ཟས་རིན་འཕར་བར་ངོ་རྒོལ།

ཕྱི་ཚེས་ ༡༤ ཉིན་སི་ཁྲོན་ཞིས་ཡོན་རྫོང་སློབ་འབྲིང་དང་པོའི་སློབ་ཕྲུག་ ༢༠༠༠ ཙམ་གྱིས་རྒྱ་གཞུང་གིས་ཟ་མའི་རིན་གོང་སྤར་བར་ངོ་རྒོལ་བྱས་ཡོད་འདུག དེ་ནི་ཉིན་དེར་སློབ་ཐུན་གྲོལ་ཏེ། སློབ་གྲྭའི་སྤྱི་ཐབ་ནང་ཟ་མ་བཟའ་རུ་འགྲོ་སྐབས། ཟས་སྣོད་སྡེར་མ་དང་ཕོར་བ་སོགས་ཇེ་ཆུང་དུ་བཏང་སྟེ་ཟ་མ་ཉུང་འཕྲི་བྱས་ཡོད་པར་མ་ཟད། ཟ་མའི་རིན་གོང་སྔར་ལས་ཇེ་མཐོར་བཏང་ཡོད་སྟབས། སློབ་མ་རྣམས་ཀྱིས་མཉམ་རུབ་ཐོག་ངོ་རྒོལ་བྱས་ཏེ་སློབ་གྲྭའི་ཐབ་ཚང་གཏོར་བཅོམ་བྱས་ཡོད་འདུག

གནད་དོན་དེ་སྤྱི་ཚོགས་ཁྲོད་ཁྱབ་བརྡལ་དུ་འགྲོ་རྒྱུར་དོགས་ཏེ། སློབ་གྲྭར་རྙོག་ཟིང་བྱུང་མ་ཐག་ཉེན་རྟོག་པ་མང་པོས་སློབ་གྲྭའི་མཐའ་སྐོར་ཏེ། ཕྱི་མི་ནང་ལ་ཡོང་མ་བཅུག་པ་དང་། ནང་མི་ཕྱི་རུ་སྐྱོད་མ་བཅུག་པར་བཀག་སྡོམ་ནན་མོ་བྱས་ཡོད་པ་མ་ཟད། སློབ་གྲྭའི་གནས་ཚུལ་འགོད་སའི་དྲ་ཚིགས་ཀྱང་སྒོ་བརྒྱབ་ཡོད་འདུག

འདི་ནི་རྒྱ་ནག་ནང་ཟས་རིན་འཕར་ཏེ་སློབ་གྲྭ་ཁག་གི་སློབ་ཕྲུག་ཚོས་ངོ་རྒོལ་བྱེད་ཐེངས་གཉིས་པ་དེ་ཆགས་ཡོད་འདུག་ལ། འདི་ལོའི་ཕྱི་ཟླ་ ༡༡ པའི་ཚེས་ ༢༢ ཉིན་ཀོས་ཀྲུག་ལིག་ཕན་གྲོང་ཁྱེར་སློབ་འབྲིང་གཉིས་པར་ཡང་གཅིག་མཚུངས་ཀྱིས་སློབ་མ་ཚོས་གཞུང་ལ་ངོ་རྒོལ་བྱས་ཡོད་འདུག

གོང་གི་གནད་དོན་དེའི་ཐད་རང་དབང་དཔྱད་བརྗོད་པ་ལིས་ཡོན་ཧྲིན་གྱིས། དམངས་གཙོའི་སྒྲིག་སྲོལ་དང་ཁྲིམས་ལུགས་འདྲ་མཉམ་མེད་པའི་རྒྱ་ནག་གི་སྤྱི་ཚོགས་ཁྲོད། མི་མང་ཚོར་རྒྱུ་མཚན་དང་གནས་ལུགས་བགྲང་སྟེ། དཀའ་ངལ་རྣམས་སེལ་རྒྱུའི་ལམ་ཁ་ཡོད་པ་མ་རེད། དེར་བརྟེན། སློབ་མ་ཚོས་རྒྱུན་ལྡན་མ་ཡིན་པའི་ཐབས་ལམ་སྤྱད་དེ་རང་ཉིད་ཀྱི་དཀའ་ངལ་དང་། འདོད་བློ་མ་ཁེངས་པའི་གནས་ཚུལ་ཐ་དག་གསལ་འདོན་བྱེད་ཀྱི་ཡོད་པ་རེད་ཟེར།

སིན་ཁྲོན་ཞིས་ཡོན་རྫོང་སློབ་འབྲིང་དང་པོ་དེ་ནི། སི་ཁྲོན་ཞིང་ཆེན་ཁོངས་གཏོགས་ཀྱི་རྒྱ་རིགས་སློབ་འབྲིང་ཞིག་ཡིན་ལ།  སློབ་གྲྭ་འདི་ཕྱི་ལོ་ ༡༩༠༢ ཙམ་ནས་བཙུགས་པ་ཞིག་ཡིན་ཞིང་། ད་ལྟ་ཁྱོན་བསྡོམས་སློབ་མ་ ༣༨༠༠ དང་། དགེ་རྒན་ལས་ ༢༢༠ ལྷག་ཡོད་འདུག 

གསར་འགོད་པ། ཚེ་རིང་རྒྱལ།