རང་རང་གི་ལྟ་བའི་ས་མཚམས་ཕྱེ་རོགས་ཟེར།

སྒྲིག་འཛུགས་གང་འདྲ་ཞིག་ཡིན་རུང་སོ་སོས་རྒྱུ་མཚན་ལ་བལྟས་ཏེ་ལྟ་བ་དང་ལངས་ཕྱོགས་མི་འདྲ་བ་ཞིག་བཟུང་ཡོད་སྟབས། དེ་བཞིན་དུ་བསམ་བློ་གཏོང་སྟངས་དང་ཕྱག་ལས་གནང་སྟངས་ཀྱང་མི་འདྲ་བ་ཞིག་དགོས་པ་རེད་ཅེས་བོད་མི་མང་སྤྱི་འཐུས་ཚོགས་གཙོ་མཆོག་གིས་གསུངས་ཡོད།

དབུ་མའི་ལམ་མི་མང་ལས་འགུལ་ཁང་གི་སྐབས་གཉིས་པའི་འགན་འཛིན་ལྷན་ཚོགས་ཐེངས་དང་པོ་དེ་དེ་རིང་ཞོགས་པར་ངྷ་སའི་སྟོད་པ་སྐྱིད་སྡུག་ཚོགས་ཁང་དུ་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གཙོས། སྤྱི་འཐུས་དང་སྤྱི་ཟུར། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། དེ་བཞིན་དབུ་མའི་ལམ་ལས་འགུལ་ཁང་གི་རྒྱུན་ལས་དང་རྒྱུན་ལས་ཟུར་པ། ས་གནས་ཁག་ ༡༨ ནས་ཕེབས་པའི་འབྲེལ་མཐུད་པ་ལྷན་འཛོམས་ཐོག་ཚོགས་འདུ་དབུ་འབྱེད་གནང་ཡོད། 

ཚོགས་འདུའི་ཐོག་མར་དབུས་འབྲེལ་མཐུད་པ་སྨན་པ་མཁྱེན་རབ་ལགས་ཀྱིས་དབུ་མའི་ལས་འགུལ་ཁང་གི་ཐོག་མའི་དམིགས་ཡུལ་དང་ལས་འགུལ་ཁང་ངོ་སྤྲོད་གནང་བ་དང་འབྲེལ་གཏམ་བཤད་གནང་དོན། འདས་པའི་མི་ལོ་གཉིས་རིང་ང་ཚོ་ལས་འགུལ་ཁང་གིས་༸གོང་ས་མཆོག་གི་དགོངས་གཞི་དབུ་མའི་ལམ་གྱི་ངོ་བོ་དང་དམིགས་ཡུལ། དགེ་ཕན་སོགས་བོད་ཕྱི་ནང་གཉིས་ཀྱི་བོད་མི་གཙོས་རྒྱ་རིགས་མི་མང་ལ་རྒྱའི་སྐད་ཡིག་ཐོག་ཡིག་བསྒྱུར་གྱིས་ངོ་སྤྲོད་གནང་བར་མ་ཟད། ༸གོང་མཆོག་གི་འཚེ་མེད་ཞི་བའི་ལས་འགུལ་ཐད་གསལ་བཤད་དང་ཁྱབ་བསྒྲགས་ཀྱི་ལས་འགུལ་སྤེལ་ཡོད་ལ། ད་ལྟའི་བར་རྒྱ་རིགས་མང་པོས་ང་ཚོའི་ལས་དོན་ལ་དགའ་མོས་དང་རྒྱབ་སྐྱོར་གནང་ཡོད། དེ་བཞིན་བཙན་བྱོལ་སྤྱི་ཚོགས་ཁྲོད་དུའང་ང་ཚོའི་དབུས་རྒྱུན་བསྐོར་བསྐྱོད་ཀྱིས་ས་གནས་ཁག་ ༢༥ ནང་འབྲེལ་མཐུད་ཁང་གསར་འཛུགས་ཀྱི་ལས་གཞི་ལེགས་འགྲུབ་བྱུང་བ་ཡོད་ལ། དེ་དང་འབྲེལ་མི་མང་ནང་ཁུལ་ཏུ་དབུ་མའི་ལམ་གྱི་གོ་རྟོགས་སྤེལ་བའི་ལས་འགུལ་དང་། དབུ་མའི་ལམ་དང་འབྲེལ་བའི་ཡིག་ཆ་འགྲེམས་སྤེལ་སོགས་བྱས་ཏེ་བཙན་བྱོལ་སྤྱི་ཚོགས་ཁྲོད་དབུ་མའི་ལམ་གྱི་སྲིད་བྱུས་དང་འབྲེལ་བའི་ལས་འགུལ་འདྲ་མིན་ཐོག་གྲུབ་འབྲས་གང་འཚམ་ཐོན་ཡོད་ཟེར།

