ཉེ་ཆར་སྤྲུལ་སྐུ་བསྟན་འཛིན་བདེ་ལེགས་ཀྱི་སྲིང་མོ་གཉིས་དང་། བུད་མེད་གཞན་ལྔ་ཁོང་ལ་ཐུག་འཕྲད་བྱེད་པར་ཕྱིན་འདུག་ཀྱང་། ཐུག་འཕྲད་བྱེད་དུ་བཅུག་མི་འདུག སྐབས་དེར་བུད་མེད་དེ་དག་གིས་སྲིད་གཞུང་ལ་གནད་དོན་གསུམ་ཞུས་འདུག
ལོ་སྔོན་མའི་ཕྱི་ཟླ་ ༡༢ ནང་ལི་ཐང་རྫོང་དང་ཉག་ཆུ་རྫོང་གི་མི་མང་བརྒྱ་ཕྲག་མང་མོ་ཤང་དང་རྫོང་དུ་སོང་ནས། སྤྲུལ་སྐུལ་བསྟན་འཛིན་བདེ་ལེགས་ཁོང་འཛིན་བཟུང་བྱས་ནས་ལོ་བརྒྱད་ཕྱིན་ཡོད་ལ། ཁོང་ད་ལྟ་དགུང་ལོ་ ༦༠ ཉེ་བ་དང་སྙིང་རླུང་གི་སྙུང་གཞི་ཡོད་སྟབས། རབ་ཡིན་ན་གློད་གྲོལ་དང་། དེ་མིན་འགན་ལེན་འོག་བཙོན་དུ་བཞུགས་མི་དགོས་པར་ཕ་ཡུལ་དུ་བཞུགས་ཆོག་པའི་བདེ་སྡུག་ཞུས་ཡོད།
བདེ་སྡུག་ཞུ་མཁན་གྱི་མི་མང་གིས་ཨུ་ཚུགས་མཐར་སྐྱེལ་བྱས་པ་དང་། ངོ་རྒོལ་ཤུགས་ཆེར་བྱས་མཐར། སྐབས་དེར་ཕྱིན་ཆད་ཟླ་རེའི་ནང་ལི་ཐང་རྫོང་དང་ཉག་ཆུ་རྫོང་གི་གཉེན་ཉེ་གཉིས་རེ་ཁོང་ལ་མཇལ་ཆོག་སྐོར་བརྗོད་ཡོད།
དེར་བརྟེན་འདི་ལོའི་ཟླ་བཞི་བའི་ནང་རིན་པོ་ཆེ་ཁོང་གི་སྲིང་མོ་གཉིས་ཁོང་དང་མཇལ་འཕྲད་བྱུང་ཡོད་ལ། སྐབས་དེར་ཁོང་གི་སྲིང་མོ་གཉིས་ཀྱིས་རིན་པོ་ཆེའི་སྐུ་གཟུགས་བདེ་ཐང་མེད་སྐོར་བརྗོད་ཡོད།
དེའི་རྗེས་ཟླ་ལྔ་བའི་ནང་བུད་མེད་ལྔ་ཁོང་ལ་མཇལ་འཕྲད་བྱེད་པར་ཕྱིན་ཡང་མཇལ་འཕྲད་ཀྱི་གོ་སྐབས་བྱུང་མེད།
ཁ་སང་གྲྭ་སེར་སྨད་བློ་དགའ་ལགས་ཀྱིས་འདི་གའི་གསར་འགོད་པར་གནས་ཚུལ་མཁོ་སྤྲོད་གནང་དོན། ཟླ་འདིའི་ཕྱི་ཚེས་ ༡༡ དང་ ༡༢ ཡས་མས་རིན་པོ་ཆེའི་སྲིང་མོ་གཉིས་དང་གཞན་བུད་མེད་ལྔ་བཅས། རིན་པོ་ཆེར་མཇལ་འཕྲད་བྱེད་དུ་ཕྱིན་འདུག་ཀྱང་། ཁོང་ཚོར་རིན་པོ་ཆེར་མཇལ་རྒྱུའི་གོ་སྐབས་བྱུང་མི་འདུག
