རང་བཙན་དང་དབུ་མའི་ལམ་བར་གྱི་འཆམས་མཐུན།

དོལ་ཚོགས་ཀྱིས་བཞུགས་སྒར་ཕོ་བྲང་གི་ཉེ་འཁོར་ནས་མི་གསོད་ཀྱི་དོན་རྐྱེན་བཟོས་སྐབས། བཙན་བྱོལ་སྤྱི་ཚོགས་ནང་ཚོགས་པ་སྐྱིད་སྡུག་ཉིས་བརྒྱ་ལྷག་ཡོད་ཀྱང་། ཛ་དྲག་གི་གནད་དོན་དེ་ལ་ཁ་གཏད་གཅོག་མཁན་དང་པོ་བོད་ཀྱི་གཞོན་ནུ་ལྷན་ཚོགས་ཡིན། གཞོན་ནུ་ལྷན་ཚོགས་ཀྱིས་ ༡༩༩༦ ལོར་དོལ་རྒྱལ་སྐོར་ལ་ཛ་དྲག་གི་ཚོགས་འདུ་བསྐངས་ཏེ་གྲོས་ཆོད་དོན་ཚན་ ༦ བཞག་སྟེ་ད་ལྟ་ལག་བསྟར་བྱེད་མུས་ཡིན་ཟེར།  

དེ་རིང་ཉིན་རྒྱབ་ཆུ་ཚོད་ ༢ སྟེང་དབུ་མའི་ལམ་མི་མང་ལས་འགུལ་ཁང་གི་གོ་སྒྲིག་འོག བཞུགས་སྒར་ཡོངས་གླིང་སློབ་གྲྭ་རུ་༼ དབུ་མའི་ལམ་དང་རང་བཙན་བརྩོན་ལེན་པ་གཉིས་ཀྱིས་ལམ་དབུ་མར་ལྟ་ཚུལ་གང་འདྲ་བཟུང་ཡོད༽ ཅེས་པའི་བརྗོད་གཞིའི་ཐོག་བགྲོ་གླེང་ཞིག་གོ་སྒྲིག་ཞུས་ཡོད་ཅིང་། གཏམ་བཤད་གནང་མཁན་དབུ་མའི་ལམ་མི་མང་ལས་འགུལ་ཁང་གི་རྒྱུན་ལས་མགོ་ལོག་དམ་ཆོས་དཔལ་བཟང་ལགས་དང་། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དོན་གྲུབ་ལྷ་དར་ལགས། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ལས་རོགས་འཇམ་དཔལ་སྨོན་ལམ་ལགས་བཅས་ཕེབས་འདུག ཐོག་མར་གཏམ་བཤད་གནང་མཁན་ཚོས་སོ་སོའི་བརྗོད་གཞིའི་ཐོག་སྐར་མ་བཅུ་རེར་གསུང་བཤད་གནང་རྗེས་མང་ཚོགས་དང་ལྷན་དུ་དྲི་བ་དྲིས་ལེན་བྱས་ཡོད།  

བགྲོ་གླེང་གི་ཐོག་མར་དམ་ཆོས་དཔལ་བཟང་ལགས་ཀྱིས་༼ གཉིས་སྨན་དབུ་མའི་ལམ་གྱི་དགོས་དམིགས་དང་། གཞིས་བྱེས་རྒྱ་ཆེའི་མི་མང་གི་མངོན་འདོད ༽ ཞེས་པའི་བརྗོད་གཞིའི་ཐོག་གཏམ་བཤད་གནང་དོན། དེ་རིང་འདིར་སྐད་ཆ་བཤད་མཁན་ང་རང་ལ་མཚོན་ན། དབུ་མའི་ལམ་ལ་མཐའ་གཅིག་ཏུ་རྒྱབ་སྐྱོར་བྱེད་མཁན་ཞིག་ཡིན། ཡིན་ནའང་རང་བཙན་སླར་གསོ་བྱེད་མཁན་ལ་སྔར་དགག་པ་བརྒྱབ་མྱོང་མེད་ལ། ཕྱིན་ཆད་ཀྱང་དགག་མི་སྲིད། རྒྱུ་མཚན་གང་ཡིན་ཟེར་ན། བོད་བསྟན་སྲིད་ཆེད་བཙན་བྱོལ་སྤྱི་ཚོགས་ནང་འདམ་ག་བཞི་བྱུང་ཡོད། འདི་ནི་ཁ་ཡོད་ལག་ཡོད་ཀྱི་དམངས་གཙོ་ཡང་དག་པ་ཞིག་ལ་ངོས་འཛིན་བྱས་ཡོད། དེར་བརྟེན། ཕན་ཚུན་གུ་ཡངས་ཀྱི་བགྲོ་གླེང་ལྷུག་པོ་དང་བསམ་ཤེས་ཡོང་གི་རེད་བསམ་ཡོད། ཅེས་དང་།

