བོད་ནང་གི་སློབ་མའི་ལས་འགུལ་ལ་གདུང་སེམས་མཉམ་སྐྱེད

གོང་དུ་དྲྭ་གྲོགས་མང་པོ་ཞིག་ནས་སོ་སོའི་དགོངས་ཚུལ་དོན་དང་ལྡན་པ་སྤེལ་འདུག་པ་ཤིན་ཏུ་ལེགས། བོད་ནང་གི་གཞོན་ནུ་ཚོས་རང་གི་སྲོག་རྩ་ལྟ་བུའི་སྐད་ཡིག་སྲུང་སྐྱོབ་སླད་ཞི་བའི་ལས་འགུལ་སྤེལ་བར་བསྔགས་བརྗོད་དང་གདུང་སེམས་མཉམ་སྐྱེད་ཞུ་གི་ཡོད་ལ་རྒྱ་ཁྱབ་རང་བཞིན་གྱི་ལས་འགུལ་མུ་མཐུད་སྤེལ་གལ་སྙམ། དེ་བཞིན་གཞོན་ནུ་རྣམས་ནས་ཤིན་ཏུ་ནས་གཟབ་ནན་གནང་དགོས་པ་ཞིག་ནི་རྒྱ་དམར་གཞུང་ནས་གཞོན་ནུའི་ཞི་བའི་ལས་འགུལ་འདིའི་ངོ་བོ་སྒྱུར་ཐབས་མི་བྱེད་པའི་ངེས་པ་མེད། དེ་ཡང་སློབ་ཕྲུག་བསམ་མེད་འགའ་ལ་ངན་བསྐུལ་གྱིས་ཟིང་ཆ་འཕར་མ་བཟོ་སྲིད། གོང་གི་འདྲ་པར་ནང་སློབ་ཕྲུག་བརྒྱ་ཕྲག་མང་པོ་ཞི་ཉམས་དོད་པོ་ཡོད་ཀྱང་མདུན་ཕྱོགས་གཡན་ཟུར་གྱི་སློབ་ཕྲུག་གཅིག་ཁོ་ནས་མཛོག་མགོ་གནམ་ལ་བསྟན་པ་དང་བཞིན་གྱི་ཁྲོ་གཉེར་བསྡུ་སྟངས་ལ་དོགས་པ་ཞིག་ཡོང་གི་འདུག ༢༠༠༨ ས་བྱི་ཞི་རྒོལ་ཆེན་མོའི་སྐབས་རྒྱ་གཞུང་གིས་གང་བྱས་ཚང་མས་མཁྱེན་གསལ་ལ་དེ་དོན་བོད་ནང་གི་སློབ་ཕྲུག་གཙོ་བོར་གྱུར་བའི་གཞིས་བྱེས་བོད་རིགས་རྣམས་ནས་ཕན་གནོད་ལ་དགོངས་པ་གཟབ་བཞེས་ཀྱིས་འགུལ་རྒྱ་ཆེ་སྤེལ་གནང་ཞུ།