འོན་ཀྱང་སྐབས་དེར། བུད་མེད་དེ་ཚོས་ཟི་ཁྲོན་ཞིང་ཆེན་གྱི་སྲིད་གཞུང་ལ་རེ་སྐུལ་དོན་ཚན་གསུམ་བཤད་འདུག
དོན་ཚན་དེ་གསུམ་ནི།
༡ རིན་པོ་ཆེར་དྲང་བདེན་གྱི་ཐོག་ནས་ཁོང་གི་ནག་ཉེས་སྐོར་ལ་བསྐྱར་དུ་ཞིབ་འཇུག་བྱེད་དགོས་ཀྱི་ཡོད།
༢ ཟླ་བཞི་བའི་ནང་རིན་པོ་ཆེ་ཁོང་སྲིང་མོ་གཉིས་དང་ཐུག་འཕྲད་གནང་སྐབས། ངས་རང་གི་སྔ་ཕྱི་བར་གསུམ་གྱི་གནད་དོན་ཡི་གེར་བཀོད་ནས་ཟླ་ལྔ་བའི་ནང་རྒྱ་ནག་གི་སྡེ་ཚན་ ༢༦ ལ་འབུལ་རྒྱུའི་ཐག་གཅོད་བྱས་ཡོད། དེའི་ཐད་ལ་ཁྱེད་ཚོས་ཞིབ་འཇུག་དང་མ་འོངས་པར་ཞུ་གཏུགས་བྱས་ན་ཕན་ཐོགས་ཡོང་གི་རེད་ཅེས་གསུངས་པར། གནད་དོན་དེ་ད་ལྟ་གང་འདྲ་ཆགས་ཡོད་དམ།
༣ ཉེ་ཆར་ཁོང་གི་སྲིང་མོ་གཉིས་ཁོང་དང་ཐུག་འཕྲད་སྐབས། སྨན་པས་ཁོང་ལ་སྐད་ཆ་བཤད་སྐབས་ཧ་ཅང་དགའ་དྲགས་པ་དང་སྐྱོ་དྲགས་པའི་རིགས་ཀྱི་སྐད་ཆ་བཤད་ཆོག་གི་མ་རེད། དེ་ནི་ཁོང་ལ་སྙུང་གཞི་ལྕི་མོ་ཡོད་སྟབས་ཡིན་ཞེས་བཤད་ཡོད་སྟབས། གལ་སྲིད་རིན་པོ་ཆེ་ཁོང་གི་སྐུ་གཟུགས་གནས་སྟངས་ཡག་པོ་མེད་པ་དང་སྐུ་སྙུང་གི་ཡོད་ན། རྒྱ་ནག་གི་ཆབ་སྲིད་བཙོན་མར་ཕྱི་ཕྱོགས་ཀྱི་སྨན་ཁང་ཆེ་ཁག་ནས་ནད་བསྟེན་བྱེད་ཆོག་པའི་ཐོབ་ཐང་ཡོད་སྟབས། ཁོང་སྨན་ཁང་དུ་ཁྲིད་ནས་སྨན་བཅོས་གནང་འཇུག་དགོས་ཞེས་ཞུས་འདུག
ཡིན་ནའང་། གནད་དོན་དང་པོ་དེའི་ཐད་དུ་སྲིད་གཞུང་གིས་འདི་ལྟར་བཤད་འདུག རིན་པོ་ཆེ་ཁོང་གི་གནད་དོན་ཐག་གཅོད་བྱས་ནས་ལ་བརྒྱབ་ལུང་བརྒལ་ཚར་ཡོད་སྟབས། གནད་དོན་དེ་བསྐྱར་ལོག་བྱེད་ཤེས་ཀྱི་མ་རེད་ཟེར།
གནད་དོན་གཉིས་པར། ང་ཚོས་རིན་པོ་ཆེས་དེ་ལྟ་བུའི་སྙན་ཞུའི་ཡི་གེ་ཞིག་བྲིས་ཡོད་པར་གཏན་ནས་མཐོང་ཐོས་མ་བྱུང་། ཞེས་ཁས་ལེན་བྱས་མི་འདུག
