རླབས་ཆེ་བའི་རྒྱལ་གཅེས་དཔའ་བོ་སྤྲུལ་སྐུ་བསྟན་འཛིན་བདེ་ལེགས་གླེང་བ།
ལྷ་ཆབ་སྦྱིན་པ།
སྤྲུལ་སྐུ་བསྟན་འཛིན་བདེ་ལེགས་ནི། དུས་རབས་གོང་མའི་ལོ་རབས་བརྒྱད་བཅུ་བའི་ནང་བཙན་བྱོལ་དུ་ཕེབས་པ་དང༌། རྒྱ་གར་ལྷོ་ཕྱོགས་འབྲས་སྤུངས་ནས་སློབ་གཉེར་བྱས་ཏེ་ཕར་ཕྱིན་བར་བཞུགས་སྐབས་འཛིན་གྲྭའི་ནང་གི་དཔེ་ཆ་བ་ཡག་ཤོས་ཀྱི་གྲས་སུ་ཡོད་པ་དང༌། མུ་མཐུད་དུ་བཞུགས་ཡོད་ན་དགེ་བཤེས་ལྷ་རམས་པ་ཞིག་ལ་འདང་རྒྱག་མེད་པ་སོགས་ཡོད་ཚད་བློས་བཏང་ནས་ལོ་རབས་དགུ་བཅུ་བར་ཕྱིར་རང་གི་ཕ་ཡུལ་དུ་ལོག་པ་རེད། ཕ་ཡུལ་དུ་ལོག་སྟེ་ཀུན་གཟིགས་པཎ་ཆེན་རིན་པོ་ཆེ་དང་གུང་ཐང་རིན་པོ་ཆེ། མཁན་ཆེན་འཇིགས་མེད་ཕུན་ཚོགས་སོགས་ཀྱི་ཞབས་ལ་གཏུགས་ནས་རང་གི་མི་རིགས་ལ་ཕན་པའི་རླབས་ཆེན་གྱི་བཀའ་སློབ་ཡང་དང་རིམ་པས་ཞུས་ཏེ། དམུ་རྒོད་དུ་གྱུར་བའི་རང་གི་ཕ་ཡུལ་ཕྱོགས་སུ་སློབ་གྲྭ་དང་བྱིས་གཉོར་ཁང༌། རྒན་གསོ་ཁང༌། དགོན་སྡེ་ཁག་དུ་མ་བཅས་གསར་འཛུགས་གནང་ཞིང༌། སྔར་ཡུལ་དེའི་ལྷ་འདྲེ་བསྟེན་སྲོལ་ཤུགས་ཆེ་བ་དག་རེ་རེ་བཞིན་ཐབས་དང་ཤེས་རབ་གཉིས་ཟུང་དུ་སྦྲེལ་ནས་བཀག་སྡོམ་བྱས་པའི་རླབས་ཆེན་གྱི་བྱ་གཞག་བསྐྱངས་པའི་ལོ་རྒྱུས་ནི་ང་ལྟ་བུ་ཞིག་གིས་ཆ་ཤས་ཙམ་ཡང་བརྗོད་དུ་ག་ལ་ལང༌། དེ་ལྟར་མདོ་སྟོད་ལི་ཐང་གི་ཕྱོགས་དེར་ནམ་ལང་ཉི་ཤར་བཞིན་མ་རིག་པའི་མུན་པ་ལ་རིན་ཆེན་གྱི་སྒྲོན་མེ་ཞིག་སྤར་བའི་བཀའ་དྲིན་མཚོན་པའི་དངོས་པོ་ནི་སྲིད་པ་གསུམ་ན་རྙེད་དུ་མེད།