ཕན་ཐོག་འདྲ་འདུག་བསམ་ན་དྲ་ངོས་ཀྱི་བསམ་ཚུལ་འགོད་ས་དེར་འཇོག་རོགས།

༼ལས་འགུལ་སྐབས་སུ་དོ་སྣང་འདི་འདྲ་བྱེད་དགོས།

ད་ནི་གནད་འགག་གི་དུས་སྐབས་ཤིག་རེད་འདུག དེ་ནི་ང་ཚོ་བོད་ཕྱི་ནང་གཉིས་ནས་གང་གཟབ་གཟབ་དང་གང་ནུས་ནུས་བྱེད་དགོས་པ་ཞིག་ཅིས་ཀྱང་ཆགས་འདུག ང་ཚོས་སྔོན་ནས་ད་བར་དུ་བོད་མང་གི་ལས་འགུལ་ཅི་སྤེལ་ལ་སྡོམ་ཚིག་རྒྱག་དུས། ལས་འགུལ་དེའི་ཐོག་མའི་འབྱུང་ཁུངས་དང་འབྱུང་རྐྱེན་གང་ཡིན།
ས་གནས་གང་དུ་འགོ་བཙུགས་པ་དེས་ཤུགས་རྐྱེན་ཐེབས་ཚུལ། དེ་ནས་ས་གནས་གང་དག་ཏུ་ཁྱབ་ཚུལ། ལས་འགུལ་ནང་དུ་ཞུགས་པའི་མི་གྲངས། འབོད་ཚིག་ཅི་ཡོད་དང་ཅི་བྱས། དུས་ཚོད་ནམ་དང་དུས་ཡུན་རིང་ཐུང་། ལས་འགུལ་ནང་དུ་ཞུགས་པའི་མི་སྣའི་གོ་ཐོབ། དཔེར་ན་དགེ་རྒན་དང་སློབ་མ། ཤེས་ལྡན་མི་སྣ་དང་རྩོམ་པ་པོ། ཡང་ན་ཞིང་པ་དང་འབྲོག་པ་དམངས་ཚོགས་སོགས་ཅི་དང་གང་ཡིན་ཁ་གསལ་གྱི་གྲངས་ཐོ་དང་། ལས་འགུལ་གྱི་སྒུལ་ཤུགས། གཞི་ཁྱོན་ཆེ་ཆུང་། མི་དམངས་ཀྱི་ཆ་ཤོས་ལེན་ཚད། དམངས་ཚོགས་ཀྱི་དགོས་འདུན་དང་ནུས་སྟོབས་ཅི་འདྲ་ཡིན་སྐོར་སོགས་ཅིས་ཀྱང་ཤེས་དགོས་ཀྱི་འདུག་སྙམ།

བོད་ནང་དུ་འདི་དང་འདི་ལྟ་བུའི་ལས་འགུལ་ཞིག་གི་མགོ་བརྩམས་མ་ཐག་ནས། བོད་ཕྱི་ན་ཡོད་པའི་གསར་འགྱུར་དང་རླུང་འཕྲིན། བརྙན་འཕྲིན་ཁང་སོགས་ནས་ཞིབ་ཚགས་ཀྱིས་གནས་ཚུལ་ཁ་གསལ་རྒྱུས་ལོན་བྱེད་པར་མི་བརྩོན་པར། གཅིག་གིས་སྤེལ་བའི་གནས་ཚུལ་དེར་བསྐྱར་བཅོས་ཡང་བཅོས་ཀྱིས་བརྒྱུད་སྒྲོག་བྱེད་ཀྱི་འདུག

དེ་ཡང་བརྒྱུད་སྒྲོག་བྱེད་པ་དེ་མི་འོས་པ་དང་མི་འཚམ་པ་རེད་ཅེས་བཤད་ཀི་མེད་མོད། སྐབས་འདི་ལྟ་བུ་ལ་ང་ཚོས་ཅིས་ཀྱང་རང་ངོས་ནས་འགན་ཆེན་པོ་ཞིག