གནད་དོན་གསུམ་པར། ཁྱེད་ཚོར་བཙོན་ཁང་གི་སྨན་པས་རིན་པོ་ཆེའི་སྐུ་གཟུགས་བདེ་བོ་མེད་སྐོར་བཤད་པ་བདེན་མིན། ང་ཚོས་ཟླ་གཉིས་རིང་བརྟག་དཔྱད་ཞིབ་འཇུག་བྱ་རྒྱུ་ཡིན་ལ། དེའི་རྗེས་ལན་རྒྱག་གི་ཡིན་ཞེས་བཤད་འདུག
དེ་བཞིན་ཟླ་གཉིས་ཀྱི་རྗེས་ནས་ཁོང་གི་སྐུ་གཟུགས་ཀྱི་གནས་སྟངས་སྐོར་ལ་བརྟག་དཔྱད་བྱས་འབྲས་བརྗོད་སྐབས། འབྲེལ་ཡོད་ནང་མི་ཡོང་དགོས་ཀྱི་ཡོད་སྐོར་བརྗོད་པར། ཁོང་གི་སྲིང་མོ་གཉིས་ཀྱིས་ཁོང་གཉིས་ཡོང་རྒྱུར་ཁས་ལེན་བྱས་འདུག
གོང་གསལ་དོན་ཚན་གསུམ་འབུལ་མཁན་གྱི་བུད་མེད་དེ་ཚོ་རིན་པོ་ཆེར་མཇལ་མ་བཅུག་པར་ཟླ་འདིའི་ཕྱི་ཚེས་ ༡༦ ཉིན་ཕྱིར་ལོག་བྱས་ཡོད་འདུག
རིན་པོ་ཆེ་ཁོང་གི་སྲིང་མོ་གཉིས་ནི་རང་ལོ་ ༥༧ ཡིན་པའི་བསོད་ནམས་བདེ་སྐྱིད་དང་། རང་ལོ་ ༤༧ ཡིན་པའི་སྒྲོལ་དཀར་གཉིས་ཡིན།
སྤྲུལ་སྐུ་བདེ་འཛིན་བདེ་ལེགས་ཀྱི་སྐུའི་སྙུང་གཞིའི་སྐོར་ལ་ཉེ་ཆར་བོད་རང་དབང་སློབ་ཕྲུག་ཚོགས་པ་དང་བོད་ཀྱི་དགུ་བཅུ་གསུམ་ལས་འགུལ་ཚོགས་པ། བོད་ཀྱི་བུད་མེད་ལྷན་ཚོགས་ཀྱིས་མཚན་རྟགས་བཞི་ཁྲི་བསྡུ་རུབ་ཀྱིས་རྒྱ་ནག་ལ་གཟུགས་འཕྲིན་ (༡) བརྒྱུད་ནས་བཏང་ཡོད།
གཟུགས་འཕྲིན་དེ་དག་རྒྱ་ནག་དབུས་ཆབ་སྲིད་སྡེ་ཁག་གི་རྒྱུན་ལས་དང་ཁྲིམས་སྲིད་འཐུས་ཚོགས་ཀྱི་ཚོགས་མི་ཀྲིག་ཡོན་ཁང་གཙོས། ཕྱི་རྒྱལ་དུ་ཡོད་པའི་རྒྱ་ནག་གི་གཞུང་ཚབ་ཁང་བཅས་ལ་ཕུལ་ཡོད།
དེའི་ནང་དུ་ད་དུང་། རྒྱ་ནག་གཞུང་གིས་སྤྲུལ་སྐུ་བསྟན་འཛིན་བདེ་ལེགས་མཆོག་ལ་དྲང་བདེན་མིན་པའི་ཁྲིམས་ཐག་བཅད་པ་དེར་བསྐྱར་ཞིབ་བྱ་དགོས་པའི་རེ་བ་དང་འབོད་སྐུལ་ཞུས་ཡོད།
གསར་འགྱུར་སྤེལ་མཁན། ཨ་རིག་འགྱུར་མེད།
༡ གཟུགས་འཕྲིན། Fax; facsimile
རྒྱ་བོད་དབྱིན་གསུམ་གསར་བྱུང་རྒྱུན་བཀོལ་མིང་འཛོད་ཀྱི་ཤོག་ངོས་ ༨༡ སྟེང་གསལ།