མ་གཞི་ང་ཚོ་དང་ཁྱེད་ཚོའི་བར་གྱི་འགལ་བ་ཞིག་མིན་ལ། སུ་རྒྱལ་སུ་ཕམ་གྱི་གནད་དོན་ཞིག་དེ་བས་ཀྱང་མིན། སོ་སོས་བདམས་པའི་ལམ་ལ་འགྲོ་པ་ལས་གཅིག་གི་ཁ་གཏད་དུ་གཅིག་ལངས་བ་ཞིག་རྩ་བ་ནས་མིན། ད་ལོའི་ཟླ་ ༩ ཚེས་ ༤ ཉིན་དབུ་མའི་ལམ་གྱི་ཚོགས་མི་དང་གཞོན་ལྷན་གྱི་ཚོགས་མི་ཕོ་བྲང་དུ་མཉམ་བཅར་སྐབས། ༧གོང་ས་མཆོག་གིས་ཀྱང་དེང་སྐབས་སྤྱི་ཚོགས་ནང་། ཁོ་རང་བཙན་རྩོད་མཁན་རེད། ཁོ་དབུ་མའི་ལམ་རྩོད་མཁན་རེད་ཟེར་ནས་འགལ་ཟླའི་རྣམ་པ་ཞིག་ཡོང་གི་ཡོད་པ་དེ་ནོར་བ་རེད་ཅེས་གསུངས་པ་ཚང་མས་མཁྱེན་གསལ་རེད། ད་ལྟའི་ཆར་རང་ཅག་གི་ལས་འགན་གཙོ་བོ་ནི། མཐུན་སྒྲིལ་གཅིག་གྱུར་ཐོག་གཞིས་བྱེས་བོད་མིའི་མངོན་འདོད་ངོ་མ་དེ་མངོན་འགྱུར་བྱ་ཐབས་སུ་འབད་བརྩོན་ལྷོད་མེད་བྱ་རྒྱུ་དེ་རེད། དེ་རིང་གི་བགྲོ་གླེང་ཡང་རང་རེའི་བར་གྱི་སྣང་ཚུལ་དང་གནས་ཚུལ་མི་མཐུན་ཕྱོགས་ཀྱི་དཀའ་ངལ་སེལ་རྒྱུར་དམིགས་པ་ཡིན། ཞེས་གསུངས་སོང་།

མཇུག་ཏུ་དབུ་མའི་ལམ་དང་རང་བཙན་བར་གྱི་ཁྱད་པར་འགའ་བརྗོད་དོན། དབུ་མའི་ལམ་དང་རང་བཙན་གཉིས་ཀྱི་ལྟ་ཚུལ་དང་ཐབས་ལམ་ཡང་ཐུན་མོང་དང་། དམིགས་ཡུལ་ཁ་ཁ་ཡིན། དང་པོ། དབུ་མའི་ལམ་དང་རང་བཙན་གཉིས་ཀྱི་ལྟ་ཚུལ་ཐུན་མོང་བ་ནི། ལོ་རྒྱུས་ཐོག་བོད་འདི་རྒྱ་དང་སོག་པོ། མན་ཇུ། གོ་མིན་ཏང་དང་གུང་ཁྲན་ཏང་གང་གི་ཆ་ཤས་ཀྱང་མིན་པ་དེ་རེད། གཉིས་པ། ཕྱོགས་གཉིས་ཀྱི་ཐབས་ལམ་ཐུན་མོང་བ་ནི། འཚེ་བ་མེད་པའི་ལམ་ནས་རྩ་དོན་འཐབ་རྩོད་དང་། ༧གོང་ས་མཆོག་བོད་ལ་གདན་འདྲེན་ཞུ་རྒྱུ་དེ་རེད། གསུམ་པ། ཕྱོགས་གཉིས་ཀྱི་དམིགས་ཡུལ་ཁ་ཁ་ཡིན་པ་ནི། དབུ་མའི་ལམ་རྩོད་མཁན་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཚད་ལྡན་ཞིག་ཡོང་ཐབས་བྱ་རྒྱུ་དེ་ཡིན་ཞིང་། རང་བཙན་རྩོད་མཁན་ཚོས་བོད་རྒྱ་ནག་ལས་ཁ་བྲལ་ཏེ་ཇི་སྲིད་བར་རང་བཙན་གཙང་མའི་ངོ་བོར་སྡོད་རྒྱུ་དང་། ལོ་རྒྱུས་ཐོག་གི་བོད་ཕྱི་ནང་སྣོད་བཅུད་དང་བཅས་པར་རང་བདག་བྱ་རྒྱུ་དེ་རེད། ཅེས་གསུངས་སོང་།

