ཁ་སང་ཨེ་ཤ་ཡ་རང་དབང་རླུང་འཕྲིན་ཁང་གི་གསར་འགོད་པ་དཔལ་ལྡན་རྒྱལ་གྱིས་གཞས་མ་ཀུན་དགའ་སྒྲོལ་མ་ལགས་སུ། ༧གོང་ས་མཆོག་གི་འཁྲུངས་སྐར་ཉིན་གླུ་གཞས་བཏང་བའི་སྐོར་ལ་ཁ་པར་བརྒྱུད་བཅར་འདྲི་བྱས་སྐབས། ཁོ་མོས་ཐེངས་འདིར་༧གོང་ས་མཆོག་གི་འཁྲུངས་སྐར་ཉིན་གླུ་གཞས་བཏང་བར། རང་ཉིད་བཟུང་བཏང་རུང་འགྱོད་པ་མེད་པའི་སེམས་ཐག་བཅད་ཡོད་ཅེས་བརྗོད་འདུག
གཤམ་ནི་ཨེ་ཤ་ཡ་རང་དབང་རླུང་འཕྲིན་ཁང་གི་གསར་འགོད་པ་དཔལ་ལྡན་རྒྱལ་དང་ཀུན་དགའ་སྒྲོལ་མ་གཉིས་ཀྱིས་ཁ་བརྡ་བྱས་པ་ཡིག་ཐོག་ཏུ་ཕབས་པ་ཡིན།
དཔལ་ལྡན་རྒྱལ། ཁྱེད་རང་ཀུན་དགའ་སྒྲོལ་མ་ཡིན་ནམ།
ཀུན་དགའ་སྒྲོལ་མ། ཡིན་ཡིན། བདེ་མོ།
དཔལ་ལྡན་རྒྱལ། ངའི་མིང་ལ་དཔལ་ལྡན་རྒྱལ་ཟེར་གྱིན་ཡོད།
ཀུན་དགའ་སྒྲོལ་མ། རེད་རེད། བཀྲ་ཤིས་བདེ་ལེགས།
དཔལ་ལྡན་རྒྱལ། ཀུན་དགའ་སྒྲོལ་མས་༧གོང་ས་མཆོག་གི་འཁྲུངས་སྐར་གླུ་ཞིག་བླངས་འདུག
ཀུན་དགའ་སྒྲོལ་མ། ཡོད་ཡོད།
དཔལ་ལྡན་རྒྱལ། ཨོ་རེད། གླུ་དེ་ནམ་བླངས་པ་དང་དེའི་དོན་དག་ཅིག་ཤོད་དང་།
ཀུན་དགའ་སྒྲོལ་མ། གླུ་དེ་བླངས་ནས་ཉིན་བཅུ་གྲངས་ཤིག་ཕྱིན་སོང་།
དཔལ་ལྡན་རྒྱལ། རེད་རེད། ཁྱེད་ཚོའི་གླུ་དེའི་དོན་དག་གཙོ་བོ་གང་དང་གང་བཤད་ཡོད།
ཀུན་དགའ་སྒྲོལ་མ། དེའི་དོན་དག་༧རྒྱལ་པ་རིན་པོ་ཆེ་ས་མཆོག་གི་འཁྲུངས་སྐར་ལ་ཕུལ་བའི་གླུ་ཞིག་ཡིན། གཙོ་བོ་ཁོང་ཚང་ལ་བསྟོད་པའི་གླུ་ཞིག་རེད།
དཔལ་ལྡན་རྒྱལ། སྤྱིར་༧རྒྱལ་པ་རིན་པོ་ཆེ་མཆོག་གི་སྐོར་ལ་གླུ་བླངས་པ་དང་བསྟོད་པ་བྱས་ན། བོད་ནང་གི་མི་ཚོར་དཀའ་ངལ་འཕྲད་ཀྱིན་འདུག ཁྱེད་ཚོར་དཀའ་ངལ་འཕྲད་རྒྱུར་མི་སྐྲག་གམ།