དེ་ལྟར་བོད་ཀྱི་ཆོས་དང་རིག་གཞུང་ལ་སྨན་པའི་ལེགས་བྱས་ཀྱི་འཁོར་ལོ་ནི་སྐད་ཅིག་ཙམ་ཡང་མི་སྡོད་པར་བསྐོར་བའི་སྐབས་ན། “མི་བུའི་མགོ་བོ་གཅོག མི་རིགས་ཀྱི་གཉའ་བ་གཅོག མངའ་ཁོངས་ཀྱི་སྐེད་པ་གཅོག དགོན་སྡེའི་རྟེན་གསུམ་གཅོག གྲོང་སྡེའི་རྒྱུ་རྫས་གཅོག སྲིད་ཀྱི་སྲོག་ཤིང་གཅོག འབྱོར་བའི་རྩ་བ་གཅོག རིག་གནས་ཀྱི་རུས་རྐང་གཅོག་པའི་འཆར་གཞི་དང་རྩ་འཛུགས། དམིགས་ཡུལ་ཡོད་“(《གནམ་ས་གོ་འབྱེད》ལས་དྲངས། )པའི་དགྱ་ནག་གིས་ལྟས་ལྟས་རིག་རིག་ལ་མི་དཀར་བོར་ཞྭ་མོ་ནག་པོ་གཡོག་སྟེ་འཛིན་བཟུང་བྱས་པའི་མི་ཚད། འཇིགས་སྐུལ་བའི་ཉེས་མིང་བཀལ་ཞིང༌། ལོ་གཉིས་འགོར་འགྱངས་ཀྱི་སྲོག་ཐོག་གི་ཉེས་པ་དང༌། དེ་ནས་ཚེ་བཙོན་ལ་ཕབ་པ་སོགས་བྱས་ཏེ་བོད་མི་རིགས་ཀྱི་སྲོག་ཤིང་ཞིག་ལ་དབང་མཐའ་སྒེར་གཅོད་ཀྱི་སྟ་རེས་སྣུན། དེའི་ཚེ་ན། སྲིད་དབང་སྒེར་གཅོད་པའི་དམིགས་ཡུལ་ལག་ལེན་དུ་བསྟར་བ་བཞིན་སློབ་གྲྭའི་སློབ་མ་འཐོར་ཞིང༌། སློབ་གྲྭའི་ཁང་བརྩེགས་འགྱེལ།རྒན་གསོ་ཁང་འཐོར་ཞིང་རྒན་རྒོན་དག་བདག་མེད་དུ་གྱུར་བ་སོགས་ཐོས་ན་གློ་སྙིང་དག་ཁ་ནས་ཡལ་གྲབས་བྱེད་པའི་ཚད་དུ་སླེབས།
དེ་ལྟར་སྐུ་ཚེ་གང་བོར་བོད་མི་རིགས་ཀྱི་བདེ་དོན་ཁོ་ནར་བཏང་བའི་སྐྱེས་བུ་དམ་པ་ཁོང་གིས་མ་འོངས་རྒྱང་གཟིགས་ཀྱིས་སྐྱེད་བསྲིངས་བྱས་པའི་སློབ་བུ་གྲངས་ཀྱིས་དབེན་པ་དང༌། དེ་དག་ལས་ཁག་ཅིག་བཙན་བྱོལ་དུ་སླེབས་པ་དང་གདན་ས་གསུམ་ལ་ཁྱབ་ནས་དགེ་བཤེས་ལྷ་རམས་པ་ཐོན་དང་ཐོན་བཞིན་པ་མང་བོ་ཡོད། ཁོང་མ་བཟུང་བའི་སྔོན་དག་ལ་ད་དུང་ཁོང་གིས་བྱེས་སུ་གྱར་མཁན་གྱི་སློབ་བུ་དག་ལ་ཡིག་ངག་གཉིས་ཐོག་ནས་སྙིང་ནས་གདམས་པའི་བསླབ་བྱ་ཉག་ཅིག་ཡོད་པ་ནི”ཁྱོད་ཚོས་ཆོལ་ཁ་དང་ཆོས་ལུགས་ཀྱི་ཞེན་ཁོག་ཅིག་བྱས་པའི་ཉིན་མོར་རྒན་དང་དགེ་ཕྲུག་གི་དམ་ཚིག་ཟེར་བ་ཞིག་ཡོད་བསམ་པས་མ་འཛིན་“(འབྲས་སྤུངས་སུ་བཞུགས་པའི་ཁོང་གི་སློབ་བུ་དགེ་བཤེས་ཉི་མ་དབང་ཕྱུག་གིས་གསུང་།)ཞེས་ཡང་དང་ཡང་དུ་གསུང་བ་དེ་རེད་འདུག་ལ། དེ་གཅིག་བུར་བསམ་ནའང་དེང་གི་སྤྲུལ་མིང་འཛིན་པ་ཁག་ཅིག་གིས་སྟོད་འགག་སེར་ལྷམ་མེར་བ་ཞིག་གྱོན་ནས་རྒྱལ་ཁམས་འགྲིམས་ཏེ་འཁོར་ཚོགས་བསྡུས་ཤིང༌། ྋརྒྱལ་བའི་བཀའ་དང་འགལ་བའི་ཆོས་བརྒྱུད་དང་ཆོལ་ཁའི་ཞེན་ཁོག་ཕྱོགས་རིས་ཀྱིས་བོད་མི་རིགས་ཀྱི་རྡོག་རྩ་ཆིག་སྒྲིལ་ལ་གནོད་པ་དག་གིས་བསྒྲུན་དུ་ག་ལ་ནུས། མདོར་བསྡུས་ན་རླབས་ཆེན་གྱི་སྐྱེས་བུ་དམ་པ་ཁོང་གིས་དུས་དང་རྣམ་པ་ཀུན་ཏུ་རང་རེའི་བོད་མི་རིགས་ཀྱི་དཔྲལ་བའི་མིག་དང་ཁོག་གི་སྙིང་དུ་གྱུར་བའི་ྋགོང་ས་ཡིད་བཞིན་ནོར་བུའི་དགོངས་གཞི་འབའ་ཞིག་དོན་དུ་གཉེར་ཡོད།
ད་ལོ་ནི་དམ་པ་ཁོང་འཛིན་བཟུང་བཙན་ཁྲིད་བྱས་ནས་མི་ལོ་དགུ་ཏག་ཏག་འཁོར་བ་དང༌།ཁོང་གི་རྗེས་འཇུག་དག་གིས་ཁྲིམས་གཏུགས་དང་སྐད་འབོད་ངོ་རྒོལ་སོགས་ཡང་དང་རིམ་པས་བྱས་ཏེ་གློད་གྲོལ་གཏོང་དགོས་པའི་རེ་འདུན་བཏོན་ནའང་ད་བར་དུ་རྔོ་གང་ཡང་ཐོགས་མེད།ཡིན་ནའང་རང་རེའི་བོད་གཞུང་དང་རྒྱལ་སྤྱིའི་ལས་འགུལ་ཚོགས་པ་ཁག དེ་བས་ཀྱང་དགྱ་ནག་གི་རྩོམ་པ་པོ་ཝང་ལི་ཞུང་སོགས་ཀྱིས་ཁོང་ལ་ནག་ཉེས་མེད་པའི་བདེན་པ་ནམ་ལང་ཉི་ཤར་བཞིན་བརྡར་སྟབས། ན་ནིང་ནས་ཁོང་གི་སྲིང་མོ་གཅིག་བུར་ཤེལ་གྱི་བར་གཅོད་བྱས་པའི་བཙོན་པའི་མཇལ་འཕྲད་དེ་བྱེད་དུ་བཅུག་འདུག་ལ། དེ་དུས་སྐུ་གཟུགས་སོགས་ཀྱི་ཐད་ནས་ཡག་པོ་མེད་པ་མངོན་སུམ་ཡིན་འདུག