གཞུང་དམངས་རྒྱལ་ཡོངས་ཚོཊ་ཆེན་གྱི་གྲུབ་འབྲས་འདི་རེད།

བོད་གཞུང་དམངས་རྒྱལ་ཡོངས་ཚོགས་ཆེན་ཐེངས་དང་པོ་དེ་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་སྒར་དུ་ཚོགས་ཏེ། རྒྱ་བལ་འབྲུག་གསུམ་གཙོས་པའི་ཕྱི་རྒྱལ་ཡུལ་གྲུ་ཁག་ ༡༥ ཡི་ཚོགས་བཅར་བ་ ༣༣༦ ཙམ་གྱིས་གྲོས་གཞི་ཁག་ ༦ གི་ཐད། ཚོགས་ཆུང་ཁག་ ༨ དུ་བགོས་ཏེ་ཉིན་ ༦ རིང་བགྲོ་གླེང་གོ་བསྡུར་ཞིབ་ལྷུག་གནང་མཐར་ཤོག་ངོས་ ༣༢ དང་དོན་ཚན་ ༡༩༦ ། ཟུར་རྒྱན་གཉིས་བཅས་ཀྱི་སྙན་ཐོ་ཞིག་བཏོན་ཏེ་ཚོགས་ཆེན་རྒྱལ་ཁའི་ངང་མཇུག་སྒྲིལ་ཡོད།

སྤྱི་ནོར་༧གོང་ས་མཆོག་དེ་རིང་སྔ་དྲོའི་ཆུ་ཚོད་ ༡༠ སྟེང་། སྦེལ་ཀོབ་བོད་མིའི་གཞིས་གྲོང་དང་པོའི་སློབ་གྲྭའི་རྩེད་ཐང་དུ་ཐད་འཕུར་གནམ་གྲུ་བརྒྱུད་ཞབས་སོར་བཀོད་ཡོད་ལ། བོད་མི་མང་སྤྱི་འཐུས་ཚོགས་གཙོ་གཞོན་གཉིས་ཀྱིས་གཙོས་པའི་བཀའ་བློན་རྣམ་པ་དང་ས་གནས་གནད་ཡོད་མི་སྣ་མང་པོ་ཕེབས་བསུར་བཅར་ཡོད། དེ་ནས་སེ་ར་བླ་སྤྱིར་གདན་འདྲེན་གྱིས་གསོལ་ཇ་འབྲས་སིལ་འདེགས་འབུལ་ཞུས་ཤིང་། ཉིན་རྒྱབ་ཆུ་ཚོད་ ༢ སྟེང་༧གོང་ས་མཆོག་གིས་དབུས་པའི་དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེ་རྣམ་གཉིས། སེ་ར་བྱེས་སྨད་ཀྱི་མཁན་པོ་རྣམ་གཉིས། བཙན་བྱོལ་བོད་གཞུང་གི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ། བོད་གཞུང་དམངས་རྒྱལ་ཡོངས་ཚོགས་ཆེན་གྱི་ཚོགས་བཅར་བ་ཡོངས། སེ་ར་ཐེག་ཆེན་གླིང་གི་བླ་མ་ལས་སྣེ་དང་གྲྭ་དམངས་བཅས་ལྷན་འཛོམས་ཐོག བཀའ་བློན་ཁྲི་ཚབ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་ཐེངས་འདིའི་ཚོགས་ཆེན་དང་འབྲེལ་བའི་བཀའ་ཤག་གི་གཟིགས་ཚོར་ངོ་སྤྲོད་དང་། བོད་མི་མང་སྤྱི་འཐུས་ཚོགས་གཙོ་མཆོག་གིས་ཚོགས་ཆེན་གྱི་མཐའ་བསྡོམས་སྙན་ཐོ་སྒྲོག་འདོན་བཅས་གནང་ཡོད།