སློབ་མའི་ལས་འགུལ་དེ་ཆབ་སྲིད་ལ་མ་བསྒྱུར་རོགས།

ཐེངས་འདིའི་སློབ་མའི་ལས་འགུལ་གྱི་སྔ་གཞུག་ཏུ་ང་ཚོས་ཤེས་དགོས་པའི་གནད་དོན་འགའ་འདུག་ལ། ལྷག་པར་དུ་བཙན་བྱོལ་བོད་གཞུང་གི་འཛིན་སྐྱོང་སྡེ་ཚན་དང་གཞུང་འབྲེལ་མིན་པའི་ཚོགས་སྡེ་ཁག་གིས་མཉམ་འཇོག་དགོས་པའི་གནད་དོན་འགའ་འདུག
མདོ་སྨད་རེབ་གོང་དང་རྨ་ལྷོ་ཁུལ། ཆབ་ཆ་ཁུལ། ཁྲི་ཀ་རྫོང་། རྩི་གོར་ཐང་། མགོ་ལོག་ཁུལ་བཅས་ཀྱི་སློབ་གྲྭ་ཆེ་འབྲིང་ཆུང་གསུམ་གྱི་སློབ་མ་རྣམས་ཀྱིས་ཅིའི་ཕྱིར་སྐད་བརྒྱབ་པ་རེད། ཁོང་ཚོའི་ངོ་རྒོལ་སྐབས་ཀྱི་འབོད་ཚིག་གཙོ་བོ་གང་དང་གང་རེད། ནམ་རྒྱུན་བོད་ས་སྟོད་སྨད་བར་གསུམ་གང་ནས་ཞི་བའི་ངོ་རྒོལ་བྱུང་སྐབས་དེའི་ནང་ན་༸གོང་ས་མཆོག་དང་བོད་ཀྱི་ཆབ་སྲིད་གནས་བབ་ཐད་ཀྱི་ཚིག་ཅིག་མེད་ས་ཞིག་མེད་མོད། ཐེངས་འདིར་དེ་དག་མེད་པའི་རྒྱུ་མཚན་ཅི།
དེ་ལྟར་ང་ཚོས་མདོ་སྨད་ཕྱོགས་ཀྱི་སློབ་གྲྭ་ཆེ་འབྲིང་ཆུང་གསུམ་གྱི་སློབ་མའི་ལས་འགུལ་འདི་ལ་ལྟ་ཤེས་པ་དང་ཉན་ཤེས་པ། གོ་རིམ་རྟོགས་པ་དང་ཡིད་གཟབ་བྱེད་དགོས་ས་མང་བོ་འདུག ཇི་ལྟར་བཤད་རུང་ལས་འགུལ་འདི་ཆབ་སྲིད་ཀྱི་ལས་འགུལ་མིན་ལ། ཆབ་སྲིད་དང་མཉམ་བསྲེས་ཀྱང་བྱས་མི་འདུག ཐ་ན་ཆབ་སྲིད་ཀྱི་དྲི་ཙམ་ཡང་མི་བྲོ་བའི་ལས་འགུལ་ཞིག་ཡིན་སྟབས། ཕྱི་ཕྱོགས་ནས་ཆབ་སྲིད་ཀྱི་ངོ་བོར་བསྒྱུར་མི་རུང་ལ། ལྷག་པར་དུ་རྒྱབ་སྐྱོར་གྱི་རྣམ་པ་སྟོན་སྐབས་རྒྱབ་སྐྱོར་བྱེད་སྟངས་མ་ཤེས་པའི་དབང་གིས་སྐད་ཡིག་རང་སྟེང་གི་བདག་དབང་རྩོད་པའི་ལས་འགུལ་འདི་ཆབ་སྲིད་ཀྱི་ངོ་བོར་མཉམ་བསྲེ་བྱ་མི་རུང་བར་འདོད།
དཔེར་ན། དེ་རིང་བོད་ཀྱི་དགུ་བཅུ་གསུམ་ལས་འགུལ་ཚོགས་པས་གདུང་སེམས་མཉམ་སྐྱེད་ཀྱི་ལས་འགུལ་སྤེལ་བ་ལྟ་བུ་རེད། སྟབས་ལེགས་པ་ཞིག་ལ་བོད་ཀྱི་དགུ་བཅུ་གསུམ་གྱི་དགེ་སློབ་ཡོངས་ཞེས་པ་བེད་སྤྱོད་བཏང་བ་ལས། དགུ་བཅུ་གསུམ་ལས་འགུལ་ཚོགས་པའི་མིང་ཐོག་ནས་ལས་འགུལ་སྤེལ་མེད། གལ་སྲིད་དེ་ལྟར་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་མིང་ཐོག་ནས་ལས་འགུལ་སྤེལ་ཡོད་ཚེ། དགུ་བཅུ་གསུམ་གྱིས་གདུང་སེམས་མཉམ་སྐྱེད་བྱས་པ་མ་འགྲིག་པ་མིན་ལ། ཁོང་ཚོ་ལྷག་བསམ་རྣམ་དག་མིན་པས་ཀྱང་མིན་མོད། དེས་ཕན་ཐོགས་རྒྱུའི་ཚབ་ཏུ་གནོད་སྐྱེད་སྲིད།