ད་ལོར་ཡང་ཉག་ཆུ་རྫོང་གི་འབྲོག་པ་མང་ཚོགས་སོགས་མི་ཁྲི་བཞི་ལ་བརྒལ་བ་ཙམ་གྱིས་ས་ཡིག་བསྡུ་རུབ་ཀྱི་ལས་འགུལ་ཞིག་སྤེལ་ཏེ་གློད་གྲོལ་གཏོང་དགོས་པའི་རེ་འདུན་བཏོན་ཡོད་པར་ཐོས་ལ། ཁོང་གི་སྐུའི་བདེ་ཐང་གི་ཐད་ནས་ཀྱང་ཁྲག་ཤེད་འཕར་བ་དང་སྙིང་གི་ན་ཚ། རུས་པའི་ན་ཚ་སོགས་ཀྱིས་མནར་ནས་ཛ་དྲག་པོ་ཡིན་པར་སྐད་ལ། འདི་གའི་བོད་ཀྱི་དགུ་བཅུ་གསུམ་ལས་འགུལ་ཚོགས་པ་དང་དབུས་བུད་མེད་ལྷན་ཚོགས། བོད་རང་བཙན་སློབ་ཕྲུག་ཚོགས་པ་བཅས་ཀྱིས་ཀྱང་ས་ཡིག་བསྡུ་རུབ་ཀྱི་ལས་འགུལ་ཞིག་སྤེལ་ཏེ་དམ་པ་ཁོང་གློད་གྲོལ་ཡོང་བའི་འབོད་སྐུལ་གྱི་ལས་འགུལ་ཞིག་རྒྱལ་སྤྱིའི་ཁྱོན་ཡོངས་ལ་སྤེལ་གྱི་ཡོད།
ང་ཚོའི་བོད་གངས་ཅན་གྱི་ལྗོངས་སུ་དམ་པ་ཁོང་ལྟ་བུ་རེ་གཉིས་ཤིག་ཡོད་ན། བོད་མི་རིགས་དང་རིག་གཞུང་གི་ཐད་ནས་ད་དུང་རེ་བས་འཆའ་ས་ཞིག་དང་ཡིད་ཀྱིས་རྟེན་ས་ཞིག་ཡོད་ངེས།དགྱ་ནག་གི་ངོས་ནས་ཀྱང་ཚུལ་དེ་མཐོང་སྟེ་དམ་པ་ཁོང་གི་ཡིད་ལའང་དྲན་མ་མྱོང་བའི་ནག་ཉེས་ཆེན་པོ་ཞིག་བཀལ་བ་ནི་འབར་རྫས་གས་གཏོར་བྱས་པའི་གནད་དོན་དེ་རེད། སྨྱོ་ཧམ་གྱི་ཐབས་བཀོད་དེ་ནི་ང་ཚོའི་མི་རིགས་ཀྱིས་དུས་ནམ་ཡང་བཟོད་དཀའ་བ་ཞིག་མ་རེད་དམ། དེ་རིང་ངས་བརྗོད་འདོད་པ་ནི་ང་ཚོའི་གཞིས་བྱེས་གཉིས་ཀྱི་སྤུན་ཟླ་ཡོངས་ཀྱིས་དམ་པ་ཁོང་དང་ཁོང་ལྟ་བུའི་མཛད་རྗེས་ལ་བསྔགས་པར་བགྱིད་པ་དང་བསྟོད་པར་བྱས་ཏེ་སློབ་སྦྱོང་བྱ་རྒྱུ་དེ་ཡིན། འདི་ནི་རྣ་ཐོས་གོ་ཐོས་ཙམ་གྱི་དམ་པ་ཁོང་གི་རྣམ་ཐར་གྱི་ཟུར་ཙམ་ཡིན་ལ། འདི་བརྒྱུད་ནས་རང་རེ་རྣམས་ཀྱིས་དམ་པ་ཁོང་གི་རྣམ་ཐར་ཡོངས་སུ་རྟོགས་ཐུབ་པའི་སྨོན་ལམ་དང་བཅས་སྦྱར་བའོ །། །།
