ཟླ་འདིའི་ཕྱི་ཚེས་ ༡༢ ནས་ ༢༥ བར་༸གོང་ས་མཆོག་འབྲས་ལྗོངས་དང་། ཀ་རྡོར་སྒང་གསུམ་ཁུལ་དུ་ཆིབས་བསྒྱུར་གྱིས་དེར་ཡོད་དགོན་སྡེ་དང་སློབ་གྲྭ་ཁག མི་མང་བཅས་ལ་གསུང་ཆོས་བསྩལ་ཏེ་མཛད་འཕྲིན་རྒྱ་ཆེར་བསྐྱངས་ཡོད་ཅིང་། ཕྱི་ཚེས་ ༢༦ ཉིན་ནས་ལྡི་ལི་མཐོ་སློབ་སོགས་སུ་མཛད་འཕྲིན་བསྐྱངས་ཏེ་བོད་རིགས་མཐོ་རིམ་སློབ་མ་དང་དགེ དེ་བཞིན་རྒྱ་གར་གྱི་བོད་དོན་རྒྱབ་སྐྱོར་བ་སོགས་ལ་བཀའ་སློབ་ལམ་སྟོན་གྲུབ་རྗེས་དེ་རིང་བོད་གཞུང་གི་གནད་ཡོད་མི་སྣ་དང་གཞུང་འབྲེལ་མིན་པའི་ཚོགས་སྡེ་ཁག དེ་བཞིན་བཞུགས་སྒར་སེར་སྐྱ་མི་མང་གི་ཕེབས་བསུའི་ཁྲོད་བཞུགས་སྒར་དུ་ཞབས་སོར་བཀོད་ཡོད།
འབྱུང་འགྱུར་ཕྱི་ཟླ་ ༡༢ ཚེས་ ༣༠ ཉིན་༧གོང་ས་མཆོག་ཀེ་ར་ལ་མངའ་སྡེའི་ཝར་ཀ་ལར་ Sanyasi Sammelanam ཞེས་པའི་ཧིན་རྡུའི་ཆོས་ལུགས་དུས་སྟོན་མཛད་སྒོ་ཞིག་ཏུ་ཕེབས་རྒྱུ་འཆར་ཡོད་པ་དང་། ཁུལ་དེའི་མཛད་འཆར་ཁག་འགྲུབ་རྗེས་རྒྱ་གར་ལྷོ་ཕྱོགས་སུ་ཕེབས་སུ་ཆིབས་བསྒྱུར་བསྐྱང་རྒྱུ་ཡིན་འདུག ཕྱི་ཟླ་ ༡ ཚེས་ ༩ ཉིན་ལྡི་ལིར་འཚོགས་འཆར་ཡོད་པའི་ནང་ཆོས་གཅེས་སྐྱོང་ཁང་དབུ་བརྙེས་ཏེ་ལོ་སུམ་ཅུ་འཁོར་བའི་མཛད་སྒོར་ཕེབས་ཏེ། བདེ་སྐྱིད་ཀྱི་གནས་རིམ་འདྲ་མིན་ཞེས་པའི་བརྗོད་གཞིའི་ཐོག་བཀའ་སློབ་གནང་རྒྱུ་ཡིན་ཞིང་། ཕྱི་ཟླ་ ༡ ཚེས་ ༡༢ ཉིནས་ ༡༦ བར་ཝ་རཱ་ཎ་སིར་ཞབས་སོར་བཀོད་དེ། རྒྱལ་སྲས་ཞི་བ་ལྷས་མཛད་པའི་སྤྱོད་འཇུག་དང་། སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་སོགས་ཀྱི་བཀའ་ཆོས་གནང་རྒྱུ་རེད་འདུག
གསར་འགོད་པ། དོན་གོ
འཆི་མེད་ཚེ་དང་བསོད་ནམས་རྣམ་འབྱེད་བློ། །སྟོབས་འབྱོར་མངའ་ཐང་སྙན་པའི་གྲགས་པ་སོགས། །ལེགས་ཚོགས་ཐམས་ཅད་ཡར་ཚེས་ཟླ་བ་ལྟར། །གོང་ནས་གོང་དུ་འཕེལ་ཞིང་རྒྱས་པར་མཛོད།
འཛམ་གླིང་ཞི་བདེའི་དེད་དཔོན་ཆེན་པོ་མཆོག་སྐུ་ཚེ་བརྟན་ཤོག བོད་མིའི་དབུ་འཁྲིད་ཀྱི་སྐྱབས་གནས་དམ་པ་ཁྱེད་ཀྱིས་དོར་མི་སྲིད་པས། བཞེད་དོན་ལྷུན་གྲུབ་ཡོང་བར་ཤོག