ཀུན་དགའ་སྒྲོལ་མ། མི་སྐྲག་གི ད་དྲག་གི་རེད། ལས་རྒྱུ་གང་ཡང་ཡོད་ནི་མ་རེད། གཙོ་བོ་རང་གི་རྩ་བའི་བླ་མ་༧གོང་ས་མཆོག་གི་ཆེད་དུ་འཇུ་བ་དང་དོན་དག་གང་བྱུང་ཡང་། བྱེད་རྒྱུ་གང་ཡང་ཡོད་པ་མ་རེད། སྐྲག་གི་མི་འདུག ༼ གད་མོ་བཅས། ༽
དཔལ་ལྡན་རྒྱལ། ༧རྒྱལ་པ་རིན་པོ་ཆེ་དགུང་ལོ་ ༧༥ ཕེབས་ཟིན་པ་རེད། བོད་ནང་གི་མི་མང་པོ་ཞིག་ཁོང་ལ་འཇལ་རྒྱུའི་འདོད་པ་ཤུགས་ཆེན་པོ་རེད། ཁྱེད་ཀྱི་ངོས་ནས་ཀྱང་༧རྒྱལ་པ་རིན་པོ་ཆེར་མཇལ་ཐུབ་རྒྱུའི་རེ་བ་བྱེད་ཀྱིན་ཨེ་ཡོད།
ཀུན་དགའ་སྒྲོལ་མ། རེ་བ་ཡོད། ཁོང་ཚང་ལ་གཅིག་མཇལ་ཐུབ་ན་བསམ་པའི་རེ་བ་ཧ་ཅང་ཆེ་གི། ཡིན་ནའང་། དེང་སྐབས་ཡར་མར་འགྲོ་རྒྱུར་ཧ་ཅང་བཙན་གི། དེར་བརྟེན་འགྲོ་འདུག་གང་ཡིན་རུང་དཀའ་མོ་རེད། དེ་མ་གཏོགས་རེ་བ་ཧ་ཅང་ཡོད། ད་ཐེངས་ཡིན་ནའང་༧རྒྱལ་པ་རིན་པོའི་འཁྲུངས་སྐར་ལ་གླུ་དེ་འདྲ་བླངས་ན། ཨེ་ཉན་མི་ཉན་ལབ་ཀི་འདུག ཡིན་ནའང་། མི་ཉན་རྒྱུ་མི་འདུག་ལབ་པ་ཡིན། རང་ཉིད་བཟུང་སོང་རུང་འགྱོད་པ་མེད་ནི་བྱས་ཡོད།
དཔལ་ལྡན་རྒྱལ། རེད། ཁྱོད་ཀྱིས་བཤད་ན་ད་ཐེངས་༧རྒྱལ་པ་རིན་པོ་ཆེའི་འཁྲུངས་སྐར་ལ་གླུ་བླངས་པ་འདིས། རང་ཉིད་བཟུང་ན་བཟུང་། འགྱོད་པ་མེད་ཟེར་བ་རེད་དམ།
ཀུན་དགའ་སྒྲོལ་མ། རེད་རེད། ང་ལ་འགྱོད་པ་གང་ཡང་མེད། རང་གིས་སྔོན་ནས་བསམ་བློ་བཏང་བསྡད་དེ་ཁོང་གི་འཁྲུངས་སྐར་གྱི་ཉིན་མོར་གླུ་ཞིག་ལེན་ཐུབ་སོང་ན། དེ་ནས་བཟུང་སོང་ན། ག་རེ་བྱས་ནའང་འགྱོད་པ་མེད་བསམ་ནས་གླུ་དེ་ཕུལ་བ་ཡིན།
དཔལ་ལྡན་རྒྱལ། ཡ་ཡ། ཞོལ་ནས་ཀུན་དགའ་སྒྲོལ་མའི་འཁྲུངས་སྐར་ལ་གླུ་དབྱངས་བླངས་ཡོད་པར་ཉན་རོགས་ཞུ།
༼ཆོས་མདོ་སྔགས་རྒྱ་གར་ཡུལ་ནས་དར།
ལུང་འཆད་ཉན་གངས་ཅན་བོད་ནས་རྒྱས།
གང་གི་གདུལ་བྱ་འཛམ་གླིང་ཀུན་ལ་ཁྱབ།
ཆོས་བསྟན་པ་དར་བའི་གླུ་ཞིག་ལེན།
རྗེ་བླ་མ་ཨ་མདོའི་ཡུལ་ནས་འཁྲུངས།
སྐུའི་མཛད་འཕྲིན་རྒྱ་གར་ཡུལ་ནས་རྒྱས།
མཚན་སྙན་གྲགས་འཛམ་གླིང་ཀུན་ལ་ཁྱབ།
ཁྱེད་སྐུ་ཚེ་བརྟན་པའི་གླུ་ཞིག་ལེན།
ང་གླུ་བ་གངས་ཅན་བོད་ནས་ཡོང་།
ངག་སྙན་མོ་འདིར་ཚོགས་ཁྲོམ་ལ་བླངས།
བཀྲ་ཤིས་བའི་གངས་ཅན་ལྗོངས་ལ་ཁྱབ།
བོད་གཞིས་བྱེས་འཛོམས་པའི་གླུ་ཞིག་ལེན།
བཀྲ་ཤིས་བའི་གངས་ཅན་ལྗོངས་ལ་ཁྱབ།
བོད་གཞིས་བྱེས་འཛོམས་པའི་གླུ་ཞིག་ལེན།༽
དཔལ་ལྡན་རྒྱལ། དེ་རིང་ཀུན་དགའ་སྒྲོལ་མ་ལགས་ཀྱིས་ཁ་པར་བརྒྱུད་ང་ཚོ་མཉམ་དུ་སྐད་ཆ་བཤད་པར་ངས་བཀའ་དྲིན་ཆེ་ཞུ་གི་ཡོད།
ཀུན་དགའ་སྒྲོལ་མ། ཨོ་ཡ་བཀའ་དྲིན་ཆེ། ཚེ་རིང་ལོ་བརྒྱ།
༧གོང་ས་མཆོག་གི་འཁྲུངས་སྐར་ཉིན་ཕུལ་བའི་གླུ་གཞས་ཀྱི་བརྙན་འཕྲིན་ཐུང་ངུ་དེའི་མགོར། ༧གོང་ས་སྐྱབས་མགོན་ཆེན་པོ་མཆོག་དགུང་གྲངས་དོན་ལྔར་ཕེབས་པའི་འཁྲུངས་སྐར་ལ་རྟེན་འབྲེལ་ཞུ། ཞེས་བྲིས་ཡོད་ལ། བརྙན་འཕྲིན་ངོ་སྤྲོད་པ་གཟི་བརྗིད་སྒྲོལ་མ་དང། གཞས་གཏོང་མཁན་ཀུན་དགའ་སྒྲོལ་མ་དང་། གཙང་མཆོད་རྟེན་གཉིས་ཡིན།
ཕབ་བཤུ་བ། ཨ་རིག་འགྱུར་མེད།
མི་རིགས་ཀྱི་དཔའ་པོ་རེད།
གཞིས་ལུས་བོད་མའི་སྙིང་སྟོབས་ལ་རྗེས་སུ་ཡི་རང་ཞུ།
ཕ་ཡུལ་གྱི་སྤུན་ཟླ་རྣམ་པར་སྙིང་ཐག་པ་ནས་ཡི་རངས་དང་ཐུགས་རྗེ་ཞུ།
གཤམ་ནི་གཙང་མཆོད་རྟེན་གྱིས་འཁྲུངས་སྐར་ཉིན་བླངས་པའི་གླུའི་གཞས་ཚིག་རེད། ཁ་བརྡ་ལས་བཤུ་འགོད་བྱས།
སྐུའི་འཁྲུངས་སྐར་བསུ་བའི་གླུ་ཞིག་ལེན།
ཆོས་མདོ་སྔགས་རྒྱ་གར་ཡུལ་ནས་དར།
ལུང་འཆད་ཉན་གངས་ཅན་བོད་ནས་རྒྱས།
གང་གི་གདུལ་བྱ་འཛམ་གླིང་ཀུན་ལ་ཁྱབ།
ཆོས་བསྟན་པ་དར་བའི་གླུ་ཞིག་ལེན།
རྗེ་བླ་མ་ཨ་མདོའི་ཡུལ་ནས་འཁྲུངས།
སྐུའི་མཛད་འཕྲིན་རྒྱ་གར་ཡུལ་ནས་རྒྱས།
མཚན་སྙན་གྲགས་འཛམ་གླིང་ཀུན་ལ་ཁྱབ།
