ཕྱི་ལོ་ ༢༠༡༠ ལོའི་རྐང་རྩེད་སྤོ་ལོའི་འགྲན་བསྡུར་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་སྟེང་། རྡེ་ར་རྡུན་དོན་འགྲུབ་གླིང་རུ་ཁག་ལ་ཨང་དང་པོ་དང་། མོན་གྷོ་འདོད་དགུ་གླིང་རུ་ཁག་ལ་ཨང་གཉིས་པ་བཅས་ཐོབ་ཡོད།
ད་ལོའི་རྒྱལ་ཡུམ་ཆེན་མོའི་རྐང་རྩེད་སྤོ་ལོ་འགྲན་བསྡུར་དེ་ཟླ་འདིའི་ཕྱི་ཚེས་ ༩ ནས་ ༡༩ བར་རྒྱ་གར་ལྷོ་ཕྱོགས་སྤེལ་ཀོབ་བོད་མིའི་གཞིས་སྒར་གྱི་གྲོང་སྡེ་གཉིས་པའི་ཉེ་འཁྲིས་ YMCA ཞེས་པའི་རྩེད་ཐང་དུ་རྩེད་ཡོད་ལ། ཁ་སང་ཕྱི་ཚེས་ ༡༩ ཉིན་གྱི་ཕྱི་དྲོ་མོན་གྷོ་འདོད་དགུ་གླིང་རུ་ཁག་དང་རྡེ་ར་རྡུན་དོན་འགྲུབ་གླིང་རུ་ཁག་གཉིས་བར་མཐའ་མའི་སྟེང་རྩོད་འགྲན་བསྡུར་བྱས་ཏེ། དོན་འགྲུབ་གླིང་རུ་ཁག་ལ་ཨང་དང་པོ་ཐོབ་སྟེ་རྒྱལ་ཡུམ་ཆེན་མོའི་གསེར་གྱི་བུམ་པའི་གཟེངས་རྟགས་དང་ཧིན་སྒོར་ལྔ་ཁྲི་ ༥༠༠༠༠ བསྩལ་ཡོད་ལ། མོན་གྷོ་རུ་ཁག་ལ་ཨང་གཉིས་པ་ཐོབ་སྟེ་དངུལ་གྱི་བུམ་པའི་གཟེངས་རྟགས་དང་ཧིན་སྒོར་སུམ་ཁྲི་ ༣༠༠༠༠ བསྩལ་ཡོད། གཞན་བལ་ཡུལ་ཀ་ཐ་མན་གྲུ་རུ་ཁག་ལ་ཐེངས་འདིའི་འགྲན་བསྡུར་ཁྲོད་ཀུན་སྤྱོད་ལེགས་པའི་གཟེངས་བསྟོད་དང་ཧིན་སྒོར་ཆིག་ཁྲི་ ༡༠༠༠༠ བཅས་བསྩལ་ཡོད་འདུག
འདི་གའི་གསར་འགོད་པས་ཁ་པར་བརྒྱུད་མཐའ་མའི་འགྲན་བསྡུར་སྐོར་ལ། མོན་གྷོ་རུ་ཁག་གི་རུ་དཔོན་ཚེ་རིང་དོན་གྲུབ་ལགས་སུ་བཅར་འདྲི་ཞུས་པར་ཁོང་གིས། ཁ་སང་ཕྱི་དྲོའི་ཆུ་ཚོད་ ༢ པའི་ཐོག་རྡེ་ར་རྡུན་དོན་འགྲུབ་གླིང་རུ་ཁག་དང་མོན་གྷོ་རུ་ཁག་གཉིས་བར་མཐའ་མའི་སྟེང་རྩོད་འགྲན་བསྡུར་བྱས་ཤིང་། འགྲན་བསྡུར་གྱི་དུས་ཡུན་སྐར་མ་ ༩༠ ནང་ཕྱོགས་གཉིས་ཀྱིས་སྤོ་ལོ་གཅིག་ཀྱང་ལྡུག་ཐུབ་མེད་སྟབས། བསྐྱར་དུ་སྐར་མ་བཅུ་རེ་སྤྲད་དེ་འགྲན་བསྡུར་བྱས་ཀྱང་སྔར་བཞིན་སུ་རྒྱལ་སུ་ཕམ་གྱི་གསལ་ཁ་བྱུང་མེད། མཐར་རུ་ཁག་རེ་ནས་མི་ ༥ རེ་བདམས་ཏེ་རྐྱང་རྒྱག་གི་འགྲན་བསྡུར་ཁྲོད། དོན་འགྲུབ་གླིང་རུ་ཁག་གིས་སྤོ་ལོ་ ༣ དང་། མོན་གྷོ་རུ་ཁག་གིས་སྤོ་ལོ་ ༢ བཅས་བླུགས་ཏེ་མཐའ་མའི་རྒྱལ་ཁ་དེ་རྡེ་ར་རྡུན་དོན་འགྲུབ་གླིང་རུ་ཁག་ལ་ཐོབ་སོང་ཟེར། ཡང་ཁོང་ལ་ཐེངས་འདིར་མོན་གྷོ་རུ་ཁག་ལ་ཨང་དང་པོ་ཐོབ་མ་ཐུབ་པར་བློ་ཕམ་བྱུང་ཡོད་མེད་དྲིས་སྐབས། རྒྱལ་ཕམ་དང་ཐོབ་ཤོར་ནི་ཆོས་ཉིད་ཞིག་ཡིན་སྟབས་ཐེངས་འདིར་ཨང་དང་པོ་མ་ཐོབ་ཀྱང་འགྱོད་སེམས་གང་མང་མེད་ཅེས་བརྗོད་སོང་།