ཆོས་རིག་བཀའ་བློན་མཆོག་གིས་ཐེངས་འདིའི་ཚོགས་ཆེན་ཐོག་གི་བཀའ་ཤག་གི་གཟིགས་ཚོར་སྐོར་གསུངས་དོན། ད་རེབ་ཚོགས་བཅར་བ་ཡོངས་ཀྱིས་གྲོས་གཞི་ཁག་གི་ཐོག་དོ་སྣང་ཆེན་པོས་བགྲོ་གླེང་དང་། དགོངས་འཆར་ཟབ་རྒྱས་གནང་བར་བོད་གཞུང་བཀའ་ཤག་གིས་བཀའ་དྲིན་བླ་མེད་དུ་ཆེ་ཞུ་རྒྱུ་ཡིན། གཞིས་བྱེས་བོད་མི་མང་ཚོགས་ཀྱིས་གཏན་ལ་ཕབ་པའི་དབུ་མའི་ལམ་གྱི་སྲིད་བྱུས་ལ། ཡིད་ཆེས་དང་རྒྱབ་སྐྱོར་བླ་མེད་གནང་འདུག་པས་བཀའ་ཤག་གིས་སྲིད་བྱུས་འདི་ལག་བསྟར་བྱ་རྒྱུའི་སྙིང་སྟོབས་ཆེས་ཆེར་བརྟས་བྱུང་། དབུ་མའི་ལམ་དང་དམངས་གཙོའི་ཐོག་མི་དམངས་ལ་གོ་རྟོགས་ཇེ་མཐོར་གཏོང་དགོས་པའི་བསམ་འཆར་ཤུགས་ཆེན་བྱུང་བ་བཞིན་འཛིན་སྐྱོང་གི་ངོས་ནས་དྲིལ་བསྒྲགས་ཟབ་སྦྱོང་སོགས་ཤུགས་སྣོན་ཞུ་རྒྱུར་སྤྱི་འཐུས་དང་ས་གནས་འབྲེལ་ཡོད། ལྷག་པར་དུ་གཞུང་འབྲེལ་མིན་པའི་སྒྲིག་འཛུགས་དང་། མང་ཚོགས་ཀྱིས་མཉམ་རུབ་ཀྱི་ནུས་པ་འདོན་རྒྱུའི་རེ་སྐུལ་ཞུ་རྒྱུ་ཡིན། གྲོས་གཞི་གཞན་དག་ཐོག་དགོངས་འཆར་ཕེབས་རིགས་ལ། སྤྱི་འཐུས་ལྷན་ཚོགས་ནས་ཕྱོགས་བསྡོམས་ཀྱིས་ལམ་སྟོན་ཕེབས་སྐབས། ལག་བསྟར་ཐུབ་རིགས་ངེས་པར་དུ་ལག་བསྟར་བྱ་རྒྱུ་ཡིན། དགོངས་འཆར་དེ་དག་ལས་མི་ཉུང་བ་ཞིག་དེ་སྔ་ཚོད་ལྟ་བྱས་ཀྱང་གྲུབ་འབྲས་མ་བྱུང་། ཞེས་གསུངས་སོང་།

དེའི་རྗེས་བོད་མི་མང་སྤྱི་འཐུས་ཚོགས་གཙོ་མཆོག་གིས་གཞུང་དམངས་ཚོགས་ཆེན་གྱི་སྙན་ཐོ་ལས་ཆབ་སྲིད་སྐོར་སྒྲོག་སྦྱོང་དང་འབྲེལ། ཐེངས་འདིར་ཚོགས་བཅར་བ་ཁ་ཤས་ཀྱིས་ས་གནས་མང་ཚོགས་ཀྱི་བསམ་འཆར་བསྡུ་རུབ་བྱས་ཏེ་བསྣམས་འདུག ཚོགས་མི་མང་ཆེ་བ་ཐུགས་འདོད་ཚིམ་པ་བྱུང་ཡོད་ཀྱང་རེ་ཟུང་གིས་ཚོགས་ཆུང་རེ་ལ་བརྗོད་གཞི་རེ་བགོས་ཡོད་སྟབས། བརྗོད་གཞི་གཞན་དག་ལ་ཆ་ཤས་ལེན་མ་ཐུབ་པའི་ཐུགས་ཕམ་ཡང་གནང་བྱུང་། ད་རེབ་དགོངས་འཆར་བྱུང་བ་ཁག