ཡང་ཁོང་གིས། མ་འོངས་པར་ང་ཚོའི་ལས་འགུལ་ཁང་གི་ངོས་ནས་དབུ་མའི་ལམ་དང་འབྲེལ་བའི་རྩོམ་ཡིག་དྲ་རྒྱའི་བརྒྱུད་ལམ་ནས་རྒྱ་ནག་ནང་ཁུལ་གྱི་མི་མང་དང་བོད་ནང་གི་མི་མང་ལ་མཁོ་སྤྲོད་ཀྱིས་བོད་ཕྱི་ནང་གཉིས་ཀྱི་འབྲེལ་ལམ་དང་ལྷག་པར་དུ་རྒྱ་རིགས་མི་མང་ལ་འབྲེལ་ལམ་བཟང་དུ་བཏང་སྟེ། དབུ་མའི་ལམ་དང་འབྲེལ་བའི་ལས་འགུལ་གྱི་གཞི་རྒྱ་ཆེ་རུ་གཏོང་འཆར་ཡོད་ཅེས་བརྗོད་བྱུང་།

དེ་བཞིན་དབུས་འབྲེལ་མཐུད་པ་སྤྱི་ཟུར་དང་ཟུར་ཡོན་ཏན་རྒྱ་མཚོ་ལགས་ཀྱིས་འདས་པའི་ལོ་གཅིག་དང་ཕྱེད་ཀའི་རིང་གི་ལས་འགུལ་ཁང་འདི་ཉིད་ཀྱི་ལོ་འཁོར་ལས་བསྡོམས་དང་རྩིས་ཁྲ་སྙན་སེང་ཞུས་ཡོད།

མཐའ་མར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་དབུ་མའི་ལམ་གྱི་དགོས་པ་དང་དམིགས་ཡུལ་ངོ་སྤྲོད་དང་འབྲེལ་གསུང་དོན། ད་ལྟའི་ཆར་ང་ཚོའི་སྤྱི་ཚོགས་ནང་བཀའ་སྤྱི་གཉིས་ཀྱི་འོས་བསྡུའི་ཐད་ཚགས་པར་ཁག་དང་བརྒྱུད་ལམ་ཁག་ཏུ་གནས་ཚུལ་མང་པོ་ཐོན་ཡོང་གི་ཡོད་པ་རེད། ང་རང་གིས་དེ་དག་ལ་བསྐྱར་ཞིབ་བྱས་སྐབས།  ང་རང་ཚོའི་སྤྱི་ཚོགས་ནང་ཆབ་སྲིད་ཀྱི་ལྟ་བ་དང་ལངས་ཕྱོགས་དེའི་ས་མཚམས་ཏག་ཏག་ཟིན་གྱི་ཡོད་ན་བསམ་གྱིན་འདུག་ལ། མི་ཁ་ཅིག་ལ་ཆབ་སྲིད་ཀྱི་ལྟ་བ་བརྟན་པོ་ཞིག་ཨེ་ཡོད་ན་བསམ་པ་ཞིག་ཀྱང་དྲན་འོང་གི་འདུག  ད་ལྟའི་ཆར་སྔོན་མ་རང་བཙན་གྱི་ལྟ་བ་འཁུར་མཁན་གྱི་སྒྲིག་འཛུགས་ཁ་ཤས་ཀྱིས་རང་ཐག་རང་གཅོད་དང་དབུ་མའི་ལམ་གྱི་ལྟ་བའི་ཐོག་འཆར་གཞི་བཏོན་ཡོད་མཁན་ཡོད་ལ།  དབུ་མའི་ལམ་ཡིན་ཟེར་མཁན་གྱིས་རང་ཐག་རང་གཅོད་ཀྱི་ལྟ་བ་འཁུར་མཁན་ལ་རྒྱབ་སྐྱོར་གནང་མཁན་དེ་འདྲ་ཡང་ཡོང་གི་ཡོད། ཡང་རང་བཙན་བཤད་བསྡད་མཁན་གྱི་རིགས་ཀྱིས་རྒྱལ་བ་རིན་པོ་ཆེའི་བཀའ་བསྒྲུབ་ཀི་ཡིན་མཁན་ཟེར་མཁན་དེ་འདྲ་ཡང་ཡོད་པ་རེད། དབུ་མའི་ལམ་གྱི་ཚགས་པར་ཡིན་ཞེས་བཤད་དེ་དེའི་ནང་རང་བཙན་གྱི་ལྟ་བ་དང་གཞན་པའི་ལྟ་བ་འཁུར་མཁན་དེ་འདྲ་ཡོང་གི་ཡོད་ཟེར།