ཇི་ལྟར་བཤད་རུང་རྒྱ་ནག་གི་མིག་ནང་ནས་བོད་ཀྱི་དགུ་བཅུ་གསུམ་ལས་འགུལ་ཚོགས་པ་ནི་ཁོང་ཚོའི་དགྲ་ལག་ནས་མ་ཆུན་མ་ཐུབ་པར། ཕྱི་ལ་བྲོས་བྱོལ་བྱས་པའི་ཆབ་སྲིད་ཀྱི་ཉེས་ཅན་པ་ཁྱུ་ཞིག་གིས་གྲུབ་པའི་ཚོགས་པ་ཞིག་རེད་ལ། ཚོགས་པའི་མཐར་ཐུག་གི་དམིགས་འདུན་ཆབ་སྲིད་བཙོན་ཟུར་རྣམས་ལ་ལྟ་སྐྱོང་དང་ཆབ་སྲིད་དང་འབྲེལ་བའི་ལས་འགུལ་སྤེལ་རྒྱུ། བོད་ཀྱི་འདས་མ་ད་གསུམ་གྱི་ཆབ་སྲིད་གནས་བབ་ལ་ལྟ་རྟོག་དང་དེ་བསྟུན་གྱིས་འགུལ་སྐྱོད་བྱ་རྒྱུ་བཅས་རེད། འདི་ལྟ་བུའི་ཚོགས་པ་ཞིག་གིས་ཐེངས་འདིའི་སློབ་མའི་ལས་འགུལ་ལ་ལག་བསྲིང་ཚེ། རྒྱ་ནག་ལ་མཚོན་ན་དེ་ནི་ཕྱི་ཕྱོགས་ཀྱི་ཆབ་སྲིད་ཚོགས་སྡེ་གང་རུང་ཞིག་གམ། ནམ་རྒྱུན་ལྟར་ལས་འགུལ་འདིའི་རྒྱབ་ན་ཏཱ་ལའི་རུ་ཚོགས་ཡོད་པ་སོགས་ཀྱིས་ཉེས་མེད་ཉེས་འགེལ་བྱེད་སྤྱེད་དུ་འགྱུར་སྲིད་པས། དགུ་བཅུ་གསུམ་དང་གཞོན་ནུ་དང་བུད་མེད། དེ་མིན་གྱི་ཆབ་སྲིད་ཚོགས་སྡེ་སུ་ཡིན་རུང་ཐད་ཀར་དུ་ལག་མ་བསྲིང་ན་བཟང་སྙམ། དེ་གཅིག་རེད།
གཉིས་པ། དེ་རིང་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་སྤེལ་བའི་གསལ་བསྒྲགས་ནང་༸གོང་ས་མཆོག་གི་མཚན་དྲངས་ཏེ་དེ་འབྲེལ་གྱི་གནད་དོན་ཞིག་འགྲེལ་ཡོད། བོད་ནང་གི་སློབ་མའི་ལས་འགུལ་འདིའི་སྔ་ཕྱི་བར་གསུམ་དུ་༸གོང་ས་མཆོག་གི་མཚན་བགྲང་མེད་པ་ཤེས་བཞིན་དུ། ཡར་ལངས་འདི་ཆབ་སྲིད་ཀྱི་ལས་འགུལ་མིན་པར་མི་རིགས་ཀྱི་སྐད་ཡིག་གི་བདག་དབང་ཡིན་པ་ཤེས་བཞིན་དུ། བོད་ཀྱི་དགུ་བཅུ་གསུམ་ལས་འགུལ་ཚོགས་པས་༸གོང་ས་མཆོག་གི་མཚན་དེའི་ནང་དུ་བསྲེས་ཡོད་ལ། དེས་རྒྱ་གཞུང་ལ་གནས་ཚུལ་དངོས་སྤས་ནས་རྫུན་མ་སྒྲོག་བྱེད་ཀྱི་སྨྲ་ལྕེ་འཐོལ་བ་ཞིག་སྦྱིན་ཡོད།
གསུམ། ལས་འགུལ་འདིར་བལྟས་ཚོད་ཀྱིས་འདི་ལོའི་ནོ་སྦེལ་ཞི་བདེའི་གཟེངས་རྟགས་རྒྱ་ནག་གི་མང་གཙོ་དོན་གཉེར་བ། སྐུ་ཞབས་ལིག་ཞོ་པོ་ལ་འཐོབ་པའི་གསལ་བསྒྲགས་སྤེལ་ཏེ། འཛམ་གླིང་གི་རྒྱབ་ཁབ་ཁག་དང་གསར་འགྱུར་སྡེ་ཚན་ཁག མང་གཙོ་དོན་གཉེར་བ་རྣམས་དང་འགྲོ་བ་མིའི་ཐོབ་ཐང་ཚོགས་པ་ཁག མདོར་ན་རྒྱ་ནག་གཞུང་མང་བཅས་དོ་སྣང་ཅན་གྱི་སྐྱེ་བོ་ཡོངས་ཀྱིས་ཁ་མིག་སྐུ་ཞབས་ལིག་ཞོ་པོ་ལ་ཕྱོགས་ཡོད་པའི་བར་གླགས་འདིར། གློ་རྡེག་ཏུ་བྱུང་བའི་ལས་འགུལ་ཞིག་དང་སྔ་ཕྱིར་གོ་རིམ་མེད་པ་ཞིག་ཏུ་སྣང་མོད། དེ་ལྟར་མིན་པར་ལས་འགུལ་འདིའི་སྔ་ཕྱིའི་གོ་རིམ་ཞིབ་ཚགས་པ་དང་འཆར་གཞི་བཏིང་བ་གཏིང་ཟབ་ལ། ལྷག་པར་དུ་བོད་ཕྱི་ཕྱོགས་ཀྱི་ཤུགས་རྐྱེན་ཏིལ་འབྲུ་ཙམ་ཡང་འདིའི་ནང་དུ་འདྲེས་མེད་སྟབས། ལས་འགུལ་སྤེལ་མཁན་ལ་སྔ་ཕྱིའི་གོ་རིམ་ཡོད་པ་དང་རང་གི་འགུལ་སྐྱོད་ལ་སྔ་ཕྱིའི་གྲ་སྒྲིག་ཡོད་པ་བཞིན། ཕྱི་ཕྱོགས་ནས་རྒྱབ་སྐྱོར་བྱེད་སྐབས་ནམ་རྒྱུན་ལྟར་ཧོལ་རྒྱུགས་མི་གནང་བར། བབ་བསྟུན་དང་གནས་ཚུལ་དངོས་ཀྱི་ངོ་གདོང་ལ་བལྟས་ཏེ་ཡིད་གཟབ་བྱ་དགོས་པར་འདོད།