ངེས་པར་དུ་ལག་བསྟར་བྱ་དགོས་པའི་ཁྲིམས་ཀྱི་ནུས་པ་མེད་ཀྱང་། མ་འོངས་པའི་བཀའ་ཤག་དང་གྲོས་ཚོགས། མི་དམངས་བཅས་ནས་ཐུགས་སྣང་གནང་དགོས་པ་ཞིག་དང་། ཐོག་མ་ནས་བཀའ་སྤྱི་གཉིས་ལ་ལམ་སྟོན་ཡིག་ཆ་ལྟ་བུ་ཞིག་ཏུ་རེ་བ་བརྒྱབ་ཡོད་ལ། མ་འོངས་པར་བཀའ་སྤྱི་གཉིས་ངོས་ནས་ལག་བསྟར་ཐུབ་པའི་རིགས་ངེས་པར་དུ་ལག་བསྟར་བྱ་རྒྱུ་དང་། མ་ཐུབ་པ་དག་ལ་རྒྱུ་མཚན་གསལ་བོ་བཤད་རྒྱུ་ཡོད་པ་ཞིག་བྱ་དགོས་པ་རེད། ཅེས་གསུངས་སོང་།

ཐེངས་འདིའི་བོད་གཞུང་དམངས་རྒྱལ་ཡོངས་ཚོགས་ཆེན་ཐེངས་དང་པོའི་མཐའ་བསྡོམས་སྙན་ཐོའི་ནང་ཆབ་སྲིད་སྐོར་ལ་དོན་ཚན་ ༣༤ བཀོད་ཡོད་པ་དག་ལས། ༧གོང་ས་མཆོག་གིས་ཕྱེད་བགྲེས་ཡོལ་ཡིན་གསུངས་པ་དེ་ལ་དགོངས་བཞེད་ནམ་ཡང་མི་གནང་རྒྱུ་དང་བོད་དོན་བདེན་མཐའ་སེལ་ཐབས་སུ་༧གོང་ས་མཆོག་གིས་ཐག་གཅོད་གང་གནང་ལ་ཤར་སྐྱོད་བྱ་རྒྱུ། དབུ་མའི་ལམ་གྱི་སྲིད་བྱུས་འོག་བོད་དོན་བདེན་མཐའ་གསལ་ཐབས་སུ་མི་དམངས་དང་གཞོན་སྐྱེས་ཚོར་གོ་རྟོགས་སྤེལ་རྒྱུ། དབུ་མ་དང་རང་བཙན་བར་ཕན་ཚུན་གུ་བཤངས་དང་བརྩི་བཀུར་བྱ་རྒྱུ། རྒྱལ་ཁབ་དང་མི་རིགས་ཀྱི་ངོས་འཛིན་སྲ་བརྟན་ཆེད་ཆིག་སྒྲིལ་གྱི་ཉིན་མོ་སྲུང་བརྩི་དགོས་པ། འཛམ་གླིང་གང་སར་གནས་བའི་བོད་རིགས་མཐོ་རིམ་སློབ་མ་རྣམས་ལ་ཆབ་སྲིད་ཀྱི་གོ་རྟོགས་སྤེལ་སླད་རྒྱལ་སྤྱི་རང་བཞིན་གྱི་མཐོ་རིམ་སློབ་མའི་ཚོགས་ཆེན་སྐོང་ཐབས་བྱ་རྒྱུ། གཞུང་འབྲེལ་གྱི་ཆབ་སྲིད་ལས་འགུལ་དག་ཏུ་སྤྱི་འཐུས་གཙོས་པའི་གཞུང་ཞབས་རྣམས་མཉམ་ཞུགས་གནང་དགོས་པ། རྒྱ་རིགས་ཚོར་བསམ་ཚུལ་བརྗེ་ལེན་ཆེད་བོད་རྒྱ་སྐད་ཡིག་གཉིས་ལྡན་གྱི་དྲ་རྒྱ་ཞིག་གསར་བཟོ་དང་། དོན་གཅོད་ཁག་དང་བོད་རྒྱ་འབྲེལ་མོལ་སྐུ་ཚབ་བཅས་སུ་རྒྱ་སྐད་ཤེས་མཁན་དགོས་པ་དང་བོད་རྒྱ་འགྲིག་འདུམ་ཐད་ནུས་ལྡན་གྱི་རྒྱལ་ཁབ་ཅིག་འཚོལ་རྒྱུ་སོགས་ལ་སྤྱི་མོས་བྱུང་འདུག