ཡང་ཁོང་གིས། ང་ཚོའི་སྤྱི་ཚོགས་ནང་རྐུབ་སྟེགས་ཞིག་གི་དོོན་དུ་ལངས་ཕྱོགས་འགྱུར་བ་གཏོང་བཞིན་པ་དང་སྒྲིག་འཛུགས་གང་རུང་ལ་ལངས་ཕྱོགས་ཡོད་མེད་སོགས་ལ་བསམ་བློ་བཏང་ཡོང་དུས།  དབུ་མའི་ལམ་ལས་འགུལ་ཁང་གི་སྒྲིག་སྲོལ་དེས་ལས་འགན་དེ་མང་ཚོགས་ནང་ཧ་ཅང་གལ་ཆེན་པོ་ཞིག་དང་། མ་འོངས་པར་སྒྲིག་འཛུགས་འདིས་མི་མང་ནང་ལས་འགུལ་ཤུགས་ཆེར་སྤེལ་ཏེ་མི་མང་གི་གོ་རྟོགས་དང་། ཆབ་སྲིད་ཀྱི་ལངས་ཕྱོགས་གསལ་བོ་ཞིག་བཟོ་བར་ནུས་པ་ཆེན་པོ་ཞིག་ཐོན་ཡོང་བའི་རེ་བ་དང་ཡིད་ཆེས་ཞིག་བཟུང་ཡོད་ཅེས་གསུངས་བྱུང་།

གཞན་ཡང་ཁོང་གིས།  ༸གོང་ས་མཆོག་གི་བཀའ་དྲིན་ལ་བརྟེན་ནས་ང་ཚོའི་སྤྱི་ཚོགས་ནང་ཚོགས་པ་སྒྲིག་འཛུགས་དང་མི་སྒེར་སོ་སོར་སོ་སོའི་ལྟ་བ་ལངས་ཕྱོགས་བརྗོད་པའི་རང་དབང་ཡོད་ཀྱང་། མི་སྒེར་དང་སྒྲིག་འཛུགས་ཁང་གིས་རང་ཉིད་ཀྱི་ལྟ་བ་དང་ལངས་ཕྱོགས་གང་ཡིན་པ་ཁ་གསལ་མེད་པར་ཕར་སྦྲེལ་ཚུར་སྦྲེལ་བྱས་པ་ཡིན་ན། སྒྲིག་སྲོལ་འདྲ་མིན་ཡོད་ཀྱང་དགོས་པ་ཅི་ཡང་མེད། སྒྲིག་སྲོལ་གང་འདྲ་ཞིག་ཡིན་རུང་རྒྱུ་མཚན་ལ་བལྟས་ཏེ་ལྟ་བ་དང་ལངས་ཕྱོགས་ཤིག་བཟུང་ཡོད་སྟབས།  བསམ་བློ་གཏོང་སྟངས་དང་ཕྱག་ལས་གནང་སྟངས་སོགས་ཀྱང་མི་འདྲ་བ་ཞིག་དགོས་པ་རེད་ཅེས་གསུངས་བྱུང་།

སྤྱི་འཐུས་ཚོགས་གཙོས་ད་དུང་འཛིན་སྐྱོང་བཀའ་ཤག་གི་ངོས་ནས་མི་མང་ལ་རེ་སྐུལ་ཞུས་པའི་དབུ་མའི་ལམ་གྱི་ཡིག་ཆའི་ནང་དོན་འགྲེལ་བཤད་དང་འབྲེལ་དབུ་མའི་ལམ་ལས་འགུལ་ཁང་ལ་སྤྱི་ཟུར་ཐུབ་བསྟན་བསམ་འགྲུབ་ལགས་ཀྱིས་གསར་འཛུགས་གནང་ཡོད་པའི་འབྲེལ་བ་ལས་ཁུངས་ལྟ་བུའི་བོད་ཕྱི་ནང་གཉིས་དང་ལྷག་པར་རྒྱ་རིགས་མི་མང་ལ་༸གོང་ས་མཆོག་གི་དགོངས་དོན་འགྲེལ་བཤད་བྱ་ཐུབ་པའི་ལས་གཞི་རྒྱ་ཆེན་པོ་ཞིག་གསར་འཛུགས་གནང་རྒྱུའི་རེ་བ་དང་འབོད་སྐུལ་ཡང་གནང་བྱུང་།

ཐེངས་འདིའི་དབུ་མའི་ལམ་ལས་འགུལ་ཁང་གི་སྐབས་གཉིས་པའི་འགན་འཛིན་ལྷན་ཚོགས་ཐེངས་དང་པོ་དེ་ཕྱི་ཚེས་ ༣ ནས་ ༥ བར་གྱི་ཉིན་གསུམ་རིང་ཚོགས་འཆར་ཡོད་པ་དང་། དེར་ས་གནས་ ༡༨ ནས་ཕེབས་པའི་ཚོགས་མི་ ༥༠ ལྷག་གིས་ས་གནས་འབྲེལ་མཐུད་ཁང་སོ་སོའི་ལས་བསྡོམས་དང་རྩིས་ཁྲ་སྙན་སྒྲོན་དང་འབྲེལ། སྐབས་སྔོན་མའི་གྲོས་གཞིའི་ཐད་བགྲོ་གླེང་གོ་བསྡུར་དང་སྒྲིག་གཞི་གསར་འཇུག  དེ་བཞིན་གྲོས་ཆོད་གཏན་འབེབས་གནང་རྒྱུ་ཡིན་པ་རེད།

གསར་འགོད་པ། དོན་གོ།