བཞི། འདས་མ་ཐག་པའི་ཉིན་གསུམ་གྱི་གནས་བབ་འདིར་བལྟས་ན། ད་ལྟའི་ཆར་ད་དུང་རྒྱ་ནག་གིས་ལས་འགུལ་འདི་སྐད་ཡིག་རང་སྟེང་གི་ལས་འགུལ་ཞིག་ཏུ་བཞག་པ་ལས་ཆབ་སྲིད་ཀྱི་ལས་འགུལ་དུ་བསྒྱུར་མི་འདུག དཔེར་ན། སློབ་མ་རྣམས་ལ་འཇིགས་སྐུལ་དང་ཉེས་རྡུང་བཙོན་འཇུག་སོགས་བྱས་མེད། དེ་ལྟར་ཕྱོགས་གང་ནས་བསམ་ཡང་ང་ཚོས་གནས་ཚུལ་འདིའི་ཕྱོགས་ཡོངས་དང་གནས་ཚུལ་དངོས་ཀྱི་ངོ་གདོང་ལ་མཉམ་འཇོག་དགོས་ཀྱི་འདུག
དེས་ན་བོད་ཕྱི་ཕྱོགས་ནས་ཐེངས་འདིའི་ལས་འགུལ་ལ་ཇི་ལྟར་རྒྱབ་སྐྱོར་དང་མཐུན་འགྱུར་གནང་ངམ་ཞེ་ན། དེ་རིང་བོད་ཀྱི་དགུ་བཅུ་གསུམ་གྱི་དགེ་སློབ་ཡོངས་དང་བོད་ཀྱི་སྐད་ཡིག་རྒྱུན་འཛིན་ཚོགས་པས་མགོ་བརྩམས་པའི་ལས་འགུལ་ཏེ། བཙན་བྱོལ་གྱི་སློབ་གྲྭ་ཁག་གི་སློབ་མ་རྣམས་ལ་མཚན་རྟགས་བསྡུ་རུབ་དང་སློབ་མ་རང་གི་ངོས་ཐད་ནས་གདུང་སེམས་མཉམ་སྐྱེད་ཀྱི་ལས་འགུལ་སྣ་མང་གོ་སྒྲིག་བྱ་རྒྱུ་བཅས་ཡིན། དཔེར་ན། ཐེངས་འདིའི་ལས་འགུལ་འདིའི་མགོ་ཆབ་སྲིད་ཚོགས་པ་ཁག་གིས་མི་ཁྲིད་པར་བོད་ཀྱི་སྐད་ཡིག་རྒྱུན་འཛིན་ཚོགས་པ་ཁག་དང་མཐོ་སློབ་ཁག་གིས་ཁྲིད་དེ། བཙན་བྱོལ་གྱི་སློབ་གྲྭ་ཡོངས་ཀྱིས་གདུང་སེམས་མཉམ་སྐྱེད་ཀྱི་ངོ་རྒོལ་སྐད་འབོད་བྱེད་པ་ལྟ་བུའོ། །
ཡིན་ནའང་། སྐབས་འདིར་འགྲེལ་འདོད་པ་ཞིག་ནི། ནམ་རྒྱུན་ལྟར་ཆབ་སྲིད་ཚོགས་སྡེ་ཁག་དང་ཆབ་སྲིད་མི་སྣ་རྣམས་ཀྱིས་ཐེངས་འདིའི་ལས་འགུལ་འདིར་རྒྱབ་སྐྱོར་ཇི་ལྟར་བྱའམ་ཟེར་ན། བོད་ནས་འདི་གར་འབྱོར་བཞིན་པའི་ཉིན་རེའི་གནས་ཚུལ་རྣམས་དུས་ལྟར་རྒྱ་དབྱིན་གཙོས་མི་རིགས་གཞན་གྱི་སྐད་ཡིག་སྟེང་ཕབ་བསྒྱུར་བྱས་ཏེ། འཛམ་གླིང་གི་གསར་འགྱུར་སྡེ་ཁག་ཆེ་ཁག་དང་མཉམ་འབྲེལ་རྒྱལ་ཚོགས། བྱིས་པའི་ཐེབས་རྩ་ཚོགས་པ་ཁག སློབ་གསོའི་སྡེ་ཚན་ཁག གཞུང་འཛིན་མི་སྣ་ཁག་བཅས་ལ་ཐད་གཏོང་དང་འཛམ་གླིང་གི་མི་མང་ཡོངས་ལ་གནས་ཚུལ་དུས་ལྟར་མཁོ་སྤྲོད་བྱ་རྒྱུ། དེ་བཞིན་བོད་ཕྱིའི་སློབ་མའི་གདུང་སེམས་མཉམ་སྐྱེད་ཀྱི་ལས་འགུལ་ལ་དངུལ་དངོས་དང་བསམ་བློས་རོགས་རམ་བྱ་རྒྱུ་བཅས་སོ། །
མཇུག་མཐར། གསར་འགྱུར་སྡེ་ཁག་གིས་མཉམ་འཇོག་སའང་གོང་མཚུངས་ལྟར་གསར་འགྱུར་འབྲི་སྤེལ་དང་སྒྲོག་སྦྱོང་། བརྙན་ཕབ་སྐབས་བོད་སྐད་ཡིག་གི་བདག་དབང་རྩོད་པའི་ལས་འགུལ་འདིའི་ནང་དུ་ཆབ་སྲིད་ཀྱི་སྐད་ཆ་ཚིག་གཅིག་ཀྱང་མ་བསྲེས་པར། སློབ་མའི་ལས་འགུལ་རང་དང་བོད་སྐད་ཡིག་གི་བདག་དབང་རྩོད་པའི་ལས་འགུལ་རང་། ད་ལྟ་སྤེལ་གྱིན་ཡོད་པའི་གནས་ཚུལ་དངོས་ཀྱི་ངོ་གདོང་རང་ནས་མང་ཚོགས་ལ་གནས་ཚུལ་མཁོ་སྤྲོད་གནང་རྒྱུ་དེའོ། །