སྤྲུལ་སྐུ་བསྟན་འཛིན་དགེ་ལེགས་ལ་མུ་མཐུད་དོ་སྣང་བྱེད་རྒྱུ་འདི་གལ་ཆེ།
ཁོང་གི་རྗེས་འཇུག་དག་གིས་ཁྲིམས་གཏུགས་དང་སྐད་འབོད་ངོ་རྒོལ་སོགས་ཡང་དང་རིམ་པས་བྱས་ཏེ་གློད་གྲོལ་གཏོང་དགོས་པའི་རེ་འདུན་ལྟར་མྱུར་འགྲུབ་པའི་སྨོན་འདུན་ཞུ།
པན་ཆུང་ཟེར་བ་དེ་སུ་ཞིག་རེད།
ཁྱོད་ཀྱི་སྙུག་རྩེ་ན་དཔྱོད་ཤེས་ཀྱི་མེ་དཔུང་ཚ་ལམ་མེར་འབར་བཞིན་འདུག
བཀའ་དྲིན་ཆེ། རྩོམ་ཐུང་འདིས་བོད་མི་རིགས་ཀྱི་་་དཔའ་བོ་་་་ངོ་མ་ཞིག་གི་བརྙན་རིས་འབུར་གཟུགས་སུ་བསྐྲུན་འདུག
ཨ་རོ། བདེ་མོ། སྤྲུལ་སྐུ་ལ་གུས་འདུད་ཞུ།
ལྷ་ཆབ་ལགས་དཀའ་དྲིན་ཆེ།
ང་ཚོའི་ལག་འོག་བརྒྱུད་ཤོར་སོང་བའི་བོད་ནང་གི་རྒྱལ་གཅེས་པ་ཧ་ཅང་མང་ཡང་། ང་ཚོའི་ནུས་པ་ལས་ཁྲིམས་མུན་ནས་འཐོན་འོང་བའི་རྒྱལ་གཅེས་པ་ཉིན་གྱི་སྐར་མ་ལས་དཀོན་སོང་ན། ད་དུང་ང་ཚོས་རྒྱལ་གཅེས་ཀྱི། སློབ་གསོ་བ། སྒྱུ་རྩལ་བ། རྩོམ་པ་པོ་སོགས། རེ་རེ་ནས་ང་ཚོས་འབོད་སྐུལ་ཞིག་དང་ཁ་གཡང་ཞིག་གིས་ཁྲིམས་མུན་དུ་འཇུག་རྒྱུ་ཡིན་ནམ།
ཡང་ན། ད་ལྟ་ང་ཚོས་ཅི་ཞིག་ལས་རྩིས་ཡོད་་་་་་་་་་་་་་་་་། ང་ཚོ་རེ་རེས་ཞིབ་འདང་རྒྱག་དགོས།
ང་ཚོ་བཙན་བྱོལ་གཞུང་སྒེར་གང་རུང་ལོ་་རེ་ནས་ལོ་རེ་ཚོར་བ་གློ་བུར་བ་ཞིག་གིས་དབང་དུ་ལས་འགུལ་སྤེལ་བ་མ་གཏོགས་རྒྱུན་མཐུད་ནས་སྤེལ་བ་ཉུང་། དེ་རིང་ལྷ་ཆབ་རྒད་པོས་བསྐྱར་དུ་སྤྲུལ་སྐུ་བསྟན་འཛིན་བདེ་ལེགས་སྐོར་གླེང་བ་འདི་ཧ་ཅང་བཟང་གི དེ་བཞིན་པན་ཆུང་སྲིད་སྐོར་བཅས་མུ་མཐུད་ནས་གླེང་དགོས་པ་རེད།