དེའི་རྗེས་དོན་གྲུབ་ལྷ་དར་ལགས་ཀྱིས་༼ བོད་རང་བཙན་རྩོད་ལེན་པས་གཉིས་སྨན་དབུ་མའི་ལམ་ལ་ལྟ་ཚུལ ༽ ཞེས་པའི་བརྗོད་གཞིའི་ཐོག་གཏམ་བཤད་གནང་དོན། བར་ལམ་ཞིག་ནས་དབུ་མའི་ལམ་དང་རང་བཙན་བར་འགལ་ཟླའི་གླེང་སློང་ཞིག་ཡོང་གི་ཡོད། དབུ་མའི་ལམ་དང་རང་བཙན་གཉིས་བར་རྩ་དོན་གྱི་དམིགས་ཚད་ལ་ཁྱད་པར་ཆེན་པོ་ཡོད་པ་ཁས་ལེན་དགོས་ལ། ལངས་ཕྱོགས་འདི་གཉིས་བར་ཐུན་མོང་གི་དམིགས་ཡུལ་དང་ཐུན་མོང་གི་དགོས་ཕན་ཡོད་པ་ཡང་ཁས་ལེན་དགོས། ལྷག་བསམ་རྣམ་དག་གིས་རང་བཙན་རྩོད་མཁན་དང་དབུ་མའི་ལམ་རྩོད་མཁན་ཞིག་ཡིན་ན། ༧གོང་ས་མཆོག་དང་བོད་གཞུང་ལ་གུས་བཀུར་ཡིད་ཆེས་གཅིག་གྱུར་ཡིན། དེ་ལ་ཁྱད་པར་དང་མཐོ་དམན་ཡོད་པ་མ་རེད། དེ་བཞིན། བོད་ནང་གི་ཁོར་ཡུག་དང་རིག་གཞུང་། མི་རིགས་ཀྱི་གནས་བབ་ཛ་དྲག་ལས་བསྐྱབ་རྒྱུ་དེ་ཡང་ཐུན་མོང་གི་དམིགས་ཡུལ་རེད། ད་དུང་རང་བཙན་རྩོད་མཁན་དང་དབུ་མའི་ལམ་རྩོད་མཁན་གཉིས་ཀར་ཐུན་མོང་གི་སྟོབས་ཤུགས་གསུམ་ཡོད། དང་པོ། ལོ་རྒྱུས་ཐོག་བོད་རང་བཙན་ཡིན་པ། གཉིས་པ། ༧གོང་ས་མཆོག་གི་དབུ་ཁྲིད། གསུམ་པ། ཆོལ་ཁ་གསུམ་རྡོག་རྩ་གཅིག་སྒྲིལ་བཅས་རེད། ཅེས་དང་།  

དེ་རིང་འདིར་གསལ་བོ་བཟོ་དགོས་པ་ཞིག་ལ། བར་ལམ་ཞིག་ནས་བོད་པའི་འཐབ་རྩོད་དེ་ལམ་དབུ་མ་དང་རང་བཙན་བར་གྱི་འཐབ་རྩོད་ཡིན་པའི་བཟོ་འདྲ་བོ་གསུང་མཁན་ཡོང་གི་ཡོད། ལྷག་བསམ་རྣམ་དག་གིས་དབུ་མའི་ལམ་རྩོད་མཁན་ཡིན་ན། ཁ་གཏད་གཅོག་ས་རྒྱ་ནག་ཡིན་པ་དང་། དམིགས་ཡུལ་བོད་མི་ས་ཡ་དྲུག་གི་ཁེ་ཕན་ཆེད་ཡིན་པར་ངོས་འཛིན་བྱེད་ཀྱི་ཡོད་ལ། ལྷག་བསམ་རྣམ་དག་གིས་རང་བཙན་རྩོད་མཁན་ཞིག་ཡིན་ནའང་ཁ་གཏད་ས་དགྲ་བོ་རྒྱ་ནག་དང་། དམིགས་ཡུལ་བོད་མི་ས་ཡ་དྲུག་གི་བདེ་རྩའི་ཆེད་ཡིན་པར་ཡིད་ཆེས་བྱེད་ཀྱི་ཡོད། དེར་བརྟེན། ང་ཚོའི་འཐབ་རྩོད་དེ་ལམ་དབུ་མ་དང་རང་བཙན་བར་གྱི་འཐབ་རྩོད་ཅིག་རྩ་བ་ནས་མིན། ཞེས་གསུངས་སོང་།