དངོས་གནས་ཡག་པོ་རེད། སྙིང་སྟོབས་ལྡན་པའི་བོད་ནང་གི་སློབ་མ་ཚོར་ང་ཚོའི་ངོས་ནས་གདུངས་སེམས་མཉམ་བསྐྱེད་ཀྱི་ལས་འགུལ་གང་མང་སྤེལ་ཐུབ་པའི་རེ་བ་ཡོད།

ལས་འགུལ་འདི་ཧ་ཅང་གི་ཡག་པོ་རེད། བོད་ནང་གི་རྒྱབ་དཔུང་དུ་ལངས་ནས་སྐད་གསེང་མཐོན་པོས་གཞོགས་འདེགས་གནང་རྒྱུ་ནི་བཙན་བྱོལ་བའི་ལས་འགན་རེད་ལ། སེམས་ཤུགས་རྒྱུན་གནས་ཐུབ་པའི་འབྱུང་ཁུངས་ཀྱང་ཡིན་ལ། སྒོས་སུ་བོད་ནང་གི་ལས་འགུལ་མ་འདྲ་བའི་ངོ་བོ་གཞིར་བཞག་ནས་རྒྱབ་བསྐྱོར་གནང་གལ་ཆེ་བ་བཞིན་ད་རེས་དགུ་བཅུ་གསུམ་ཚོགས་པའི་འགན་འཛིན་ལྷན་རྒྱས་ནས་དེ་ལུགས་གཞིར་བཞག་ཡོད་པས། ཤེས་ནས་རྒྱབ་བསྐྱོར་བྱེད་པ་དང་མ་ཤེས་གང་བྱུང་རྒྱུགས་པ་གཉིས་ལ་ངོ་བོའི་ཆ་ནས་དབྱེ་བ་ཡོད་པའང་འདི་ལས་ངོ་འཕྲོད་ཡོད་ཅིང་། དགུ་བཅུ་གསུམ་ཚོགས་པས་རྒྱུན་ལས་གསར་འདེམས་གནང་བ་ནོར་མི་འདུག་པར་མ་ཟད། དངོས་གནས་སྲིད་དོན་བཙོན་ཟུར་དག་གི་འགན་འཁྲིའི་སྒང་ལ་གོམ་པ་སྤོས་འདུག་པས། དམིགས་བསལ་གྱིས་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་གི་ཡིན།