དམངས་གཙོ་འཕེལ་རྒྱུས་སྐོར་ལ་དོན་ཚན་ ༢༩ ཡོད་དག་ལས། མང་ཚོགས་ཀྱི་མངོན་འདོད་གཙོ་བོར་འཛིན་དགོས་པ་དང་མང་ཚོགས་ཀྱི་དམངས་གཙོའི་གོ་རྟོགས་མཐོ་རུ་གཏོང་དགོས་པ། སྦེལ་ཀོབ་སོགས་སུ་ས་འཐུས་འཛུགས་དགོས་པ་དང་ས་གནས་མགོ་འཛིན་ས་གནས་མི་དམངས་ཀྱིས་ཐད་ཀར་འོས་འདེམས་བྱ་དགོས་པ། སྤྱི་འཐུས་རྣམ་པས་གྲོས་ཚོགས་ལས་རིམ་ནང་ཆ་ཤས་ལེན་དགོས་པ་དང་སྤྱི་ཚོགས་ནང་བཟང་སྤྱོད་སྣེ་ཁྲིད་ཐུབ་དགོས་པ། སྤྱི་འཐུས་ལས་དོན་འགལ་འཛོལ་བྱེད་རིགས་ཕྱིར་འཕུད་གཏོང་དགོས་སོགས་ལ་སྤྱི་མོས་དང་། ཆོལ་ཁ་རེ་རེའི་སྤྱི་འཐུས་ཀྱང་བཙན་བྱོལ་བོད་མི་ཡོངས་ནས་འོས་བསྡུ་བྱ་ཆེད་བཅའ་སྒྲིག་བསྐྱར་བཅོས་དང་གང་ཟག་གཅིག་ལ་འོས་ཤོག་ཅིག་གི་ཐོབ་ཐང་ལས་མེད་པ། སྤྱི་འཐུས་ཀྱི་ལས་རྒྱུན་བཀའ་ཁྲིའི་ལས་རྒྱུན་ལྟར་རྒྱས་བཅད་བཟོ་རྒྱུ། གྲོས་ཚོགས་འོག་མ་ལས་དབང་ཚད་མཐོ་བའི་ཆེད་ལས་པ་དང་མཁས་དབང་ལས་གྲུབ་པའི་གྲོས་ཚོགས་གོང་མ་འཛུགས་རྒྱུ་སོགས་ལ་མང་མོས་བྱུང་འདུག

ཆོས་དང་རིག་གཞུང་སྐོར་ལ་དོན་ཚན་ ༡༣ ཡོད་པ་དག་ལས། ཤེས་ཡོན་སྲིད་བྱུས་གསར་པ་དེ་བོད་ཁྱིམ་སོགས་བཙན་བྱོལ་གྱི་སློབ་གྲྭ་ཡོངས་ནས་ལག་བསྟར་དགོས་པ་དང་ཆོས་རྒྱུད་ཁག་གི་གྲྭ་བཙུན་ཚོས་ཀུན་སྤྱོད་ལ་གཟབ་ནན་བྱ་དགོས་པ། བོད་རིགས་ཡོངས་ནས་སྐད་ཡིག་བསྲེ་ལྷད་མི་ཡོང་བ་བཅས་ཀྱི་ལས་དོན་ཐད་སྤྱི་སྒེར་གཉིས་ནས་མཉམ་རུབ་བྱ་དགོས་པ། ཆོས་རྒྱུད་ཁག་ནས་སྤྱི་ཚོགས་ཞབས་ཞུའི་ལས་རིགས་མང་དུ་སྤེལ་དགོས་པ། སློབ་གྲྭ་ཁག་ཏུ་དགེ་རྒན་ཚད་ལྡན་བསྐོ་བཞག་གིས་མཐུན་རྐྱེན་ཇེ་བཟང་དུ་གཏོང་དགོས་པ་བཅས་ལ་སྤྱི་མོས་བྱུང་འདུག གཞིས་ཆགས་སྲ་བརྟན་སྐོར་ལ་དོན་ཚན་ ༣༢ འདུག་པ་དག་ལས། ཕྲུ་གུ་མང་པོ་ཡོད་རིགས་ལ་འཚོ་སྣོན་དང་སློབ་ཡོན་ལ་མཐུན་འགྱུར་སྲིད་བྱུས་བཟོ་རྒྱུ་དང་། གཞིས་ཆགས་ཁག་ནང་ས་ཞིང་ཡུལ་མིར་བོགས་གཏོང་བྱེད་བཞིན་པ་དག་ལ་ནང་སྲིད་ལས་ཁུངས་ནས་ཞིབ་འཇུག་ཚོགས་ཆུང་ཆེད་འཛུགས་ཀྱིས་ཐག་གཅོད་གནང་དགོས་པ། བལ་ཡུལ་དུ་ཛ་དྲག་གི་དཀའ་ངལ་འཕྲད་བཞིན་པར་བཀའ་སྤྱི་གཉིས་ནས་ལས་འཆར་བསྒྲིག་རྒྱུ་དང་རྒྱལ་ཁབ་གཞན་དུ་སྤོ་ཐབས་བྱ་རྒྱུ། བལ་གོས་བཙོང་མཁན་དག་གི་ཁྲལ་འབབ་ཆག་ཡང་ཐད་རྒྱ་གར་གཞུང་ལ་ཞུ་སྐུལ་དང་གཏན་འཇགས་ཁྲོམ་ས་རག་ཐབས་བྱ་རྒྱུ། ཁ་ཐོར་བོད་མི་རྣམས་གཞིས་ཁོངས་སུ་འཇུག་དགོས་པ་དང་གཞིས་སྒར་ཁག་ཏུ་བཟོ་གྲྭའི་རིགས་གསར་འཛུགས། བོད་ནས་གསར་དུ་འབྱོར་རིགས་ཚོར་བཀའ་སྤྱི་གཉིས་ནས་སྡོད་ཁང་སྐྲུན་ཐབས། ཕྱི་རྒྱལ་མི་རིགས་དང་གཉེན་སྒྲིག་བྱེད་མཁན་ཚོར་དཔྱ་ཁྲལ་ལག་དེབ་གནང་ཐབས་སོགས་ལ་སྤྱི་མོས་བྱུང་འདུག

དཔལ་འབྱོར་སྐོར་ལ་དོན་ཚན་ ༡༨ ཡོད་པ་དག་ནི། དང་བླངས་དཔྱ་དངུལ་སྤར་རྒྱུ་དང་སྔར་ཡོད་རྣམས་ཆད་ལུས་མེད་པ་བཟོ་རྒྱུ། རང་གཞུང་གི་འཆར་འགོད་འོག་དངུལ་ཁང་ཞིག་འཛུགས་རྒྱུ་དང་སོ་ནམ་གཞིས་ཆགས་ཁག་ཏུ་སྔར་སྲོལ་བཅོས་སྒྱུར་གྱིས་ཤིང་འབྲས་འདེབས་འཛུགས། བལ་གོས་སོགས་དགུན་ཚོང་ལས་རིགས་གཉེར་མཁན་དག་ལ་མ་རྩའི་དཀའ་ངལ་ཡོད་ན་རང་གཞུང་ནས་སྐྱེད་མེད་དང་། སྐྱེད་ཆུང་བུན་གཏོང་ལ་དགོངས་བཞེས་གནང་རྒྱུ་སོགས་ལ་སྤྱི་མོས་བྱུང་འདུག ཤེས་རིག་སྐོར་ལ་དོན་ཚན་ ༣༠ ཡོད་པ་དག་ལས། སྤྱི་ཚོགས་ནང་གི་ཤེས་ཡོན་ཅན་ཚོར་ཆེ་མཐོང་དང་གཟེངས་ཐོན་རིགས་ལ་ཆེ་བསྟོད་གཟེངས་རྟགས་གནང་རྒྱུ། ཤེས་རིག་ལས་ཁུངས་ཀྱིས་ཤེས་ཡོན་བསྟི་གནས་ཁག་ཏུ་ལྟ་སྐོར་གྱིས་ཤེས་ཡོན་གནས་ཚད་སྤྱི་དང་སློབ་མའི་འགྲོ་འདུག་སྤྱོད་གསུམ་ལ་ཞིབ་འཇུག་མཐིལ་ཕྱིན་བྱ་རྒྱུ། ཕྱི་རྒྱལ་ཁག་ཏུ་སྐུ་ཚབ་དོན་གཅོད་ཁང་གི་འགན་འཁུར་འོག སློབ་གྲྭ་འཛུགས་སྐྲུན་གྱིས་མཚོན་པའི་གཞོན་སྐྱེས་ཚོར་བོད་པའི་སྐད་ཡིག་གོམ་གཤིས་སློབ་སྦྱོང་གི་མཐུན་འགྱུར་ཞུ་རྒྱུ། སློབ་གྲྭ་ཁག་ནང་བོད་ཀྱི་ཁོར་ཡུག་དང་ས་དཔྱད་རིག་པ། བཟང་སྤྱོད་སོགས་ཀྱི་སློབ་ཚན་འཇོག་རྒྱུ་སོགས་ལ་སྤྱི་མོས་བྱུང་འདུག