ཡང་མང་པོ་ཞིག་གིས་རང་བཙན་བརྩད་ན་དབུ་མའི་ལམ་ལ་གནོད་པ་དང་། གཞོན་ནུ་ལྷན་ཚོགས་ཀྱིས་༧གོང་ས་མཆོག་དང་བོད་གཞུང་ལ་ཁ་གཏད་གཅོག་གི་ཡོད་པའི་དགོངས་ཚུལ་གསུང་མཁན་ཡོད། དེ་དག་ལ་གསལ་བོ་ཞུ་རྒྱུ་ཞིག་ལ། གཞོན་ནུ་ལྷན་ཚོགས་ཀྱིས་ལམ་དབུ་མར་ཁ་གཏད་གཅོག་གི་མེད་ལ། ༧གོང་ས་མཆོག་དང་བོད་གཞུང་ལ་ཡང་ཁ་གཏད་གཅོག་གི་མེད། སུ་ལ་ཁ་གཏད་གཅོག་གི་ཡོད་ཟེར་ན་དགྲ་བོ་རྒྱ་ནག་ལ་ཁ་གཏད་གཅོག་གི་ཡོད་ལ། སུ་ཞིག་གི་ཆེད་དུ་ཡིན་ཟེར་ན་བོད་མི་ས་ཡ་དྲུག་གི་མ་འོངས་པའི་མདུན་ལམ་ཆེད་དུ་ཡིན། འདི་ལ་བདེན་དཔུང་གང་ཡོད་ཟེར་ན། ༡༩༧༠ ལོར་བོད་ཀྱི་གཞོན་ནུ་ལྷན་ཚོགས་དབུ་བརྙེས་པ་ནས་ཉི་མ་དེ་རིང་བར་ལངས་ཕྱོགས་རང་བཙན་ཡིན། སྐབས་དེ་དུས་འཛམ་གླིང་ཐོག་ལམ་དབུ་མ་ཟེར་བ་ཞིག་མེད། བོད་གཞུང་དམངས་གཉིས་ཀྱི་ལངས་ཕྱོགས་རང་བཙན་རེད། ཅེས་དང་།

༧གོང་ས་མཆོག་དང་བོད་གཞུང་ལ་མཛད་དཀའ་བཟོ་མཁན་དེ་གཞོན་ནུ་ལྷན་ཚོགས་མ་རེད། དོལ་རྒྱལ་ཚོགས་པ་དང་བོད་སོག་ལས་ཁུངས་ཀྱི་དངུལ་ཟ་མཁན་དེ་ཚོ་རེད། འདི་ལ་འཚེར་སྣང་དང་འཛེམ་ཟོན་བྱ་དགོས་པ་གང་ཡང་ཡོད་པ་མ་རེད། དོལ་ཚོགས་ཀྱིས་བཞུགས་སྒར་ཕོ་བྲང་གི་ཉེ་འཁོར་ནས་མི་གསོད་ཀྱི་དོན་རྐྱེན་བཟོས་སྐབས། བཙན་བྱོལ་སྤྱི་ཚོགས་ནང་ཚོགས་པ་སྐྱིད་སྡུག་ཉིས་བརྒྱ་ལྷག་ཡོད་ཀྱང་། ཛ་དྲག་གི་གནད་དོན་དེ་ལ་ཁ་གཏད་གཅོག་མཁན་དང་པོ་བོད་ཀྱི་གཞོན་ནུ་ལྷན་ཚོགས་ཡིན། གཞོན་ནུ་ལྷན་ཚོགས་ཀྱིས་ ༡༩༩༦ ལོར་དོལ་རྒྱལ་སྐོར་ལ་ཛ་དྲག་གི་ཚོགས་འདུ་བསྐངས་ཏེ་གྲོས་ཆོད་དོན་ཚན་ ༦ བཞག་སྟེ་ད་ལྟ་ལག་བསྟར་བྱེད་མུས་ཡིན། ཞེས་གསུངས་སོང་།