རླབས་ཆེ་བའི་སྐད་འབོད་ཀྱིས། ང་ཚོ་ཡང་དང་བསྐྱར་དུ་གཉིད་ལས་དཀྲོགས། སླར་ཡང་གཉིད་དུ་ཡུར། འདི་ནི་བཙན་བྱོལ་དུ་འདུག་ཡུན་རིང་དྲགས་སོང་སྟབས་ཡིན་ས་རེད། གང་ལྟར། ད་རེབས་དགུ་བཅུ་གསུམ་དང་སྐད་ཡིག་རྒྱུན་འཛིན་ཚོགས་པ་གཉིས་ཀྱིས་མེ་བོད་ནང་དུ་མཆེད་པ་དང་། དུ་བ་ཕྱི་ནས་མངོན་དུ་བཅུགས་པ་དེ་ལ་དགའ་བསུ་ཡོད།

ལས་འགུལ་འདིར་དགའ་བསུ་ཡོད།་་ བཙན་བྱོལ་སློབ་གྲྭ་ཁག་ནས་འདིར་རྣམ་འགྱུར་ཞིག་སྟོན་དགོས་འདུག

གོང་གསལ་ཚོགས་པ་གཉིས་ཀྱིས་མཉམ་འབྲེལ་ཐོག་ལས་འགུལ་དང་དེ་འབྲེལ་རྒྱ་ནག་ལ་སྤྲད་པའི་དོན་ཚན་ཁག་གསུམ། མཚན་རྟགས་བསྡུ་རུབ་ཀྱི་བྱ་འགུལ་དེར་རྗེས་སུ་ཡི་རངས་དང་རྒྱབ་སྐྱོར་ཡོད། གཏན་སློབ་ཁག་ཏུ་ལས་འགུལ་དེ་ཏག་ཏག་འགྲོ་ཨེ་ཐུབ། དགུ་བཅུ་གསུམ་གྱི་དབུ་རྒྱུན་གསར་པའི་ལས་འགུལ་ཐོག་མའི་གྲས་སུ་བོད་ནང་གི་གཞིས་ལུས་སློབ་ཕྲུག་ཚོར་རྒྱབ་སྐྱོར་གྱི་རླབས་ཆེན་ཕྱག་ལས་འདིར་དམིགས་བསལ་གྱི་བཀྲ་ཤིས་བདེ་ལེགས་དང་ཡོང་རྒྱུའི་ལས་འགུལ་དེའི་རིགས་རྣམས་ལམ་འགྲོ་ཡོང་བའི་སྨོན་ལམ་ཡོད། ཁ་བ་ཅན་པའི་སློབ་མ་རྒྱལ་བར་ཤོག་་་་་བོད་སློབ་རྒྱལ་ལོ།