སློབ་མ་ ༢ འཛིན་བཟུང་།

ནག་ཆུ་སློབ་འབྲིང་གི་ལོ་རིམ་གསུམ་པའི་སློབ་མ་ ༦ འབྲུག་ཡུལ་བརྒྱུད་རྒྱ་གར་ལ་བཙན་བྱོལ་དུ་ཡོང་སྐབས། སྟབས་མ་ལེགས་པར་སློབ་མ་ ༢ འབྲུག་ཡུལ་བུམ་ཐང་ཉེན་རྟོག་པས་འཛིན་བཟུང་བྱས་འདུག  

ད་ལྟ་བལ་ཡུལ་སྣེ་ལེན་ཁང་དུ་བོད་ནས་གསར་དུ་འབྱོར་ཡོད་པའི་བོད་མི་ཞིག་གིས་གསར་ལམ་དུ་གནས་ཚུལ་བརྗོད་པ་ལྟར་ན། ལོ་འདིའི་ཕྱི་ཟླ་ ༩ པའི་ཚེས་ ༢༦ ཉིན་བོད་རང་སྐྱོང་ལྗོངས་ནག་ཆུ་སོག་རྫོང་ནས་ཡིན་པའི་སློབ་མ་ ༦ བོད་ནས་རྒྱ་གར་ལ་བྲོས་བྱོལ་ཏུ་ཕྱིན་ཡོད་པ་དང་། ཕྱི་ཟླ་ ༡༠ བའི་ཟླ་མགོ་ཙམ་ལ་འབྲུག་ཡུལ་ནང་འབྱོར་ཏེ། ཕྱི་ཚེས་ ༤ བར་འབྲུག་ཡུལ་གྱི་རི་ཁྲོད་དགོན་པ་ཞིག་ཏུ་ཡིབ་སྡོད་བྱས་ཡོད་ཅིང་། ཉིན་ཤས་རྗེས་ཁོང་ཚོའི་ཁྲོད་ཀྱི་ལོ་ན་ཆེ་ཤོས་རང་ལོ་ ༡༨ ཡས་མས་ཡིན་པའི་དབང་ཆེན་ཟླ་བ་དང་བཀྲ་ཤིས་དགའ་སྐྱིད་གཉིས་འབྲུག་གི་གྲོང་ཁྱེར་དུ་བལ་ཡུལ་ནང་འགྲོ་བའི་རླངས་འཁོར་ཡོད་མེད་བརྩད་གཅོད་དུ་ཕྱིན་འདུག སྐབས་དེར་འབྲུག་བུམ་ཐང་ས་གནས་ཉེན་རྟོག་མི་སྣས་འཛིན་བཟུང་བྱས་ཡོད་འདུག

སློབ་མ་གཞན་རྣམས་ཡིབ་སྡོད་བྱེད་སའི་དགོན་པ་དེའི་དགེ་འདུན་པ་ཞིག་གི་རོགས་རམ་འོག ཚེས་ ༡༠ ཉིན་བལ་ཡུལ་བོད་གཞུང་སྣེ་ལེན་ཁང་དུ་འབྱོར་ཡོད་ཀྱང་། ད་ལྟའི་ཆར་འབྲུག་ཡུལ་ནང་འཛིན་བཟུང་བྱས་པའི་བོད་མི་གཉིས་ཀྱི་གནས་ཚུལ་ཅི་ཡང་ཤེས་རྟོགས་ཐུབ་ཀྱི་མི་འདུག་ཅེས་བརྗོད་འདུག སློབ་མ་དེ་དག་ནི་ནག་ཆུ་སློབ་འབྲིང་གི་མཐོ་འབྲིང་ལོ་རིམ་གསུམ་པའི་སློབ་མ་ཡིན་འདུག

གོང་གི་གནས་ཚུལ་འདིའི་ཐད། དེ་རིང་འདི་གའི་གསར་འགོད་པ་བོད་གཞུང་བདེ་སྲུང་ལས་ཁུངས་སུ་ཕྱིན་ཏེ་བཅར་འདྲི་ཞུ་སྐབས། བདེ་སྲུང་དྲུང་ཆེ་དངོས་གྲུབ་རྡོ་རྗེ་ལགས་ཀྱིས་འདིའི་སྐོར་སྒང་ཏོག་ས་གནས་བདེ་དོན་བརྒྱུད་བོད་མི་བཞི་བལ་ཡུལ་དུ་གཏོང་གི་ཡོད་ཚུལ་གོ་བྱུང་། འབྲུག་ཡུལ་བོད་མིའི་ལྟ་རྟོག་འགན་འཛིན་ལ་གནས་ཚུལ་འདི་འདྲི་འཆར་ཡོད་ཅེས་བརྗོད་བྱུང་།  གསར་འགོད་པས་ཁ་པར་བརྒྱུད་འབྲུག་སྡོད་བོད་མིའི་ལྟ་རྟོག་འགན་འཁུར་བ་རྡོ་རྗེ་རྒྱལ་པོ་ལགས་སུ། འབྲུག་ཡུལ་དུ་གནས་ཚུལ་དེ་འདྲ་ཞིག་བྱུང་ཡོད་མེད་དྲིས་པར་ཁོང་གིས། གནས་ཚུལ་དེ་འདྲ་ཞིག་བྱུང་ཡོད་མེད་ཐད་ང་རང་ལ་གསལ་ཆ་མེད། ད་སྔ་དེ་འདྲའི་གནས་ཚུལ་འདྲ་གོ་མ་སོང་ཟེར།  

 གསར་འགོད་པ། དོན་གོ