རྒྱ་ནག་གི་ཕྱི་སྐྱོད་ལག་འཁྱེར་བརྒྱུད་ཕྱིར་བོད་ནང་ལོག་བསམ་གྱི་འདུག

ངོས་རང་ལོ་ ༡༦ གི་ཐོག་ང་རང་མི་སྒེར་གྱི་རང་དབང་ཤོར་བ་དང་། ལོ་ ༢༤ ཐོག་ང་རང་གི་རྒྱལ་ཁབ་ཤོར་ཏེ། འདས་པའི་ལོ་ ༥༡ རིང་སྐྱབས་བཅོལ་བའི་གནས་བབ་ཐོག་འཚོ་བ་སྐྱེལ་བཞིན་ཡོད་པ་རེད། འོན་ཀྱང་ང་རང་གི་ངོས་ནས་རེ་བ་ཡག་ས་ཞིག་ལ་རྒྱག་གི་ཡོད། ངས་རྒྱ་ནག་གི་ཕྱི་སྐྱོད་ལག་འཁྱེར་བརྒྱུད་དེ་ཕྱིར་བོད་ནང་ལོག་བསམ་པ་དེ་འདྲ་ཡང་ཡོང་གི་འདུག ཅེས་༸གོང་ས་མཆོག་གིས་ཧང་གྷ་རིའི་གྲོས་ཚོགས་སུ་གསུངས་ཡོད།

ཟླ་འདིའི་ཕྱི་ཚེས་ ༡༩ ཉིན་གྱི་ཕྱི་དྲོ་༸གོང་ས་མཆོག་གིས་ཧང་གྷ་རིའི་རྒྱལ་ས་བྷུ་ཌ་པེ་སིར་གྱི་ཉིན་གྲངས་གཉིས་རིང་གི་ཆོས་འབྲེལ་ལེགས་པར་གྲུབ་སྟེ། ཁ་སང་ཕྱི་ཚེས་ ༢༠ ཉིན་ཧང་གྷ་རིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་དང་ཆབ་སྲིད་ཚོགས་པ་ Lahet Mas a Politika གཉིས་ཀྱིས་གནད་ཡོད་མགོ་ཁྲིད་ཀྱིས་ཕེབས་བསུའི་ཁྲོད་གྲོས་ཚོགས་སུ་ཆིབས་བསྒྱུར་བསྐྱངས་ཏེ། ཆབ་སྲིད་ཚོགས་པའི་ཚོགས་གཞོན་ལྕམ་སྐུ་ Szabo Timea ལགས་ཀྱིས་ཐེངས་འདིར་ཧང་གྷ་རི་གྲོས་ཚོགས་ཀྱི་ངོས་ནས་༸གོང་ས་ཏཱ་ལའི་བླ་མ་མཆོག་གྲོས་ཚོགས་སུ་གདན་ཞུ་གནང་བ་དེ་གྲོས་ཚོགས་ཀྱི་ངོས་ནས་བོད་ཀྱི་གནད་དོན་ལ་རྒྱབ་སྐྱོར་ཡོད་པ་མཚོན་གྱི་ཡོད་ལ། འདས་པའི་ལོ་ངོ་སྟོང་ཕྲག་ལྷག་གི་ཡར་སྔོན་ནས་བྱུང་བའི་བོད་མིའི་རིག་གཞུང་དང་བོད་པའི་ཁོར་ཡུག་སྲུང་སྐྱོབ། གནམ་གཤིས་འགྱུར་ལྡོག་གི་གནད་དོན་སོགས་ལའང་སེམས་འཁུར་བྱེད་ཀྱི་ཡོད། ལྷག་པར་དུ་བོད་མིའི་ངོ་བོ་སྲུང་སྐྱོབ་ཡོང་བར་མིང་དོན་མཚུངས་པའི་རང་སྐྱོང་ཡོང་ཐབས་ཐད་རྒྱབ་སྐྱོར་བྱེད་ཀྱི་ཡོད་ཅེས་གསུངས་ཡོད།

