབས་ཏེ་སློབ་གྲྭར་འགྲོ་བ་དང་། སློབ་གྲྭ་ནས་བསྐྱར་དུ་སྣེ་ལེན་ཁང་བརྒྱུད་དེ་སློབ་གྲྭ་གཞན་དུ་འཛུལ་བ་སོགས་ཀྱི་གནད་དོན་ཐད་རྒྱུས་མངའ་ཡོད་དམ།
ལན། དེ་བདེན་པ་རེད། གསར་འབྱོར་ནང་སྔོན་མ་རྒྱ་གར་ལ་ཐེངས་གསུམ་རེར་ཡོང་མྱོང་མཁན་དེ་འདྲ་ཡོང་གིན་འདུག ང་རང་དབུས་སྣེ་ལེན་ཁང་དུ་ཡོང་རྗེས་བལ་ཡུལ་སྣེ་ལེན་ཁང་ལ་མི་གསུམ་ལས་གྲུབ་པའི་ཞིབ་འཇུག་ཚོགས་ཆུང་ཞིག་བཙུགས་ཡོད། ཁོང་ཚོས་དེའི་སྐོར་ལ་ཞིབ་འཇུག་བྱེད་ཀྱིན་ཡོད། གལ་སྲིད་ཁོང་ཚོས་ཞིབ་འཇུག་བརྒྱུད་ཐག་གཅོད་དཀའ་བའི་གནས་ཚུལ་འདྲ་བྱུང་ན། དབུས་སྣེ་ལེན་ཁང་ནས་བསྐྱར་དུ་ཞིབ་འཇུག་བྱེད་ཀྱིན་ཡོད། དེ་ལྟར་མི་ཁ་ཤས་འཛིན་ཐུབ་པ་བྱུང་ཡོད། བོད་ནས་འབྱོར་མཁན་རེ་ཟུང་ལ་དམིགས་བསལ་གཏོང་དགོས་པ་ཡོང་གིན་འདུག གཞན། བཙན་བྱོལ་ནས་ཡིན་པ་འགའ་རེ་ཡང་ང་ཚོས་བཟུང་མྱོང་ལ། སྔར་སྣེ་ལེན་ཁང་གི་ལས་བྱེད་ཡིན་པ་ཞིག་ཀྱང་འཇུས་ཡོད། སློབ་གྲྭ་ཁག་གི་འབྲེལ་ཡོད་ལས་བྱེད་དང་ང་ཚོས་མཉམ་འབྲེལ་ཐོག་ཞིབ་འཇུག་བྱེད་ཀྱིན་ཡོད་ལ། ད་ལོ་བལ་ཡུལ་སྣེ་ལེན་འགན་འཛིན་དང་ལྡི་ལི་སྣེ་ལེན་འགན་འཛིན། ངྷ་རམ་ས་ལའི་སྣེ་ལེན་འགན་འཛིན་བཅས་འགན་འཛིན་ལྷན་ཚོགས་ཤིག་ཚོགས་ཏེ་གྲོས་བསྡུར་བྱས་པ་ཡིན་ལ། སྐབས་དེར་སུ་ཇཱ་དང་བྷོལ་པ་པུར་སོགས་ལ་ཆེད་དུ་སོང་སྟེ་ཞིབ་འཇུག་ཀྱང་བྱས་པ་ཡིན།
དྲི་བ། ༢༠༠༨ ལོའི་རྗེས་སུ་སྣེ་ལེན་ཁང་རིམ་པའི་སྒྲིག་འཛུཊ་དང་ལས་དོན་བྱེད་ཕྱོགས། ཕྱི་རྒྱལ་རོགས་ཚོགས་ཁག་དང་མཉམ་འབྲེལ་རྒྱལ་ཚོགས་ཕྱི་མི་ཞིབ་བཤེར་ལས་ཁུངས་སོགས་ལ་འགྱུར་བ་འདྲ་སོང་ཡོད་དམ།