གསར་འགོད་པ། དཔལ་ལྡན།
རྡེ་ར་རྡུན་རུ་ཁག་ལ་བཀྲ་ཤིས་བདེ་ལེགས་ཞུ།
རྐང་རྩེད་སྤོ་ལོ་ཡག་པོ་བྱུང་འདུག་ཏོབ་མཁན་ལ་བཀྲིས་བདེ་ལེགས་བཞུ།
བལ་ཡུལ་གྱི་རྩེད་འགྲན་རུ་ཁག་དང་རྡེ་ར་རྡུན་རུ་ཁག་གཉིས་ཀྱི་ཡག་པོ་རྩེད་ཀྱིན་འདུག་པ་གོ་ཐོས་བྱུང་།
ད་གང་ལྟར་བརྩོད་རྙོག་ཆེར་མ་བྱུང་བ་འཇུག་བསྒྲིལ་བ་རྟེན་འབྲེལ་ཞུ
རྩེད་འགྲན་པ་ཚོས་བོད་མི་རིགས་ཀྱི་ཐུན་མོང་མ་ཡིན་པའི་བཟང་སྤྱོད་དང་ཁ་མ་བྲལ་བའི་ཐོག་ནས་རྩེད་འགྲན་གནང་རྒྱུ་ནི་གནད་ཀྱི་དམ་པ་ལགས་པས་དེ་དོན་འབྱུང་འགྱུར་ཡང་ཐུགས་གཟབ་དང་། སྔར་ལས་ལྷག་པའི་སྤྲོ་སྣང་དང་གཟི་བརྗིད་བསྐྲུན་ཐུབ་རྒྱུར་འབད་པར་འཚལ།
མཛའ་གྲོགས་ཨང་པོ། འགྲན་བསྡུར་ཨང་གཉིས། ཞེས་པའི་ཤོད་སྲོལ་དེ་ཡང་གནས་ལུགས་རྒྱུ་མཚན་ཡོད་པའི་སྡོམ་ཚིག་ཅིག་ཡིན་པ་འདྲ།།
ང་ཚོ་བལ་ཡུལ་ཀ་ཐ་མན་གྲུ་རུ་ཁག་ལ་ཐེངས་འདིའི་འགྲན་བསྡུར་ཁྲོད་ཀུན་སྤྱོད་ལེགས་པའི་གཟེངས་བསྟོད་དང་ཧིན་སྒོར་ཆིག་ཁྲི་ ༡༠༠༠༠ ཐོབ་པར་བཀྲིས་བདེ་ལེགས་ཞུ།
ད་ཐེངས་རྒྱག་རེས་ཆེན་མོའི་རྐང་སྤོ་རྩེད་འགྲན་ཡིན་ས་མ་རེད། དངོས་ཡོད་ཀྱི་རྒྱལ་ཡུམ་ཆེན་མོའི་རྐང་སྤོ་འགྲན་བསྡུར་བྱས་འདུག ཡར་རྒྱས་ཕྱིན་འདུག་ཡག་པོ་རེད།
རང་རེའི་སྐྱ་སེར་ཐུན་མོང་གི་མིག་གི་ལོངས་སྤྱོད་དུ་གྱུར་བ་དང་ལྷག་དོན་རྒྱལ་ཡུམ་དམ་པར་དྲན་རྟེན་གྱི་བྱེད་སྒོ་འདི་སྤེལ་བ་ནི་ལོ་རྒྱུས་ཀྱི་རིན་ཐང་ཞིག་གི་ངོས་དང་ཡར་རྒྱས་ཀྱི་རིན་ཐང་ཞིག་གི་ངོས་བཅས་ནས་བལྟ་དགོས་ལ། འདིས་ནི་མི་རིགས་ཤིག་གི་གསོན་ཤུགས་ཀྱི་ཚད་གཞི་དམ་འཛིན་བྱས་ཡོད་ཅེས་ཞུ་འདོད་བྱུང་། ང་ཚོའི་མི་རིགས་འདི་རྩེད་མོར་དགའ་བ་དང་། དེའི་སྒྱུ་རྩལ་ལ་དུངས་པ་ནི་ཤིན་ཏུ་ནས་རེ་བ་ཞིག་ཡོད་པའི་རྟགས་སུ་མཐོང་ལ། ལྷག་པར་དུ་འཛམ་གླིང་གཅིག་མཐུན་གྱི་རྩེད་མོ་འདིའི་རིགས་རྒྱུད་འཛིན་དམ་ཟབ་གནང་ནས་མ་འོངས་པའི་མི་རིགས་ཀྱི་བླ་སྲོག་ལ་བརྒྱུད་སྤྲོད་བྱེད་དགོས།
ད་ཐེངས་འཁྲུག་འཛིང་སོགས་མ་བྱུང་བར་བདེ་ལེགས་ངང་མཐའ་མའི་རྟིང་རྩོད་འགྲན་བསྡུར་མཇུག་བསྡུས་པ་ནི་བསྔགས་པར་འོས་ཤིང་། ལྷག་པར་དུ་ལྡེ་ར་ལྡུན་གྱི་རྐང་རྩེད་པ་དག་ལ་ཐེངས་འདིའི་རྒྱལ་ཁ་ཐོབ་པར་རྟེན་འབྲེལ་ཞུ།