བོད་དོན་དྲིལ་བསྒྲགས་སྐོར་ལ་དོན་ཚན་ ༡༨ ཡོད་པ་དག་ལས། གཞུང་འབྲེལ་མིན་པའི་ཚོགས་པ་ཁག་གིས་བོད་དོན་དྲིལ་བསྒྲགས་ལ་འགན་མཉམ་ལེན་བྱ་དགོས་པ་དང་བོད་གཞུང་དྲིལ་བསྒྲགས་རྒྱ་ཡིག་སྡེ་ཚན་རྒྱ་སྐྱེད་གཏོང་དགོས་པ། བོད་གཞུང་དྲིལ་བསྒྲགས་འོག དམིགས་བསལ་རྒྱ་ནག་ཉམས་ཞིབ་སྡེ་ཚན་ཞིག་འཛུགས་གལ་ཆེ་བ་དང་རྒྱ་གར་ཡུལ་མིར་བོད་དོན་དྲིལ་བསྒྲགས་ཤུགས་ཆེན་བྱ་དགོས་པ། བོད་རིག་པའི་ཞིབ་འཇུག་དང་རྒྱལ་སྤྱིའི་ཁོར་ཡུག་ཚོགས་འདུ་སོགས་ལ་བོད་པའི་སྐུ་ཚབ་མང་པོ་གཏོང་ཐབས་བྱ་རྒྱུ་སོགས་ལ་སྤྱི་མོས་བྱུང་འདུག ཕྱི་རྒྱལ་བོད་མི་ཁ་ཐོར་སྐོར་ལ་དོན་ཚན་ ༨ ཡོད་པ་དག་ལས། ཕྱི་རྒྱལ་བོད་རིགས་ཚོགས་པ་ཁག་གིས་མཉམ་རུབ་རོགས་སྐྱོར་ཐེབས་རྩ་བཙུགས་ཏེ། གཞིས་ཆགས་སྐྱོ་བོ་སོགས་ལས་ལ་རོགས་རམ་བྱ་རྒྱུ། ཕྱི་རྒྱལ་ཁག་ཏུ་གྲངས་ཉུང་མི་རིགས་ཀྱི་རིག་གཞུང་རྒྱུན་འཛིན་ཆེད་དངུལ་ཟུར་བཅད་ཡོད་སྟབས། བོད་རིགས་ཚོགས་པ་ཚོས་ཐོབ་ཐང་དེ་རིགས་རག་ཐབས་བྱ་རྒྱུ་སོགས་ལ་སྤྱི་མོས་བྱུང་འདུག འཕྲོད་བསྟེན་སྐོར་ལ་དོན་ཚན་ ༡༤ ཡོད་པ་དག་ལས། བཙན་བྱོལ་བོད་གཞུང་གིས་བོད་ལུགས་དང་ཕྱི་ལུགས་ཟུང་འབྲེལ་གྱི་འཕྲོད་བསྟེན་སྲིད་བྱུས་གསར་པ་ཞིག་གཏན་འབེབས་བྱ་དགོས་པ་དང་། ལོ་རིམ་དང་བསྟུན་ཏེ་ཤེས་ཡོན་སྲིད་བྱུས་ནང་བོད་ལུགས་གསོ་རིག་གི་ཤེས་བྱ་ངོ་སྤྲོད་འཇོག་དགོས་པ། བོད་ལུགས་གསོ་རིག་དང་ནང་ཆོས་ཟུང་འབྲེལ་གྱི་སེམས་ཁམས་སློབ་གསོའི་ཡིག་ཆ་གསར་བཟོ་བྱ་དགོས་པ་སོགས་ལ་སྤྱི་མོས་བྱུང་འདུག