ཁྱེད་སྐུ་ཚེ་བརྟན་པའི་གླུ་ཞིག་ལེན།
ང་གླུ་བ་གངས་ཅན་བོད་ནས་ཡོང་།
ངག་སྙན་མོ་འདིར་ཚོགས་ཁྲོམ་ལ་བླངས།
བཀྲ་ཤིས་བའི་གངས་ཅན་ལྗོངས་ལ་ཁྱབ།
བོད་གཞིས་བྱེས་འཛོམས་པའི་གླུ་ཞིག་ལེན།
བཀྲ་ཤིས་བའི་གངས་ཅན་ལྗོངས་ལ་ཁྱབ།
བོད་གཞིས་བྱེས་འཛོམས་པའི་གླུ་ཞིག་ལེན།
ང་ཚོ་ཚང་མས་ཁྱེད་ཀྱི་འཁྲུངས་སྐར་བསུ།
ང་ཚོའི་ཕ་ལོ་བྱང་ཆུབ་སེམས་དཔའ་ཡིན།
བྱམས་དང་སྙིང་རྗེ་ཅན་གྱི་རིགས་རྒྱུད་ཡིན།
ཆོས་དང་དགེ་བར་འབད་པའི་མི་རིགས་ཡིན།
ང་ཚོ་ཚང་མ་གདོང་དམར་བོད་པ་ཡིན།
ང་ཚོ་ཚང་མས་ཁྱེད་ཀྱི་འཁྲུངས་སྐར་བསུ།
ང་ཚོའི་མ་ལོ་བྲག་གི་སྲིན་མོ་ཡིན།
དཔའ་དང་སྙིང་སྟོབས་ཅན་གྱི་རིགས་རྒྱུད་ཡིན།
ཐབས་དང་བརྩོན་འགྲུས་ཅན་གྱི་མི་རིགས་ཡིན།
ང་ཚོ་ཚང་མ་གདོང་དམར་བོད་པ་ཡིན།
ང་ཚོ་ཚང་མས་ཁྱེད་ཀྱི་འཁྲུངས་སྐར་བསུ།
ང་ཚོའི་ཕ་ས་གངས་ལྗོངས་ཕྱུག་མོ་ཡིན།
གངས་སེང་དཀར་མོར་དགའ་བའི་རིགས་རྒྱུད་ཡིན།
འཛམ་གླིང་ཡང་རྩེ་སྲུང་བའི་མི་རིགས་ཡིན།
ང་ཚོ་ཚང་མ་གདོང་དམར་བོད་པ་ཡིན།
ང་ཚོ་ཚང་མས་ཁྱེད་ཀྱི་འཁྲུངས་སྐར་བསུ།
ང་ཚོའི་སྐྱབས་མགོན་ཡིད་བཞིན་ནོར་བུ་ཡིན།
ཞི་བདེ་ལས་ལ་བྲེལ་བའི་རིགས་རྒྱུད་ཡིན།
ལས་དང་རྒྱུ་འབྲས་བརྩི་བའི་མི་རིགས་ཡིན།
ང་ཚོ་ཚང་མ་གདོང་དམར་བོད་པ་ཡིན།
ང་ཚོ་ཚང་མས་ཁྱེད་ཀྱི་འཁྲུངས་སྐར་བསུ།
ང་ཚོའི་ཕ་མཁར་ཕོ་བྲང་དམར་པོ་ཡིན།
གངས་ལྗོངས་འདི་ཡི་གཞི་འཛིན་དང་པོ་ཡིན།
རིག་གནས་སྣ་མང་འཛོམས་པའི་མི་རིགས་ཡིན།
ང་ཚོ་ཚང་མ་གདོང་དམར་བོད་པ་ཡིན།
ང་ཚོ་ཚང་མས་ཁྱེད་ཀྱི་འཁྲུངས་སྐར་བསུ།
གཞིས་ལུས་བོད་མའི་སྙིང་སྟོབས་ལ་དད་པ་ཤོར།
ངོ་མ་བོད་ཀྱི་སྐྱེད་མ་རེད་ཡ
ཨ་རོགས་ཚོ་
ད་སྐྱིད་ལ་ཉལ་ནས་འདུག་རེན་ཞིག་རེད་དམ