ལན། སྣེ་ལེན་ཁང་གསུམ་གྱི་སྒྲིག་འཛུགས་ཐད་འགྱུར་བ་གང་ཡང་ཕྱིན་མེད། བལ་ཡུལ་སྣེ་ལེན་ཁང་དུ་ལས་བྱེད་ ༡༧ ལས་མེད་སྟབས་ཉུང་དྲགས་འདུག འོན་ཀྱང་གསར་དུ་བསྐོ་རྒྱུར་བལ་ཡུལ་གྱི་ལག་འཁྱེར་དགོས་སྟབས་ཅུང་དཀའ་ངལ་འདུག ལྡི་ལི་སྣེ་ལེན་ཁང་དུ་ལས་བྱེད་ ༧ ཡོད་ལ། དེར་ལས་ཀ་ཡང་ཞེ་དྲག་མེད། ངྷ་ས་དབུས་སྣེ་ལེན་ཁང་དུ་ལས་བྱེད་ ༢༦ ཡོད། རོགས་ཚོགས་ཀྱི་ཐད་ནས། སྔོན་མ་མེད་པ་ཞིག་ལ་བལ་ཡུལ་སྣེ་ལེན་ཁང་གི་སྔོན་རྩིས་དེ་རྒྱལ་སྤྱིའི་སྔོན་རྩིས་ནང་ལ་ཞུས་ཏེ་གང་འཚམ་ཞིག་རག་གིན་ཡོད། ལྡི་ལི་སྣེ་ལེན་ཁང་དང་དབུས་སྣེ་ལེན་ཁང་གི་འགྲོ་སོང་ཆ་ཚང་སྔོན་མ་ནས་ཨ་རིའི་གཞུང་གིས་གཏོང་གིན་ཡོད་ལ། ལོ་ལྟར་སྔོན་རྩིས་ནང་མི་ ༡༥༠༠ ཙམ་ཞུ་བཞིན་ཡོད་པ་ལྟར་རག་གིན་ཡོད། འོན་ཀྱང་། ༢༠༠༨ ལོར་བོད་ནང་དོན་རྐྱེན་བྱུང་སྟེ་གསར་འབྱོར་བ་ཉུང་དུ་ཕྱིན་ཡོད་སྟབས། ད་ལོ་མི་ ༧༠༠ ལས་ངོས་ལེན་གནང་མ་སོང་། གལ་སྲིད་མི་བདུན་བརྒྱ་ལས་བརྒལ་བ་ཡིན་ན་བསྐྱར་དུ་སྤྲོད་ཆོག་ཟེར།
དྲི་བ། ཕྱི་ལོ་ ༢༠༠༨ ཟླ་ ༡ ནས་ཤེས་རབ་དགའ་ཚལ་སློབ་གླིང་གི་ཉེ་འཁྲིས་སུ་དབུས་སྣེ་ལེན་ཁང་སྤོར་འཛུགས་ཀྱི་ལས་གཞི་ཞིག་འགྲོ་བཞིན་ཡོད་པ་དེའི་གནས་སྟངས་ངོ་སྤྲོད་ཅིག་གནང་རོགས།
ལན། ལས་གཞི་དེ་ཐོག་མ་ཨ་རིའི་གཞུང་ལ་སྙན་གསེང་ཞུ་སྐབས། ༢༠༠༨ ལོར་ལས་འཆར་རིམ་པ་དང་པོ་རྫོགས་རྒྱུ་ཁས་ལེན་བྱས་ཡོད་ཀྱང་། ༧གོང་ས་མཆོག་གི་སྐུ་བགེགས་ཀྱི་དབང་གིས་ཕྱིར་འགྱངས་བྱས་པ་རེད། ཕྱི་ལོ་ ༢༠༠༨ ཟླ་ ༡ ནས་མགོ་འཛུགས་ཀྱིས་ད་ལྟ་གང་འཚམ་གྲུབ་ཡོད། འདི་ལོའི་ཕྱི་ཟླ་ ༥ བའི་ཟླ་མཇུག་ཙམ་ལ་ཡོངས་སུ་མཇུག་སྒྲིལ་ཏེ། སྒོ་འབྱེད་བྱ་ཐུབ་རྒྱུར་རེ་བ་རྒྱག་གིན་ཡོད། སྤྱིའི་འཛུགས་སྐྲུན་ཐད། བུ་ ༣༠༠ དང་བུ་མོ་ ༢༠༠ ཁྱོན་བསྡོམས་མི་ ༥༠༠ ཡི་ཉལ་ཁང་དང་། དེ་ལ་ཁྲུས་ཁང་དང་གསང་སྤྱོད་བཅས་ཆ་རྐྱེན་འཐུས་ཚང་ཡིན། གཞན་ལས་ཁུངས་དང་སྨན་ཁང་། ལས་ཤག་ ༣༠ ཙམ་ཡོད་ལ། ཆབ་སྲིད་བཙོན་པ་འདུག་ས་ལོགས་སུ་ཡོད། ལས་འཆར་དེར་འགྲོ་སོང་ཁྱོན་བསྡོམས་ཧིན་སྒོར་འབུམ་དྲུག་བརྒྱ་ ༦༠༠༠༠༠༠༠ མ་ཟིན་ཙམ་རེད། འགྲོ་སོང་དེའི་བརྒྱ་ཆའི་ ༧༠ ཨ་རིའི་གཞུང་དང་། བརྒྱ་ཆ་ ༣༠ ཙམ་སྣེ་ལེན་ཁང་རང་གིས་བཏང་བ་རེད།
དྲི་བ། སྣེ་ལེན་ཁང་རིམ་པར་དམིགས་བསལ་གྱི་དཀའ་ངལ་ཡོད་མེད་དང་། བོད་ནང་ཕྱིར་ལོག་མཁན་དང་། རྒྱ་གར་དང་བལ་ཡུལ་ས་མཚམས་ཁག་ནས་ཕར་སྐྱོད་ཚུར་འོང་བྱེད་མཁན་བོད་རིགས་ཚོར་རོགས་རམ་མཐུན་འགྱུར་གང་འདྲ་བྱེད་ཀྱིན་ཡོད་དམ།
ལན། སྣེ་ལེན་ཁང་ལ་དམིགས་བསལ་གྱི་དཀའ་ངལ་ཡོད་པ་མ་རེད། དྲང་མོར་བཤད་ན་ལོ་འདི་འགར་བོད་ནས་གསར་དུ་ཡོང་མཁན་མེད་པའི་དཀའ་ངལ་དེ་རེད། ག་ཚོད་མང་མང་ཡོང་ན་བསམ་བསམ་འདུག སློབ་གྲྭ་ཁག་དང་གདན་ས་ཁག་ཏུ་མི་མེད་པའི་དཀའ་ངལ་འཕྲད་ཀྱིན་ཡོད། སློབ་གྲྭ་ཁག་ནས་རྟག་པར་དབུས་སྣེ་ལེན་ཁང་ལ་མི་ཡོད་མེད་སྐད་ཆ་དྲིས་ཡོང་གིན་འདུག གཞན། རྒྱ་གར་དང་བལ་ཡུལ་ཀྱི་ས་མཚམས་བརྒྱུད་མཁན་རིགས་ལ་གང་ཐུབ་ཀྱིས་རོགས་རམ་བྱེད་ཀྱིན་ཡོད། བལ་ཡུལ་སྣེ་ལེན་ཁང་མ་བརྒྱུད་པར་རྒྱ་གར་ནང་འཛུལ་མཁན་ཡོང་གིན་འདུག ཉེ་ཆར་རྡོ་རྗེ་གདན་གྱི་གསུང་ཆོས་ཐོག་མི་ ༤ འབྱོར་འདུག སྔར་ལོ་བོད་ནས་ཡོང་བའི་ལག་འཁྱེར་ཡོད་མཁན་ཞིག་རྒྱ་བལ་ས་མཚམས་གྷོ་རཱ་པུར་གྱི་ཉེན་རྟོག་པས་འཇུས་ཏེ། དཀའ་ངལ་མང་པོ་ཕྲད་སོང་། རྗེས་སུ་ལྡི་ལིའི་རྒྱ་ནག་གཞུང་ཚབ་ལ་རྩིས་སྤྲོད་བྱ་རྒྱུ་བྱས་ཏེ། ལྡི་ལིར་འབྱོར་མ་ཐག་ང་ཚོས་ལེན་ཐུབ་པ་བྱུང་ཡོད། རྒྱ་གར་ནས་ཕྱིར་བོད་དུ་ལོག་མཁན་ཚོར་ཡང་གང་ཐུབ་ཀྱིས་ཞབས་ཞུ་སྒྲུབ་ཀྱིན་ཡོད། དབུས་སྣེ་ལེན་ཁང་ནས་ལྡི་ལི་བར་ཧིན་སྒོར་ ༤༠༠ དང་། ལྡི་ལི་ནས་བལ་ཡུལ་བར་ ༡༥༠༠ ། བལ་ཡུལ་ནས་ཁོངས་སོ་སོའི་ཕ་ཡུལ་བར་འདང་ངེས་ཀྱི་དངུལ་སྤྲོད་ཀྱིན་ཡོད་ལ། གྱོན་ཆས་ཀྱི་དོད་དུ་ཧིན་སྒོར་ ༢༠༠༠ ལྷག་སྤྲོད་ཀྱིན་ཡོད། བོད་དུ་ལོག་མཁན་ཚོའི་འགྲོ་སོང་དེ་སྔོན་མ་ཨ་རིའི་གཞུང་གིས་གཏོང་གིན་ཡོད་ཀྱང་། མི་མང་པོ་ཞིག་གིས་དངུལ་ཆ་ཚང་བླངས་ཏེ་བོད་ནང་མ་ལོག་པའི་གནས་ཚུལ་བྱུང་ཡོད་སྟབས། ཨ་རིའི་གཞུང་གིས་ད་ཆར་དངུལ་དེ་མཚམས་འཇོག་བྱས་སོང་།
ཏག་ཏག་རེད། ད་གཞིས་ལུས་མི་མང་གིས་ཧ་གོ་ཡོང་གིན་ཡོད་པ་རེད། རྒྱ་གར་དུ་མང་པོ་ཞིག་མི་ཡོང་བ་དེ་ནོར་མི་འདུག ང་ཚོ་བཞིན་ས་མཐའ་རུ་རྒས་ནས་ས་མཐའ་རུ་ཤི་སོང་ན་སྙིང་པོ་འདི་རེད་ཟེར་བ་ཞིག་ནི་ཅང་མི་འདུག་ག བོད་མིས་བོད་ཡུལ་གྱི་བདག་པོ་བྱེད་དགོས་པ་རེད།
ངག་དབང་ནོར་བུ་ལགས་ཀྱི་ལྷག་བསམ་རྣམ་དག་གི་ཕྱག་ལས་གནང་གི་ཡོད་པ་གསལ་བོ་བྱུང་། ལས་དོན་ཚང་མ་ཕྱི་གསལ་ནང་གསལ་བཟོས་སོང་། ཐུགས་རྗེ་ཆེ། ང་ཚོས་ཁྱེད་རང་གི་བྱ་བ་ལམ་འགྲོ་དང་ཚེ་རིང་བོ་ཡོང་བར་སྨོན་ལམ་གསོལ་འདེབས་ཞུ་བཞིན་ཡོད།
༸གོང་ས་མཆོག་དང་བོད་གཞུང་གི་སྐུ་དྲིན་ནི་བོད་མི་ཡོད་དོ་ཅོག་གི་སྙིང་དབུས་སུ་ངེས་དགོས་པ་ཞིག་རེད། ལ་ལས་བོད་གཞུང་དང་༸གོང་ས་མཆོག་ལ་ཡང་མི་འདོད་པའི་རྣམ་འགྱུར་དང་མ་བྱུང་མ་འཐུས་པའི་བབ་ཅོལ་གྱི་གཏམ་སྨྲ་མཁན་ཡང་ཡོད།
དེ་རིགས་ཀྱིས་དོན་དམ་པའི་བོད་གཞུང་དང་༸གོང་ས་མཆོག་གི་སྐུ་དྲིན་གྱིས་སྐྱབས་བཅོལ་བ་ཚོ་ཇི་ལྟར་སྐྱོང་གིན་ཡོད་མེད་དེ་ཞིབ་གསལ་ཤེས་ཀྱི་མེད་ཚོད་རེད། །
བོད་གཞུང་སྣེ་ལེན་ཁང་གིས་གསར་འབྱོར་པ་རྣམས་ལ་རོགས་དངུལ་མང་པོ་ཞིག་གཏོང་གིན་ཡོད་པ་སྔར་ནས་ཐོས་སོང་། འོན་ཀྱང་དངུལ་དེ་ཨ་རི་གཞུང་གིས་སྤྲད་ཀྱིན་ཡོད་དེ་རིང་མ་གཏོགས་ཐོས་མ་སོང་། ཐུགས་རྗེ་ཆེ།