མཇུག་མཐར་༧གོང་ས་མཆོག་གིས་ཐུགས་དགྱེས་ཚོར་ཆེན་པོས་བཀའ་སློབ་གནང་དོན། ད་རེབ་འདིར་ཚོགས་འདུ་ཚོགས་ཐུབ་པ་ཡག་པོ་ཞེ་དྲག་བྱུང་འདུག ཚོགས་ཆུང་ཁག་བགོས་ཀྱིས་གོ་བསྡུར་ཞིབ་ལྷུག་བྱུང་བ་དེ་གལ་ཆེན་པོ་རེད། ཉམས་མྱོང་འདི་གཞི་ལ་བཞག་སྟེ། མ་འོངས་པར་ལེགས་བཅོས་བྱེད་བཞིན་མུ་མཐུད་ཚོགས་ཐུབ་པའི་འདུན་པ་ཡོད་པ་དེ་ཡག་པོ་ཞེ་དྲག་རེད། བོད་སྤྱི་བའི་དོན་དག་ཟེར་བ་དེ་ང་ཚོ་ཚང་མར་ལྷག་བསམ་དང་། དམ་ཚིག་རྡོག་རྩ་གཅིག་སྒྲིལ་གྱི་འོག་ནས་ཡོང་དགོས་པ་ཞིག་ཆགས་ཡོད། སྐབས་རེར་བཙན་བྱོལ་བོད་མའི་སྒྲིག་འཛུགས་ཟུར་དུ་ལྷག་ཡོད་པ་དང་། མང་ཚོགས་ཟུར་གཞན་ཞིག་ཏུ་ལྷག་ཡོད་པའི་བཟོ་འདྲ་བོ་བཤད་མཁན་ཡོང་གི་ཡོད། ང་གཞིས་ཆགས་ཁག་ཏུ་འགྲོ་སྐབས་བཤད་ཀྱི་ཡོད། སྤྱིར་མ་འགྲིག་ཕྲན་བུ་རེ་ཡོང་གི་རེད་དེ། མ་འགྲིག་པ་བཤད་ས་ཞིག་ཡོད་པ་དེ་ཡག་པོ་ཞེ་དྲག་རེད།

བཙན་བྱོལ་བོད་མི་ཆིག་འབུམ་ལྔ་ཁྲི་ཙམ་ཡོད་པ་རེད། གཞིས་ལུས་མི་དམངས་ས་ཡ་དྲུག་ཙམ་ཡོད་པ་དེ་དག་གི་བློ་གཏོད་ས་དེ། ང་མི་གཅིག་གི་སྐད་ཆ་མ་རེད། རང་དབང་ལུང་པར་ཡོད་པའི་བོད་མིའི་གོང་བུ་འདི་རེད། ང་ཚོའི་སྤྱི་བའི་སྒྲིག་འཛུགས་འདི་རྡོག་སྒྲིལ་བོ་ཡོང་རྒྱུ་གལ་ཆེན་པོ་རེད། གཞུང་དམངས་གཉིས་ཐད་ནས་ལས་ཀ་གང་འདྲ་བྱེད་ཀྱི་ཡོད་པའི་གནས་ཚུལ་གསལ་བོ་ཤེས་པ་ཡིན་ན་ཡིད་ཆེས་ཡོང་གི་རེད། རྡོག་རྩ་གཅིག་སྒྲིལ་གྱི་ས་བོན་དེ་ཡིད་ཆེས་རེད། གུང་ཁྲན་ཏང་གིས་ལོ་ངོ་དྲུག་ཅུ་ལྷག་ལ་མཐུན་སྒྲིལ་བཤད་བསྡད་ཀྱང་། མི་ལ་ཡིད་ཆེས་མེད་ན་མཐུན་སྒྲིལ་གང་ནས་ཡོང་གི་རེད། ཕན་ཚུན་ལ་ཡིད་ཆེས་ཡོང་བ་ལ་ད་རེབ་ཀྱི་ཚོགས་ཆེན་ལྟ་བའི་བགྲོ་གླེང་ཚོགས་འདུ་རིགས་གལ་ཆེན་པོ་རེད། མཉམ་རུབ་ཐོག་གོ་བསྡུར་བྱས་ཏེ་ཕྱི་གསལ་ནང་གསལ་བྱུང་ན། ད་གཟོད་ཡིད་ཆེས་སླེབས་གི་རེད། ད་རེབ་ཡག་པོ་ཞེ་དྲག་བྱུང་འདུག བཀྲ་ཤིས་བདེ་ལེགས་དང་ཐུགས་རྗེ་ཆེ་ཟེར་རྒྱུ་ཡིན། ཞེས་གསུངས་སོང་།

༼ གསར་འགོད་པ་དོན་འགྲུབ་བཀྲ་ཤིས་ཀྱིས་ལྷོ་ཕྱོགས་སེ་ར་ཐེག་ཆེན་གླིང་ནས་སྤེལ ༽