 སྐབས་དེར་༸གོང་ས་མཆོག་གིས་ཧང་གྷ་རི་གྲོས་ཚོགས་གོང་མའི་ཚོགས་མི་དང་གྲོས་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་མི་བཅས་ལ་འཚམས་འདྲི་དང་འབྲེལ་བཀའ་སློབ་གནང་དོན།  ངོས་རང་ལོ་ ༡༦ གི་ཐོག་ང་རང་མི་སྒེར་གྱི་རང་དབང་ཤོར་བ་དང་། ལོ་ ༢༤ ཐོག་ང་རང་གི་རྒྱལ་ཁབ་ཤོར་ཏེ། འདས་པའི་ལོ་ ༥༡ རིང་སྐྱབས་བཅོལ་བའི་གནས་བབ་ཐོག་འཚོ་བ་སྐྱེལ་བཞིན་ཡོད་པ་རེད། འོན་ཀྱང་ང་རང་གི་ངོས་ནས་རེ་བ་ཡག་ས་ཞིག་ལ་རྒྱག་གི་ཡོད། ངས་རྒྱ་ནག་གི་ཕྱི་སྐྱོད་ལག་འཁྱེར་བརྒྱུད་དེ་ཕྱིར་བོད་ནང་ལོག་བསམ་པ་དེ་འདྲ་ཡང་ཡོང་གི་འདུག་ཅེས་གསུངས་བ་དང་། དེ་བཞིན་ཁོང་གིས། རྒྱ་ནག་གི་བོད་ལ་འཛིན་པའི་སྲིད་བྱུས་འཁྲུག་འཛིང་ཆེ་བ་ཞིག་ཡིན་ཡང་། ད་ལྟའི་བར་ང་རང་གི་ངོས་ནས་བོད་རྒྱ་ནག་དང་ཁ་བྲལ་བྱ་འདོད་མེད། གཙོ་ཆེ་བ་རྒྱ་ནག་གཞུང་གིས་གུ་ཡངས་ཀྱི་སྲིད་བྱུས་ཤིག་ལག་བསྟར་བྱས་ཏེ་བོད་རྒྱ་གཉིས་ཕན་གྱི་ཐབས་ལམ་ཞིག་ངེས་པར་དུ་འཚོལ་དགོས་པ་རེད།

དེ་ལྟར་མ་བྱས་ཚེ་རྒྱལ་སྤྱིའི་སྤྱི་ཚོགས་ཀྱི་ངོས་ནས་རྒྱ་ནག་གི་མགོ་ཁྲིད་ཚོར་ཡིད་ཆེ་བརླག་པའི་ཉེན་ཁ་ཡོད་སྟབས། རྒྱ་ནག་གི་གནད་ཡོད་དཔོན་རིགས་ཚོས་སྲིད་བྱུས་གུ་ཡངས་མི་གཏོང་ཐབས་མེད་ཡིན་པ་ཤེས་དགོས་པ་རེད་ལ། བོད་རྒྱའི་དཀའ་རྙོག་སེལ་བ་དེ་ཕྱོགས་གཉིས་ཀར་ཕན་གྱི་ཡོད་པའང་ཤེས་དགོས་པ་རེད། ད་ལྟའི་དུས་འདིར་མེ་མདའི་ནུས་སྟོབས་ལས་དྲང་བདེན་གྱི་ནུས་སྟོབས་ཤུགས་ཆེ་བ་ཡོད། མེ་མདའི་ནུས་སྟོབས་དེ་གནས་སྐབས་ཀྱི་ནུས་སྟོབས་ཤིག་ཡིན་པ་དང། དེས་དྲང་བདེན་གྱི་ནུས་སྟོབས་མེད་པར་བཟོ་མི་ཐུབ་སྟབས། རྒྱ་ནག་གཞུང་གིས་ཀྱང་བོད་མི་རིགས་ཀྱི་གནད་དོན་དེ་བཙན་དབང་གིས་སེལ་ཐུབ་ཀྱི་མ་རེད། དེར་བརྟེན། ང་ཚོས་བོད་རྒྱ་གཉིས་ཕན་གྱི་ཁོར་ཡུག་བཙལ་ཏེ་བོད་རྒྱ་གཉིས་ཕན་ཐོག བོད་མི་ཡོངས་ལ་མིང་དོན་མཚུངས་པའི་རང་སྐྱོང་སྤྲོད་རྒྱུ་དེ་ཡིན་ཞེས་དང་། ཧང་གྷ་རིའི་གྲོས་ཚོགས་འཐུས་མི་རྣམས་བོད་ནང་གི་གནས་སྟངས་ཤེས་རྟོགས་ཆེད་གཟིགས་སྐོར་དུ་འགྲོ་དགོས་པའི་ར་བ་ཡང་བཏོན་ཡོད།

ཐེངས་འདིའི་ཧང་གྷ་རིའི་གྲོས་ཚོགས་སུ་ཆིབས་བསྒྱུར་གྱིས་གོ་སྐབས་འདི་བརྒྱུད་ཁོང་གིས་ཧང་གྷ་རིའི་གྲོས་ཚོགས་གོང་མའི་མགོ་ཁྲིད་དང་།  དེ་མིན་ཧང་གྷ་རི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་པའི་ཚོགས་གཙོ། གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་ ༣༠ བཅས་ལ་མཇལ་འཕྲད་གནང་ཡོད་པར་མ་ཟད། ཡུ་རོབ་གྲོས་ཚོགས་ཀྱི་ཚོགས་གཙོ་གཞོན་པ་དང་ཆབ་སྲིད་ཚོགས་པའི་གནད་ཡོད་མི་སྣ་བཅས་ལ་མཇལ་འཕྲད་གནང་ཡོད་པ་རེད། ༸གོང་ས་མཆོག་ ༡༩༨༢ ལོར་ཐོག་མར་ཧང་གྷ་རིའི་ནང་ཆིབས་སྒྱུར་བསྐྱངས་ཡོད་པ་དང་། ཐེངས་འདི་ནི་ཕེབས་ཐེངས་བདུན་པ་དེ་ཆགས་ཡོད་པ་རེད།

 གསར་འགོད་པ་དོན་གོ