རྒྱབ་སྐྱོར་གྱི་འབོད་སྐུལ།

དེ་རིང་ཕྱི་དྲོར་གངས་སྐྱིད་བོད་ཀྱི་དཔེ་མཛོད་ཁང་དུ་དབུ་མའི་ལམ་མི་མང་ལས་འགུལ་ཁང་གིས། ཉིན་འདི་འགའི་བོད་ནང་གི་སློབ་མ་ཚོའི་སྐད་འབོད་ཀྱི་ལས་འགུལ་ལ་རྒྱབ་སྐྱོར་དང་གདུང་སེམས་མཉམ་སྐྱེད་མཚོན་ཕྱིར་གསར་འགོད་གསལ་བསྒྲགས་ཤིག་སྤེལ་སོང་།

སྐབས་དེར་དབུ་མའི་ལམ་མི་མང་ལས་འགུལ་ཁང་གི་རྒྱུན་ལས་མགོ་ལོག་དམ་ཆོས་དཔལ་བཟང་ལགས་ཀྱིས་བརྗོད་དོན། རྒྱ་ནག་གཞུང་གིས་བོད་ཀྱི་སྐད་ཡིག་རྩ་མེད་གཏོང་བའི་ཐག་གཅོད་དང་བསྒྱུར་བཅོས་གཏོང་རྒྱུའི་དམིགས་ཡུལ་གཙོ་བོ། གྲངས་ཉུང་མི་རིགས་རང་གི་ངོ་བོ་མཚོན་པའི་སྐད་ཡིག་དང་རིག་གཞུང་རྩ་མེད་དུ་གཏོང་རྒྱུ་དེ་ཡིན་པ་དང་། དེ་རྒྱ་ནག་གི་རྩ་ཁྲིམས་དང་མི་རིགས་ས་གནས་རང་སྐྱོང་གི་བཅའ་ཁྲིམས་བཅས་སུ་མི་རིགས་སོ་སོའི་སྐད་ཡིག་དང་རིག་གཞུང་བཀོལ་སྤྱོད་བྱ་རྒྱུའི་རང་དབང་ཡོད་ཅེས་པ་དང་ཡོངས་སུ་འགལ་བ་ཞིག་ཡིན་སྟབས། ང་ཚོ་བཙན་བྱོལ་བོད་མི་ཡོངས་དང་ལྷག་པར་དུ་དྲང་བདེན་ལ་དགའ་བའི་རྒྱ་ཆེའི་མི་མང་གིས། རྒྱ་ནག་གཞུང་གིས་མི་རིགས་རིག་གཞུང་དང་བཅས་པ་ཤུལ་མེད་བཟོ་རྒྱུའི་སྐད་ཡིག་བཅོས་བསྒྱུར་གྱི་བྱ་སྤྱོད་ལ་མཐའ་གཅིག་ཏུ་ངོ་རྒོལ་བྱ་རྒྱུ་མ་ཟད།  ད་ལྟ་བོད་ནང་གི་སློབ་ཕྲུག་རྣམས་ཀྱིས་རང་གི་སྐད་ཡིག་ལ་རང་དབང་དགོས་པའི་རེ་འབོད་ཁྲོམ་སྐོར་གྱི་ལས་འགུལ་སྤེལ་བཞིན་པར་གདུང་སེམས་མཉམ་སྐྱེད་བྱ་དགོས་པའི་རེ་བ་དང་འབོད་སྐུལ་ཞུ་རྒྱུ་ཡིན།  ཞེས་བརྗོད་བྱུང་།

ཁོང་ཅག་གིས་བཙན་བྱོལ་བོད་མིའི་སྤྱི་ཚོགས་ལ་ཁ་བཏད་དེ་བརྗོད་དོན འདས་པའི་མི་ལོ་ ༥༡ ལྷག་གི་རིང་བོད་ཀྱི་རྩ་དོན་མ་ཤི་བར་སྲ་བརྟན་ཡུན་གནས་ཐུབ་པ་དེ་གཞིས་ལུས་མི་མང་གི་སྙིང་སྟོབས་དང་ལྷག་བསམ་ལ་བརྟེན་ནས་བྱུང་བ་དང་། ལྷག་པར་དུ་རྒྱ་གཞུང་གིས་སྡུག་སྦྱོང་མནར་གཅོད་གང་འདྲ་བཏང་ཡང་། ད་ལྟའི་རྒྱ་ནག་གཞུང་གི་འཛིན་སྐྱོང་འོག་འཚར་ལོངས་འབྱུང་བཞིན་པའི་མི་རབས་གསར་བ་ཚོས་ཀྱང་། མི་རིགས་ཀྱི་ལ་རྒྱ་དང་སྐད་ཡིག་སྲུང་སྐྱོབ་ཆེད་སྒེར་ལངས་བྱེད་ཀྱིན་ཡོད་པའི་སྙིང་སྟོབས་དང་ལྷག་བསམ་དེར་ང་ཚོ་བཙན་བྱོལ་ནང་ཡོད་པའི་བོད་མི་ཚོས་གུས་བརྩི་དང་གདུང་སེམས་མཉམ་སྐྱེད་བྱ་དགོས་པའི་རེ་བ་དང་འབོད་སྐུལ་ཞུ་བཞིན་ཡོད། ཅེས་རྒྱལ་སྤྱིའི་ཚོགས་སྡེ་ཁག་དང་། ཡང་སྒོས་བཙན་བྱོལ་གཞུང་དམངས་ལ། བོད་ནང་གི་སློབ་ཕྲུག་ཚོར་རྒྱབ་ལངས་དགོས་པའི་འབོད་སྐུལ་ཞུས་སོང་།

གསར་འགོད་པ། དོན་གོ