ཁོས་མུ་མཐུད་དུ་གསུངས་དོན། དབུ་མའི་ལམ་ལ་དང་ལེན་མ་བྱས་པ་ཙམ་གྱིས་༧གོང་ས་མཆོག་གི་དགོངས་གཞི་ཡོངས་རྫོགས་དང་འགལ་ཟླ་ཆགས་ཀྱི་མེད། ༧གོང་ས་མཆོག་གི་ཆབ་སྲིད་ཀྱི་ལངས་ཕྱོགས་དེ་དབུ་མའི་ལམ་ཡིན་རུང་། སྤྱི་ཡོངས་ཀྱི་ལམ་སྟོན་དང་དགོངས་གཞི་དེ་དམངས་གཙོ་ཡང་དག་པའི་ལམ་སྲོལ་ལ་བརྟེན་ཏེ། བོད་པ་མི་རེ་ངོ་རེ་ཡིས་འཚེ་མེད་ཞི་བའི་ཐོག་ནས་རྩ་དོན་འཐབ་རྩོད་ལ་འགན་འཁུར་རྒྱུ་དེ་རེད། དགོངས་གཞི་དེའི་འོག་དབུ་མ་དང་རང་བཙན། རང་ཐག་རང་གཅོད། བདེན་པའི་ཨུ་ཚུགས་གང་ཞིག་བརྩད་ཀྱང་ཆོག་གི་རེད། རང་བཙན་རྩོད་པ་དེ་དབུ་མའི་ལམ་གྱི་ཆེད་མིན་ཡང་། རང་བཙན་འཐབ་རྩོད་བྱས་ན་དབུ་མའི་ལམ་ལ་བརྒྱ་ཆའི་བརྒྱ་ཕན་གི་རེད་མ་གཏོགས་གནོད་གི་མ་རེད། ཅེས་བརྗོད་བྱུང་།

མཇུག་ཏུ་འཇམ་དཔལ་སྨོན་ལམ་ལགས་ཀྱིས་༼ གཉིས་བྱེས་གཉིས་སུ་བོད་མིའི་གཅིག་སྒྲིལ་ལ་བལྟས་པའི་མྱོང་ཚོར ༽ ཞེས་པའི་བརྗོད་གཞིའི་ཐོག་གཏམ་བཤད་གནང་དོན། དབུ་མའི་ལམ་དང་རང་བཙན་གཉིས་རྩ་དོན་འཐབ་རྩོད་ཀྱི་ལངས་ཕྱོགས་ཁ་ཁ་ཡིན་ཡང་། འཐབ་རྩོད་ཀྱི་ཁ་གཏད་ས་རྒྱ་ནག་དང་། དམིགས་ཡུལ་མཐར་ཐུག་བོད་མི་ས་ཡ་དྲུག་གི་བདེ་སྐྱིད་ཆེད་རེད། རང་བཙན་རྩོད་མཁན་ཡིན་ན། རང་བཙན་གྱི་ལྟ་བ་ལངས་ཕྱོགས་དང་། དགོས་པ་དམིགས་ཡུལ་ཆ་ཚང་ལ་ངེས་པ་བརྙེས་དགོས་ལ། དེ་བཞིན། དབུ་མའི་ལམ་ལ་རྒྱབ་སྐྱོར་བྱེད་མཁན་ཡིན་ནའང་། དབུ་མའི་ལམ་གྱི་འདས་པའི་བྱུང་རིམ་དང་། མ་འོངས་པའི་དམིགས་ཡུལ་ཆ་ཚང་རྟོགས་དགོས། འདི་ལྟར་ཕྱིན་པ་ཡིན་ན། ལངས་ཕྱོགས་འདི་གཉིས་བར་འགལ་བ་གང་ཡང་ཡོང་གི་མ་རེད་ལ། རྩ་དོན་འཐབ་རྩོད་ཐོག་ནུས་པ་ཤུགས་ཆེན་འཐོན་གི་རེད། བོད་ནང་ལ་མཚོན་ན། ཆོལ་ཁ་ཆོས་ལུགས་ཀྱི་འཐེན་འཁྱེར་ཡོད་པ་མ་རེད་ལ། རང་བཙན་དབུ་མའི་ལམ་གྱི་རྩོད་གླེང་ཡང་ཡོད་པ་མ་རེད། བོད་ཡུལ་མདོ་དབུས་ཁམས་གསུམ་དམ་ཚིག་རྡོག་རྩ་གཅིག་སྒྲིལ་རེད། རྒྱག་གཅིག་མཆོང་གཅིག་གིས་རྒྱ་གཞུང་ལ་ངོ་རྒོལ་དང་། ༧གོང་ས་མཆོག་བོད་དུ་ཕེབས་རྒྱུ་དེ་རེད། ཅེས་གསུངས་སོང་།

གསར་འགོད་པ། དོན་འགྲུབ་བཀྲ་ཤིས།